[863] Kathañcānanda ariyo hoti bhāvitindriyo. Idhānanda
bhikkhuno cakkhunā rūpaṁ disvā uppajjati manāpaṁ uppajjati amanāpaṁ
uppajjati manāpāmanāpaṁ. So sace ākaṅkhati paṭikkūle appaṭikkūlasaññī
vihareyyanti appaṭikkūlasaññī tattha viharati. Sace
ākaṅkhati appaṭikkūle paṭikkūlasaññī vihareyyanti paṭikkūlasaññī
tattha viharati. Sace ākaṅkhati paṭikkūle ca appaṭikkūle ca appaṭikkūlasaññī
1 Yu. evameva kho.
Vihareyyanti appaṭikkūlasaññī tattha viharati. Sace
ākaṅkhati appaṭikkūle ca paṭikkūle ca paṭikkūlasaññī vihareyyanti
paṭikkūlasaññī tattha viharati. Sace ākaṅkhati paṭikkūlañca
appaṭikkūlañca tadubhayaṁ abhinivajjetvā upekkhako vihareyyaṁ sato
sampajānoti upekkhako tattha viharati sato sampajāno.

[864] Puna caparaṁ ānanda bhikkhuno sotena saddaṁ sutvā ...
Ghānena gandhaṁ ghāyitvā ... Jivhāya rasaṁ sāyitvā ... Kāyena phoṭṭhabbaṁ
phusitvā ... Manasā dhammaṁ viññāya uppajjati manāpaṁ uppajjati
amanāpaṁ uppajjati manāpāmanāpaṁ. So sace ākaṅkhati paṭikkūle
appaṭikkūlasaññī vihareyyanti appaṭikkūlasaññī tattha viharati.
Sace ākaṅkhati appaṭikkūle paṭikkūlasaññī vihareyyanti paṭikkūlasaññī
tattha viharati. Sace ākaṅkhati paṭikkūle ca appaṭikkūle ca
appaṭikkūlasaññī vihareyyanti appaṭikkūlasaññī tattha viharati.
Sace ākaṅkhati appaṭikkūle ca paṭikkūle ca paṭikkūlasaññī
vihareyyanti paṭikkūlasaññī tattha viharati. Sace ākaṅkhati paṭikkūlañca
appaṭikkūlañca tadubhayaṁ 1 abhinivajjetvā upekkhako vihareyyaṁ
sato sampajānoti upekkhako tattha viharati sato sampajāno.
Evaṁ kho ānanda ariyo hoti bhāvitindriyo.

[865] Iti kho ānanda desitā mayā ariyassa vinaye anuttarā
indriyabhāvanā desito sekho pāṭipado desito ariyo bhāvitindriyo
1 Ma. tadubhayampi.
Yaṁ 1 ānanda satthārā karaṇīyaṁ sāvakānaṁ hitesinā
anukampakena anukampaṁ upādāya kataṁ vo taṁ mayā etāni ānanda
rukkhamūlāni etāni suññāgārāni jhāyathānanda mā pamādattha
mā pacchā vippaṭisārino ahuvattha ayaṁ vo amhākaṁ anusāsanīti.
Idamavoca bhagavā attamano āyasmā ānando bhagavato
bhāsitaṁ abhinandīti.
Indriyabhāvanāsuttaṁ niṭṭhitaṁ dasamaṁ.
Saḷāyatanavaggo pañcamo.
--------
Tassuddānaṁ
anāthapiṇḍiko channo puṇṇo nandakarāhulo
chachakkaṁ saḷāyatanikaṁ nagaravindeyya suddhiko
indriyabhāvanā cāpi vaggo ottarapañcamo.
Uparipaṇṇāsakaṁ niṭṭhitaṁ.
---------
1 Po. Ma. Yu. yaṁ kho.

Suttantapiṭake saṁyuttanikāyassa
paṭhamo bhāgo
---------
sagāthavaggo
namo tassa bhagavato arahato sammāsambuddhassa.
Devatāsaṁyuttaṁ
naḷavaggo paṭhamo
--------
paṭhamaṁ oghataraṇasuttaṁ

[1] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho aññatarā devatā
abhikkantāya rattiyā abhikkantavaṇṇā kevalakappaṁ jetavanaṁ obhāsetvā
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ aṭṭhāsi.

[2] Ekamantaṁ ṭhitā kho sā devatā bhagavantaṁ etadavoca
kathaṁ nu tvaṁ mārisa oghamatarīti. Appatiṭṭhaṁ khvāhaṁ āvuso
anāyūhaṁ oghamatarinti. Yathākathaṁ pana tvaṁ mārisa appatiṭṭhaṁ
anāyūhaṁ oghamatarīti. Yadā svāhaṁ āvuso santiṭṭhāmi tadāssu
Saṁsīdāmi yadā svāhaṁ āyūhāmi 1 tadāssu nivuyhāmi 2 evaṁ khvāhaṁ
āvuso appatiṭṭhaṁ anāyūhaṁ oghamatarinti.
Cirassaṁ vata passāmi brāhmaṇaṁ parinibbutaṁ
appatiṭṭhaṁ anāyūhaṁ tiṇṇaṁ loke visattikanti.

[3] Idamavoca sā devatā samanuñño satthā ahosi.
Atha kho sā devatā samanuñño 3 me satthāti bhagavantaṁ abhivādetvā
padakkhiṇaṁ katvā tatthevantaradhāyīti.
Dutiyaṁ nimokkhasuttaṁ

[4] Sāvatthiyaṁ ... Atha kho aññatarā devatā abhikkantāya
rattiyā abhikkantavaṇṇā kevalakappaṁ jetavanaṁ obhāsetvā yena
bhagavā tenupasaṅkami upasaṅkamitvā bhagavantaṁ abhivādetvā
ekamantaṁ aṭṭhāsi.

[5] Ekamantaṁ ṭhitā kho sā devatā bhagavantaṁ etadavoca
jānāsi no tvaṁ mārisa sattānaṁ nimokkhaṁ pamokkhaṁ vivekanti.
Jānāmi khvāhaṁ āvuso sattānaṁ nimokkhaṁ pamokkhaṁ 4 vivekanti.
Yathākathaṁ pana tvaṁ mārisa jānāsi sattānaṁ nimokkhaṁ pamokkhaṁ
vivekanti.
1 Yu. yadā svāhaṁ āvuso āyūhāmi. Ma. yadāhaṁ āyūhāmi.
2 Ma. Yu. nibbuyhāmi. 3 Sī. samanuññāto. 4 Sī. pāmokkhaṁ.

[6] Nandibhavaparikkhayā saññāviññāṇasaṅkhayā
vedanānaṁ nirodhā 1 upasamā
evaṁ khvāhaṁ āvuso jānāmi
sattānaṁ nimokkhaṁ 2 pamokkhaṁ vivekanti.
Tatiyaṁ upaneyyasuttaṁ