[182] Tena samayena buddho bhagavā sāvatthiyaṁ viharati jetavane
anāthapiṇḍikassārāme. Tena kho pana samayena chabbaggiyā
bhikkhū pesalehi bhikkhūhi saddhiṁ bhaṇḍantā 1 pesale bhikkhū omasanti
jātiyāpi nāmenapi gottenapi kammenapi sippenapi ābādhenapi
liṅgenapi kilesenapi āpattiyāpi hīnenapi akkosena khuṁsenti
vambhenti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū pesalehi bhikkhūhi
saddhiṁ bhaṇḍantā pesale bhikkhū omasissanti jātiyāpi nāmenapi
gottenapi kammenapi sippenapi ābādhenapi liṅgenapi kilesenapi
āpattiyāpi hīnenapi akkosena khuṁsessanti vambhessantīti.
Athakho te bhikkhū bhagavato etamatthaṁ ārocesuṁ. Saccaṁ kira tumhe
bhikkhave pesalehi bhikkhūhi saddhiṁ bhaṇḍantā pesale bhikkhū omasatha
jātiyāpi nāmenapi gottenapi kammenapi sippenapi ābādhenapi
liṅgenapi kilesenapi āpattiyāpi hīnenapi akkosena khuṁsetha
vambhethāti. Saccaṁ bhagavāti. Vigarahi buddho bhagavā kathaṁ hi nāma
tumhe moghapurisā pesalehi bhikkhūhi saddhiṁ bhaṇḍantā pesale
bhikkhū omasissatha jātiyāpi .pe. Hīnenapi akkosena khuṁsessatha
1 Yu. bhaṇḍentā. evamuparipi.
Vambhessatha netaṁ moghapurisā appasannānaṁ vā pasādāya pasannānaṁ
vā bhiyyobhāvāya .pe. Vigarahitvā dhammiṁ kathaṁ katvā bhikkhū
āmantesi.

[183] Bhūtapubbaṁ bhikkhave takkasilāyaṁ 1 aññatarassa brāhmaṇassa
nandivisālo nāma balibaddo 2 ahosi. Athakho bhikkhave nandivisālo
balibaddo taṁ brāhmaṇaṁ etadavoca gaccha tvaṁ brāhmaṇa
seṭṭhinā saddhiṁ sahassena abbhudaṁ 3 karohi mayhaṁ balibaddo
sakaṭasataṁ atibaddhaṁ pavaṭṭessatīti. Athakho bhikkhave so brāhmaṇo
seṭṭhinā saddhiṁ sahassena abbhudaṁ akāsi mayhaṁ balibaddo
sakaṭasataṁ atibaddhaṁ pavaṭṭessatīti. Athakho bhikkhave so brāhmaṇo
sakaṭasataṁ atibandhitvā nandivisālaṁ balibaddaṁ yuñjitvā etadavoca
añcha 4 kūṭa vahassu kūṭāti. Athakho bhikkhave nandivisālo
balibaddo tattheva aṭṭhāsi. Athakho bhikkhave so brāhmaṇo
sahassena parājito pajjhāyi. Athakho bhikkhave nandivisālo
balibaddo taṁ brāhmaṇaṁ etadavoca kissa tvaṁ brāhmaṇa
pajjhāyasīti. Tathā hi panāhaṁ bho tayā sahassena parājitoti.
Kissa pana maṁ tvaṁ brāhmaṇa akūṭaṁ kūṭavādena pāpesi gaccha
tvaṁ brāhmaṇa seṭṭhinā saddhiṁ dvīhi sahassehi abbhudaṁ karohi
mayhaṁ balibaddo sakaṭasataṁ atibaddhaṁ pavaṭṭessatīti mā ca maṁ
akūṭaṁ kūṭavādena pāpesīti. Athakho bhikkhave so brāhmaṇo
1 Ma. takkasīlāyaṁ. 2 Ma. balībaddo. Sī. balivaddo. evamuparipi.
3 Ma. abbhutaṁ. evamuparipi. 4 Ma. gaccha.
Seṭṭhinā saddhiṁ dvīhi sahassehi abbhudaṁ akāsi mayhaṁ balibaddo
sakaṭasataṁ atibaddhaṁ pavaṭṭessatīti. Athakho bhikkhave so brāhmaṇo
sakaṭasataṁ atibandhitvā nandivisālaṁ balibaddaṁ yuñjitvā etadavoca
añcha bhadra vahassu bhadrāti. Athakho bhikkhave nandivisālo
balibaddo sakaṭasataṁ atibaddhaṁ pavaṭṭesi.

[184] Manāpameva bhāseyya nāmanāpaṁ kudācanaṁ
manāpaṁ bhāsamānassa garubhāraṁ udabbahi
dhanañca naṁ alabbhesi 1 tena cattamano ahūti.

[185] Tadāpi me bhikkhave amanāpā khuṁsanā vambhanā kimaṅgaṁ
panetarahi manāpā bhavissati khuṁsanā vambhanā netaṁ bhikkhave
appasannānaṁ vā pasādāya .pe. Evañca pana bhikkhave imaṁ sikkhāpadaṁ
uddiseyyātha omasavāde pācittiyanti.

[186] Omasavādo nāma dasahi ākārehi omasati jātiyāpi
nāmenapi gottenapi kammenapi sippenapi ābādhenapi liṅgenapi
kilesenapi āpattiyāpi akkosenapi.

[187] Jāti nāma dve jātiyo hīnā ca jāti ukkaṭṭhā
ca jāti. Hīnā nāma jāti caṇḍālajāti veṇajāti nesādajāti
rathakārajāti pukkusajāti esā hīnā nāma jāti. Ukkaṭṭhā nāma
jāti khattiyajāti brāhmaṇajāti esā ukkaṭṭhā nāma jāti.

[188] Nāmaṁ nāma dve nāmāni hīnañca nāmaṁ ukkaṭṭhañca
1 Ma. alābhesi.
Nāmaṁ. Hīnaṁ nāma nāmaṁ avakaṇṇakaṁ javakaṇṇakaṁ dhaniṭṭhakaṁ saviṭṭhakaṁ
kulavaḍḍhakaṁ tesu tesu vā pana janapadesu oññātaṁ avaññātaṁ
hīḷitaṁ paribhūtaṁ acitīkataṁ 1 etaṁ hīnaṁ nāma nāmaṁ. Ukkaṭṭhaṁ nāma
nāmaṁ buddhapaṭisaṁyuttaṁ dhammapaṭisaṁyuttaṁ saṅghapaṭisaṁyuttaṁ tesu tesu vā
pana janapadesu anoññātaṁ anavaññātaṁ ahīḷitaṁ aparibhūtaṁ citīkataṁ
etaṁ ukkaṭṭhaṁ nāma nāmaṁ.

[189] Gottaṁ nāma dve gottāni hīnañca gottaṁ ukkaṭṭhañca
gottaṁ. Hīnaṁ nāma bhāradvājagottaṁ tesu tesu vā pana janapadesu
oññātaṁ avaññātaṁ hīḷitaṁ paribhūtaṁ acitīkataṁ etaṁ hīnaṁ nāma
gottaṁ. Ukkaṭṭhaṁ nāma gottaṁ gotamagottaṁ moggallānagottaṁ
kaccāyanagottaṁ vāseṭṭhagottaṁ 2 tesu tesu vā pana janapadesu
anoññātaṁ anavaññātaṁ ahīḷitaṁ aparibhūtaṁ citīkataṁ etaṁ ukkaṭṭhaṁ
nāma gottaṁ.

[190] Kammaṁ nāma dve kammāni hīnañca kammaṁ ukkaṭṭhañca
kammaṁ. Hīnaṁ nāma kammaṁ koṭṭhakakammaṁ pupphachaḍḍakakammaṁ tesu
tesu vā pana janapadesu oññātaṁ avaññātaṁ hīḷitaṁ paribhūtaṁ
acitīkataṁ etaṁ hīnaṁ nāma kammaṁ. Ukkaṭṭhaṁ nāma kammaṁ kasi
vaṇijjā gorakkhā tesu tesu vā pana janapadesu anoññātaṁ
anavaññātaṁ ahīḷitaṁ aparibhūtaṁ citīkataṁ etaṁ ukkaṭṭhaṁ nāma kammaṁ.

[191] Sippaṁ nāma dve sippāni hīnañca sippaṁ ukkaṭṭhañca
1 Ma. acittīkataṁ. evamuparipi. 2 Ma. kaccānagottaṁ vāsiṭṭhagottaṁ. evamuparipi.
Sippaṁ. Hīnaṁ nāma sippaṁ naḷakārasippaṁ kumbhakārasippaṁ pesakārasippaṁ
cammakārasippaṁ nahāpitasippaṁ tesu tesu vā pana janapadesu oññātaṁ
avaññātaṁ hīḷitaṁ paribhūtaṁ acitīkataṁ etaṁ hīnaṁ nāma sippaṁ.
Ukkaṭṭhaṁ nāma sippaṁ muddhā 1 gaṇanā lekhā tesu tesu vā pana
janapadesu anoññātaṁ anavaññātaṁ ahīḷitaṁ aparibhūtaṁ citīkataṁ etaṁ
ukkaṭṭhaṁ nāma sippaṁ.