[897] Atha kho bhikkhave te isayo sīlavanto kalyāṇadhammā
sakkaṁ devānamindaṁ gāthāya ajjhabhāsiṁsu
1 Po. Ma. paṭaliyo.
Gandho isīnaṁ ciradakkhitānaṁ
kāyā cuto gacchati mālutena
ito paṭikkamma sahassanetta
gandho isīnaṁ asuci devarājāti.

[898] Gandho isīnaṁ ciradakkhitānaṁ
kāyā cuto gacchati 1 mālutena
sucitrapupphaṁ sirasmiṁva mālaṁ
gandhaṁ etaṁ paṭikaṅkhāma bhante
na hettha devā paṭikkūlasaññinoti.
Dasamaṁ samuddakasuttaṁ

[899] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Tatra kho .pe.

[900] Bhagavā etadavoca bhūtapubbaṁ bhikkhave sambahulā isayo
sīlavanto kalyāṇadhammā samuddatīre paṇṇakuṭīsu sammanti. Tena
kho pana samayena bhikkhave devāsurasaṅgāmo samupabyūḷho ahosi.
Atha kho bhikkhave tesaṁ isīnaṁ sīlavantānaṁ kalyāṇadhammānaṁ etadahosi
dhammikā kho devā adhammikā asurā siyāpi naṁ 2 asurato bhayaṁ
yannūna mayaṁ sambaraṁ asurindaṁ upasaṅkamitvā abhayadakkhiṇaṁ
yāceyyāmāti.

[901] Atha kho bhikkhave te isayo sīlavanto kalyāṇadhammā
1 Po. Ma. Yu. gacchatu. 2 Ma. no.
Seyyathāpi nāma balavā puriso sammiñjitaṁ vā bāhaṁ pasāreyya
pasāritaṁ vā bāhaṁ sammiñjeyya evameva samuddatīre paṇṇakuṭīsu
antarahitā sambarassa asurindassa sammukhe pāturahesuṁ. Atha kho
bhikkhave te isayo sīlavanto kalyāṇadhammā sambaraṁ asurindaṁ
gāthāya ajjhabhāsiṁsu
isayo sambaraṁ pattā yācanti abhayadakkhiṇaṁ
kāmaṁ karosi 1 te dātuṁ bhayassa abhayassa vāti.

[902] Isīnaṁ abhayaṁ natthi duṭṭhānaṁ sakkasevinaṁ
abhayaṁ yācamānānaṁ bhayameva dadāmi voti.

[903] Abhayaṁ yācamānānaṁ bhayameva dadāsi no
paṭiggaṇhāma te ekaṁ 2 abhayaṁ 3 hotu te bhayaṁ
yādisaṁ labhate 4 bījaṁ tādisaṁ labhate 5 phalaṁ
kalyāṇakārī kalyāṇaṁ pāpakārī ca pāpakaṁ
pavuttaṁ tāta 6 te bījaṁ phalaṁ paccanubhossasīti.
Atha kho bhikkhave te isayo sīlavanto kalyāṇadhammā sambaraṁ
asurindaṁ abhisapetvā 7 seyyathāpi nāma balavā puriso sammiñjitaṁ
vā bāhaṁ pasāreyya pasāritaṁ vā bāhaṁ sammiñjeyya evameva
sambarassa asurindassa sammukhe antarahitā samuddatīre paṇṇakuṭīsu
pāturahesuṁ.
1 Ma. karohi. 2 Ma. Yu. etaṁ. 3 Ma. Yu. akkhayaṁ. 4 Ma. vapate.
5 Ma. Yu. harate. Yu. vappate. 6 vappate. 7 Ma. abhisapitvā.

[904] Atha kho bhikkhave sambaro asurindo tehi isīhi sīlavantehi
kalyāṇadhammehi abhisapito rattiyā sudaṁ tikkhattuṁ ubbijjatīti.
Paṭhamo vaggo.
Tassuddānaṁ
suvīraṁ susimañceva dhajaggaṁ vepacittino
subhāsitaṁ jayañceva kulāvakaṁ nadubbhiyaṁ
virocanāsurindo isayo araññakañceva
isayo ca samuddakāti.
-------------
Dutiyavaggo dutiyo
------------
paṭhamaṁ paṭhamadevasuttaṁ

[905] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Tatra kho .pe.

[906] Bhagavā etadavoca sakkassa bhikkhave devānamindassa
pubbe manussabhūtassa satta vattapadāni 1 samattāni samādinnāni ahesuṁ
yesaṁ samādinnattā sakko sakkattaṁ ajjhagā. Katamāni satta.
Yāvajīvaṁ mātāpettibharo assaṁ yāvajīvaṁ kule jeṭṭhāpacāyī assaṁ
yāvajīvaṁ saṇhavāco assaṁ yāvajīvaṁ apisuṇavāco assaṁ yāvajīvaṁ
vigatamalamaccherena cetasā agāraṁ ajjhāvaseyyaṁ muttacāgo payatapāṇī
vossaggarato yācayogo dānasaṁvibhāgarato yāvajīvaṁ saccavāco assaṁ
yāvajīvaṁ akkodhano assaṁ sacepi me kodho uppajjeyya khippameva
naṁ paṭivineyyanti. Sakkassa bhikkhave devānamindassa pubbe manussabhūtassa
imāni satta vattapadāni 2 samattāni samādinnāni ahesuṁ
yesaṁ samādinnattā sakko sakkattaṁ ajjhagāti.