[719] Attheso thera ekavihāro na so 2 natthīti vadāmi
apica te thera yathā ekavihāro vitthāratarena paripuṇṇo hoti taṁ
suṇāhi sādhukaṁ manasikarohi bhāsissāmīti. Evaṁ bhanteti kho .pe.
1 Ma. Yu. thera. 2 Ma. Yu. neso.

[720] Kathañca thera ekavihāro vitthāratarena paripuṇṇo
hoti idha thera yaṁ atītaṁ taṁ pahīnaṁ yaṁ anāgataṁ taṁ
paṭinissaṭṭhaṁ paccuppannesu ca attabhāvapaṭilābhesu chandarāgo
supaṭivinīto evaṁ kho thera ekavihāro vitthāratarena paripuṇṇo
hotīti.

[721] Idamavoca bhagavā idaṁ vatvāna sugato athāparaṁ
etadavoca satthā
sabbābhibhuṁ sabbaviduṁ sumedhaṁ
sabbesu dhammesu anūpalittaṁ
sabbaṁ jahaṁ taṇhakkhaye vimuttaṁ
tamahaṁ naraṁ ekavihārīti brūmīti. Dasamaṁ.

[722] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho āyasmā
mahākappino yena bhagavā tenupasaṅkami upasaṅkamitvā.

[723] Addasā kho bhagavā āyasmantaṁ mahākappinaṁ dūratova
āgacchantaṁ disvāna bhikkhū āmantesi passatha no tumhe bhikkhave
etaṁ bhikkhuṁ āgacchantaṁ odātaṁ tanukaṁ tuṅganāsikanti. Evaṁ bhante.
Eso kho bhikkhave bhikkhu mahiddhiko mahānubhāvo na ca sā samāpatti
sulabharūpā yā tena bhikkhunā asamāpannapubbā yassa catthāya
kulaputtā sammadeva agārasmā anagāriyaṁ pabbajanti tadanuttaraṁ
Brahmacariyapariyosānaṁ diṭṭheva dhamme sayaṁ abhiññā sacchikatvā
upasampajja viharatīti.

[724] Idamavoca bhagavā idaṁ vatvāna sugato athāparaṁ
etadavoca satthā
khattiyo seṭṭho janetasmiṁ ye gottapaṭisārino
vijjācaraṇasampanno so seṭṭho devamānuse
divā tapati ādicco rattimābhāti candimā
sannaddho khattiyo tapati jhāyī tapati brāhmaṇo
atha sabbamahorattaṁ 1 buddho tapati tejasāti. Ekādasamaṁ.

[725] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho dve bhikkhū sahāyakā
āyasmato mahākappinassa saddhivihārino 2 yena bhagavā tenupasaṅkamiṁsu
upasaṅkamitvā 3 .

[726] Addasā kho bhagavā te bhikkhū dūratova āgacchante
disvāna bhikkhū āmantesi passatha no tumhe bhikkhave ete dve
bhikkhū sahāyake āgacchante mahākappinassa saddhivihārinoti. Evaṁ
bhante. Ete kho bhikkhave bhikkhū mahiddhikā mahānubhāvā na
ca sā samāpatti sulabharūpā yā tehi bhikkhūhi asamāpannapubbā
yassa catthāya kulaputtā sammadeva agārasmā anagāriyaṁ pabbajanti
tadanuttaraṁ brahmacariyapariyosānaṁ diṭṭheva dhamme sayaṁ abhiññā
1 Ma. Yu. sabbamahorattiṁ. 2 Yu. saddhivihārikā. 3 Ma. Yu. ayaṁ pāṭho natthi.
Sacchikatvā upasampajja viharantīti.

[727] Idamavoca bhagavā idaṁ vatvāna sugato athāparaṁ
etadavoca satthā
sahāyā vatime bhikkhū cirarattaṁ samenikā 1
sameti nesaṁ saddhammo dhamme buddhappavedite
suvinītā kappinena dhamme ariyappavedite
dhārenti antimaṁ dehaṁ jetvā māraṁ savāhananti 2 . Dvādasamaṁ.
Bhikkhusaṁyuttaṁ navamaṁ samattaṁ.
Tassuddānaṁ
kolito upatisso ca ghaṭo cāpi pavuccati
navo sujāto bhaddī ca visākhanando tisso ca
theranāmo ca kappino sahāyena ca dvādasāti.
Nidānavaggassa saṁyuttako
tassa uddānaṁ
abhisamayadhātusaṁyuttaṁ 3 anamataggena kassapaṁ
sakkārarāhulalakkhaṇo- pammabhikkhuno nidāno 4
dutiyo tena pavuccatīti.
Nidānavaggasaṁyuttaṁ samattaṁ.
1 Ma. Yu. sametikā. 2 Ma. savāhininti. 3 Ma. Yu. nidānābhisamayadhātu.
4 Ma. Yu. sakkārarāhulalakkhaṇo opamma bhikkhunā vaggo.

Suttantapiṭake saṁyuttanikāyassa
tatiyo bhāgo
-------
khandhavāravaggo
namo tassa bhagavato arahato sammāsambuddhassa.
Khandhasaṁyuttaṁ
-------
mūlapaṇṇāsake nakulapitavaggo paṭhamo