[107] Vehāsaṁ ṭhitā kho ekā devatā bhagavato santike imaṁ
gāthaṁ abhāsi
aññathā santamattānaṁ aññathā yo pavedaye
nikacca kitavasseva bhuttaṁ theyyena tassa taṁ
yañhi kayirā tañhi vade yaṁ na kayirā na taṁ vade
akarontaṁ bhāsamānānaṁ 2 parijānanti paṇḍitāti.

[108] Nayidaṁ bhāsitamattena ekantasavanena vā
anukkamitave sakkā yāyaṁ paṭipadā daḷhā 3
yāya dhīrā pamuccanti jhāyino mārabandhanā
na ve dhīrā pakubbanti viditvā lokapariyāyaṁ
aññāya nibbutā dhīrā tiṇṇā loke visattikanti.
1 saṅgātigāti vā saṅkhātigāti vā pāṭho. 2 Ma. akarontaṁ abhāsamānaṁ.
3 Sī. paṭipadaḷhā.

[109] Atha kho tā devatāyo paṭhaviyaṁ patiṭṭhahitvā bhagavato
pādesu sirasā nipatitvā bhagavantaṁ etadavocuṁ accayo no bhante
accagamā yathābālā yathāmūḷhā yathāakusalā yā mayaṁ bhagavantaṁ
apasādetabbaṁ amaññimhā tāsaṁ no bhante bhagavā accayaṁ
accayato paṭiggaṇhātu āyatiṁ saṁvarāyāti. Atha kho bhagavā
sitaṁ pātvākāsi.

[110] Atha kho tā devatāyo bhiyyoso mattāya 1 ujjhāyantiyo
vehāsaṁ abbhuggacchuṁ. Ekā devatā bhagavato santike imaṁ gāthaṁ abhāsi
accayaṁ desayantīnaṁ yo ce 2 na paṭigaṇhati
kopantaro dosagaru sa veraṁ paṭimuccatīti.
Accayo ce na vijjetha nocīdha apahataṁ 3 siyā
verāni na ca sammeyyuṁ kenīdha 4 kusalo siyāti.
Kassaccayā na vijjanti kassa natthi apāhataṁ
ko na sammohamāpādi kodha dhīro sadā satoti.

[111] Tathāgatassa buddhassa sabbabhūtānukampino
tassaccayā na vijjanti tassa natthi apāhataṁ
so na sammohamāpādi sodha 5 dhīro sadā satoti.
Accayaṁ desayantīnaṁ yo ce na paṭigaṇhati
1 bhīyoso mattāyātipi pāṭho. 2 Po. Yu. yo ve. 3 Sī. Ma. cīdha apagataṁ.
Yu. cīdhāpagataṁ. 4 Sī. konīdha. 5 Po. Ma. sova.
Kopantaro dosagaru sa 1 veraṁ paṭimuccati
taṁ veraṁ nābhinandāmi paṭiggaṇhāmi voccayanti.
Chaṭṭhaṁ saddhāsuttaṁ

[112] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Atha kho sambahulā satullapakāyikā devatāyo
abhikkantāya rattiyā abhikkantavaṇṇā kevalakappaṁ jetavanaṁ obhāsetvā
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ aṭṭhaṁsu.

[113] Ekamantaṁ ṭhitā kho ekā devatā bhagavato santike
imaṁ gāthaṁ abhāsi
saddhā dutiyā purisassa hoti
no ce assaddhiyamavatiṭṭhati
yaso ca kittī ca tatvassa hoti 2
saggañca so gacchati sarīraṁ pahāyāti.
Kodhaṁ jahe vippajaheyya mānaṁ
saññojanaṁ sabbamatikkameyya
taṁ nāmarūpasmimasajjamānaṁ
akiñcanaṁ nānupatanti saṅgāti.
1 Sī. Yu. yaṁ. 2 Sī. yato sā ca kittī ca taṁ tassa hotītipi vataṁ tassa hotītipi
pāṭho.

[114] Pamādamanuyuñjanti bālā dummedhino janā
appamādañca medhāvī dhanaṁ seṭṭhaṁva rakkhati
mā pamādamanuyuñjetha mā kāmaratisanthavaṁ
appamatto hi jhāyanto pappoti paramaṁ sukhanti.
Sattamaṁ samayasuttaṁ

[115] Evamme sutaṁ ekaṁ samayaṁ bhagavā sakkesu viharati
kapilavatthusmiṁ mahāvane mahatā bhikkhusaṅghena saddhiṁ pañcamattehi
bhikkhusatehi sabbeheva arahantehi. Dasahi ca lokadhātūhi devatā
yebhuyyena sannipatitā honti bhagavantaṁ dassanāya bhikkhusaṅghañca.

[116] Atha kho catunnaṁ suddhāvāsakāyikānaṁ devānaṁ etadahosi
ayaṁ kho bhagavā sakkesu viharati kapilavatthusmiṁ mahāvane mahatā
bhikkhusaṅghena saddhiṁ pañcamattehi bhikkhusatehi sabbeheva arahantehi
dasahi ca lokadhātūhi devatā yebhuyyena sannipatitā honti bhagavantaṁ
dassanāya bhikkhusaṅghañca yannūna mayampi yena bhagavā tenupasaṅkameyyāma
upasaṅkamitvā bhagavato santike paccekagāthā bhāseyyāmāti.