[219] Seyyathāpi bhikkhave mahā rukkho atha puriso
āgaccheyya kuddālapiṭakaṁ ādāya .pe. Āyatiṁ anuppādadhammo
evameva kho bhikkhave saññojaniyesu dhammesu ādīnavānupassino
viharato nāmarūpassa avakkanti na hoti nāmarūpanirodhā saḷāyatananirodho
.pe. Evametassa kevalassa dukkhakkhandhassa nirodho hotīti.
Aṭṭhamaṁ.

[220] Sāvatthiyaṁ viharati ... Tatra kho bhagavā ... Saññojaniyesu
bhikkhave dhammesu assādānupassino viharato viññāṇassa avakkanti
hoti viññāṇapaccayā nāmarūpaṁ .pe. Evametassa kevalassa
dukkhakkhandhassa samudayo hoti.

[221] Seyyathāpi bhikkhave mahā rukkho tassa yāni ceva
Mūlāni .pe. Evameva kho bhikkhave saññojaniyesu dhammesu
assādānupassino viharato viññāṇassa avakkanti hoti viññāṇapaccayā
nāmarūpaṁ .pe. Evametassa kevalassa dukkhakkhandhassa
samudayo hoti.

[222] Saññojaniyesu bhikkhave dhammesu ādīnavānupassino
viharato viññāṇassa avakkanti na hoti viññāṇanirodhā
nāmarūpanirodho .pe. Evametassa kevalassa dukkhakkhandhassa nirodho
hoti.

[223] Seyyathāpi bhikkhave mahā rukkho atha puriso
āgaccheyya kuddālapiṭakaṁ ādāya .pe. Āyatiṁ anuppādadhammo
evameva kho bhikkhave saññojaniyesu dhammesu ādīnavānupassino
viharato viññāṇassa avakkanti na hoti viññāṇanirodhā
nāmarūpanirodho .pe. Evametassa kevalassa dukkhakkhandhassa nirodho
hotīti. Navamaṁ.

[224] Ekaṁ samayaṁ bhagavā kurūsu viharati kammāsadammaṁ 1 nāma
kurūnaṁ nigamo. Atha kho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā ānando bhagavantaṁ etadavoca acchariyaṁ
bhante abbhūtaṁ bhante yāvagambhīro cāyaṁ bhante paṭiccasamuppādo
1 kammāsadhammantipi pāṭho.
Gambhīrāvabhāso ca atha ca pana me uttānakuttānako viya
khāyatīti.

[225] Mā hevaṁ ānanda mā hevaṁ ānanda gambhīro cāyaṁ
ānanda paṭiccasamuppādo gambhīrāvabhāso ca etassa ānanda
dhammassa aññāṇā ananubodhā appaṭivedhā evamayaṁ pajā
tantākulajātā guḷīguṇṭhikajātā 1 muñjapabbajabhūtā apāyaṁ duggatiṁ
vinipātaṁ saṁsāraṁ nātivattati.

[226] Upādāniyesu ānanda dhammesu assādānupassino viharato
taṇhā pavaḍḍhati taṇhāpaccayā upādānaṁ upādānapaccayā
bhavo bhavapaccayā jāti jātipaccayā jarāmaraṇaṁ sokaparidevadukkhadomanassupāyāsā
sambhavanti evametassa kevalassa dukkhakkhandhassa
samudayo hoti.

[227] Seyyathāpi ānanda mahā rukkho tassa yāni ceva
mūlāni adhogamāni yāni ca tiriyaṅgamāni sabbāni tāni uddhaṁ
ojaṁ abhiharanti evañhi so ānanda mahā rukkho tadāhāro
tadupādāno ciraṁ dīghamaddhānaṁ tiṭṭheyya evameva kho ānanda
upādāniyesu dhammesu assādānupassino viharato taṇhā pavaḍḍhati
taṇhāpaccayā upādānaṁ upādānapaccayā bhavo .pe.
Evametassa kevalassa dukkhakkhandhassa samudayo hoti.

[228] Upādāniyesu ānanda dhammesu ādīnavānupassino viharato
1 Ma. kulagaṇṭhikajātā. Yu. guḷiganudhikajātā.
Taṇhā nirujjhati taṇhānirodhā upādānanirodho upādānanirodhā
bhavanirodho .pe. Evametassa kevalassa dukkhakkhandhassa nirodho
hoti.