[162] Dasāhānāgatanti dasāhānāgatāya pavāraṇāya.
Kattikatemāsipuṇṇamanti pavāraṇā kattikā vuccati. Accekacīvaraṁ
nāma senāya vā gantukāmo hoti pavāsaṁ vā gantukāmo hoti
1 Ma. Yu. sabbattha etadavocāti dissati.
Gilāno vā hoti gabbhinī vā hoti assaddhassa vā saddhā
uppannā hoti appasannassa vā pasādo uppanno hoti.
So ce bhikkhūnaṁ santike dūtaṁ pahiṇeyya āgacchantu bhaddantā
vassāvāsikaṁ dassāmīti. Etaṁ accekacīvaraṁ nāma. Accekaṁ
maññamānena bhikkhunā paṭiggahetabbaṁ paṭiggahetvā yāvacīvarakālasamayaṁ
nikkhipitabbanti saññāṇaṁ katvā nikkhipitabbaṁ idaṁ
accekacīvaranti. Cīvarakālasamayo nāma anatthate kaṭhine vassānassa
pacchimo māso atthate kaṭhine pañca māsā. Tato ce
uttariṁ nikkhipeyyāti anatthate kaṭhine vassānassa pacchimaṁ divasaṁ
atikkāmeti nissaggiyaṁ hoti 1 . Atthate kaṭhine kaṭhinuddhāradivasaṁ
atikkāmeti nissaggiyaṁ hoti nissajjitabbaṁ saṅghassa vā gaṇassa
vā puggalassa vā. Evañca pana bhikkhave nissajjitabbaṁ .pe.
Idaṁ me bhante accekacīvaraṁ cīvarakālasamayaṁ atikkāmitaṁ nissaggiyaṁ
imāhaṁ saṅghassa nissajjāmīti .pe. Dadeyyāti .pe. Dadeyyunti
.pe. Āyasmato dammīti.

[163] Accekacīvare accekacīvarasaññī cīvarakālasamayaṁ
atikkāmeti nissaggiyaṁ pācittiyaṁ. Accekacīvare vematiko cīvarakālasamayaṁ
atikkāmeti nissaggiyaṁ pācittiyaṁ. Accekacīvare anaccekacīvarasaññī
cīvarakālasamayaṁ atikkāmeti nissaggiyaṁ pācittiyaṁ. Anadhiṭṭhite
1 Ma. Yu. sabbattha nissaggiyaṁ pācittiyanti dissati.
Adhiṭṭhitasaññī ... Avikappite vikappitasaññī ... Avissajjite vissajjitasaññī
... Anaṭṭhe naṭṭhasaññī ... Avinaṭṭhe vinaṭṭhasaññī ... Adaḍḍhe
daḍḍhasaññī .. Avilutte viluttasaññī cīvarakālasamayaṁ atikkāmeti
nissaggiyaṁ pācittiyaṁ. Nissaggiyaṁ cīvaraṁ anissajjitvā paribhuñjati
āpatti dukkaṭassa. Anaccekacīvare accekacīvarasaññī āpatti
dukkaṭassa. Anaccekacīvare vematiko āpatti dukkaṭassa.
Anaccekacīvare anaccekacīvarasaññī anāpatti.

[164] Anāpatti antosamayaṁ 1 adhiṭṭheti vikappeti vissajjeti
nassati vinassati dayhati acchinditvā gaṇhāti 2 vissāsaṁ gaṇhāti 3
ummattakassa ādikammikassāti.
Aṭṭhamasikkhāpadaṁ niṭṭhitaṁ.
-------
1 Ma. antosamaye. 2-3 Ma. Yu. gaṇhanti.
Navamasikkhāpadaṁ

[165] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhū vutthavassā
āraññakesu senāsanesu viharanti. Kattikacorakā bhikkhū laddhalābhāti
paripātenti. Bhagavato etamatthaṁ ārocesuṁ. Athakho
bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū
āmantesi anujānāmi bhikkhave āraññakesu senāsanesu viharantena
tiṇṇaṁ cīvarānaṁ aññataraṁ cīvaraṁ antaraghare nikkhipitunti. Tena
kho pana samayena bhikkhū bhagavatā anuññātaṁ āraññakesu
senāsanesu viharantena tiṇṇaṁ cīvarānaṁ aññataraṁ cīvaraṁ antaraghare
nikkhipitunti. Te 1 tiṇṇaṁ cīvarānaṁ aññataraṁ cīvaraṁ antaraghare
nikkhipitvā atirekachārattaṁ vippavasanti. Tāni cīvarāni nassantipi
vinassantipi dayhantipi undurehipi khajjanti. Bhikkhū duccolā
honti lūkhacīvarā. Bhikkhū evamāhaṁsu kissa tumhe āvuso
duccolā lūkhacīvarāti. Athakho te bhikkhū bhikkhūnaṁ etamatthaṁ
ārocesuṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma bhikkhū tiṇṇaṁ cīvarānaṁ aññataraṁ
cīvaraṁ antaraghare nikkhipitvā atirekachārattaṁ vippavasissantīti.
Athakho te bhikkhū bhagavato etamatthaṁ ārocesuṁ. Saccaṁ kira
1 Ma. ayaṁ pāṭho natthi.
Bhikkhave bhikkhū tiṇṇaṁ cīvarānaṁ aññataraṁ cīvaraṁ antaraghare nikkhipitvā
atirekachārattaṁ vippavasantīti. Saccaṁ bhagavāti. Vigarahi buddho
bhagavā kathaṁ hi nāma te bhikkhave moghapurisā tiṇṇaṁ cīvarānaṁ
aññataraṁ cīvaraṁ antaraghare nikkhipitvā atirekachārattaṁ vippavasissanti
netaṁ bhikkhave appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha upavassaṁ
kho pana kattikapuṇṇamaṁ. Yāni kho pana tāni āraññakāni
senāsanāni sāsaṅkasammatāni sappaṭibhayāni tathārūpesu bhikkhu
senāsanesu viharanto ākaṅkhamāno tiṇṇaṁ cīvarānaṁ aññataraṁ cīvaraṁ
antaraghare nikkhipeyya. Siyā ca tassa bhikkhuno kocideva
paccayo tena cīvarena vippavāsāya chārattaparamantena bhikkhunā
tena cīvarena vippavasitabbaṁ. Tato ce uttariṁ vippavaseyya
aññatra bhikkhusammatiyā nissaggiyaṁ pācittiyanti.

[166] Upavassaṁ kho panāti vutthavassānaṁ. Kattikapuṇṇamanti
kattikacātumāsinī vuccati. Yāni kho pana tāni āraññakāni
senāsanānīti āraññakaṁ nāma senāsanaṁ pañcadhanusatikaṁ pacchimaṁ.
Sāsaṅkaṁ nāma ārāme ārāmupacāre corānaṁ niviṭṭhokāso dissati
bhuttokāso dissati ṭhitokāso dissati nisinnokāso dissati
nipannokāso dissati. Sappaṭibhayaṁ nāma ārāme ārāmupacāre
corehi manussā hatā dissanti viluttā dissanti ākoṭitā
Dissanti. Tathārūpesu bhikkhu senāsanesu viharantoti evarūpesu
bhikkhu senāsanesu viharanto. Ākaṅkhamānoti icchamāno.
Tiṇṇaṁ cīvarānaṁ aññataraṁ cīvaranti saṅghāṭiṁ vā uttarāsaṅgaṁ vā
antaravāsakaṁ vā. Antaraghare nikkhipeyyāti samantā gocaragāme
nikkhipeyya. Siyā ca tassa bhikkhuno kocideva paccayo tena
cīvarena vippavāsāyāti siyā paccayo siyā karaṇīyaṁ. Chārattaparamantena
bhikkhunā tena cīvarena vippavasitabbanti chārattaparamatā
vippavasitabbaṁ. Aññatra bhikkhusammatiyāti ṭhapetvā bhikkhusammatiṁ.
Tato ce uttariṁ vippavaseyyāti sattame aruṇuggamane nissaggiyaṁ
hoti nissajjitabbaṁ saṅghassa vā gaṇassa vā puggalassa vā.
Evañca pana bhikkhave nissajjitabbaṁ .pe. Idaṁ me bhante cīvaraṁ
atirekachārattaṁ vippavutthaṁ aññatra bhikkhusammatiyā nissaggiyaṁ imāhaṁ
saṅghassa nissajjāmīti .pe. Dadeyyāti .pe. Dadeyyunti .pe.
Āyasmato dammīti.

[167] Atirekachāratte atirekasaññī vippavasati aññatra
bhikkhusammatiyā nissaggiyaṁ pācittiyaṁ. Atirekachāratte vematiko
vippavasati aññatra bhikkhusammatiyā nissaggiyaṁ pācittiyaṁ. Atirekachāratte
ūnakasaññī vippavasati aññatra bhikkhusammatiyā nissaggiyaṁ
pācittiyaṁ. Appaccuddhaṭe paccuddhaṭasaññī ... Avissajjite vissajjitasaññī ...
Anaṭṭhe naṭṭhasaññī ... Avinaṭṭhe vinaṭṭhasaññī ... Adaḍḍhe
Daḍḍhasaññī ... Avilutte viluttasaññī vippavasati aññatra
bhikkhusammatiyā nissaggiyaṁ pācittiyaṁ. Nissaggiyaṁ cīvaraṁ anissajjitvā
paribhuñjati āpatti dukkaṭassa. Ūnakachāratte atirekasaññī
āpatti dukkaṭassa. Ūnakachāratte vematiko āpatti dukkaṭassa.
Ūnakachāratte ūnakasaññī anāpatti.

[168] Anāpatti chārattaṁ vippavasati ūnakachārattaṁ vippavasati
chārattaṁ vippavasitvā puna gāmasīmaṁ okkamitvā vasitvā pakkamati
antochārattaṁ paccuddharati vissajjeti nassati vinassati dayhati
acchinditvā gaṇhāti 1 vissāsaṁ gaṇhāti 2 bhikkhusammatiyā
ummattakassa ādikammikassāti.
Navamasikkhāpadaṁ niṭṭhitaṁ.
-------
1-2 Ma. Yu. gaṇhanuti.
Dasamasikkhāpadaṁ

[169] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sāvatthiyaṁ
aññatarassa pūgassa saṅghassa sacīvarabhattaṁ paṭiyattaṁ hoti bhojetvā
cīvarena acchādessāmāti. Athakho chabbaggiyā bhikkhū yena
so pūgo tenupasaṅkamiṁsu upasaṅkamitvā taṁ pūgaṁ etadavocuṁ
dethāvuso amhākaṁ imāni cīvarānīti. Na mayaṁ bhante dassāma
amhākaṁ saṅghassa anuvassaṁ sacīvarabhikkhā paññattāti. Bahū āvuso
saṅghassa dāyakā bahū saṅghassa bhattā mayaṁ tumhe nissāya tumhe
sampassantā idha viharāma tumhe ce amhākaṁ na dassatha atha
kocarahi amhākaṁ dassati dethāvuso amhākaṁ imāni cīvarānīti.
Athakho so pūgo chabbaggiyehi bhikkhūhi nippīḷiyamāno yathāpaṭiyattaṁ
cīvaraṁ chabbaggiyānaṁ bhikkhūnaṁ datvā saṅghaṁ bhattena parivisi. Ye te
bhikkhū jānanti saṅghassa sacīvarabhattaṁ paṭiyattaṁ na ca jānanti
chabbaggiyānaṁ bhikkhūnaṁ dinnanti te evamāhaṁsu oṇojetha āvuso
saṅghassa cīvaranti. Natthi bhante yathāpaṭiyattaṁ cīvaraṁ ayyā
chabbaggiyā attano pariṇāmesunti. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma
chabbaggiyā bhikkhū jānaṁ saṅghikaṁ lābhaṁ pariṇataṁ attano
Pariṇāmessantīti. Athakho te bhikkhū bhagavato etamatthaṁ ārocesuṁ.
Saccaṁ kira tumhe bhikkhave jānaṁ saṅghikaṁ lābhaṁ pariṇataṁ attano
pariṇāmethāti. Saccaṁ bhagavāti. Vigarahi buddho bhagavā kathaṁ
hi nāma tumhe moghapurisā jānaṁ saṅghikaṁ lābhaṁ pariṇataṁ attano
pariṇāmessatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha yo pana bhikkhu jānaṁ saṅghikaṁ lābhaṁ pariṇataṁ
attano pariṇāmeyya nissaggiyaṁ pācittiyanti.

[170] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Jānāti nāma sāmaṁ vā
jānāti aññe vā tassa ārocenti so vā āroceti.
Saṅghikaṁ nāma saṅghassa dinnaṁ hoti pariccattaṁ. Lābho nāma
cīvarapiṇḍapātasenāsanagilānapaccayabhesajjaparikkhārā antamaso cuṇṇapiṇḍopi
dantakaṭṭhaṁpi dasikasuttaṁpi. Pariṇataṁ nāma dassāma
karissāmāti vācā bhinnā hoti. Attano pariṇāmeti payoge
dukkaṭaṁ. Paṭilābhena nissaggiyaṁ hoti nissajjitabbaṁ saṅghassa vā
gaṇassa vā puggalassa vā. Evañca pana bhikkhave nissajjitabbaṁ .pe.
Idaṁ me bhante jānaṁ saṅghikaṁ lābhaṁ pariṇataṁ attano
pariṇāmitaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.
Pariṇate pariṇatasaññī attano pariṇāmeti nissaggiyaṁ pācittiyaṁ.
Pariṇate vematiko attano pariṇāmeti āpatti dukkaṭassa.
Pariṇate apariṇatasaññī attano pariṇāmeti anāpatti. Saṅghassa
pariṇataṁ aññasaṅghassa vā cetiyassa vā pariṇāmeti āpatti
dukkaṭassa. Cetiyassa pariṇataṁ aññacetiyassa vā saṅghassa vā
gaṇassa vā puggalassa vā pariṇāmeti āpatti dukkaṭassa.
Puggalassa pariṇataṁ aññapuggalassa vā saṅghassa vā gaṇassa vā
cetiyassa vā pariṇāmeti āpatti dukkaṭassa. Apariṇate
pariṇatasaññī āpatti dukkaṭassa. Apariṇate vematiko āpatti
dukkaṭassa. Apariṇate apariṇatasaññī anāpatti.

[171] Anāpatti kattha demāti pucchiyamāno yattha tumhākaṁ
deyyadhammo paribhogaṁ vā labheyya paṭisaṅkhāraṁ vā labheyya ciraṭṭhitiko
vā assa yattha vā pana tumhākaṁ cittaṁ pasīdati tattha dethāti
bhaṇati ummattakassa ādikammikassāti.
Dasamasikkhāpadaṁ niṭṭhitaṁ.
Pattavaggo tatiyo.
-------
Tassuddānaṁ
dve ca pattāni bhesajjaṁ vassikā dānapañcamaṁ
sāmaṁ vāyāpanācceko 1 sāsaṅkaṁ saṅghikena cāti.
1 Ma. Yu. vāyāpanacceko.