[50] Tena kho pana samayena sambahulā vesālikā vajjīputtakā
bhikkhū sikkhaṁ appaccakkhāya dubbalyaṁ anāvikatvā methunaṁ dhammaṁ
paṭiseviṁsu. Tesaṁ kukkuccaṁ ahosi bhagavatā sikkhāpadaṁ paññattaṁ
kacci nu kho mayaṁ pārājikaṁ āpattiṁ āpannāti. Bhagavato etamatthaṁ
ārocesuṁ. Āpattiṁ tumhe bhikkhave āpannā pārājikanti.

[51] Tena kho pana samayena aññataro bhikkhu evaṁ me
anāpatti bhavissatīti gihiliṅgena methunaṁ dhammaṁ paṭisevi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.

[52] Tena kho pana samayena aññataro bhikkhu evaṁ me
anāpatti bhavissatīti naggo hutvā methunaṁ dhammaṁ paṭisevi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.

[53] Tena kho pana samayena aññataro bhikkhu evaṁ me
anāpatti bhavissatīti kusacīraṁ nivāsetvā .pe. Vākacīraṁ nivāsetvā
phalakacīraṁ nivāsetvā kesakambalaṁ nivāsetvā vālakambalaṁ nivāsetvā
ulūkapakkhaṁ nivāsetvā ajinakkhipaṁ nivāsetvā methunaṁ dhammaṁ paṭisevi.
Tassa kukkuccaṁ ahosi .pe. Āpattiṁ tvaṁ bhikkhu āpanno
pārājikanti.

[54] Tena kho pana samayena aññataro piṇḍacāriko bhikkhu
pīṭhake nipannaṁ dārikaṁ passitvā sāratto aṅguṭṭhaṁ aṅgajātaṁ
pavesesi. Sā kālamakāsi. Tassa kukkuccaṁ ahosi .pe.
Anāpatti bhikkhu pārājikassa āpatti saṅghādisesassāti.

[55] Tena kho pana samayena aññataro māṇavako uppalavaṇṇāya
bhikkhuniyā paṭibaddhacitto hoti. Athakho so māṇavako
uppalavaṇṇāya bhikkhuniyā gāmaṁ piṇḍāya paviṭṭhāya kuṭikaṁ pavisitvā
nilīno acchi. Uppalavaṇṇā bhikkhunī pacchābhattaṁ piṇḍapātapaṭikkantā
pāde pakkhāletvā kuṭikaṁ pavisitvā mañcake nisīdi.
Athakho so māṇavako uppalavaṇṇaṁ bhikkhuniṁ uggahetvā dūsesi.
Uppalavaṇṇā bhikkhunī bhikkhunīnaṁ etamatthaṁ ārocesi. Bhikkhuniyo
bhikkhūnaṁ etamatthaṁ ārocesuṁ. Bhikkhū bhagavato etamatthaṁ ārocesuṁ.
Anāpatti bhikkhave asādiyantiyāti.

[56] Tena kho pana samayena aññatarassa bhikkhuno itthīliṅgaṁ
pātubhūtaṁ hoti. Bhagavato etamatthaṁ ārocesuṁ. Anujānāmi bhikkhave
taṁyeva upajjhaṁ tameva upasampadaṁ tāni vassāni bhikkhunīhi saṅkamituṁ
yā āpattiyo bhikkhūnaṁ bhikkhunīhi sādhāraṇā tā āpattiyo bhikkhunīnaṁ
santike vuṭṭhātuṁ yā āpattiyo bhikkhūnaṁ bhikkhunīhi asādhāraṇā
tāhi āpattīhi anāpattīti. Tena kho pana samayena aññatarissā
bhikkhuniyā purisaliṅgaṁ pātubhūtaṁ hoti. Bhagavato etamatthaṁ ārocesuṁ.
Anujānāmi bhikkhave taṁyeva upajjhaṁ tameva upasampadaṁ tāni vassāni
bhikkhūhi saṅkamituṁ yā āpattiyo bhikkhunīnaṁ bhikkhūhi sādhāraṇā tā
āpattiyo bhikkhūnaṁ santike vuṭṭhātuṁ yā āpattiyo bhikkhunīnaṁ bhikkhūhi
Asādhāraṇā tāhi āpattīhi anāpattīti.

[57] Tena kho pana samayena aññataro bhikkhu evaṁ me anāpatti
bhavissatīti mātuyā methunaṁ dhammaṁ paṭisevi .pe. Dhītuyā methunaṁ
dhammaṁ paṭisevi .pe. Bhaginiyā methunaṁ dhammaṁ paṭisevi. Tassa
kukkuccaṁ ahosi .pe. Bhagavato etamatthaṁ ārocesi. Āpattiṁ
tvaṁ bhikkhu āpanno pārājikanti. Tena kho pana samayena aññataro
bhikkhu purāṇadutiyikāya methunaṁ dhammaṁ paṭisevi. Tassa kukkuccaṁ
ahosi .pe. Āpattiṁ tvaṁ bhikkhu āpanno pārājikanti.

[58] Tena kho pana samayena aññataro bhikkhu mudupiṭṭhiko hoti.
So anabhiratiyā pīḷito attano aṅgajātaṁ mukhena aggahesi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.
Tena kho pana samayena aññataro bhikkhu lambī hoti. So anabhiratiyā
pīḷito attano aṅgajātaṁ attano vaccamaggaṁ pavesesi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.

[59] Tena kho pana samayena aññataro bhikkhu matasarīraṁ passi.
Tasmiṁ ca sarīre aṅgajātasāmantā vaṇo hoti. So evaṁ me
anāpatti bhavissatīti aṅgajāte aṅgajātaṁ pavesetvā vaṇena nīhari.
Tassa kukkuccaṁ ahosi .pe. Āpattiṁ tvaṁ bhikkhu āpanno
pārājikanti. Tena kho pana samayena aññataro bhikkhu matasarīraṁ
passi. Tasmiṁ ca sarīre aṅgajātasāmantā vaṇo hoti. So
Evaṁ me anāpatti bhavissatīti vaṇe aṅgajātaṁ pavesetvā aṅgajātena
nīhari. Tassa kukkuccaṁ ahosi .pe. Āpattiṁ tvaṁ bhikkhu
āpanno pārājikanti.