[209] Seyyathāpi bhikkhave mahā rukkho atha puriso
āgaccheyya kuddālapiṭakaṁ ādāya so taṁ rukkhaṁ mūle chindeyya
mūle chetvā palikhaneyya palikhanitvā mūlāni uddhareyya antamaso
usīranāḷimattānipi. So taṁ rukkhaṁ khaṇḍākhaṇḍikaṁ chindeyya khaṇḍākhaṇḍikaṁ
chinditvā phāleyya phāletvā sakalikaṁ sakalikaṁ kareyya
sakalikaṁ sakalikaṁ karitvā vātātape visoseyya vātātape visosetvā
agginā ḍaheyya agginā ḍahetvā masiṁ kareyya masiṁ karitvā
mahāvāte vā ophuneyya 1 nadiyā vā sīghasotāya pavāheyya evañhi
so bhikkhave mahā rukkho ucchinnamūlo assa tālāvatthukato
anabhāvaṅgato 2 āyatiṁ anuppādadhammo evameva kho bhikkhave
upādāniyesu dhammesu ādīnavānupassino viharato taṇhā nirujjhati
taṇhānirodhā upādānanirodho upādānanirodhā bhavanirodho .pe.
Evametassa kevalassa dukkhakkhandhassa nirodho hotīti. Pañcamaṁ.

[210] Sāvatthiyaṁ viharati ... Tatra kho bhagavā ... Seyyathāpi
bhikkhave mahā rukkho tassa yāni ceva mūlāni adhogamāni yāni ca
1 Ma. ophuṇeyya. Yu. opuneyya. 2 Ma. Yu. anabhāvaṅkato. evamuparipi.
Tiriyaṅgamāni sabbāni tāni uddhaṁ ojaṁ abhiharanti evañhi
so bhikkhave mahā rukkho tadāhāro tadupādāno ciraṁ dīghamaddhānaṁ
tiṭṭheyya evameva kho bhikkhave upādāniyesu dhammesu assādānupassino
viharato taṇhā pavaḍḍhati taṇhāpaccayā upādānaṁ .pe.
Evametassa kevalassa dukkhakkhandhassa samudayo hoti.

[211] Seyyathāpi bhikkhave mahā rukkho atha puriso
āgaccheyya kuddālapiṭakaṁ ādāya so taṁ rukkhaṁ mūle chindeyya mūle
chetvā palikhaneyya palikhanitvā mūlāni uddhareyya .pe. Nadiyā
vā sīghasotāya pavāheyya evañhi so bhikkhave mahā rukkho
ucchinnamūlo assa tālāvatthukato anabhāvaṅgato āyatiṁ anuppādadhammo
evameva kho bhikkhave upādāniyesu dhammesu ādīnavānupassino
viharato taṇhā nirujjhati taṇhānirodhā upādānanirodho .pe.
Evametassa kevalassa dukkhakkhandhassa nirodho hotīti. Chaṭṭhaṁ.

[212] Sāvatthiyaṁ viharati ... Tatra kho bhagavā ... Saññojaniyesu
bhikkhave dhammesu assādānupassino viharato taṇhā pavaḍḍhati
taṇhāpaccayā upādānaṁ .pe. Evametassa kevalassa dukkhakkhandhassa
samudayo hoti.

[213] Seyyathāpi bhikkhave taruṇo rukkho tassa puriso
kālena kālaṁ mūlāni palisajjeyya 1 kālena kālaṁ paṁsuṁ dadeyya
1 Ma. palimajjeyya.
Kālena kālaṁ udakaṁ dadeyya evañhi so bhikkhave taruṇo rukkho
tadāhāro tadupādāno vuḍḍhiṁ virūḷhiṁ vepullaṁ āpajjeyya evameva
kho bhikkhave saññojaniyesu dhammesu assādānupassino viharato
taṇhā pavaḍḍhati taṇhāpaccayā upādānaṁ .pe. Evametassa
kevalassa dukkhakkhandhassa samudayo hoti.

[214] Saññojaniyesu bhikkhave dhammesu ādīnavānupassino viharato
taṇhā nirujjhati taṇhānirodhā upādānanirodho .pe.
Evametassa kevalassa dukkhakkhandhassa nirodho hoti.

[215] Seyyathāpi bhikkhave taruṇo rukkho atha puriso
āgaccheyya kuddālapiṭakaṁ ādāya .pe. Nadiyā vā sīghasotāya
pavāheyya evañhi so bhikkhave taruṇo rukkho ucchinnamūlo assa
tālāvatthukato anabhāvaṅgato āyatiṁ anuppādadhammo evameva kho
bhikkhave saññojaniyesu dhammesu ādīnavānupassino viharato taṇhā
nirujjhati taṇhānirodhā upādānanirodho .pe. Evametassa
kevalassa dukkhakkhandhassa nirodho hotīti. Sattamaṁ.

[216] Sāvatthiyaṁ viharati ... Tatra kho bhagavā ... Saññojaniyesu
bhikkhave dhammesu assādānupassino viharato nāmarūpassa avakkanti
hoti nāmarūpapaccayā saḷāyatanaṁ .pe. Evametassa kevalassa
dukkhakkhandhassa samudayo hoti.

[217] Seyyathāpi bhikkhave mahā rukkho tassa yāni ceva
Mūlāni adhogamāni yāni ca tiriyaṅgamāni sabbāni tāni uddhaṁ
ojaṁ abhiharanti evañhi so bhikkhave mahā rukkho tadāhāro
tadupādāno ciraṁ dīghamaddhānaṁ tiṭṭheyya evameva kho bhikkhave
saññojaniyesu dhammesu assādānupassino viharato nāmarūpassa
avakkanti hoti nāmarūpapaccayā saḷāyatanaṁ .pe. Evametassa
kevalassa dukkhakkhandhassa samudayo hoti.

[218] Saññojaniyesu bhikkhave dhammesu ādīnavānupassino viharato
nāmarūpassa avakkanti na hoti nāmarūpanirodhā saḷāyatananirodho .pe.
Evametassa kevalassa dukkhakkhandhassa nirodho hoti.