[927] Na kho devānaminda tathāgatā evaṁ vanditabbā.
Evañca kho devānaminda tathāgatā vanditabbā
uṭṭhāhi vīra vijitasaṅgāma
satthavāha anaṇa vicara loke
desetu 1 bhagavā dhammaṁ aññātāro bhavissantīti.
Aṭṭhamaṁ paṭhamasakkanamassanasuttaṁ

[928] Sāvatthīnidānaṁ. Bhūtapubbaṁ bhikkhave sakko devānamindo
mātaliṁ saṅgāhakaṁ āmantesi yojehi samma mātali sahassayuttaṁ
ājaññarathaṁ uyyānabhūmiṁ gacchāma subhūmiṁ dassanāyāti. Evaṁ
bhaddantavāti kho bhikkhave mātali saṅgāhako sakkassa devānamindassa
paṭissutvā sahassayuttaṁ ājaññarathaṁ yojetvā sakkassa
devānamindassa paṭivedesi yutto kho te mārisa sahassayutto
ājaññaratho yassadāni kālaṁ maññasīti. Atha kho bhikkhave
sakko devānamindo vejayantapāsādā orohanto añjaliṁ katvā 2
sudaṁ puthuddisā namassati.
1 Po. Ma. desassu. 2 Yu. pañjaliko.

[929] Atha kho bhikkhave mātali saṅgāhako sakkaṁ devānamindaṁ
gāthāya ajjhabhāsi
taṁ namassanti tevijjā sabbe bhummā ca khattiyā
cattāro ca mahārājā tidasā ca yasassino
atha ko nāma so yakkho yaṁ tvaṁ sakka namassasīti.

[930] Yaṁ namassanti tevijjā sabbe bhummā ca khattiyā
cattāro ca mahārājā tidasā ca yasassino
ahañca sīlasampanne cirarattasamāhite
sammā pabbajite vande brahmacariyaparāyane
ye gahaṭṭhā puññakarā sīlavanto upāsakā
dhammena dāraṁ posenti te namassāmi mātalīti.

[931] Seṭṭhā hi kira lokasmiṁ ye tvaṁ sakka namassasi
ahampi te namassāmi ye namassasi vāsavāti.

[932] Idaṁ vatvāna maghavā devarājā sujampati
puthuddisā namassitvā pamukho rathamāruhīti.
Navamaṁ dutiyasakkanamassanasuttaṁ

[933] Sāvatthīnidānaṁ. Bhūtapubbaṁ bhikkhave sakko devānamindo
mātaliṁ saṅgāhakaṁ āmantesi yojehi samma mātali sahassayuttaṁ
ājaññarathaṁ uyyānabhūmiṁ gacchāma subhūmiṁ dassanāyāti. Evaṁ
bhaddantavāti kho bhikkhave mātali saṅgāhako sakkassa devānamindassa
Paṭissutvā sahassayuttaṁ ājaññarathaṁ yojetvā sakkassa
devānamindassa paṭivedesi yutto kho te mārisa sahassayutto
ājaññaratho yassadāni kālaṁ maññasīti. Atha kho bhikkhave
sakko devānamindo vejayantapāsādā orohanto añjaliṁ katvā
sudaṁ bhagavantaṁ namassati.

[934] Atha kho bhikkhave mātali saṅgāhako sakkaṁ devānamindaṁ
gāthāya ajjhabhāsi
yaṁ hi devā manussā ca taṁ namassanti vāsava
atha ko nāma so yakkho yaṁ tvaṁ sakka namassasīti.

[935] Yo idha sammāsambuddho asmiṁ loke sadevake
anomanāmaṁ satthāraṁ taṁ namassāmi mātali
yesaṁ rāgo ca doso ca avijjā ca virājitā
khīṇāsavā arahanto te namassāmi mātali
ye rāgadosavinayā avijjāsamatikkamā
sekkhā apacayārāmā appamattānusikkhare
............... Te namassāmi mātalīti.

[936] Seṭṭhā hi kira lokasmiṁ ye tvaṁ sakka namassasi
ahampi te namassāmi ye namassasi vāsavāti.