[459] Bhūtapubbaṁ bhikkhave imassa vepullassa pabbatassa
supassotveva samaññā udapādi. Tena kho pana bhikkhave samayena
manussānaṁ suppiyātveva samaññā udapādi. Suppiyānaṁ bhikkhave
manussānaṁ vīsativassasahassāni āyuppamāṇaṁ ahosi. Suppiyā
bhikkhave manussā supassaṁ pabbataṁ dvīhena ārohanti dvīhena orohanti.
Tena kho pana bhikkhave samayena kassapo bhagavā arahaṁ sammāsambuddho loke
uppanno hoti. Kassapassa bhikkhave bhagavato arahato sammāsambuddhassa
tissa bhāradvājaṁ nāma sāvakayugaṁ ahosi aggaṁ bhaddayugaṁ.
Passatha bhikkhave sā cevimassa pabbatassa samaññā antarahitā
te ca manussā kālakatā so ca bhagavā parinibbuto. Evaṁ
Aniccā bhikkhave saṅkhārā evaṁ addhuvā bhikkhave saṅkhārā evaṁ
.pe. Alaṁ vimuccituṁ.

[460] Etarahi kho pana bhikkhave imassa vepullassa pabbatassa
vepullotveva samaññā udapādi. Etarahi kho pana bhikkhave
imesaṁ manussānaṁ māgadhakātveva samaññā udapādi. Māgadhakānaṁ
bhikkhave manussānaṁ appakaṁ āyuppamāṇaṁ parittakaṁ lahukaṁ yo ciraṁ
jīvati so vassasataṁ appaṁ vā bhiyyo vā. Māgadhakā bhikkhave manussā
vepullaṁ pabbataṁ muhutteneva ārohanti muhuttena orohanti.
Etarahi kho panāyaṁ bhikkhave arahaṁ sammāsambuddho loke uppanno.
Mayhaṁ kho pana bhikkhave sārīputtamoggallānaṁ nāma sāvakayugaṁ
aggaṁ bhaddayugaṁ. Bhavissati bhikkhave so samayo yā ayañcevimassa
pabbatassa samaññā antaradhāyissati ime ca manussā kālaṁ
karissanti ahañca parinibbāyissāmi. Evaṁ aniccā bhikkhave
saṅkhārā evaṁ addhuvā bhikkhave saṅkhārā evaṁ anassāsikā
bhikkhave saṅkhārā. Yāvañcidaṁ bhikkhave alameva sabbasaṅkhāresu
nibbindituṁ alaṁ virajjituṁ alaṁ vimuccitunti.

[461] Idamavoca bhagavā idaṁ vatvāna sugato athāparaṁ
etadavoca satthā
pācīnavaṁso tivarānaṁ rohitassāna vaṅkato
suppiyānaṁ supassopi 1 māgadhānañca vepulo
1 Ma. supassoti. Yu. supassāti.
Aniccā vata saṅkhārā uppādavayadhammino
uppajjitvā nirujjhanti tesaṁ vūpasamo sukhoti. Dasamaṁ.
Dutiyavaggo dutiyo.
Tassa uddānaṁ
duggataṁ sukhitañceva tiṁsamātā pitena ca
bhātā bhaginī putto ca dhītā vepullapabbataṁ.
Anamataggasaṁyuttaṁ tatiyaṁ samattaṁ.
---------
Kassapasaṁyuttaṁ

[462] Sāvathiyaṁ viharati ... Tatra kho bhagavā ... Santuṭṭhāyaṁ
bhikkhave kassapo itarītarena cīvarena itarītaracīvarasantuṭṭhiyā ca
vaṇṇavādī na ca cīvarahetu anesanaṁ appaṭirūpaṁ āpajjati aladdhā ca
cīvaraṁ na paritassati laddhā ca cīvaraṁ agadhito amucchito anajjhāpanno
ādīnavadassāvī nissaraṇapañño paribhuñjati. Santuṭṭhāyaṁ bhikkhave
kassapo itarītarena piṇḍapātena itarītarapiṇḍapātasantuṭṭhiyā
ca vaṇṇavādī na ca piṇḍapātahetu anesanaṁ appaṭirūpaṁ āpajjati
aladdhā ca piṇḍapātaṁ na paritassati laddhā ca piṇḍapātaṁ
agadhito amucchito anajjhāpanno ādīnavadassāvī nissaraṇapañño
paribhuñjati. Santuṭṭhāyaṁ bhikkhave kassapo itarītarena senāsanena
itarītarasenāsanasantuṭṭhiyā ca vaṇṇavādī na ca senāsanahetu
anesanaṁ appaṭirūpaṁ āpajjati aladdhā ca senāsanaṁ na paritassati
laddhā ca senāsanaṁ agadhito amucchito anajjhāpanno ādīnavadassāvī
nissaraṇapañño paribhuñjati. Santuṭṭhāyaṁ bhikkhave kassapo itarītarena
gilānapaccayabhesajjaparikkhārena itarītaragilānapaccayabhesajjaparikkhārasantuṭṭhiyā
ca vaṇṇavādī na ca gilānapaccayabhesajjaparikkhārahetu
anesanaṁ appaṭirūpaṁ āpajjati aladdhā ca gilānapaccayabhesajjaparikkhāraṁ
na paritassati laddhā ca gilānapaccayabhesajjaparikkhāraṁ agadhito
Amucchito anajjhāpanno ādīnavadassāvī nissaraṇapañño paribhuñjati.

[463] Tasmātiha bhikkhave evaṁ sikkhitabbaṁ santuṭṭhā bhavissāma
itarītarena cīvarena itarītaracīvarasantuṭṭhiyā ca vaṇṇavādino na ca
cīvarahetu anesanaṁ appaṭirūpaṁ āpajjissāma aladdhā ca cīvaraṁ na
paritassissāma laddhā ca cīvaraṁ agadhitā amucchitā anajjhāpannā
ādīnavadassāvino nissaraṇapaññā paribhuñjissāma.
[evaṁ sabbaṁ kātabbaṁ]
santuṭṭhā bhavissāma itarītarena piṇḍapātena .pe. Santuṭṭhā
bhavissāma itarītarena senāsanena .pe. Santuṭṭhā bhavissāma
itarītarena gilānapaccayabhesajjaparikkhārena itarītaragilānapaccayabhesajja-
parikkhārasantuṭṭhiyā ca vaṇṇavādino na ca gilānapaccayabhesajjaparikkhārahetu
anesanaṁ appaṭirūpaṁ āpajjissāma aladdhā ca
gilānapaccayabhesajjaparikkhāraṁ na paritassissāma laddhā ca gilānapaccaya-
bhesajjaparikkhāraṁ agadhitā amucchitā anajjhāpannā ādīnavadassāvino
nissaraṇapaññā paribhuñjissāmāti evañhi vo bhikkhave sikkhitabbaṁ.
Kassapena vā hi vo bhikkhave ovadissāmi yo vā panassa 1
kassapādiso 2 ovaditehi ca pana vo tathattāya paṭipajjitabbanti.
Paṭhamaṁ.

[464] Evamme sutaṁ ekaṁ samayaṁ āyasmā ca mahākassapo
āyasmā ca sārīputto bārāṇasiyaṁ viharanti isipatane migadāye.
1 Yu. ayaṁ pāṭho natthi. 2 Ma. Yu. kassapasadiso. evamuparipi.
Atha kho āyasmā sārīputto sāyaṇhasamayaṁ paṭisallānā vuṭṭhito
yenāyasmā mahākassapo tenupasaṅkami upasaṅkamitvā āyasmatā
mahākassapena saddhiṁ sammodi sammodanīyaṁ kathaṁ sārāṇīyaṁ
vītisāretvā ekamantaṁ nisīdi.

[465] Ekamantaṁ nisinno kho āyasmā sārīputto āyasmantaṁ
mahākassapaṁ etadavoca vuccati hidaṁ āvuso kassapa anātāpī
anottāpī abhabbo sambodhāya abhabbo nibbānāya abhabbo
anuttarassa yogakkhemassa adhigamāya ātāpī ca kho ottāpī
bhabbo sambodhāya bhabbo nibbānāya bhabbo anuttarassa yogakkhemassa
adhigamāya kittāvatā nu kho āvuso anātāpī hoti anottāpī
abhabbo sambodhāya abhabbo nibbānāya abhabbo anuttarassa
yogakkhemassa adhigamāya kittāvatā ca panāvuso ātāpī hoti
ottāpī bhabbo sambodhāya bhabbo nibbānāya bhabbo anuttarassa
yogakkhemassa adhigamāyāti.

[466] Idhāvuso bhikkhu anuppannā me pāpakā akusalā
dhammā uppajjamānā anatthāya saṁvatteyyunti na ātappaṁ karoti
uppannā me pāpakā akusalā dhammā appahīyamānā anatthāya
saṁvatteyyunti na ātappaṁ karoti anuppannā me kusalā dhammā
anuppajjamānā anatthāya saṁvatteyyunti na ātappaṁ karoti
uppannā me kusalā dhammā nirujjhamānā anatthāya saṁvatteyyunti
Na ātappaṁ karoti. Evaṁ kho āvuso anātāpī hoti.

[467] Kathañcāvuso anottāpī hoti. Idhāvuso bhikkhu
anuppannā me pāpakā akusalā dhammā uppajjamānā anatthāya
saṁvatteyyunti na ottappati uppannā me pāpakā akusalā
dhammā appahīyamānā anatthāya saṁvatteyyunti na ottappati
anuppannā me kusalā dhammā anuppajjamānā anatthāya saṁvatteyyunti
na ottappati uppannā me kusalā dhammā nirujjhamānā
anatthāya saṁvatteyyunti na ottappati. Evaṁ kho āvuso
anottāpī hoti. Evaṁ kho āvuso anātāpī anottāpī
abhabbo sambodhāya abhabbo nibbānāya abhabbo anuttarassa
yogakkhemassa adhigamāya.

[468] Kathañcāvuso ātāpī hoti. Idhāvuso bhikkhu anuppannā
me pāpakā akusalā dhammā uppajjamānā anatthāya saṁvatteyyunti
ātappaṁ karoti uppannā me pāpakā akusalā dhammā
appahīyamānā anatthāya saṁvatteyyunti ātappaṁ karoti anuppannā
me kusalā dhammā anuppajjamānā anatthāya saṁvatteyyunti
ātappaṁ karoti uppannā me kusalā dhammā nirujjhamānā
anatthāya saṁvatteyyunti ātappaṁ karoti. Evaṁ kho āvuso
ātāpī hoti.