[469] Kathañcāvuso ottāpī hoti. Idhāvuso bhikkhu
Anuppannā me pāpakā akusalā dhammā uppajjamānā anatthāya
saṁvatteyyunti ottappati uppannā me pāpakā akusalā dhammā
appahīyamānā anatthāya saṁvatteyyunti ottappati anuppannā me
kusalā dhammā anuppajjamānā anatthāya saṁvatteyyunti ottappati
uppannā me kusalā dhammā nirujjhamānā anatthāya saṁvatteyyunti
ottappati. Evaṁ kho āvuso ottāpī hoti. Evaṁ kho
āvuso ātāpī ottāpī bhabbo sambodhāya bhabbo nibbānāya
bhabbo anuttarassa yogakkhemassa adhigamāyāti. Dutiyaṁ.

[470] Sāvatthiyaṁ viharati ... Tatra kho bhagavā ... Candūpamā
bhikkhave kulāni upasaṅkamatha apakasseva kāyaṁ apakassa cittaṁ
niccanavakā kulesu appagabbhā. Seyyathāpi bhikkhave puriso jarudapānaṁ
vā olokeyya pabbatavisamaṁ vā nadīviduggaṁ vā apakasseva kāyaṁ
apakassa cittaṁ evameva kho bhikkhave candūpamā kulāni upasaṅkamatha
apakasseva kāyaṁ apakassa cittaṁ niccanavakā kulesu appagabbhā.
Kassapo bhikkhave candūpamo kulāni upasaṅkamati apakasseva kāyaṁ
apakassa cittaṁ niccanavako kulesu appagabbho.

[471] Taṁ kiṁ maññatha bhikkhave kathaṁrūpo bhikkhu arahati kulāni
upasaṅkamitunti. Bhagavaṁmūlakā no bhante dhammā bhagavaṁnettikā
bhagavaṁpaṭisaraṇā sādhu vata bhante bhagavantaṁyeva paṭibhātu etassa
bhāsitassa attho bhagavato sutvā bhikkhū dhāressantīti. Atha
Kho bhagavā ākāse pāṇiṁ cālesi seyyathāpi bhikkhave ayaṁ
ākāse pāṇi na sajjati na gayhati na bajjhati evameva kho
bhikkhave yassakassaci bhikkhuno kulāni upasaṅkamato kulesu cittaṁ na
sajjati na gayhati na bajjhati labhantu lābhakāmā puññakāmā
karontu pana 1 puññānīti yathāsakena lābhena attamano hoti
sumano evaṁ paresaṁ lābhena attamano hoti sumano. Evarūpo
kho bhikkhave bhikkhu arahati kulāni upasaṅkamituṁ. Kassapassa bhikkhave
kulāni upasaṅkamato kulesu cittaṁ na sajjati na gayhati na bajjhati
labhantu lābhakāmā puññakāmā karontu pana 1 puññānīti yathāsakena
lābhena attamano hoti sumano evaṁ paresaṁ lābhena attamano
hoti sumano.

[472] Taṁ kiṁ maññatha bhikkhave kathaṁrūpassa bhikkhuno aparisuddhā
dhammadesanā hoti kathaṁrūpassa bhikkhuno parisuddhā dhammadesanā
hotīti. Bhagavaṁmūlakā no bhante dhammā bhagavaṁnettikā
bhagavaṁpaṭisaraṇā sādhu vata bhante bhagavantaṁyeva paṭibhātu etassa
bhāsitassa attho bhagavato sutvā bhikkhū dhāressantīti. Tenahi
bhikkhave suṇātha sādhukaṁ manasikarotha bhāsissāmīti. Evaṁ bhanteti
kho te bhikkhū bhagavato paccassosuṁ. Bhagavā etadavoca yo hi
koci bhikkhave bhikkhu evaṁcitto paresaṁ dhammaṁ deseti aho vata
me dhammaṁ suṇeyyuṁ sutvā ca pana dhammaṁ pasīdeyyuṁ pasannāva 2 me
1 Ma. Yu. panasaddo natthi. 2 Ma. Yu. pasannā ca.
Pasannākāraṁ kareyyunti. Evarūpassa kho bhikkhave bhikkhuno aparisuddhā
dhammadesanā hoti. Yo ca kho bhikkhave bhikkhu evaṁcitto paresaṁ
dhammaṁ deseti svākkhāto bhagavatā dhammo sandiṭṭhiko akāliko
ehipassiko opanayiko 1 paccattaṁ veditabbo viññūhīti aho vata
me dhammaṁ suṇeyyuṁ sutvā ca pana dhammaṁ ājāneyyuṁ ājānitvā ca
pana tathattāya paṭipajjeyyunti iti dhammasudhammataṁ paṭicca paresaṁ
dhammaṁ deseti kāruññaṁ paṭicca paresaṁ dhammaṁ deseti anudayaṁ
paṭicca paresaṁ dhammaṁ deseti anukampaṁ upādāya paresaṁ dhammaṁ
deseti. Evarūpassa kho bhikkhave bhikkhuno parisuddhā dhammadesanā
hoti.

[473] Kassapo bhikkhave evaṁcitto paresaṁ dhammaṁ deseti
svākkhāto bhagavatā dhammo sandiṭṭhiko akāliko ehipassiko
opanayiko 1 paccattaṁ veditabbo viññūhīti aho vata me dhammaṁ
suṇeyyuṁ sutvā ca pana dhammaṁ ājāneyyuṁ ājānitvā ca pana
tathattāya paṭipajjeyyunti iti dhammasudhammataṁ paṭicca paresaṁ dhammaṁ
deseti kāruññaṁ paṭicca paresaṁ dhammaṁ deseti anudayaṁ paṭicca paresaṁ
dhammaṁ deseti anukampaṁ upādāya paresaṁ dhammaṁ deseti. Kassapena
vā hi vo bhikkhave ovadissāmi yo vā panassa kassapādiso
ovaditehi ca pana vo tathattāya paṭipajjitabbanti. Tatiyaṁ.

[474] Sāvatthiyaṁ viharati ... Taṁ kiṁ maññatha bhikkhave kathaṁrūpo
1 Ma. opaneyyiko.
Bhikkhu arahati kulūpako hotuṁ kathaṁrūpo bhikkhu na arahati kulūpako
hotunti. Bhagavaṁmūlakā no bhante dhammā .pe.

[475] Bhagavā etadavoca yo hi koci bhikkhave bhikkhu
evaṁcitto kulāni upasaṅkamati dentuyeva me mā nādaṁsu bahukaññeva
me dentu mā thokaṁ paṇītaññeva me dentu mā lūkhaṁ sīghaññeva
me dentu mā dandhaṁ sakkaccaññeva me dentu mā asakkaccanti.
Tassa ce bhikkhave bhikkhuno evaṁcittassa kulāni upasaṅkamato
na denti tena bhikkhu sandīyati so tatonidānaṁ dukkhaṁ
domanassaṁ paṭisaṁvedayati. Thokaṁ denti no bahukaṁ .pe. Lūkhaṁ
denti no paṇītaṁ dandhaṁ denti no sīghaṁ tena bhikkhu sandīyati
so tatonidānaṁ dukkhaṁ domanassaṁ paṭisaṁvedayati. Asakkaccaṁ
denti no sakkaccaṁ tena bhikkhu sandīyati so tatonidānaṁ dukkhaṁ
domanassaṁ paṭisaṁvedayati. Evarūpo kho bhikkhave bhikkhu na arahati
kulūpako hotuṁ.

[476] Yo ca kho bhikkhave bhikkhu evaṁcitto kulāni upasaṅkamati
taṁ kutettha labbhā parakulesu dentuyeva me mā nādaṁsu bahukaññeva
me dentu mā thokaṁ paṇītaññeva me dentu mā lūkhaṁ sīghaññeva
me dentu mā dandhaṁ sakkaccaññeva me dentu mā asakkaccanti.
Tassa ce bhikkhave bhikkhuno evaṁcittassa kulāni upasaṅkamato na
denti tena bhikkhu na sandīyati so na tatonidānaṁ dukkhaṁ
Domanassaṁ paṭisaṁvedayati. Thokaṁ denti no bahukaṁ tena bhikkhu
na sandīyati so na tatonidānaṁ dukkhaṁ domanassaṁ paṭisaṁvedayati.
Lūkhaṁ denti no paṇītaṁ ... Dandhaṁ denti no sīghaṁ tena bhikkhu na
sandīyati so na tatonidānaṁ dukkhaṁ domanassaṁ paṭisaṁvedayati.
Asakkaccaṁ denti no sakkaccaṁ tena bhikkhu na sandīyati so na
tatonidānaṁ dukkhaṁ domanassaṁ paṭisaṁvedayati. Evarūpo kho bhikkhave
bhikkhu arahati kulūpako hotuṁ.

[477] Kassapo bhikkhave evaṁcitto kulāni upasaṅkamati taṁ
kutettha labbhā parakulesu dentuyeva me mā nādaṁsu bahukaññeva
me dentu mā thokaṁ .pe. Na denti tena kassapo na sandīyati
so na tatonidānaṁ dukkhaṁ domanassaṁ paṭisaṁvedayati. Thokaṁ denti
no bahukaṁ tena kassapo na sandīyati so na tatonidānaṁ
dukkhaṁ domanassaṁ paṭisaṁvedayati. Lūkhaṁ denti no paṇītaṁ tena
kassapo na sandīyati so na tatonidānaṁ dukkhaṁ domanassaṁ
paṭisaṁvedayati. Dandhaṁ denti no sīghaṁ tena kassapo na sandīyati
so na tatonidānaṁ dukkhaṁ domanassaṁ paṭisaṁvedayati. Asakkaccaṁ
denti no sakkaccaṁ tena kassapo na sandīyati so na tatonidānaṁ
dukkhaṁ domanassaṁ paṭisaṁvedayati. Kassapena vā hi vo bhikkhave
ovadissāmi yo vā panassa kassapādiso ovaditehi ca pana
vo tathattāya paṭipajjitabbanti. Catutthaṁ.

[478] Evamme sutaṁ ekaṁ samayaṁ bhagavā rājagahe viharati
veḷuvane .pe. Atha kho āyasmā mahākassapo yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.