[70] Tena kho pana samayena aññataro bhikkhu vesāliyaṁ mahāvane
kūṭāgārasālāyaṁ divāvihāragato dvāraṁ vivaritvā nipanno hoti.
Tassa aṅgamaṅgāni vātupatthaddhāni honti. Tena kho pana samayena
sambahulā itthiyo gandhañca mālañca ādāya ārāmaṁ agamaṁsu
vihārapekkhikāyo. Athakho tā itthiyo taṁ bhikkhuṁ passitvā aṅgajāte
abhinisīditvā yāvadatthaṁ katvā purisusabho vatāyanti vatvā gandhañca
mālañca āropetvā pakkamiṁsu. Bhikkhu kilinnaṁ passitvā bhagavato
etamatthaṁ ārocesi 1 . Pañcahi bhikkhave ākārehi aṅgajātaṁ kammaniyaṁ
hoti rāgena vaccena passāvena vātena uccāliṅgapāṇakadaṭṭhena
1 idhāpi ṭhāne tesu vuttapotthakesu bahuvacanavasena payogo kato.
Imehi kho bhikkhave pañcahākārehi aṅgajātaṁ kammaniyaṁ hoti
aṭṭhānametaṁ bhikkhave anavakāso yaṁ tassa bhikkhuno rāgena aṅgajātaṁ
kammaniyaṁ assa arahaṁ so bhikkhave bhikkhu anāpatti bhikkhave tassa
bhikkhuno anujānāmi bhikkhave divā paṭisallīyantena dvāraṁ saṁvaritvā
paṭisallīyitunti.

[71] Tena kho pana samayena aññataro bhārukacchako bhikkhu
supinantena purāṇadutiyikāya methunaṁ dhammaṁ paṭisevitvā assamaṇo
ahaṁ vibbhamissāmīti bhārukacchaṁ gacchanto antarāmagge āyasmantaṁ
upāliṁ passitvā etamatthaṁ ārocesi. Āyasmā upāli evamāha
anāpatti āvuso supinantenāti.

[72] Tena kho pana samayena rājagahe supabbā nāma upāsikā
muduppasannā 1 hoti. Sā evaṁdiṭṭhikā hoti yā methunaṁ dhammaṁ
deti sā aggadānaṁ detīti. Sā bhikkhuṁ passitvā etadavoca ehi
bhante methunaṁ dhammaṁ paṭisevāti. Alaṁ bhagini netaṁ kappatīti. Ehi
bhante ūruntarikāya 2 ghaṭṭehi evante anāpatti bhavissatīti. So
bhikkhu tathā akāsi. Tassa kukkuccaṁ ahosi .pe. Anāpatti bhikkhu
pārājikassa āpatti saṅghādisesassāti. Tena kho pana samayena
rājagahe sapabbā nāma upāsikā muduppasannā hoti. Sā evaṁdiṭṭhikā
hoti yā methunaṁ dhammaṁ deti sā aggadānaṁ detīti. Sā
1 yebhuyyena buddhappasannāti dissati. 2 Yu. Ma. urantarikāya.
Bhikkhuṁ passitvā etadavoca ehi bhante methunaṁ dhammaṁ paṭisevāti.
Alaṁ bhagini netaṁ kappatīti. Ehi bhante nābhiyaṁ 1 ghaṭṭehi
.pe. Ehi bhante udaravaṭṭiyaṁ 2 ghaṭṭehi .pe. Ehi bhante
upakacchake ghaṭṭehi .pe. Ehi bhante gīvāyaṁ 3 ghaṭṭehi .pe.
Ehi bhante kaṇṇacchidde ghaṭṭehi .pe. Ehi bhante kesavaṭṭiyaṁ 4
ghaṭṭehi .pe. Ehi bhante aṅgulantarikāya ghaṭṭehi
.pe. Ehi bhante hatthena upakkamitvā mocessāmi evante
anāpatti bhavissatīti. So bhikkhu tathā akāsi. Tassa kukkuccaṁ
ahosi .pe. Anāpatti bhikkhu pārājikassa āpatti saṅghādisesassāti.

[73] Tena kho pana samayena sāvatthiyaṁ saddhā nāma upāsikā
muduppasannā hoti. Sā evaṁdiṭṭhikā hoti yā methunaṁ dhammaṁ deti
sā aggadānaṁ detīti. Sā bhikkhuṁ passitvā etadavoca ehi
bhante methunaṁ dhammaṁ paṭisevāti. Alaṁ bhagini netaṁ kappatīti.
Ehi bhante ūruntarikāya ghaṭṭehi evante anāpatti bhavissatīti.
So bhikkhu tathā akāsi. Tassa kukkuccaṁ ahosi .pe. Anāpatti
bhikkhu pārājikassa āpatti saṅghādisesassāti.

[74] Tena kho pana samayena sāvatthiyaṁ saddhā nāma upāsikā
1 Yu. Ma. nābhiyā. 2 Yu. Ma. udaravaṭṭiyā. 3 Yu. Ma. gīvāya.
4 Yu. Ma. kesavaṭṭiyā.
Muduppasannā hoti. Sā evaṁdiṭṭhikā hoti yā methunaṁ dhammaṁ deti
sā aggadānaṁ detīti. Sā bhikkhuṁ passitvā etadavoca ehi
bhante methunaṁ dhammaṁ paṭisevāti. Alaṁ bhagini netaṁ kappatīti.
Ehi bhante nābhiyaṁ ghaṭṭehi .pe. Ehi bhante udaravaṭṭiyaṁ
ghaṭṭehi .pe. Ehi bhante upakacchake ghaṭṭehi .pe.
Ehi bhante gīvāyaṁ ghaṭṭehi .pe. Ehi bhante kaṇṇacchidde
ghaṭṭehi .pe. Ehi bhante kesavaṭṭiyaṁ ghaṭṭehi .pe. Ehi
bhante aṅgulantarikāya ghaṭṭehi .pe. Ehi bhante hatthena
upakkamitvā mocessāmi evante anāpatti bhavissatīti. So
bhikkhu tathā akāsi. Tassa kukkuccaṁ ahosi .pe. Anāpatti
bhikkhu pārājikassa āpatti saṅghādisesassāti 1 .

[75] Tena kho pana samayena vesāliyaṁ licchavikumārakā bhikkhuṁ gahetvā
bhikkhuniyā vippaṭipādesuṁ. Ubho sādiyiṁsu ubho nāsetabbā. Ubho
na sādiyiṁsu ubhinnaṁ anāpatti. Tena kho pana samayena vesāliyaṁ
licchavikumārakā bhikkhuṁ gahetvā sikkhamānāya vippaṭipādesuṁ .pe.
Sāmaṇeriyā vippaṭipādesuṁ. Ubho sādiyiṁsu ubho nāsetabbā.
Ubho na sādiyiṁsu ubhinnaṁ anāpatti.

[76] Tena kho pana samayena vesāliyaṁ licchavikumārakā bhikkhuṁ
gahetvā vesiyā vippaṭipādesuṁ .pe. Paṇḍake vippaṭipādesuṁ
1 yathā purimesu vatthūsu visadisatā dissati tathā imesupi vatthūsu.
.pe. Gihiniyā vippaṭipādesuṁ. Bhikkhu sādiyi bhikkhu nāsetabbo.
Bhikkhu na sādiyi bhikkhussa anāpatti. Tena kho pana samayena
vesāliyaṁ licchavikumārakā bhikkhuṁ gahetvā aññamaññaṁ vippaṭipādesuṁ.
Ubho sādiyiṁsu ubho nāsetabbā. Ubho na sādiyiṁsu
ubhinnaṁ anāpatti.

[77] Tena kho pana samayena aññataro vuḍḍhapabbajito bhikkhu
purāṇadutiyikāya dassanaṁ agamāsi. Sā ehi bhante vibbhamāti
aggahesi. So bhikkhu paṭikkamanto uttāno paripati. Sā
ubbhujitvā aṅgajāte abhinisīdi. Tassa kukkuccaṁ ahosi. Bhagavato
etamatthaṁ ārocesi. Sādiyi tvaṁ bhikkhūti. Nāhaṁ bhagavā
sādiyinti. Anāpatti bhikkhu asādiyantassāti.

[78] Tena kho pana samayena aññataro bhikkhu araññe viharati.
Migapotako tassa passāvaṭṭhānaṁ āgantvā passāvaṁ pivanto mukhena
aṅgajātaṁ aggahesi. So bhikkhu sādiyi. Tassa kukkuccaṁ
ahosi. Bhagavato etamatthaṁ ārocesi. Āpattiṁ tvaṁ bhikkhu
āpanno pārājikanti.
Paṭhamapārājikaṁ niṭṭhitaṁ.
------------
Dutiyapārājikakaṇḍaṁ

[79] Tena samayena buddho bhagavā rājagahe viharati gijjhakūṭe
pabbate. Tena kho pana samayena sambahulā sandiṭṭhā sambhattā
bhikkhū isigilipasse tiṇakuṭiyo karitvā vassaṁ upagacchiṁsu. Āyasmāpi
dhaniyo kumbhakāraputto tiṇakuṭikaṁ karitvā vassaṁ upagacchi. Athakho
te bhikkhū vassaṁ vutthā temāsaccayena tiṇakuṭiyo bhinditvā tiṇañca
kaṭṭhañca paṭisāmetvā janapadacārikaṁ pakkamiṁsu. Āyasmā pana
dhaniyo kumbhakāraputto tattheva vassaṁ vasi tattha hemantaṁ tattha
gimhaṁ. Athakho āyasmato dhaniyassa kumbhakāraputtassa gāmaṁ piṇḍāya
paviṭṭhassa tiṇahāriyo kaṭṭhahāriyo tiṇakuṭikaṁ bhinditvā tiṇañca
kaṭṭhañca ādāya agamaṁsu. Dutiyampi kho āyasmā dhaniyo
kumbhakāraputto tiṇañca kaṭṭhañca saṅkaḍḍhitvā tiṇakuṭikaṁ akāsi.
Dutiyampi kho āyasmato dhaniyassa kumbhakāraputtassa gāmaṁ piṇḍāya
paviṭṭhassa tiṇahāriyo kaṭṭhahāriyo tiṇakuṭikaṁ bhinditvā tiṇañca
kaṭṭhañca ādāya agamaṁsu. Tatiyampi kho āyasmā dhaniyo
kumbhakāraputto tiṇañca kaṭṭhañca saṅkaḍḍhitvā tiṇakuṭikaṁ akāsi.
Dutiyampi kho āyasmato dhaniyassa kumbhakāraputtassa gāmaṁ piṇḍāya
paviṭṭhassa tiṇahāriyo kaṭṭhahāriyo tiṇakuṭikaṁ bhinditvā tiṇañca
kaṭṭhañca ādāya agamaṁsu. Athakho āyasmato dhaniyassa kumbhakāraputtassa
Etadahosi yāvatatiyakaṁ kho me gāmaṁ piṇḍāya
paviṭṭhassa tiṇahāriyo kaṭṭhahāriyo tiṇakuṭikaṁ bhinditvā tiṇañca
kaṭṭhañca ādāya agamaṁsu ahaṁ kho pana susikkhito anavayo sake
ācariyake kumbhakārakamme pariyodātasippo yannūnāhaṁ sāmaṁ cikkhallaṁ
madditvā sabbamattikāmayaṁ kuṭikaṁ kareyyanti. Athakho āyasmā
dhaniyo kumbhakāraputto sāmaṁ cikkhallaṁ madditvā sabbamattikāmayaṁ
kuṭikaṁ karitvā tiṇañca kaṭṭhañca gomayañca saṅkaḍḍhitvā taṁ kuṭikaṁ
paci. Sā ahosi kuṭikā abhirūpā dassanīyā pāsādikā lohitakā 1
seyyathāpi indagopako. Seyyathāpi nāma kiṁkiṇikasaddo evameva
tassā kuṭikāya saddo ahosi. Athakho bhagavā sambahulehi bhikkhūhi
saddhiṁ gijjhakūṭā pabbatā orohanto addasa taṁ kuṭikaṁ abhirūpaṁ
dassanīyaṁ pāsādikaṁ lohitakaṁ disvāna bhikkhū āmantesi kiṁ etaṁ
bhikkhave abhirūpaṁ dassanīyaṁ pāsādikaṁ lohitakaṁ seyyathāpi indagopakoti.
Athakho te bhikkhū bhagavato etamatthaṁ ārocesuṁ.
Vigarahi buddho bhagavā ananucchavikaṁ bhikkhave tassa moghapurisassa
ananulomikaṁ appaṭirūpaṁ assāmaṇakaṁ akappiyaṁ akaraṇīyaṁ kathaṁ hi
nāma so bhikkhave moghapuriso sāmaṁ cikkhallaṁ madditvā sabbamattikāmayaṁ
kuṭikaṁ karissati na hi nāma bhikkhave tassa moghapurisassa
pāṇesu anuddayā anukampā avihesā bhavissati gacchathetaṁ bhikkhave
1 Yu. Ma. lohitikā.
Kuṭikaṁ bhindatha mā pacchimā janatā pāṇesu pātabyataṁ 1 āpajji na
ca bhikkhave sabbamattikāmayā kuṭikā kātabbā yo kareyya āpatti
dukkaṭassāti. Evaṁ bhanteti kho te bhikkhū bhagavato paṭissuṇitvā
yena sā kuṭikā tenupasaṅkamiṁsu upasaṅkamitvā taṁ kuṭikaṁ bhindiṁsu.
Athakho āyasmā dhaniyo kumbhakāraputto te bhikkhū etadavoca
kissa me tumhe āvuso kuṭikaṁ bhindathāti. Bhagavā āvuso
bhedāpetīti. Bhindathāvuso sace dhammasāmī bhedāpetīti.