[192] Sabbepi ābādhā hīnā nāma apica madhumeho ābādho
ukkaṭṭho.

[193] Liṅgaṁ nāma dve liṅgāni hīnañca liṅgaṁ ukkaṭṭhañca
liṅgaṁ. Hīnaṁ nāma liṅgaṁ atidīghaṁ atirassaṁ atikaṇhaṁ accodātaṁ
etaṁ hīnaṁ nāma liṅgaṁ. Ukkaṭṭhaṁ nāma liṅgaṁ nātidīghaṁ nātirassaṁ
nātikaṇhaṁ nāccodātaṁ etaṁ ukkaṭṭhaṁ nāma liṅgaṁ.

[194] Sabbepi kilesā hīnā.

[195] Sabbāpi āpattiyo hīnā apica sotāpatti samāpatti
ukkaṭṭhā.

[196] Akkoso nāma dve akkosā hīno ca akkoso
ukkaṭṭho ca akkoso. Hīno nāma akkoso oṭṭhosi
meṇḍosi goṇosi gadrabhosi tiracchānagatosi nerayikosi
natthi tuyhaṁ sugati duggatiyeva tuyhaṁ pāṭikaṅkhāti yakārena vā
bhakārena vā kāṭakoṭacikāya vā eso hīno nāma akkoso.
1 Ma. muddā. evamuparipi.
Ukkaṭṭho nāma akkoso paṇḍitosi byattosi medhāvīsi
bahussutosi dhammakathikosi natthi tuyhaṁ duggati sugatiyeva tuyhaṁ
pāṭikaṅkhāti eso ukkaṭṭho nāma akkoso.

[197] Upasampanno upasampannaṁ khuṁsetukāmo vambhetukāmo
maṅkukattukāmo 1 hīnena hīnaṁ vadeti caṇḍālaṁ veṇaṁ nesādaṁ
rathakāraṁ pukkusaṁ caṇḍālosi veṇosi nesādosi rathakārosi
pukkusosīti bhaṇati āpatti vācāya vācāya pācittiyassa.

[198] Upasampanno upasampannaṁ khuṁsetukāmo vambhetukāmo
maṅkukattukāmo hīnena ukkaṭṭhaṁ vadeti khattiyaṁ brāhmaṇaṁ caṇḍālosi
veṇosi nesādosi rathakārosi pukkusosīti bhaṇati āpatti
vācāya vācāya pācittiyassa.

[199] Upasampanno upasampannaṁ khuṁsetukāmo vambhetukāmo
maṅkukattukāmo ukkaṭṭhena hīnaṁ vadeti caṇḍālaṁ veṇaṁ nesādaṁ
rathakāraṁ pukkusaṁ khattiyosi brāhmaṇosīti bhaṇati āpatti vācāya
vācāya pācittiyassa.

[200] Upasampanno upasampannaṁ khuṁsetukāmo vambhetukāmo
maṅkukattukāmo ukkaṭṭhena ukkaṭṭhaṁ vadeti khattiyaṁ brāhmaṇaṁ
khattiyosi brāhmaṇosīti bhaṇati āpatti vācāya vācāya
pācittiyassa.
1 Yu. maṅkuṁ kattukāmo. evamuparipi.

[201] Upasampanno upasampannaṁ khuṁsetukāmo vambhetukāmo
maṅkukattukāmo hīnena hīnaṁ vadeti avakaṇṇakaṁ javakaṇṇakaṁ dhaniṭṭhakaṁ
saviṭṭhakaṁ kulavaḍḍhakaṁ avakaṇṇakosi javakaṇṇakosi dhaniṭṭhakosi
saviṭṭhakosi kulavaḍḍhakosīti bhaṇati āpatti vācāya vācāya
pācittiyassa.