[947] Atha kho bhikkhave devā tāvatiṁsā yena sakko devānamindo
tenupasaṅkamiṁsu upasaṅkamitvā sakkaṁ devānamindaṁ etadavocuṁ
idha te mārisa aññataro yakkho dubbaṇṇo okoṭimako tumhākaṁ
āsane nisinno. Tatra sudaṁ mārisa devā tāvatiṁsā ujjhāyanti
khīyanti vipācenti acchariyaṁ vata bho abbhūtaṁ vata bho ayaṁ
yakkho dubbaṇṇo okoṭimako sakkassa devānamindassa āsane
nisinnoti yathā yathā kho mārisa devā tāvatiṁsā ujjhāyanti
khīyanti vipācenti tathā tathā so yakkho abhirūpataro ceva hoti
dassanīyataro ca pāsādikataro cāti so hi nūna mārisa kodhabhakkho
yakkho bhavissatīti.

[948] Atha kho bhikkhave sakko devānamindo yena so kodhabhakkho
yakkho tenupasaṅkami upasaṅkamitvā ekaṁsaṁ uttarāsaṅgaṁ karitvā
dakkhiṇajānumaṇḍalaṁ paṭhaviyaṁ nihatvā 1 yena so kodhabhakkho
yakkho tenañjalimpaṇāmetvā tikkhattuṁ nāmaṁ sāveti sakvāhaṁ
mārisa devānamindo ... Sakvāhaṁ mārisa devānamindoti. Yathā yathā
kho bhikkhave sakko devānamindo nāmaṁ sāveti tathā tathā so
yakkho dubbaṇṇataro ceva ahosi okoṭimakataro ca dubbaṇṇataro
1 Po. nihacca. Ma. Yu. nihantvā.
Ceva hutvā okoṭimakataro ca tatthevantaradhāyi.

[949] Atha kho bhikkhave sakko devānamindo sake āsane
nisīditvā deve tāvatiṁse anunayamāno tāyaṁ velāyaṁ imā gāthāyo
abhāsi
na sūpahatacittomhi nāvaṭṭena suvānayo
na vo cirāhaṁ kujjhāmi kodho mayi nāvatiṭṭhati
kuddhāhaṁ na pharusaṁ brūmi na ca dhammāni kittaye
sanniggaṇhāmi attānaṁ sampassaṁ atthamattanoti.
Tatiyaṁ māyāsuttaṁ

[950] Sāvatthīnidānaṁ. Bhūtapubbaṁ bhikkhave vepacitti asurindo
ābādhiko ahosi dukkhito bāḷhagilāno. Atha kho bhikkhave sakko
devānamindo yena vepacitti asurindo tenupasaṅkami gilānapucchako.
Addasā kho bhikkhave vepacitti asurindo sakkaṁ devānamindaṁ
dūratova āgacchantaṁ disvāna sakkaṁ devānamindaṁ etadavoca
tikiccha maṁ devānamindāti. Vācehi maṁ vepacitti sambarimāyanti.
Na tāvāhaṁ vācemi yāvāhaṁ mārisa asure paṭipucchāmīti. Atha
kho bhikkhave vepacitti asurindo asure paṭipucchi vācemahaṁ mārisā
sakkaṁ devānamindaṁ sambarimāyanti. Mā kho tvaṁ mārisa vācesi
sakkaṁ devānamindaṁ sambarimāyanti.

[951] Atha kho bhikkhave vepacitti asurindo sakkaṁ devānamindaṁ
Gāthāya ajjhabhāsi
māyāvī maghavā sakka devarājā sujampati
upeti nirayaṁ ghoraṁ sambarova sataṁ samanti.
Catutthaṁ accayasuttaṁ

[952] Ekaṁ samayaṁ bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena dve bhikkhū
sampayojesuṁ. Tatreko bhikkhu accasarā. Atha kho so bhikkhu
tassa bhikkhuno santike accayaṁ accayato deseti. So bhikkhu na
paṭiggaṇhāti.

[953] Atha kho sambahulā bhikkhū yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ
nisinnā kho te bhikkhū bhagavantaṁ etadavocuṁ idha bhante dve
bhikkhū sampayojesuṁ tatreko bhikkhu accasarā atha kho bhante
so bhikkhu tassa bhikkhuno santike accayaṁ accayato deseti so
bhikkhu na paṭiggaṇhātīti.

[954] Dveme bhikkhave bālā. Yo ca accayaṁ accayato
na passati yo ca accayaṁ desentassa yathādhammaṁ na paṭiggaṇhāti.
Ime kho bhikkhave dve bālā. Dveme bhikkhave paṇḍitā.
Yo ca accayaṁ accayato passati yo ca accayaṁ desentassa
yathādhammaṁ paṭiggaṇhāti. Ime kho bhikkhave dve paṇḍitā.

[955] Bhūtapubbaṁ bhikkhave sakko devānamindo sudhammāyaṁ sabhāyaṁ
deve tāvatiṁse anunayamāno tāyaṁ velāyaṁ imaṁ gāthaṁ abhāsi
kodho vo vasamāyātu mā ca mitte hi vo jarā
agarahiyaṁ mā garahittha mā ca bhāsittha pesuṇaṁ
atha pāpajanaṁ kodho pabbatovābhimaddatīti.
Pañcamaṁ akkodhasuttaṁ

[956] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā bhikkhū .pe.