[907] Idamavoca bhagavā idaṁ vatvāna sugato athāparaṁ
etadavoca satthā
1-2 Ma. Yu. vatapadāni.
Mātāpettibharaṁ jantuṁ kule jeṭṭhāpacāyinaṁ
saṇhaṁ sakhilasambhāsaṁ pesuṇeyyappahāyinaṁ
maccheravinaye yuttaṁ saccaṁ kodhābhibhuṁ naraṁ
taṁ ve devā tāvatiṁsā āhu sappuriso itīti.
Dutiyaṁ dutiyadevasuttaṁ

[908] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Tatra kho bhagavā bhikkhū .pe.

[909] Bhagavā etadavoca sakko bhikkhave devānamindo
pubbe manussabhūto samāno magho nāma māṇavo ahosi tasmā
maghavāti vuccati. Sakko bhikkhave devānamindo pubbe manussabhūto
samāno pure dānaṁ adāsi tasmā purindadoti vuccati.
Sakko bhikkhave devānamindo pubbe manussabhūto samāno sakkaccaṁ
dānaṁ adāsi tasmā sakkoti vuccati. Sakko bhikkhave
devānamindo pubbe manussabhūto samāno āvasathaṁ adāsi tasmā
vāsavoti vuccati. Sakko bhikkhave devānamindo sahassampi
atthānaṁ muhuttena cinteti tasmā sahassakkhoti vuccati.
Sakkassa bhikkhave devānamindassa sujā nāma asurakaññā pajāpatī
tasmā sujampatīti vuccati. Sakko bhikkhave devānamindo devānaṁ
tāvatiṁsānaṁ issariyādhipaccaṁ rajjaṁ kāreti 1 tasmā devānamindoti
vuccati.
1 Yu. kāresi.

[910] Sakkassa bhikkhave devānamindassa pubbe manussabhūtassa
satta vattapadāni samattāni samādinnāni ahesuṁ yesaṁ samādinnattā
sakko sakkattaṁ ajjhagā. Katamāni satta. Yāvajīvaṁ mātāpettibharo
assaṁ yāvajīvaṁ kule jeṭṭhāpacāyī assaṁ yāvajīvaṁ saṇhavāco assaṁ
yāvajīvaṁ apisuṇavāco assaṁ yāvajīvaṁ vigatamalamaccherena cetasā
agāraṁ ajjhāvaseyyaṁ muttacāgo payatapāṇī vossaggarato yācayogo
dānasaṁvibhāgarato yāvajīvaṁ saccavāco assaṁ yāvajīvaṁ akkodhano
assaṁ sacepi me kodho uppajjeyya khippameva naṁ paṭivineyyanti.
Sakkassa bhikkhave devānamindassa pubbe manussabhūtassa imāni satta
vattapadāni samattāni samādinnāni ahesuṁ yesaṁ samādinnattā
sakko sakkattaṁ ajjhagāti.

[911] Idamavoca .pe.
Mātāpettibharaṁ jantuṁ kule jeṭṭhāpacāyinaṁ
saṇhaṁ sakhilasambhāsaṁ pesuṇeyyappahāyinaṁ
maccheravinaye yuttaṁ saccaṁ kodhābhibhuṁ naraṁ
taṁ ve devā tāvatiṁsā āhu sappuriso itīti.
Tatiyaṁ tatiyadevasuttaṁ

[912] Evamme sutaṁ ekaṁ samayaṁ bhagavā vesāliyaṁ viharati
mahāvane kūṭāgārasālāyaṁ. Atha kho mahalī 1 licchavī yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
1 Ma. Yu. sabbattha mahālī.
Ekamantaṁ nisinno kho mahalī licchavī bhagavantaṁ etadavoca diṭṭho vo 1
bhante 2 sakko devānamindoti. Diṭṭho kho me mahali sakko
devānamindoti. So hi nūna bhante sakkapaṭirūpako bhavissati duddaso
hi bhante sakko devānamindoti.

[913] Sakkañcāhaṁ mahali pajānāmi sakkakaraṇe ca dhamme
yesañca dhammānaṁ samādinnattā sakko sakkattaṁ ajjhagā tañca
pajānāmi. Sakko mahali devānamindo pubbe manussabhūto samāno
magho nāma māṇavo ahosi tasmā maghavāti vuccati. Sakko
mahali devānamindo pubbe manussabhūto samāno pure dānaṁ adāsi
tasmā purindadoti vuccati. Sakko mahali devānamindo pubbe
manussabhūto samāno sakkaccaṁ dānaṁ adāsi tasmā sakkoti
vuccati. Sakko mahali devānamindo pubbe manussabhūto samāno
āvasathaṁ adāsi tasmā vāsavoti vuccati. Sakko mahali
devānamindo sahassampi atthānaṁ muhuttena cinteti tasmā
sahassakkhoti vuccati. Sakkassa mahali devānamindassa sujā nāma
asurakaññā pajāpatī tasmā sujampatīti vuccati. Sakko mahali
devānamindo devānaṁ tāvatiṁsānaṁ issariyādhipaccaṁ rajjaṁ kāreti 3
tasmā devānamindoti vuccati.

[914] Sakkassa mahali devānamindassa pubbe manussabhūtassa
1 Ma. kho. 2 Sī. Yu. diṭṭho no bhante bhagavatā. 3 Yu. kāresi.
Satta vattapadāni samattāni samādinnāni ahesuṁ yesaṁ samādinnattā
sakko sakkattaṁ ajjhagā. Katamāni satta. Yāvajīvaṁ mātāpettibharo
assaṁ yāvajīvaṁ kule jeṭṭhāpacāyī assaṁ yāvajīvaṁ saṇhavāco assaṁ
yāvajīvaṁ apisuṇavāco assaṁ yāvajīvaṁ vigatamalamaccherena cetasā
agāraṁ ajjhāvaseyyaṁ muttacāgo payatapāṇī vossaggarato yācayogo
dānasaṁvibhāgarato yāvajīvaṁ saccavāco assaṁ yāvajīvaṁ akkodhano
assaṁ sacepi me kodho uppajjeyya khippameva naṁ paṭivineyyanti.
Sakkassa mahali devānamindassa pubbe manussabhūtassa imāni satta
vattapadāni samattāni samādinnāni ahesuṁ yesaṁ samādinnattā
sakko sakkattaṁ ajjhagāti.

[915] Idamavoca .pe.
Mātāpettibharaṁ jantuṁ kule jeṭṭhāpacāyinaṁ
saṇhaṁ sakhilasambhāsaṁ pesuṇeyyappahāyinaṁ
maccheravinaye yuttaṁ saccaṁ kodhābhibhuṁ naraṁ
taṁ ve devā tāvatiṁsā āhu sappuriso itīti.
Catutthaṁ daḷiddasuttaṁ

[916] Ekaṁ samayaṁ bhagavā rājagahe viharati veḷuvane kalandakanivāpe.
Tatra kho bhagavā bhikkhū āmantesi bhikkhavoti.
Bhadanteti te bhikkhū bhagavato paccassosuṁ.