[489] Rājagahe viharati veḷuvane ... Atha kho āyasmā mahākassapo
yena bhagavā tenupasaṅkami ... Ekamantaṁ nisinnaṁ kho āyasmantaṁ
mahākassapaṁ bhagavā etadavoca ovada kassapa bhikkhū karohi
kassapa bhikkhūnaṁ dhammiṁ kathaṁ ahaṁ vā kassapa bhikkhū ovadeyyaṁ
tvaṁ vā ahaṁ vā bhikkhūnaṁ dhammiṁ kathaṁ kareyyaṁ tvaṁ vāti.
[490] Dubbacā kho bhante bhagavā etarahi bhikkhū
dovacassakaraṇehi dhammehi samannāgatā akkhamā appadakkhiṇaggāhino
anusāsaniṁ. Yassakassaci bhante saddhā natthi kusalesu dhammesu hiri
natthi kusalesu dhammesu ottappaṁ natthi kusalesu dhammesu viriyaṁ
natthi kusalesu dhammesu paññā natthi kusalesu dhammesu tassa
Yā ratti vā divaso vā āgacchati hāniyeva pāṭikaṅkhā kusalesu
dhammesu no vuḍḍhi. Seyyathāpi bhante kāḷapakkhe candassa
yā ratti vā divaso vā āgacchati hāyateva ca 1 vaṇṇena
hāyati maṇḍalena hāyati ābhāya hāyati ārohapariṇāhena evameva
kho bhante yassakassaci saddhā natthi kusalesu dhammesu hiri natthi ...
Ottappaṁ natthi ... Viriyaṁ natthi ... Paññā natthi kusalesu dhammesu
tassa yā ratti vā divaso vā āgacchati hāniyeva pāṭikaṅkhā
kusalesu dhammesu no vuḍḍhi. Assaddho purisapuggaloti bhante
parihānametaṁ ahiriko purisapuggaloti bhante parihānametaṁ anottāpī
purisapuggaloti bhante parihānametaṁ kusīto purisapuggaloti bhante
parihānametaṁ duppañño purisapuggaloti bhante parihānametaṁ kodhano
purisapuggaloti bhante parihānametaṁ upanāhī purisapuggaloti bhante
parihānametaṁ na santi bhikkhū ovādakāti bhante parihānametaṁ.
[491] Yassakassaci bhante saddhā atthi kusalesu dhammesu hiri
atthi kusalesu dhammesu ottappaṁ atthi kusalesu dhammesu viriyaṁ
atthi kusalesu dhammesu paññā atthi kusalesu dhammesu tassa
yā ratti vā divaso vā āgacchati vuḍḍhiyeva pāṭikaṅkhā kusalesu
dhammesu no parihāni. Seyyathāpi bhante juṇhapakkhe candassa
yā ratti vā divaso vā āgacchati vaḍḍhateva ca 1 vaṇṇena
vaḍḍhati maṇḍalena vaḍḍhati ābhāya vaḍḍhati ārohapariṇāhena
1 Ma. Yu. casaddo natthi. evamuparipi.
Evameva kho bhante yassakassaci saddhā atthi kusalesu dhammesu
hiri atthi ... Ottappaṁ atthi ... Viriyaṁ atthi ... Paññā atthi
kusalesu dhammesu tassa yā ratti vā divaso vā āgacchati
vuḍḍhiyeva pāṭikaṅkhā kusalesu dhammesu no parihāni. Saddho
purisapuggaloti bhante aparihānametaṁ hirimā purisapuggaloti bhante
aparihānametaṁ ottāpī purisapuggaloti bhante aparihānametaṁ
āraddhaviriyo purisapuggaloti bhante aparihānametaṁ paññavā
purisapuggaloti bhante aparihānametaṁ akkodhano purisapuggaloti bhante
aparihānametaṁ anupanāhī purisapuggaloti bhante aparihānametaṁ
santi bhikkhū ovādakāti bhante aparihānametanti.
[492] Sādhu sādhu kassapa yassakassaci [1]- saddhā natthi kusalesu
dhammesu hiri natthi ... Ottappaṁ natthi ... Viriyaṁ natthi ... Paññā
natthi kusalesu dhammesu tassa yā ratti vā divaso vā āgacchati
hāniyeva pāṭikaṅkhā kusalesu dhammesu no vuḍḍhi. Seyyathāpi
kassapa kāḷapakkhe candassa yā ratti vā divaso vā āgacchati
hāyateva ca vaṇṇena hāyati maṇḍalena hāyati ābhāya hāyati
ārohapariṇāhena evameva kho kassapa yassakassaci saddhā natthi
kusalesu dhammesu hiri natthi ... Ottappaṁ natthi ... Viriyaṁ natthi ...
Paññā natthi kusalesu dhammesu tassa yā ratti vā divaso vā
āgacchati hāniyeva pāṭikaṅkhā kusalesu dhammesu no vuḍḍhi.
1 Ma. Yu. kassapa.
Assaddho purisapuggaloti kassapa parihānametaṁ ahiriko .pe.
Anottāpī .pe. Kusīto .pe. Duppañño .pe. Kodhano .pe.
Upanāhī purisapuggaloti kassapa parihānametaṁ na santi bhikkhū
ovādakāti kassapa parihānametaṁ.
[493] Yassakassaci kassapa saddhā atthi kusalesu dhammesu
hiri atthi ... Ottappaṁ atthi ... Viriyaṁ atthi ... Paññā atthi
kusalesu dhammesu tassa yā ratti vā divaso vā āgacchati
vuḍḍhiyeva pāṭikaṅkhā kusalesu dhammesu no parihāni. Seyyathāpi
kassapa juṇhapakkhe candassa yā ratti vā divaso vā āgacchati
vaḍḍhateva ca vaṇṇena vaḍḍhati maṇḍalena vaḍḍhati ābhāya vaḍḍhati
ārohapariṇāhena evameva kho kassapa yassakassaci saddhā atthi
kusalesu dhammesu hiri atthi ... Ottappaṁ atthi ... Viriyaṁ atthi ...
Paññā atthi kusalesu dhammesu tassa yā ratti vā divaso vā
āgacchati vuḍḍhiyeva pāṭikaṅkhā kusalesu dhammesu no parihāni.
Saddho purisapuggaloti kassapa aparihānametaṁ hirimā .pe.
Ottāpī .pe. Āraddhaviriyo .pe. Paññavā .pe. Akkodhano .pe.
Anupanāhī purisapuggaloti kassapa aparihānametaṁ santi bhikkhū
ovādakāti kassapa aparihānametanti. Sattamaṁ.
[494] Rājagahe viharati veḷuvane kalandakanivāpe. Atha kho
āyasmā mahākassapo yena bhagavā tenupasaṅkami upasaṅkamitvā
Bhagavantaṁ abhivādetvā ekamantaṁ nisīdi. Ekamantaṁ nisinnaṁ kho
āyasmantaṁ mahākassapaṁ bhagavā etadavoca ovada kassapa bhikkhū
karohi kassapa bhikkhūnaṁ dhammiṁ kathaṁ ahaṁ vā kassapa bhikkhū ovadeyyaṁ
tvaṁ vā ahaṁ vā bhikkhūnaṁ dhammiṁ kathaṁ kareyyaṁ tvaṁ vāti. Dubbacā
kho bhante bhagavā etarahi bhikkhū dovacassakaraṇehi dhammehi
samannāgatā akkhamā appadakkhiṇaggāhino anusāsaninti 1 .
[495] Tathā hi pana kassapa pubbe therā bhikkhū āraññikā
ceva ahesuṁ āraññikattassa ca vaṇṇavādino piṇḍapātikā
ceva ahesuṁ piṇḍapātikattassa ca vaṇṇavādino paṁsukūlikā ceva
ahesuṁ paṁsukūlikattassa ca vaṇṇavādino tecīvarikā ceva ahesuṁ
tecīvarikattassa ca vaṇṇavādino appicchā ceva ahesuṁ
appicchatāya ca vaṇṇavādino santuṭṭhā ceva ahesuṁ santuṭṭhiyā ca
vaṇṇavādino pavivittā ceva ahesuṁ pavivekassa ca vaṇṇavādino
asaṁsaṭṭhā ceva ahesuṁ asaṁsaggassa ca vaṇṇavādino āraddhaviriyā
ceva ahesuṁ viriyārambhassa ca vaṇṇavādino. Tatra yo hoti bhikkhu
āraññiko ceva āraññikattassa ca vaṇṇavādī piṇḍapātiko ceva
piṇḍapātikattassa ca vaṇṇavādī paṁsukūliko ceva paṁsukūlikattassa
ca vaṇṇavādī tecīvariko ceva tecīvarikattassa ca vaṇṇavādī
appiccho ceva appicchatāya ca vaṇṇavādī santuṭṭho ceva
santuṭṭhiyā ca vaṇṇavādī pavivitto ceva pavivekassa ca vaṇṇavādī
1 Yu. anusāsananti.
Asaṁsaṭṭho ceva asaṁsaggassa ca vaṇṇavādī āraddhaviriyo ceva
viriyārambhassa ca vaṇṇavādī taṁ therā bhikkhū āsanena
nimantenti ehi bhikkhu ko nāmāyaṁ bhikkhu bhaddako vatāyaṁ bhikkhu
sikkhākāmo vatāyaṁ bhikkhu ehi bhikkhu idaṁ āsanaṁ nisīdāhīti.
Tatra kassapa navānaṁ bhikkhūnaṁ evaṁ hoti yo kira so hoti bhikkhu
āraññiko ceva āraññikattassa ca vaṇṇavādī piṇḍapātiko
ceva ... Paṁsukūliko ceva ... Tecīvariko ceva ... Appiccho ceva ...
Santuṭṭho ceva ... Pavivitto ceva ... Asaṁsaṭṭho ceva ... Āraddhaviriyo
ceva viriyārambhassa ca vaṇṇavādī taṁ therā bhikkhū āsanena
nimantenti ehi bhikkhu ko nāmāyaṁ bhikkhu bhaddako vatāyaṁ
bhikkhu sikkhākāmo vatāyaṁ bhikkhu ehi bhikkhu idaṁ āsanaṁ nisīdāhīti
te tathattāya paṭipajjanti tesantaṁ hoti dīgharattaṁ hitāya sukhāya.
[496] Etarahi pana kassapa therā bhikkhū na ceva āraññikā
na ca āraññikattassa vaṇṇavādino na ceva piṇḍapātikā
na ca piṇḍapātikattassa vaṇṇavādino na ceva paṁsukūlikā na ca
paṁsukūlikattassa vaṇṇavādino na ceva tecīvarikā na ca tecīvarikattassa
vaṇṇavādino na ceva appicchā na ca appicchatāya vaṇṇavādino
na ceva santuṭṭhā na ca santuṭṭhiyā vaṇṇavādino
na ceva pavivittā na ca pavivekassa vaṇṇavādino na ceva
asaṁsaṭṭhā na ca asaṁsaggassa vaṇṇavādino na ceva āraddhaviriyā
Na ca viriyārambhassa vaṇṇavādino. Tatra yo hoti bhikkhu
ñāto yasassī lābhī cīvarapiṇḍapātasenāsanagilānapaccayabhesajjaparikkhārānaṁ
taṁ therā bhikkhū āsanena nimantenti ehi bhikkhu
ko nāmāyaṁ bhikkhu bhaddako vatāyaṁ bhikkhu sabrahmacārikāmo vatāyaṁ
bhikkhu ehi bhikkhu idaṁ āsanaṁ nisīdāhīti. Tatra kassapa navānaṁ
bhikkhūnaṁ evaṁ hoti yo kira so hoti bhikkhu ñāto yasassī
lābhī cīvarapiṇḍapātasenāsanagilānapaccayabhesajjaparikkhārānaṁ taṁ
therā bhikkhū āsanena nimantenti ehi bhikkhu ko nāmāyaṁ bhikkhu
bhaddako vatāyaṁ bhikkhu sabrahmacārikāmo vatāyaṁ bhikkhu ehi bhikkhu
idaṁ āsanaṁ nisīdāhīti te tathattāya paṭipajjanti tesantaṁ hoti
dīgharattaṁ ahitāya dukkhāya. Yañhi taṁ kassapa sammā vadamāno
vadeyya upaddutā brahmacārī brahmacārūpaddavena abhivānā 1
brahmacārī brahmacārābhivānenāti 2 . Etarahi taṁ kassapa sammā
vadamāno vadeyya upaddutā brahmacārī brahmacārūpaddavena
abhivānā brahmacārī brahmacārābhivānenāti. Aṭṭhamaṁ.
[497] Sāvatthiyaṁ viharati ... Ahaṁ bhikkhave yāvadeva ākaṅkhāmi
vivicceva kāmehi vivicca akusalehi dhammehi savitakkaṁ savicāraṁ vivekajaṁ
pītisukhaṁ paṭhamaṁ jhānaṁ upasampajja viharāmi. Kassapopi bhikkhave
yāvadeva ākaṅkhati vivicceva kāmehi vivicca akusalehi dhammehi
savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
1 Ma. abhipatthanā. Yu. abhibhavanā. 2 Ma. brahmacāriabhipatthanenāti.
Yu. brahmacārābhibhavanenāti.
[498] Ahaṁ bhikkhave yāvadeva ākaṅkhāmi vitakkavicārānaṁ
vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ
samādhijaṁ pītisukhaṁ dutiyaṁ jhānaṁ upasampajja viharāmi. Kassapopi
bhikkhave yāvadeva ākaṅkhati vitakkavicārānaṁ vūpasamā .pe. Dutiyaṁ
jhānaṁ upasampajja viharati.