[37] Katihaṁ careyya sāmaññaṁ cittaṁ ce na nivāraye
pade pade visīdeyya saṅkappānaṁ vasānugo 1
kummova aṅgāni sake kapāle
samodahaṁ bhikkhu manovitakke
anissito aññamaheṭhayāno
parinibbuto nūpavadeyya kañcīti.
Aṭṭhamaṁ hirisuttaṁ

[38] Hirinisedho puriso koci lokasmi vijjati
yo niddaṁ apabodheti asso bhadro kasāmivāti.

[39] Hirinisedhā tanuyā ye caranti sadā satā
antaṁ dukkhassa pappuyya caranti visame samanti.
Navamaṁ kuṭikāsuttaṁ

[40] Kacci te kuṭikā natthi kacci natthi kulāvakā
kacci santānakā natthi kacci muttosi bandhanāti.

[41] Taggha me kuṭikā natthi taggha natthi kulāvakā
taggha santānakā natthi taggha muttomhi bandhanāti.
1 Po. Ma. itisaddo atthi.

[42] Kintāhaṁ kuṭikaṁ brūmi kinte brūmi kulāvakaṁ
kinte santānakaṁ brūmi kintāhaṁ brūmi bandhananti.

[43] Mātaraṁ kuṭikaṁ brūsi bhariyaṁ brūsi kulāvakaṁ
putte santānake brūsi taṇhaṁ me brūsi bandhananti.
Sāhu te kuṭikā natthi sāhu natthi kulāvakā
sāhu santānakā natthi sāhu muttosi bandhanāti.
Dasamaṁ samiddhisuttaṁ

[44] Evamme sutaṁ ekaṁ samayaṁ bhagavā rājagahe viharati
tapodārāme. Atha kho āyasmā samiddhi rattiyā paccūsasamayaṁ 1
paccuṭṭhāya yena tapodā tenupasaṅkami gattāni parisiñcituṁ tapode
gattāni parisiñcitvā paccuttaritvā ekacīvaro aṭṭhāsi gattāni
sukkhāpayamāno 2 .

[45] Atha kho aññatarā devatā abhikkantāya rattiyā abhikkantavaṇṇā
kevalakappaṁ tapodaṁ obhāsetvā yena āyasmā samiddhi
tenupasaṅkami upasaṅkamitvā vehāsaṁ ṭhitā āyasmantaṁ samiddhiṁ
gāthāya ajjhabhāsi
abhutvā bhikkhasi bhikkhu na hi bhutvāna bhikkhasi
bhutvāna bhikkhu bhikkhassu mā taṁ kālo upaccagāti.
1 paccusasamayetipi pāṭho. 2 Ma. pubbāpayamāno.

[46] Kālaṁ vohaṁ na jānāmi channo kālo na dissati
tasmā abhutvā bhikkhāmi mā maṁ kālo upaccagāti.