[579] Seyyathāpi bhikkhave balavā puriso daḷhāya bālarajjuyā
jaṅghaṁ veṭhetvā ghaṁseyya sā chaviṁ chindeyya chaviṁ chetvā cammaṁ
chindeyya cammaṁ chetvā maṁsaṁ chindeyya maṁsaṁ chetvā nahāruṁ
chindeyya nahāruṁ chetvā aṭṭhiṁ chindeyya aṭṭhiṁ chetvā aṭṭhimiñjaṁ
āhacca tiṭṭheyya. Evameva kho bhikkhave lābhasakkārasiloko
Chaviṁ chindati chaviṁ chetvā cammaṁ chindati cammaṁ chetvā
maṁsaṁ chindati maṁsaṁ chetvā nahāruṁ chindati nahāruṁ chetvā aṭṭhiṁ
chindati aṭṭhiṁ chetvā aṭṭhimiñjaṁ āhacca tiṭṭhati. Evaṁ
dāruṇo kho bhikkhave lābhasakkārasiloko .pe. Evañhi vo
bhikkhave sikkhitabbanti. Navamaṁ.

[580] Sāvatthiyaṁ viharati ... Tatra kho bhagavā ... Yopi so
bhikkhave bhikkhu arahaṁ khīṇāsavo tassapahaṁ 1 lābhasakkārasilokaṁ 2
antarāyāya vadāmīti. Evaṁ vutte āyasmā ānando bhagavantaṁ
etadavoca kissa pana bhante khīṇāsavassa bhikkhuno lābhasakkārasiloko
antarāyāyāti.

[581] Yā hissa sā ānanda akuppā cetovimutti nāhaṁ
tassā lābhasakkārasilokaṁ antarāyāya vadāmi. Ye ca khvassa
vo 3 ānanda appamattassa ātāpino pahitattassa viharato diṭṭhadhamma-
sukhavihārā adhigatā tesāhamassa lābhasakkārasilokaṁ antarāyāya
vadāmi. Evaṁ dāruṇo kho ānanda lābhasakkārasiloko
kaṭuko pharuso antarāyiko anuttarassa yogakkhemassa adhigamāya.
Tasmātiha ānanda evaṁ sikkhitabbaṁ uppannaṁ lābhasakkārasilokaṁ
pajahissāma na ca no uppanno lābhasakkārasiloko cittaṁ pariyādāya
ṭhassatīti. Evañhi vo ānanda sikkhitabbanti. Dasamaṁ.
Tatiyavaggo tatiyo.
1 Ma. Yu. tassapāhaṁ. 2 Ma. lābhasakkārasiloko. 3 Ma. Yu. vosaddo natthi.
Tassa uddānaṁ
mātugāmo ca kalyāṇī putto ca ekadhītuyā
samaṇabrāhmaṇā tīṇi chavi rajju ca bhikkhunāti.
-------
Catutthavaggo catuttho

[582] Sāvatthiyaṁ viharati ... Tatra kho bhagavā ... Dāruṇo
bhikkhave lābhasakkārasiloko .pe. Lābhasakkārasilokena abhibhūto
pariyādinnacitto bhikkhave devadatto saṅghaṁ bhindi. Evaṁ dāruṇo
kho bhikkhave lābhasakkārasiloko .pe. Sikkhitabbanti. Paṭhamaṁ.

[583] Sāvatthiyaṁ viharati ... Tatra kho bhagavā ... Dāruṇo
bhikkhave lābhasakkārasiloko .pe. Lābhasakkārasilokena abhibhūtassa
pariyādinnacittassa bhikkhave devadattassa kusalamūlaṁ samucchedamagamā.
Evaṁ dāruṇo kho bhikkhave lābhasakkārasiloko .pe.
Sikkhitabbanti. Dutiyaṁ.

[584] Sāvatthiyaṁ viharati ... Tatra kho bhagavā ... Dāruṇo
bhikkhave lābhasakkārasiloko .pe. Lābhasakkārasilokena abhibhūtassa
pariyādinnacittassa bhikkhave devadattassa kusalo dhammo samucchedamagamā.
Evaṁ dāruṇo kho bhikkhave lābhasakkārasiloko .pe.
Sikkhitabbanti. Tatiyaṁ.

[585] Sāvatthiyaṁ viharati ... Tatra kho bhagavā ... Dāruṇo
bhikkhave lābhasakkārasiloko .pe. Lābhasakkārasilokena abhibhūtassa
pariyādinnacittassa bhikkhave devadattassa sukko dhammo samucchedamagamā.
Evaṁ dāruṇo kho bhikkhave lābhasakkārasiloko .pe.
Sikkhitabbanti. Catutthaṁ.

[586] Ekaṁ samayaṁ bhagavā rājagahe viharati gijjhakūṭe pabbate.
Acirapakkante devadatte tatra kho bhagavā devadattaṁ ārabbha bhikkhū
āmantesi attavadhāya bhikkhave devadattassa lābhasakkārasiloko
udapādi parābhavāya devadattassa lābhasakkārasiloko udapādi.

[587] Seyyathāpi bhikkhave kadalī attavadhāya phalaṁ deti
parābhavāya phalaṁ deti. Evameva kho bhikkhave attavadhāya
devadattassa lābhasakkārasiloko udapādi parābhavāya devadattassa
lābhasakkārasiloko udapādi.

[588] Seyyathāpi bhikkhave veḷu attavadhāya phalaṁ deti
parābhavāya phalaṁ deti. Evameva kho bhikkhave attavadhāya
devadattassa lābhasakkārasiloko udapādi parābhavāya devadattassa
lābhasakkārasiloko udapādi.