[619] Evaṁ passaṁ rāhula sutavā ariyasāvako rūpasmimpi
nibbindati vedanāyapi nibbindati saññāyapi nibbindati saṅkhāresupi
nibbindati viññāṇasmimpi nibbindati nibbindaṁ virajjati virāgā
vimuccati. Vimuttasmiṁ vimuttamiti ñāṇaṁ hoti. Khīṇā jāti vusitaṁ
brahmacariyaṁ kataṁ karaṇīyaṁ nāparaṁ itthattāyāti pajānātīti. Dasamaṁ.
Paṭhamavaggo paṭhamo.
Tassa uddānaṁ
cakkhuṁ rūpañca viññāṇaṁ samphasso vedanāya ca
saññā ca cetanā taṇhā dhātu khandhena te dasāti.
--------
Dutiyavaggo dutiyo

[620] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho āyasmā rāhulo
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi.

[621] Ekamantaṁ nisinnaṁ kho āyasmantaṁ rāhulaṁ bhagavā etadavoca
taṁ kiṁ maññasi rāhula cakkhuṁ niccaṁ vā aniccaṁ vāti.
Aniccaṁ bhante. Yaṁ panāniccaṁ dukkhaṁ vā taṁ sukhaṁ vāti. Dukkhaṁ
bhante. Yaṁ panāniccaṁ dukkhaṁ vipariṇāmadhammaṁ kallaṁ nu taṁ
samanupassituṁ etaṁ mama esohamasmi eso me attāti. No hetaṁ
bhante. Sotaṁ ... Ghānaṁ ... Jivhā ... Kāyo ... Mano ... Nicco
vā anicco vāti. Anicco bhante. Yaṁ panāniccaṁ dukkhaṁ vā taṁ
sukhaṁ vāti. Dukkhaṁ bhante. Yaṁ panāniccaṁ dukkhaṁ vipariṇāmadhammaṁ
kallaṁ nu taṁ samanupassituṁ etaṁ mama esohamasmi eso me
attāti. No hetaṁ bhante.

[622] Evaṁ passaṁ rāhula sutavā ariyasāvako cakkhusmimpi
nibbindati sotasmimpi nibbindati ghānasmimpi nibbindati jivhāyapi
nibbindati kāyasmimpi nibbindati manasmimpi nibbindati nibbindaṁ
virajjati virāgā vimuccati. Vimuttasmiṁ vimuttamiti ñāṇaṁ hoti.
Khīṇā jāti vusitaṁ brahmacariyaṁ kataṁ karaṇīyaṁ nāparaṁ itthattāyāti
pajānātīti. Paṭhamaṁ.
[etena peyyālena dasa suttantā kātabbā]

[623] Taṁ kiṁ maññasi rāhula rūpā niccā vā aniccā
vāti. Aniccā bhante ... Saddā ... Gandhā ... Rasā ...
Phoṭṭhabbā ... Dhammā ....

[624] Cakkhuviññāṇaṁ ... Sotaviññāṇaṁ ... Ghānaviññāṇaṁ ...
Jivhāviññāṇaṁ ... Kāyaviññāṇaṁ ... Manoviññāṇaṁ ....

[625] Cakkhusamphasso ... Sotasamphasso ... Ghānasamphasso ...
Jivhāsamphasso ... Kāyasamphasso ... Manosamphasso ....

[626] Cakkhusamphassajāvedanā ... Sotasamphassajāvedanā ...
Ghānasamphassajāvedanā ... Jivhāsamphassajāvedanā ... Kāyasamphassajā-
vedanā ... Manosamphassajāvedanā ....

[627] Rūpasaññā ... Saddasaññā ... Gandhasaññā ...
Rasasaññā ... Phoṭṭhabbasaññā ... Dhammasaññā ....

[628] Rūpasañcetanā ... Saddasañcetanā ... Gandhasañcetanā ...
Rasasañcetanā ... Phoṭṭhabbasañcetanā ... Dhammasañcetanā ....