[152] Anāpatti so vā deti tassa vā vissāsanto
gaṇhāti ummattakassa ādikammikassāti.
Pañcamasikkhāpadaṁ niṭṭhitaṁ.
-------
1 Ma. Yu. ayaṁ saddo natthi.
Chaṭṭhasikkhāpadaṁ

[153] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena chabbaggiyā bhikkhū
cīvarakārasamaye bahuṁ suttaṁ viññāpesuṁ. Katepi cīvare bahu
suttaṁ avasiṭṭhaṁ hoti. Athakho chabbaggiyānaṁ bhikkhūnaṁ etadahosi
handa mayaṁ āvuso aññaṁpi suttaṁ viññāpetvā tantavāyehi
cīvaraṁ vāyāpemāti. Athakho chabbaggiyā bhikkhū aññaṁpi suttaṁ
viññāpetvā tantavāyehi cīvaraṁ vāyāpesuṁ. Vītepi cīvare bahu
suttaṁ avasiṭṭhaṁ hoti. Dutiyampi kho chabbaggiyā bhikkhū aññaṁpi
suttaṁ viññāpetvā tantavāyehi cīvaraṁ vāyāpesuṁ. Vītepi cīvare
bahu suttaṁ avasiṭṭhaṁ hoti. Tatiyampi kho chabbaggiyā bhikkhū
aññaṁpi suttaṁ viññāpetvā tantavāyehi cīvaraṁ vāyāpesuṁ.
Manussā ujjhāyanti khīyanti vipācenti kathaṁ hi nāma samaṇā
sakyaputtiyā sāmaṁ suttaṁ viññāpetvā tantavāyehi cīvaraṁ
vāyāpessantīti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
sāmaṁ suttaṁ viññāpetvā tantavāyehi cīvaraṁ vāyāpessantīti.
Athakho te bhikkhū bhagavato etamatthaṁ ārocesuṁ. Saccaṁ kira tumhe
Bhikkhave sāmaṁ suttaṁ viññāpetvā tantavāyehi cīvaraṁ vāyāpethāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā sāmaṁ suttaṁ viññāpetvā tantavāyehi cīvaraṁ vāyāpessatha
netaṁ moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu sāmaṁ suttaṁ viññāpetvā tantavāyehi cīvaraṁ
vāyāpeyya nissaggiyaṁ pācittiyanti.

[154] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Sāmanti sayaṁ viññāpetvā.
Suttaṁ nāma cha suttāni khomaṁ kappāsikaṁ koseyyaṁ kambalaṁ sāṇaṁ
bhaṅgaṁ. Tantavāyehīti pesakārakehi vāyāpeti payoge dukkaṭaṁ.
Paṭilābhena nissaggiyaṁ hoti nissajjitabbaṁ saṅghassa vā gaṇassa vā
puggalassa vā. Evañca pana bhikkhave nissajjitabbaṁ .pe. Idaṁ
me bhante cīvaraṁ sāmaṁ suttaṁ viññāpetvā tantavāyehi vāyāpitaṁ
nissaggiyaṁ imāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Āyasmato dammīti.

[155] Vāyāpite vāyāpitasaññī nissaggiyaṁ pācittiyaṁ.
Vāyāpite vematiko nissaggiyaṁ pācittiyaṁ. Vāyāpite
avāyāpitasaññī nissaggiyaṁ pācittiyaṁ. Avāyāpite vāyāpitasaññī
āpatti dukkaṭassa. Avāyāpite vematiko āpatti dukkaṭassa.
Avāyāpite avāyāpitasaññī anāpatti.

[156] Anāpatti cīvaraṁ sibbituṁ āyoge kāyabandhane
aṁsabandhake 1 pattatthavikāya parissāvane ñātakānaṁ pavāritānaṁ
aññassatthāya attano dhanena ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
1 Sī. aṁsavaṭṭake.
Sattamasikkhāpadaṁ

[157] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
puriso pavāsaṁ gacchanto pajāpatiṁ etadavoca suttaṁ dhārayitvā
amukassa tantavāyassa dehi cīvaraṁ vāyāpetvā nikkhipāhi 1 āgato
ayyaṁ upanandaṁ cīvarena acchādessāmīti. Assosi kho aññataro
piṇḍacāriko bhikkhu tassa purisassa imaṁ vācaṁ bhāsamānassa.
Athakho so bhikkhu yenāyasmā upanando sakyaputto tenupasaṅkami
upasaṅkamitvā āyasmantaṁ upanandaṁ sakyaputtaṁ etadavoca mahāpuññosi
tvaṁ āvuso upananda amukasmiṁ okāse aññataro
puriso pavāsaṁ gacchanto pajāpatiṁ etadavoca suttaṁ dhārayitvā
amukassa tantavāyassa dehi cīvaraṁ vāyāpetvā nikkhipāhi āgato
ayyaṁ upanandaṁ cīvarena acchādessāmīti. Atthāvuso maṁ so
upaṭṭhākoti. Sopi kho tantavāyo āyasmato upanandassa
sakyaputtassa upaṭṭhāko hoti. Athakho āyasmā upanando
sakyaputto yena so tantavāyo tenupasaṅkami upasaṅkamitvā taṁ 2
tantavāyaṁ etadavoca idaṁ kho āvuso cīvaraṁ maṁ uddissa vīyati
āyatañca karohi vitthatañca appitañca suvītañca suppavāyitañca
1 Ma. Yu. nikkhipa. evamuparipi. 2 Ma. Yu. ayaṁ pāṭho natthi.
Suvilekhitañca suvitacchitañca karohīti. Ete kho me bhante suttaṁ
dhārayitvā adaṁsu iminā suttena cīvaraṁ vināhīti na bhante sakkā
āyataṁ vā vitthataṁ vā appitaṁ vā kātuṁ sakkā ca kho bhante
suvītañca suppavāyitañca suvilekhitañca suvitacchitañca kātunti.
Iṅgha tvaṁ āvuso āyatañca karohi vitthatañca appitañca na
tena suttena paṭibaddhaṁ bhavissatīti. Athakho so tantavāyo
yathāābhataṁ suttaṁ tante upanetvā yena sā itthī tenupasaṅkami
upasaṅkamitvā taṁ itthiṁ etadavoca suttena ayye atthoti.
Nanu tvaṁ ayya 1 mayā vutto iminā suttena cīvaraṁ vināhīti.
Saccāhaṁ ayye tayā vutto iminā suttena cīvaraṁ vināhīti apica
maṁ ayyo upanando evamāha iṅgha tvaṁ āvuso āyatañca karohi
vitthatañca appitañca na tena suttena paṭibaddhaṁ bhavissatīti.
Athakho sā itthī yattakaññeva suttaṁ paṭhamaṁ adāsi tattakaṁ
pacchā adāsi. Assosi kho āyasmā upanando sakyaputto so
kira puriso pavāsato āgatoti. Athakho āyasmā upanando sakyaputto
yena tassa purisassa nivesanaṁ tenupasaṅkami upasaṅkamitvā
paññatte āsane nisīdi. Athakho so puriso yenāyasmā
upanando sakyaputto tenupasaṅkami upasaṅkamitvā āyasmantaṁ
upanandaṁ sakyaputtaṁ abhivādetvā ekamantaṁ nisīdi. Ekamantaṁ
1 Ma. Yu. ayyo.
Nisinno kho so puriso pajāpatiṁ etadavoca vāyāpitaṁ 1 cīvaranti.
Āma ayya vāyāpitaṁ 2 cīvaranti. Āhara ayyaṁ upanandaṁ cīvarena
acchādessāmīti. Athakho sā itthī taṁ cīvaraṁ nīharitvā sāmikassa
datvā etamatthaṁ ārocesi. Athakho so puriso āyasmato
upanandassa sakyaputtassa taṁ 3 cīvaraṁ datvā ujjhāyati khīyati vipāceti
mahicchā ime samaṇā sakyaputtiyā asantuṭṭhā nayime sukarā
cīvarena acchādetuṁ kathaṁ hi nāma ayyo upanando mayā pubbe
appavārito tantavāye 4 upasaṅkamitvā cīvare vikappaṁ āpajjissatīti.
Assosuṁ kho bhikkhū tassa purisassa ujjhāyantassa khīyantassa
vipācentassa. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā upanando sakyaputto
pubbe appavārito gahapatikassa tantavāye upasaṅkamitvā cīvare
vikappaṁ āpajjissatīti. Athakho te bhikkhū bhagavato etamatthaṁ
ārocesuṁ. Saccaṁ kira tvaṁ upananda pubbe appavārito gahapatikassa
tantavāye upasaṅkamitvā cīvare vikappaṁ āpajjasīti 5 . Saccaṁ bhagavāti.
Ñātako te upananda aññātakoti. Aññātako bhagavāti.
Aññātako moghapurisa aññātakassa na jānāti paṭirūpaṁ vā appaṭirūpaṁ
vā santaṁ vā asantaṁ vā tattha nāma tvaṁ moghapurisa pubbe
1-2 Ma. Yu. vītaṁ taṁ. 3 Ma. Yu. ayaṁ pāṭho natthi. 4 Yu. gahapatikassa
tantavāye. 5 Ma. Yu. āpajjīti.
Appavārito aññātakassa gahapatikassa tantavāye upasaṅkamitvā
cīvare vikappaṁ āpajjissasi netaṁ moghapurisa appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha bhikkhuṁ paneva uddissa aññātako
gahapati vā gahapatānī vā tantavāyehi cīvaraṁ vāyāpeyya.
Tatra ce so bhikkhu pubbe appavārito tantavāye upasaṅkamitvā
cīvare vikappaṁ āpajjeyya idaṁ kho āvuso cīvaraṁ maṁ uddissa
vīyati āyatañca karotha vitthatañca appitañca suvītañca suppavāyitañca
suvilekhitañca suvitacchitañca karotha appevanāma mayampi
āyasmantānaṁ kiñcimattaṁ anupadajjeyyāmāti. Evañca so bhikkhu
vatvā kiñcimattaṁ anupadajjeyya 1 antamaso piṇḍapātamattampi
nissaggiyaṁ pācittiyanti.

[158] Bhikkhuṁ paneva uddissāti bhikkhussatthāya bhikkhuṁ ārammaṇaṁ
katvā bhikkhuṁ acchādetukāmo. Aññātako nāma mātito vā
pitito vā yāva sattamā pitāmahayugā asambaddho. Gahapati
nāma yo koci agāraṁ ajjhāvasati. Gahapatānī nāma yā kāci
agāraṁ ajjhāvasati. Tantavāyehīti pesakārehi. Cīvaraṁ nāma
channaṁ cīvarānaṁ aññataraṁ cīvaraṁ vikappanupagaṁ pacchimaṁ. Vāyāpeyyāti
vināpeti. Tatra ce so bhikkhūti yaṁ bhikkhuṁ uddissa cīvaraṁ vīyati
1 anuppadajjeyyāti amhākaṁ mati.
So bhikkhu. Pubbe appavāritoti pubbe avutto hoti kīdisena
te bhante cīvarena attho kīdisaṁ te cīvaraṁ vāyāpemīti.
Tantavāye upasaṅkamitvāti gharaṁ gantvā yattha katthaci upasaṅkamitvā.
Cīvare vikappaṁ āpajjeyyāti idaṁ kho āvuso cīvaraṁ maṁ uddissa
vīyati āyatañca karotha vitthatañca appitañca suvītañca suppavāyitañca
suvilekhitañca suvitacchitañca karotha appevanāma mayampi
āyasmantānaṁ kiñcimattaṁ anupadajjeyyāmāti. Evañca so bhikkhu
vatvā kiñcimattaṁ anupadajjeyya antamaso piṇḍapātamattampīti
piṇḍapāto nāma yāgupi bhattaṁpi khādanīyaṁpi cuṇṇapiṇḍopi dantakaṭṭhaṁpi
dasikasuttaṁpi antamaso dhammaṁpi bhaṇati. Tassa vacanena
āyataṁ vā vitthataṁ vā appitaṁ vā karoti payoge dukkaṭaṁ
paṭilābhena nissaggiyaṁ hoti nissajjitabbaṁ saṅghassa vā gaṇassa
vā puggalassa vā. Evañca pana bhikkhave nissajjitabbaṁ .pe.
Idaṁ me bhante cīvaraṁ pubbe appavārito aññātakassa gahapatikassa
tantavāye upasaṅkamitvā cīvare vikappaṁ āpannaṁ nissaggiyaṁ
imāhaṁ saṅghassa nissajjāmīti .pe. Dadeyyāti .pe. Dadeyyunti
.pe. Āyasmato dammīti.

[159] Aññātake aññātakasaññī pubbe appavārito
gahapatikassa tantavāye upasaṅkamitvā cīvare vikappaṁ āpajjati nissaggiyaṁ
pācittiyaṁ. Aññātake vematiko pubbe appavārito gahapatikassa
Tantavāye upasaṅkamitvā cīvare vikappaṁ āpajjati nissaggiyaṁ
pācittiyaṁ. Aññātake ñātakasaññī pubbe appavārito gahapatikassa
tantavāye upasaṅkamitvā cīvare vikappaṁ āpajjati nissaggiyaṁ
pācittiyaṁ. Ñātake aññātakasaññī āpatti dukkaṭassa.
Ñātake vematiko āpatti dukkaṭassa. Ñātake ñātakasaññī
anāpatti.

[160] Anāpatti ñātakānaṁ pavāritānaṁ aññassatthāya
attano dhanena mahagghaṁ vāyāpetukāmassa appagghaṁ vāyāpeti
ummattakassa ādikammikassāti.
Sattamasikkhāpadaṁ niṭṭhitaṁ.
-------
Aṭṭhamasikkhāpadaṁ

[161] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
mahāmatto pavāsaṁ gacchanto bhikkhūnaṁ santike dūtaṁ pāhesi āgacchantu
bhaddantā vassāvāsikaṁ dassāmīti. Bhikkhū vassaṁ vutthānaṁ bhagavatā
vassāvāsikaṁ anuññātanti kukkuccāyantā nāgamaṁsu. Athakho so
mahāmatto ujjhāyati khīyati vipāceti kathaṁ hi nāma bhaddantā
mayā pahite dūte nāgacchissanti ahaṁ hi senāya gacchāmi dujjānaṁ
jīvitaṁ dujjānaṁ maraṇanti. Assosuṁ kho bhikkhū tassa mahāmattassa
ujjhāyantassa khīyantassa vipācentassa. Athakho te bhikkhū
bhagavato etamatthaṁ ārocesuṁ. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave accekacīvaraṁ paṭiggahetvā nikkhipitunti. Tena kho pana
samayena bhikkhū bhagavatā anuññātaṁ accekacīvaraṁ paṭiggahetvā
nikkhipitunti. Te accekacīvaraṁ 1 paṭiggahetvā cīvarakālasamayaṁ
atikkāmenti. Tāni cīvarāni cīvaravaṁse bhaṇḍikābaddhāni tiṭṭhanti.
Addasā kho āyasmā ānando senāsanacārikaṁ āhiṇḍanto
tāni cīvarāni cīvaravaṁse bhaṇḍikābaddhāni ṭhitāni 2 disvāna 3 bhikkhū
1 Ma. Yu. accekacīvarāni. 2 Ma. Yu. tiṭuṭhante. 3 Ma. Yu. disvā.
Āmantesi 1 kassimāni āvuso cīvarāni cīvaravaṁse bhaṇḍikābaddhāni
tiṭṭhantīti. Amhākaṁ āvuso accekacīvarānīti. Kīvaciraṁ panāvuso
imāni cīvarāni nikkhittānīti. Athakho te bhikkhū āyasmato
ānandassa yathānikkhittaṁ ārocesuṁ. Āyasmā ānando ujjhāyati
khīyati vipāceti kathaṁ hi nāma bhikkhū accekacīvarāni paṭiggahetvā
cīvarakālasamayaṁ atikkāmessantīti. Athakho āyasmā ānando
bhagavato etamatthaṁ ārocesi. Saccaṁ kira bhikkhave bhikkhū accekacīvaraṁ
paṭiggahetvā cīvarakālasamayaṁ atikkāmentīti. Saccaṁ bhagavāti.
Vigarahi buddho bhagavā kathaṁ hi nāma te bhikkhave moghapurisā
accekacīvaraṁ paṭiggahetvā cīvarakālasamayaṁ atikkāmessanti netaṁ
bhikkhave appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
dasāhānāgataṁ kattikatemāsipuṇṇamaṁ bhikkhuno paneva accekacīvaraṁ
uppajjeyya accekaṁ maññamānena bhikkhunā paṭiggahetabbaṁ
paṭiggahetvā yāvacīvarakālasamayaṁ nikkhipitabbaṁ tato ce uttariṁ
nikkhipeyya nissaggiyaṁ pācittiyanti.