[659] Addasaṁ sāmaṇeraṁ vehāsaṁ gacchantaṁ tassa saṅghāṭipi
ādittā .pe. Pāpasāmaṇero ahosi. Dasamaṁ.

[660] Idhāhaṁ āvuso gijjhakūṭā pabbatā orohanto addasaṁ
sāmaṇeriṁ vehāsaṁ gacchantiṁ tassā saṅghāṭipi ādittā sampajjalitā
sañjotibhūtā pattopi āditto sampajjalito sañjotibhūto
kāyabandhanampi ādittaṁ sampajjalitaṁ sañjotibhūtaṁ kāyopi āditto
sampajjalito sañjotibhūto sā sudaṁ aṭṭassaraṁ karoti. Tassa
mayhaṁ āvuso etadahosi acchariyaṁ vata bho abbhūtaṁ vata bho
evarūpopi nāma satto bhavissati evarūpopi nāma yakkho bhavissati
evarūpopi nāma attabhāvapaṭilābho bhavissatīti.

[661] Atha kho bhagavā bhikkhū āmantesi cakkhubhūtā vata
bhikkhave sāvakā viharanti ñāṇabhūtā vata bhikkhave sāvakā viharanti
yatra hi nāma sāvako evarūpaṁ ñassati vā dakkhati vā sakkhiṁ vā
karissati. Pubbeva 1 me sā bhikkhave sāmaṇerī diṭṭhā ahosi.
Apicāhaṁ na byākāsiṁ ahañcetaṁ byākareyyaṁ parepi 2 me na
saddaheyyuṁ ye me na saddaheyyuṁ tesaṁ taṁ assa dīgharattaṁ
1 Yu. pubbepi. 2 Ma. Yu. pare ca.
Ahitāya dukkhāya. Esā bhikkhave sāmaṇerī kassapassa
sammāsambuddhassa pāvacane pāpasāmaṇerī ahosi sā tassa kammassa
vipākena bahūni vassāni bahūni vassasatāni bahūni vassasahassāni
bahūni vassasatasahassāni niraye pacittha 1 tasseva kammassa
vipākāvasesena evarūpaṁ attabhāvapaṭilābhaṁ paṭisaṁvedayatīti. Ekādasamaṁ.
Dutiyavaggo dutiyo.
Tassa uddānaṁ
kūpe nimuggo hi so paradāriko
gūthakhādi ahu duṭṭhabrāhmaṇo
nicchavitthī aticārinī ahu
maṅguḷitthī ahu ikkhaṇitthikā 2
okilinī sapatiṁ karoti 3
sīsacchinno ahu coraghātako
bhikkhu bhikkhunī sikkhamānā
sāmaṇero atha sāmaṇerikā 4
kassapassa vinayassa 5 pabbajjaṁ 6
pāpakammaṁ akariṁsu tāvade 7 .
Lakkhaṇasaṁyuttaṁ sattamaṁ samattaṁ.
-------
1 Ma. pacitvā. 2 Yu. ikkhaṇitthi yā. 3 Ma. Yu. sapattaṅgārokiri. 4 Yu.
sāmaṇeriyo. 5 Ma. Yu. vinayasmiṁ. 6 Yu. pabbajjuṁ. 7 Ma. Yu. itisaddo atthi.
Opammasaṁyuttaṁ

[662] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā ... Seyyathāpi
bhikkhave kūṭāgārassa yākāci gopānasiyo sabbā tā kūṭaṅgamā
kūṭasamosaraṇā kūṭasamugghātā sabbā tā samugghātaṁ gacchanti
evameva kho bhikkhave yekeci akusalā dhammā sabbe te avijjāmūlakā
avijjāsamosaraṇā avijjāsamugghātā sabbe te samugghātaṁ
gacchanti. Tasmātiha bhikkhave evaṁ sikkhitabbaṁ appamattā
viharissāmāti evañhi vo bhikkhave sikkhitabbanti. Paṭhamaṁ.

[663] Sāvatthiyaṁ viharati ... Atha kho bhagavā parittaṁ nakhasikhāyaṁ
paṁsuṁ āropetvā bhikkhū āmantesi taṁ kiṁ maññatha bhikkhave
katamaṁ nu kho bahutaraṁ yo cāyaṁ mayā paritto nakhasikhāyaṁ paṁsu
āropito yā cāyaṁ mahāpaṭhavīti. Etadeva bhante bahutaraṁ yadidaṁ
mahāpaṭhavī appamattakoyaṁ bhagavatā paritto nakhasikhāyaṁ paṁsu āropito
saṅkhampi na upeti upanidhampi na upeti kalabhāgampi na upeti
mahāpaṭhaviṁ upanidhāya bhagavatā paritto nakhasikhāyaṁ paṁsu āropitoti.

[664] Evameva kho bhikkhave appakā te sattā ye
manussesu paccājāyanti atha kho eteyeva bahutarā sattā ye
aññatra manussehi paccājāyanti. Tasmātiha bhikkhave evaṁ
Sikkhitabbaṁ appamattā viharissāmāti evañhi vo bhikkhave
sikkhitabbanti. Dutiyaṁ.

[665] Sāvatthiyaṁ viharati ... Tatra kho bhagavā ... Seyyathāpi
bhikkhave yānikānici kulāni bahutthikāni appapurisāni tāni
supadhaṁsiyāni honti corehi kumbhatthenakehi. Evameva kho bhikkhave
yassakassaci bhikkhuno mettā cetovimutti abhāvitā abahulīkatā
so supadhaṁsiyo hoti amanussehi.

[666] Seyyathāpi bhikkhave yānikānici kulāni appatthikāni 1
bahupurisāni tāni duppadhaṁsiyāni honti corehi kumbhatthenakehi
evameva kho bhikkhave yassakassaci bhikkhuno mettā cetovimutti
bhāvitā bahulīkatā so duppadhaṁsiyo hoti amanussehi. Tasmātiha
bhikkhave evaṁ sikkhitabbaṁ mettā no cetovimutti bhāvitā bhavissati
bahulīkatā yānīkatā vatthukatā anuṭṭhitā paricitā susamāraddhāti
evañhi vo bhikkhave sikkhitabbanti. Tatiyaṁ.

[667] Sāvatthiyaṁ viharati ... Yo bhikkhave pubbaṇhasamayaṁ
okkhāsataṁ 2 dānaṁ dadeyya yo majjhantikasamayaṁ okkhāsataṁ dānaṁ dadeyya
yo sāyaṇhasamayaṁ okkhāsataṁ dānaṁ dadeyya yo vā pubbaṇhasamayaṁ
antamaso gaddūhanamattampi mettacittaṁ bhāveyya yo vā
majjhantikasamayaṁ antamaso gaddūhanamattampi mettacittaṁ bhāveyya
1 Ma. Yu. appitthikāni. 2 ukkāsatantipi pāṭho.
Yo vā sāyaṇhasamayaṁ antamaso gaddūhanamattampi mettacittaṁ
bhāveyya idaṁ tato mahapphalataraṁ. Tasmātiha bhikkhave evaṁ
sikkhitabbaṁ mettā no cetovimutti bhāvitā bhavissati bahulīkatā
yānīkatā vatthukatā anuṭṭhitā paricitā susamāraddhāti evañhi vo
bhikkhave sikkhitabbanti. Catutthaṁ.

[668] Sāvatthiyaṁ viharati ... Seyyathāpi bhikkhave satti tiṇhaphalā
atha puriso āgaccheyya ahaṁ imaṁ sattiṁ tiṇhaphalaṁ pāṇinā vā
muṭṭhinā vā paṭileṇissāmi paṭikoṭṭessāmi 1 paṭivaṭṭessāmīti.
Taṁ kiṁ maññatha bhikkhave bhabbo nu kho so puriso amuṁ sattiṁ
tiṇhaphalaṁ pāṇinā vā muṭṭhinā vā paṭileṇetuṁ paṭikoṭṭetuṁ
paṭivaṭṭetunti. No hetaṁ bhante. Taṁ kissa hetu. Asu hi
bhante satti tiṇhaphalā na sukarā pāṇinā vā muṭṭhinā vā
paṭileṇetuṁ paṭikoṭṭetuṁ paṭivaṭṭetuṁ yāvadeva ca pana so puriso
kilamathassa vighātassa bhāgī assāti.