[679] Evameva kho bhikkhave idha therā bhikkhū pubbaṇhasamayaṁ
nivāsetvā pattacīvaramādāya gāmaṁ vā nigamaṁ vā piṇḍāya pavisanti
te tattha dhammaṁ bhāsanti tesaṁ gihī pasannā pasannākāraṁ karonti
te taṁ lābhaṁ agadhitā amucchitā anajjhāpannā 3 ādīnavadassāvino
nissaraṇapaññā paribhuñjanti tesantaṁ vaṇṇāya ceva hoti balāya
ca na ca tatonidānaṁ maraṇaṁ vā nigacchanti maraṇamattaṁ vā dukkhaṁ.
Tesaññeva kho pana bhikkhave therānaṁ bhikkhūnaṁ anusikkhamānā navā
bhikkhū pubbaṇhasamayaṁ nivāsetvā pattacīvaramādāya gāmaṁ vā nigamaṁ
vā piṇḍāya pavisanti te tattha dhammaṁ bhāsanti tesaṁ gihī
pasannā pasannākāraṁ karonti te taṁ lābhaṁ gadhitā mucchitā
ajjhāpannā 4 anādīnavadassāvino anissaraṇapaññā paribhuñjanti
tesantaṁ neva vaṇṇāya hoti na balāya tatonidānaṁ maraṇaṁ vā
nigacchanti maraṇamattaṁ vā dukkhaṁ. Tasmātiha bhikkhave evaṁ
sikkhitabbaṁ agadhitā amucchitā anajjhāpannā ādīnavadassāvino
nissaraṇapaññā paribhuñjissāmāti evañhi vo bhikkhave
1 Ma. Yu. bhiṅkacchāpā. 2 Yu. saṅkharitvā. 3 Ma. anajjhopannā.
4 Ma. ajjhopannā. evamuparipi.
Sikkhitabbanti. Navamaṁ.

[680] Sāvatthiyaṁ viharati ... Tena kho pana samayena aññataro
bhikkhu ativelaṁ kulesu cārittaṁ āpajjati. Tamenaṁ bhikkhū evamāhaṁsu
mā āyasmā ativelaṁ kulesu cārittaṁ āpajjīti. So 1 bhikkhūhi
vuccamāno na ramati. Atha kho sambahulā bhikkhū yena bhagavā
tenupasaṅkamiṁsu upasaṅkamitvā bhagavantaṁ abhivādetvā ekamantaṁ
nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ
idha bhante aññataro bhikkhu ativelaṁ kulesu cārittaṁ āpajjati
tamenaṁ bhikkhū evamāhaṁsu mā āyasmā ativelaṁ kulesu cārittaṁ
āpajjīti so [1]- bhikkhūhi vuccamāno na ramatīti.

[681] Bhūtapubbaṁ bhikkhave viḷāro sandhisamalasaṅkatire ṭhito
ahosi mudumūsiṁ āgamayamāno 2 yatthāyaṁ mudumūsi gocarāya
pakkamissati tattheva naṁ gahetvā khādissāmīti. Atha kho [3]-
bhikkhave mudumūsi gocarāya pakkāmi. Tamenaṁ viḷāro gahetvā
sahasā maṁsaṁ khāditvā 4 ajjhohari. Tassa sā mudumūsi antampi
khādi antaguṇampi khādi. So tatonidānaṁ maraṇampi nigacchati
maraṇamattampi dukkhaṁ.

[682] Evameva kho bhikkhave idhekacco bhikkhu pubbaṇhasamayaṁ
nivāsetvā pattacīvaramādāya gāmaṁ vā nigamaṁ vā piṇḍāya pavisati
arakkhiteneva kāyena arakkhitāya vācāya arakkhitena cittena
1 Ma. Yu. bhikkhu. 2 Ma. Yu. maggayamāno. 3 Ma. Yu. so. 4 Ma. sahasā
saṅkhāditvā. Yu. sahasā saṅkharitvā.
Anupaṭṭhitāya satiyā asaṁvutehi indriyehi tattha passati mātugāmaṁ
dunnivatthaṁ vā duppārutaṁ vā tassa mātugāmaṁ disvāna dunnivatthaṁ
vā duppārutaṁ vā rāgo cittaṁ anuddhaṁseti so rāgānuddhaṁsena
cittena maraṇaṁ vā nigacchati maraṇamattaṁ vā dukkhaṁ. Maraṇaṁ so
taṁ bhikkhave 1 ariyassa vinaye yo sikkhaṁ paccakkhāya hīnāyāvattati.
Maraṇamattaññeva 2 bhikkhave dukkhaṁ yadidaṁ aññataraṁ saṅkiliṭṭhaṁ
āpattiṁ āpajjati yathārūpāya āpattiyā vuṭṭhānaṁ paññāyati.
Tasmātiha bhikkhave evaṁ sikkhitabbaṁ rakkhitena 3 kāyena rakkhitāya
vācāya rakkhitena cittena upaṭṭhitāya satiyā saṁvutehi indriyehi
gāmaṁ vā nigamaṁ vā piṇḍāya pavisissāmāti evañhi vo bhikkhave
sikkhitabbanti. Dasamaṁ.

[683] Sāvatthiyaṁ viharati ... Assuttha no tumhe bhikkhave rattiyā
paccūsasamayaṁ sigālassa 4 vassamānassāti. Evaṁ bhante. Eso kho
bhikkhave jarasigālo ukkaṇṇakena nāma rogajātena phuṭṭho. So
yena yena icchati tena tena gacchati yattha yattha icchati tattha
tattha tiṭṭhati yattha yattha icchati tattha tattha nisīdati yattha
yattha icchati tattha tattha nipajjati. Sītakopi naṁ vāto upavāyati.

[684] Sādhu khvassa bhikkhave yaṁ idhekacco sakyaputtiyapaṭiñño
evarūpampi attabhāvapaṭilābhaṁ paṭisaṁvediyeva 5 . Tasmātiha bhikkhave evaṁ
1 Ma. Yu. maraṇañhetaṁ bhikkhaveti dissati. 2 Ma. Yu. maraṇamattañhetanti dissati.
3 Ma. Yu. rakkhiteneva. 4 Ma. jarasiṅgālassa. Yu. siṅgālassa. evamuparipi.
5 Ma. Yu. paṭivediyetha.
Sikkhitabbaṁ appamattā viharissāmāti evañhi vo bhikkhave
sikkhitabbanti. Ekādasamaṁ.

[685] Sāvatthiyaṁ viharati ... Assuttha no tumhe bhikkhave rattiyā
paccūsasamayaṁ sigālassa vassamānassāti. Evaṁ bhante. Siyā kho
bhikkhave tasmiṁ jarasigāle kāci 1 kataññutā kataveditā na tveva
idhekacce sakyaputtiyapaṭiññe siyā kāci 1 kataññutā kataveditā.
Tasmātiha bhikkhave evaṁ sikkhitabbaṁ kataññuno bhavissāma katavedino
na 2 ca no amhesu appakampi kataṁ vinasissatīti 3 evañhi vo
bhikkhave sikkhitabbanti. Dvādasamaṁ.
Tassa uddānaṁ
kūṭaṁ nakhasikha kulaṁ okkhā satti dhanuggaho
āṇi kaliṅgaro nāgo viḷāro dve sigālakāti.
Opammasaṁyuttaṁ aṭṭhamaṁ samattaṁ.
---------
1 Ma. Yu. yā kāci. 2 Yu. na ca noti na dissati. amhesu appakaṁpi kataṁ mā
nasissatīti iti ettakampana dissati. 3 Ma. nassissatīti.
Bhikkhusaṁyuttaṁ

[686] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho āyasmā
mahāmoggallāno bhikkhū āmantesi āvuso bhikkhaveti. Āvusoti
kho te bhikkhū āyasmato mahāmoggallānassa paccassosuṁ.

[687] Āyasmā mahāmoggallāno etadavoca idha mayhaṁ
āvuso rahogatassa paṭisallīnassa evaṁ cetaso parivitakko udapādi
ariyo tuṇhībhāvo ariyo tuṇhībhāvoti vuccati katamo nu kho
ariyo tuṇhībhāvoti. Tassa mayhaṁ āvuso etadahosi idha
bhikkhu vitakkavicārānaṁ vūpasamā ajjhattaṁ sampasādanaṁ cetaso
ekodibhāvaṁ avitakkaṁ avicāraṁ samādhijaṁ pītisukhaṁ dutiyajjhānaṁ upasampajja
viharati ayaṁ vuccati ariyo tuṇhībhāvoti. So khvāhaṁ āvuso
vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ
avitakkaṁ avicāraṁ samādhijaṁ pītisukhaṁ dutiyajjhānaṁ upasampajja viharāmi 1 .
Tassa mayhaṁ āvuso iminā vihārena viharato vitakkasahagatā
saññāmanasikārā samudācaranti. Atha kho maṁ āvuso bhagavā iddhiyā
upasaṅkamitvā etadavoca moggallāna moggallāna mā brāhmaṇa
ariyaṁ tuṇhībhāvaṁ pamādo ariye tuṇhībhāve cittaṁ saṇṭhapehi
ariye tuṇhībhāve cittaṁ ekodibhāvaṁ karohi ariye tuṇhībhāve
1 Ma. vihariṁ.
Cittaṁ samādahāti. So khvāhaṁ āvuso aparena samayena
vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ
avitakkaṁ avicāraṁ samādhijaṁ pītisukhaṁ dutiyajjhānaṁ upasampajja viharāmi.
Yaṁ hi [1]- āvuso sammā vadamāno vadeyya satthārā anuggahito
sāvako mahābhiññattaṁ pattoti. Mamantaṁ sammā vadamāno vadeyya
satthārā anuggahito sāvako mahābhiññattaṁ pattoti. Paṭhamaṁ.

[688] Sāvatthīnidānaṁ. Tatra kho āyasmā sārīputto bhikkhū
āmantesi āvuso bhikkhaveti. Āvusoti kho te bhikkhū āyasmato
sārīputtassa paccassosuṁ.