[937] Idaṁ vatvāna maghavā devarājā sujampati
bhagavantaṁ namassitvā pamukho rathamāruhīti.
Dasamaṁ tatiyasakkanamassanasuttaṁ

[938] Sāvatthīnidānaṁ. Bhūtapubbaṁ bhikkhave sakko devānamindo
mātaliṁ saṅgāhakaṁ āmantesi yojehi samma mātali sahassayuttaṁ
ājaññarathaṁ uyyānabhūmiṁ gacchāma subhūmiṁ dassanāyāti. Evaṁ
bhaddantavāti kho bhikkhave mātali saṅgāhako sakkassa devānamindassa
paṭissutvā sahassayuttaṁ ājaññarathaṁ yojetvā sakkassa
devānamindassa paṭivedesi yutto kho te mārisa sahassayutto
ājaññaratho yassadāni kālaṁ maññasīti. Atha kho bhikkhave sakko
devānamindo vejayantapāsādā orohanto añjaliṁ katvā sudaṁ
bhikkhusaṅghaṁ namassati.

[939] Atha kho bhikkhave mātali saṅgāhako sakkaṁ devānamindaṁ
gāthāya ajjhabhāsi
taṁ hi ete namasseyyuṁ pūtidehasayā narā
nimuggā kuṇapasmete 1 khuppipāsā samappitā
kiṁ nu tesaṁ pihayasi anāgārāna vāsava
ācāraṁ isinaṁ brūhi taṁ suṇoma vaco tavāti.

[940] Etaṁ tesaṁ pihayāmi anāgārāna mātali
yamhā gāmā pakkamanti anapekkhā vajanti te
na tesaṁ koṭṭhe openti na kumbhā na kaḷopiyaṁ
paraniṭṭhitamesanā 2 tena yāpenti subbatā
1 Ma. kuṇapamhete Yu. kuṇapesavete. 2 Ma. Yu. ... mesānā.
Sumantamantino dhīrā tuṇhībhūtā samañcarā
devā viruddhā asurehi puthumaccā ca mātali
aviruddhā viruddhesu attadaṇḍesu nibbutā
sādānesu anādānā te namassāmi mātalīti.

[941] Seṭṭhā hi kira lokasmiṁ ye tvaṁ sakka namassasi
ahampi te namassāmi ye namassasi vāsavāti.

[942] Idaṁ vatvāna maghavā devarājā sujampati
bhikkhusaṅghaṁ namassitvā pamukho rathamāruhīti.
Dutiyo vaggo.
Tassuddānaṁ
vatapadena 1 tayo vuttā daḷiddañca rāmaṇeyyakaṁ
yajamānañca vandanā tayo sakkanamassanāti.
1 Yu. devā pana.
Sakkapañcakaṁ tatiyaṁ
---------
paṭhamaṁ ghatvāsuttaṁ

[943] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Atha kho sakko devānamindo yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ aṭṭhāsi.

[944] Ekamantaṁ ṭhito kho sakko devānamindo bhagavantaṁ gāthāya
ajjhabhāsi
kiṁsu ghatvā 1 sukhaṁ seti kiṁsu ghatvā na socati
kissassa 2 ekadhammassa vadhaṁ rocesi gotamāti.

[945] Kodhaṁ ghatvā sukhaṁ seti kodhaṁ ghatvā na socati
kodhassa visamūlassa madhuraggassa vāsava
vadhaṁ ariyā pasaṁsanti taṁ hi ghatvā na socatīti.
Dutiyaṁ dubbaṇṇiyasuttaṁ

[946] Sāvatthīnidānaṁ. Bhūtapubbaṁ bhikkhave aññataro yakkho
dubbaṇṇo okoṭimako sakkassa devānamindassa āsane nisinno
ahosi. Tatra sudaṁ bhikkhave devā tāvatiṁsā ujjhāyanti khīyanti
vipācenti acchariyaṁ vata bho abbhūtaṁ vata bho ayaṁ yakkho
dubbaṇṇo okoṭimako sakkassa devānamindassa āsane nisinnoti.
1 Ma. Yu. chetvā. sabbattha evaṁ ñātabbaṁ. 2 Ma. kissassu.
Yathā yathā kho bhikkhave devā tāvatiṁsā ujjhāyanti khīyanti vipācenti
tathā tathā so yakkho abhirūpataro ceva hoti dassanīyataro ca
pāsādikataro ca.