[97] Atha kho aparā devatā bhagavato santike imaṁ udānaṁ
udānesi
sādhu kho mārisa dānaṁ appakasmiṁpi sāhu dānaṁ
apica saddhāyapi sāhu dānaṁ
dānañca yuddhañca samānamāhu
appāpi santā bahuke jinanti
appampi ce saddahāno dadāti
teneva so hoti sukhī paratthāti.

[98] Atha kho aparā devatā bhagavato santike imaṁ udānaṁ
udānesi
sādhu kho mārisa dānaṁ appakasmiṁpi sāhu dānaṁ
saddhāyapi sāhu dānaṁ apica dhammaladdhassapi sāhu dānaṁ
yo dhammaladdhassa dadāti dānaṁ
uṭṭhānaviriyādhigatassa jantu
atikkamma [1]- vetaraṇiṁ yamassa
dibbāni ṭhānāni upeti maccoti.

[99] Atha kho aparā devatā bhagavato santike imaṁ udānaṁ
udānesi
sādhu kho mārisa dānaṁ appakasmiṁpi sāhu dānaṁ
saddhāyapi sāhu dānaṁ dhammaladdhassapi sāhu dānaṁ
1 Ma. Yu. etthantare soti atthi.
Apica viceyyadānaṁpi sādhu
viceyyadānaṁ sugatappasatthaṁ
ye dakkhiṇeyyā idha jīvaloke
etesu dinnāni mahapphalāni
vījāni vuttāni yathā sukhetteti.

[100] Atha kho aparā devatā bhagavato santike imaṁ udānaṁ udānesi
sādhu kho mārisa dānaṁ appakasmiṁpi sāhu dānaṁ
saddhāyapi sāhu dānaṁ dhammaladdhassapi sāhu dānaṁ
viceyyadānaṁpi sādhu apica pāṇesupi sādhu saṁyamo
yo pāṇabhūtāni 1 aheṭhayaṁ caraṁ
parūpavādā na karoti pāpaṁ
bhīruṁ pasaṁsanti na hi tattha sūraṁ
bhayā hi santo na karonti pāpanti.
Atha kho aparā devatā bhagavantaṁ etadavoca kassa nu kho bhagavā
subhāsitanti.

[101] Sabbāsaṁ vo subhāsitaṁ pariyāyena apica mamāpi 2 suṇātha
saddhāhi 3 dānaṁ bahudhā pasatthaṁ
dānā ca 4 kho dhammapadaṁva seyyo
1 Yu. pāṇabhūtesu. 2 Yu. mamaṁpiti dissati. 3 addhāhīti vā pāṭho.
4 Sī. dānañca.
Pubbeva hi pubbatareva santo
nibbānamevajjhagamuṁ sapaññāti.
Catutthaṁ nasantisuttaṁ

[102] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Atha kho sambahulā satullapakāyikā devatāyo
abhikkantāya rattiyā abhikkantavaṇṇā kevalakappaṁ jetavanaṁ
obhāsetvā yena bhagavā tenupasaṅkamiṁsu upasaṅkamitvā bhagavantaṁ
abhivādetvā ekamantaṁ aṭṭhaṁsu.

[103] Ekamantaṁ ṭhitā kho ekā devatā bhagavato santike
imaṁ gāthaṁ abhāsi
na santi kāmā manujesu niccā
santīdha kamanīyāni yesu baddho
yesu pamatto 1 apunāgamanaṁ
anāgantvā puriso maccudheyyāti.
Chandajaṁ aghaṁ chandajaṁ dukkhaṁ
chandavinayā aghavinayo
aghavinayā dukkhavinayoti.
Na te kāmā yāni citrāni 2 loke
1 Sī. yesu ca baddho supamatto. 2 Sī. kāmāni citrāni.
Saṅkapparāgo purisassa kāmo
tiṭṭhanti citrāni tatheva loke
athettha dhīrā vinayanti chandaṁ.
Kodhaṁ jahe vippajaheyya mānaṁ
saññojanaṁ sabbamatikkameyya
taṁ nāmarūpasmimasajjamānaṁ
akiñcanaṁ nānupatanti dukkhā.
Pahāsi saṅkhaṁ na vimānamāgā 1
acchejji taṇhaṁ idha nāmarūpe
taṁ chinnaganthaṁ anighaṁ nirāsaṁ
pariyesamānā nājjhagamuṁ 2
devā manussā idha vā huraṁ vā
saggesu vā sabbanivesanesūti.

[104] Tañce hi nāddakkhuṁ tathā vimuttaṁ [iccāyasmā mogharājā]
devā manussā idha vā huraṁ vā
naruttamaṁ atthacaraṁ narānaṁ
ye taṁ namassanti pasaṁsiyā teti.

[105] Pasaṁsiyā tepi bhavanti bhikkhu [mogharājāti bhagavā]
ye taṁ namassanti tathā vimuttaṁ
1 Po. Ma. Yu. na vimānamajjhagā. 2 Yu. na ca ajjhagamuṁ.
Aññāya dhammaṁ vicikicchaṁ pahāya
saṅgātitā 1 tepi bhavanti bhikkhūti.
Pañcamaṁ ujjhānasaññisuttaṁ

[106] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Atha kho sambahulā ujjhānasaññikā devatāyo
abhikkantāya rattiyā abhikkantavaṇṇā kevalakappaṁ jetavanaṁ obhāsetvā
yena bhagavā tenupasaṅkamiṁsu upasaṅkamitvā vehāsaṁ aṭṭhaṁsu.