[599] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho āyasmā rāhulo
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinno kho āyasmā rāhulo
bhagavantaṁ etadavoca sādhu me bhante bhagavā saṅkhittena dhammaṁ
desetu yamahaṁ bhagavato dhammaṁ sutvā eko vūpakaṭṭho appamatto
ātāpī pahitatto vihareyyanti.

[600] Taṁ kiṁ maññasi rāhula cakkhuṁ niccaṁ vā aniccaṁ vāti.
Aniccaṁ bhante. Yaṁ panāniccaṁ dukkhaṁ vā taṁ sukhaṁ vāti. Dukkhaṁ
bhante. Yaṁ panāniccaṁ dukkhaṁ vipariṇāmadhammaṁ kallaṁ nu taṁ samanupassituṁ
etaṁ mama esohamasmi eso me attāti. No
hetaṁ bhante.
[evaṁ peyyālo]
sotaṁ niccaṁ vā aniccaṁ vāti. Aniccaṁ bhante ... Ghānaṁ niccaṁ vā
aniccaṁ vāti. Aniccaṁ bhante ... Jivhā niccā vā aniccā vāti.
Aniccā bhante ... Kāyo nicco vā anicco vāti. Anicco
Bhante ... Mano nicco vā anicco vāti. Anicco bhante.
Yaṁ panāniccaṁ dukkhaṁ vā taṁ sukhaṁ vāti. Dukkhaṁ bhante. Yaṁ panāniccaṁ
dukkhaṁ vipariṇāmadhammaṁ kallaṁ nu taṁ samanupassituṁ etaṁ mama esohamasmi
eso me attāti. No hetaṁ bhante.

[601] Evaṁ passaṁ rāhula sutavā ariyasāvako cakkhusmimpi
nibbindati sotasmimpi nibbindati ghānasmimpi nibbindati jivhāyapi
nibbindati kāyasmimpi nibbindati manasmimpi nibbindati nibbindaṁ
virajjati virāgā vimuccati. Vimuttasmiṁ vimuttamiti 1 ñāṇaṁ hoti.
Khīṇā jāti vusitaṁ brahmacariyaṁ kataṁ karaṇīyaṁ nāparaṁ itthattāyāti
pajānātīti. Paṭhamaṁ.
[etena peyyālena dasa suttantā kātabbā]

[602] Sāvatthiyaṁ viharati ... Taṁ kiṁ maññasi rāhula rūpā niccā
vā aniccā vāti. Aniccā bhante ... Saddā .pe. Gandhā ...
Rasā ... Phoṭṭhabbā ... Dhammā niccā vā aniccā vāti. Aniccā
bhante ....

[603] Evaṁ passaṁ rāhula sutavā ariyasāvako rūpesupi
nibbindati saddesupi nibbindati gandhesupi nibbindati rasesupi
nibbindati phoṭṭhabbesupi nibbindati dhammesupi nibbindati nibbindaṁ
virajjati .pe. Pajānātīti. Dutiyaṁ.
1 katthaci vimuttamhītītipi pāṭho dissati.

[604] Sāvatthiyaṁ viharati ... Taṁ kiṁ maññasi rāhula
cakkhuviññāṇaṁ niccaṁ vā aniccaṁ vāti. Aniccaṁ bhante ...
Sotaviññāṇaṁ .pe. Ghānaviññāṇaṁ ... Jivhāviññāṇaṁ ...
Kāyaviññāṇaṁ ... Manoviññāṇaṁ niccaṁ vā aniccaṁ vāti. Aniccaṁ
bhante ....

[605] Evaṁ passaṁ rāhula sutavā ariyasāvako cakkhuviññāṇasmimpi
nibbindati sotaviññāṇasmimpi nibbindati ghānaviññāṇasmimpi
nibbindati jivhāviññāṇasmimpi nibbindati kāyaviññāṇasmimpi
nibbindati manoviññāṇasmimpi nibbindati
nibbindaṁ virajjati .pe. Pajānātīti. Tatiyaṁ.

[606] Sāvatthiyaṁ viharati ... Taṁ kiṁ maññasi rāhula cakkhusamphasso
nicco vā anicco vāti. Anicco bhante ... Sotasamphasso
.pe. Ghānasamphasso ... Jivhāsamphasso ... Kāyasamphasso ...
Manosamphasso nicco vā anicco vāti. Anicco bhante ....

[607] Evaṁ passaṁ rāhula sutavā ariyasāvako cakkhusamphassasmimpi
nibbindati sotasamphassasmimpi nibbindati ghānasamphassasmimpi
nibbindati jivhāsamphassasmimpi nibbindati kāyasamphassasmimpi
nibbindati manosamphassasmimpi nibbindati nibbindaṁ
virajjati .pe. Pajānātīti. Catutthaṁ.

[608] Sāvatthiyaṁ viharati ... Taṁ kiṁ maññasi rāhula cakkhusamphassajāvedanā
Niccā vā aniccā vāti. Aniccā bhante ... Sotasamphassajāvedanā
.pe. Ghānasamphassajāvedanā ... Jivhāsamphassajāvedanā ...
Kāyasamphassajāvedanā ... Manosamphassajāvedanā niccā vā
aniccā vāti. Aniccā bhante ....