[699] Idamavoca bhagavā idaṁ vatvāna sugato athāparaṁ
etadavoca satthā
nayidaṁ sithilamārabbha nayidaṁ appathāmasā 1
nibbānaṁ adhigantabbaṁ sabbaganthappamocanaṁ 2
ayaṁ ca daharo bhikkhu ayamuttamaporiso
dhāreti antimaṁ dehaṁ jetvā māraṁ savāhananti 3 . Catutthaṁ.

[700] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho āyasmā sujāto
yena bhagavā tenupasaṅkami upasaṅkamitvā.

[701] Addasā kho bhagavā āyasmantaṁ sujātaṁ dūratova āgacchantaṁ
disvāna bhikkhū āmantesi ubhayenevāyaṁ bhikkhave kulaputto sobhati
yañca abhirūpo dassanīyo pāsādiko paramāya vaṇṇapokkharatāya
samannāgato yassa catthāya kulaputtā sammadeva agārasmā anagāriyaṁ
pabbajanti tadanuttaraṁ brahmacariyapariyosānaṁ diṭṭheva dhamme sayaṁ
abhiññā sacchikatvā upasampajja viharatīti.

[702] Idamavoca bhagavā .pe. Satthā
sobhati vatāyaṁ bhikkhu ujubhūtena cetasā
vippayutto visaññutto anupādāya nibbuto
dhāreti antimaṁ dehaṁ jetvā māraṁ savāhananti 3 . Pañcamaṁ.
1 Ma. Yu. appena thāmasā. 2 Ma. Yu. sabbadukkhappamocanaṁ. 3 Ma. savāhininti.

[703] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Athakho āyasmā
lakuṇṭakabhaddiyo yena bhagavā tenupasaṅkami upasaṅkamitvā.

[704] Addasā kho bhagavā āyasmantaṁ lakuṇṭakabhaddiyaṁ dūratova
āgacchantaṁ disvāna bhikkhū āmantesi passatha no tumhe bhikkhave
etaṁ bhikkhuṁ āgacchantaṁ dubbaṇṇaṁ duddasikaṁ okoṭimakaṁ bhikkhūnaṁ
paribhūtarūpanti. Evaṁ bhante. Eso kho bhikkhave bhikkhu mahiddhiko
mahānubhāvo na ca sā samāpatti sulabharūpā yā tena bhikkhunā
asamāpannapubbā yassa catthāya kulaputtā sammadeva agārasmā
anagāriyaṁ pabbajanti tadanuttaraṁ brahmacariyapariyosānaṁ diṭṭheva dhamme
sayaṁ abhiññā sacchikatvā upasampajja viharatīti.

[705] Idamavoca bhagavā .pe. Satthā
haṁsā kuñcā 1 mayūrā ca hatthiyo pasaṭamigā 2
sabbe sīhassa bhāyanti natthi kāyasmi tulyatā
evameva manussesu daharo cepi paññavā
so hi tattha mahā hoti neva bālo sarīravāti. Chaṭṭhaṁ.

[706] Evamme sutaṁ ekaṁ samayaṁ bhagavā vesāliyaṁ viharati
mahāvane kūṭāgārasālāyaṁ. Tena kho pana samayena āyasmā
visākho pañcālaputto upaṭṭhānasālāyaṁ bhikkhū dhammiyā kathāya
sandasseti samādapeti samuttejeti sampahaṁseti poriyā vācāya
1 Ma. Yu. koñcā. 2 Ma. Yu. pasadā migā.
Vissaṭṭhāya anelagaḷāya atthassa viññāpaniyā pariyāpannāya
anissitāya.

[707] Atha kho bhagavā sāyaṇhasamayaṁ paṭisallānā vuṭṭhito
yena upaṭṭhānasālā tenupasaṅkami upasaṅkamitvā paññatte āsane
nisīdi. Nisajja kho bhagavā bhikkhū āmantesi ko nu kho bhikkhave
upaṭṭhānasālāyaṁ bhikkhū dhammiyā kathāya sandasseti samādapeti
samuttejeti sampahaṁseti poriyā vācāya vissaṭṭhāya anelagaḷāya atthassa
viññāpaniyā pariyāpannāya anissitāyāti. Āyasmā bhante visākho
pañcālaputto upaṭṭhānasālāyaṁ bhikkhū dhammiyā kathāya sandasseti
samādapeti samuttejeti sampahaṁseti poriyā vācāya vissaṭṭhāya
anelagaḷāya atthassa viññāpaniyā pariyāpannāya anissitāyāti.
Atha kho bhagavā āyasmantaṁ visākhaṁ pañcālaputtaṁ āmantesi sādhu
sādhu visākha sādhu kho tvaṁ visākha bhikkhū dhammiyā kathāya
sandassesi .pe. Atthassa viññāpaniyā pariyāpannāya anissitāyāti.

[708] Idamavoca bhagavā idaṁ vatvāna sugato athāparaṁ
etadavoca satthā
nābhāsamāna 1 jānanti missaṁ bālehi paṇḍataṁ
bhāsamānañca jānanti desentaṁ amataṁ padaṁ
bhāsaye jotaye dhammaṁ paggaṇhe isinaṁ dhajaṁ
subhāsitadhajā isayo dhammo hi isinaṁ dhajoti. Sattamaṁ.
1 Ma. nābhāsamānaṁ. Yu. no bhāsamānaṁ.