[30] Kathañca bhikkhave dubbalyāvikammañceva hoti sikkhā ca
appaccakkhātā. Idha bhikkhave bhikkhu ukkaṇṭhito anabhirato sāmaññā
cavitukāmo bhikkhubhāvaṁ aṭṭiyamāno harāyamāno jigucchamāno gihibhāvaṁ
patthayamāno upāsakabhāvaṁ patthayamāno ārāmikabhāvaṁ patthayamāno
sāmaṇerabhāvaṁ patthayamāno titthiyabhāvaṁ patthayamāno titthiyasāvakabhāvaṁ
patthayamāno assamaṇabhāvaṁ patthayamāno asakyaputtiyabhāvaṁ patthayamāno
yannūnāhaṁ buddhaṁ paccakkheyyanti vadati viññāpeti. Evaṁpi
bhikkhave dubbalyāvikammañceva hoti sikkhā ca appaccakkhātā.
Athavā pana ukkaṇṭhito anabhirato sāmaññā cavitukāmo bhikkhubhāvaṁ
aṭṭiyamāno harāyamāno jigucchamāno gihibhāvaṁ patthayamāno .pe.
Asakyaputtiyabhāvaṁ patthayamāno yannūnāhaṁ dhammaṁ paccakkheyyanti
vadati viññāpeti .pe. Yannūnāhaṁ saṅghaṁ paccakkheyyanti vadati
viññāpeti. Yannūnāhaṁ sikkhaṁ paccakkheyyanti vadati viññāpeti.
Yannūnāhaṁ vinayaṁ paccakkheyyanti vadati viññāpeti. Yannūnāhaṁ
pātimokkhaṁ paccakkheyyanti vadati viññāpeti. Yannūnāhaṁ uddesaṁ
paccakkheyyanti vadati viññāpeti. Yannūnāhaṁ upajjhāyaṁ paccakkheyyanti
vadati viññāpeti. Yannūnāhaṁ ācariyaṁ paccakkheyyanti vadati
viññāpeti. Yannūnāhaṁ saddhivihārikaṁ paccakkheyyanti vadati viññāpeti.
Yannūnāhaṁ antevāsikaṁ paccakkheyyanti vadati viññāpeti.
Yannūnāhaṁ samānupajjhāyakaṁ paccakkheyyanti vadati viññāpeti.
Yannūnāhaṁ samānācariyakaṁ paccakkheyyanti vadati viññāpeti. Yannūnāhaṁ
sabrahmacāriṁ paccakkheyyanti vadati viññāpeti. Yannūnāhaṁ
gihī assanti vadati viññāpeti. Yannūnāhaṁ upāsako assanti
vadati viññāpeti. Yannūnāhaṁ ārāmiko assanti vadati viññāpeti.
Yannūnāhaṁ sāmaṇero assanti vadati viññāpeti. Yannūnāhaṁ
titthiyo assanti vadati viññāpeti. Yannūnāhaṁ titthiyasāvako
assanti vadati viññāpeti. Yannūnāhaṁ assamaṇo assanti vadati
viññāpeti. Yannūnāhaṁ asakyaputtiyo assanti vadati viññāpeti.
Evaṁpi bhikkhave dubbalyāvikammañceva hoti sikkhā ca appaccakkhātā.
Athavā pana ukkaṇṭhito anabhirato sāmaññā cavitukāmo
bhikkhubhāvaṁ aṭṭiyamāno harāyamāno jigucchamāno gihibhāvaṁ patthayamāno
.pe. Asakyaputtiyabhāvaṁ patthayamāno yadi panāhaṁ buddhaṁ
paccakkheyyanti vadati viññāpeti .pe. Yadi panāhaṁ asakyaputtiyo
Assanti vadati viññāpeti .pe. Athāhaṁ 1 buddhaṁ paccakkheyyanti
vadati viññāpeti .pe. Athāhaṁ asakyaputtiyo assanti vadati
viññāpeti .pe. Handāhaṁ buddhaṁ paccakkheyyanti vadati viññāpeti
.pe. Handāhaṁ asakyaputtiyo assanti vadati viññāpeti .pe.
Hotu me buddhaṁ paccakkheyyanti vadati viññāpeti .pe. Hotu
me asakyaputtiyo assanti vadati viññāpeti. Evaṁpi bhikkhave
dubbalyāvikammañceva hoti sikkhā ca appaccakkhātā. Athavā
pana ukkaṇṭhito anabhirato sāmaññā cavitukāmo bhikkhubhāvaṁ aṭṭiyamāno
harāyamāno jigucchamāno gihibhāvaṁ patthayamāno .pe.
Asakyaputtiyabhāvaṁ patthayamāno mātaraṁ sarāmīti vadati viññāpeti.
Pitaraṁ sarāmīti vadati viññāpeti. Bhātaraṁ sarāmīti vadati viññāpeti.
Bhaginiṁ sarāmīti vadati viññāpeti. Puttaṁ sarāmīti vadati
viññāpeti. Dhītaraṁ sarāmīti vadati viññāpeti. Pajāpatiṁ sarāmīti
vadati viññāpeti. Ñātake sarāmīti vadati viññāpeti. Mitte
sarāmīti vadati viññāpeti. Gāmaṁ sarāmīti vadati viññāpeti.
Nigamaṁ sarāmīti vadati viññāpeti. Khettaṁ sarāmīti vadati viññāpeti.
Vatthuṁ sarāmīti vadati viññāpeti. Hiraññaṁ sarāmīti
vadati viññāpeti. Suvaṇṇaṁ sarāmīti vadati viññāpeti. Sippaṁ
sarāmīti vadati viññāpeti. Pubbe hasitaṁ lapitaṁ kīḷitaṁ samanussarāmīti
1 Yu. Ma. apāhaṁ.
Vadati viññāpeti. Evaṁpi bhikkhave dubbalyāvikammañceva
hoti sikkhā ca appaccakkhātā. Athavā pana ukkaṇṭhito anabhirato
sāmaññā cavitukāmo bhikkhubhāvaṁ aṭṭiyamāno harāyamāno jigucchamāno
gihibhāvaṁ patthayamāno .pe. Asakyaputtiyabhāvaṁ patthayamāno
mātā me atthi sā mayā posetabbāti vadati viññāpeti.
Pitā me atthi so mayā posetabboti vadati viññāpeti.
Bhātā me atthi so mayā posetabboti vadati viññāpeti.
Bhaginī me atthi sā mayā posetabbāti vadati viññāpeti.
Putto me atthi so mayā posetabboti vadati viññāpeti.
Dhītā me atthi sā mayā posetabbāti vadati viññāpeti.
Pajāpatī me atthi sā mayā posetabbāti vadati viññāpeti.
Ñātakā me atthi te mayā posetabbāti vadati viññāpeti.
Mittā me atthi te mayā posetabbāti vadati viññāpeti.
Evaṁpi bhikkhave dubbalyāvikammañceva hoti sikkhā ca appaccakkhātā.
Athavā pana ukkaṇṭhiko anabhirato sāmaññā cavitukāmo
bhikkhubhāvaṁ aṭṭiyamāno harāyamāno jigucchamāno gihibhāvaṁ patthayamāno
.pe. Asakyaputtiyabhāvaṁ patthayamāno mātā me atthi
sā maṁ posessatīti vadati viññāpeti. Pitā me atthi so
maṁ posessatīti vadati viññāpeti. Bhātā me atthi so maṁ
posessatīti vadati viññāpeti. Bhaginī me atthi sā maṁ posessatīti
Vadati viññāpeti. Putto me atthi so maṁ posessatīti
vadati viññāpeti. Dhītā me atthi sā maṁ posessatīti vadati
viññāpeti. Pajāpatī me atthi sā maṁ posessatīti vadati
viññāpeti. Ñātakā me atthi te maṁ posessantīti vadati
viññāpeti. Mittā me atthi te maṁ posessantīti vadati
viññāpeti. Gāmo me atthi tenapāhaṁ 1 jīvissāmīti vadati
viññāpeti. Nigamo me atthi tenapāhaṁ jīvissāmīti vadati
viññāpeti. Khettaṁ me atthi tenapāhaṁ jīvissāmīti vadati
viññāpeti. Vatthuṁ me atthi tenapāhaṁ jīvissāmīti vadati
viññāpeti. Hiraññaṁ me atthi tenapāhaṁ jīvissāmīti vadati
viññāpeti. Suvaṇṇaṁ me atthi tenapāhaṁ jīvissāmīti vadati
viññāpeti. Sippaṁ me atthi tenapāhaṁ jīvissāmīti vadati
viññāpeti. Evaṁpi bhikkhave dubbalyāvikammañceva hoti sikkhā
ca appaccakkhātā. Athavā pana ukkaṇṭhito anabhirato sāmaññā
cavitukāmo bhikkhubhāvaṁ aṭṭiyamāno harāyamāno jigucchamāno gihibhāvaṁ
patthayamāno .pe. Asakyaputtiyabhāvaṁ patthayamāno dukkaranti
vadati viññāpeti. Na sukaranti vadati viññāpeti. Duccaranti
vadati viññāpeti. Na sucaranti vadati viññāpeti. Na ussahāmīti
vadati viññāpeti. Na visahāmīti vadati viññāpeti. Na ramāmīti
1 tena cāhantipi pāṭho.
Vadati viññāpeti. Nābhiramāmīti vadati viññāpeti. Evaṁpi kho
bhikkhave dubbalyāvikammañceva hoti sikkhā ca appaccakkhātā.

[31] Kathañca bhikkhave dubbalyāvikammañceva hoti sikkhā ca
paccakkhātā. Idha bhikkhave bhikkhu ukkaṇṭhito anabhirato sāmaññā
cavitukāmo bhikkhubhāvaṁ aṭṭiyamāno harāyamāno jigucchamāno gihibhāvaṁ
patthayamāno .pe. Asakyaputtiyabhāvaṁ patthayamāno buddhaṁ paccakkhāmīti
vadati viññāpeti. Evaṁpi bhikkhave dubbalyāvikammañceva hoti
sikkhā ca paccakkhātā. Athavā pana ukkaṇṭhito anabhirato
sāmaññā cavitukāmo bhikkhubhāvaṁ aṭṭiyamāno harāyamāno jigucchamāno
gihibhāvaṁ patthayamāno .pe. Asakyaputtiyabhāvaṁ patthayamāno
dhammaṁ paccakkhāmīti vadati viññāpeti. Saṅghaṁ paccakkhāmīti vadati
viññāpeti. Sikkhaṁ paccakkhāmīti vadati viññāpeti. Vinayaṁ
paccakkhāmīti vadati viññāpeti. Pātimokkhaṁ paccakkhāmīti vadati
viññāpeti. Uddesaṁ paccakkhāmīti vadati viññāpeti. Upajjhāyaṁ
paccakkhāmīti vadati viññāpeti. Ācariyaṁ paccakkhāmīti vadati
viññāpeti. Saddhivihārikaṁ paccakkhāmīti vadati viññāpeti.
Antevāsikaṁ paccakkhāmīti vadati viññāpeti. Samānupajjhāyakaṁ
paccakkhāmīti vadati viññāpeti. Samānācariyakaṁ paccakkhāmīti
vadati viññāpeti. Sabrahmacāriṁ paccakkhāmīti vadati viññāpeti
.pe. Gihīti maṁ dhārehīti vadati viññāpeti. Upāsakoti maṁ
Dhārehīti vadati viññāpeti. Ārāmikoti maṁ dhārehīti vadati
viññāpeti. Sāmaṇeroti maṁ dhārehīti vadati viññāpeti.
Titthiyoti maṁ dhārehīti vadati viññāpeti. Titthiyasāvakoti maṁ
dhārehīti vadati viññāpeti. Assamaṇoti maṁ dhārehīti vadati
viññāpeti. Asakyaputtiyoti maṁ dhārehīti vadati viññāpeti.
Evaṁpi bhikkhave dubbalyāvikammañceva hoti sikkhā ca paccakkhātā.
Athavā pana ukkaṇṭhito anabhirato sāmaññā cavitukāmo bhikkhubhāvaṁ
aṭṭiyamāno harāyamāno jigucchamāno gihibhāvaṁ patthayamāno .pe.
Asakyaputtiyabhāvaṁ patthayamāno alaṁ me buddhenāti vadati viññāpeti
.pe. Alaṁ me sabrahmacārīhīti vadati viññāpeti. Evaṁpi
bhikkhave .pe. Athavā pana .pe. Kinnu me buddhenāti vadati
viññāpeti .pe. Kinnu me sabrahmacārīhīti vadati viññāpeti.
Evaṁpi .pe. Athavā pana .pe. Na mamattho buddhenāti vadati
viññāpeti .pe. Na mamattho sabrahmacārīhīti vadati viññāpeti.
Evaṁpi .pe. Athavā pana .pe. Sumuttāhaṁ buddhenāti vadati
viññāpeti .pe. Sumuttāhaṁ sabrahmacārīhīti vadati viññāpeti.
Evaṁpi bhikkhave dubbalyāvikammañceva hoti sikkhā ca paccakkhātā.
Yāni vā panaññānipi atthi buddhavevacanāni vā dhammavevacanāni
vā saṅghavevacanāni vā sikkhāvevacanāni vā vinayavevacanāni vā
pātimokkhavevacanāni vā uddesavevacanāni vā upajjhāyavevacanāni
Vā ācariyavevacanāni vā saddhivihārikavevacanāni vā antevāsikavevacanāni
vā samānupajjhāyakavevacanāni vā samānācariyakavevacanāni
vā sabrahmacārivevacanāni vā gihivevacanāni vā upāsakavevacanāni
vā ārāmikavevacanāni vā sāmaṇeravevacanāni vā titthiyavevacanāni
vā titthiyasāvakavevacanāni vā assamaṇavevacanāni vā asakyaputtiyavevacanāni
vā tehi ākārehi tehi liṅgehi tehi nimittehi
vadati viññāpeti. Evaṁpi kho bhikkhave dubbalyāvikammañceva
hoti sikkhā ca paccakkhātā.

[32] Kathañca bhikkhave appaccakkhātā hoti sikkhā. Idha bhikkhave
bhikkhunā 1 yehi ākārehi yehi liṅgehi yehi nimittehi sikkhā
paccakkhātā hoti tehi ākārehi tehi liṅgehi tehi nimittehi
ummattako sikkhaṁ paccakkhāti. Appaccakkhātā hoti sikkhā.
Ummattakassa santike sikkhaṁ paccakkhāti. Appaccakkhātā hoti
sikkhā. Khittacitto sikkhaṁ paccakkhāti. Appaccakkhātā hoti
sikkhā. Khittacittassa santike sikkhaṁ paccakkhāti. Appaccakkhātā
hoti sikkhā. Vedanaṭṭo sikkhaṁ paccakkhāti. Appaccakkhātā hoti
sikkhā. Vedanaṭṭassa santike sikkhaṁ paccakkhāti. Appaccakkhātā
hoti sikkhā. Devatāya santike sikkhaṁ paccakkhāti. Appaccakkhātā
hoti sikkhā. Tiracchānagatassa santike sikkhaṁ paccakkhāti.
1 yuropiyamarammapotthakesvāyaṁ pāṭho na dissati.
Appaccakkhātā hoti sikkhā. Ariyakena milakkhakassa santike sikkhaṁ
paccakkhāti. So ce 1 na paṭivijānāti appaccakkhātā hoti sikkhā.
Milakkhakena ariyakassa santike sikkhaṁ paccakkhāti. So ce na
paṭivijānāti appaccakkhātā hoti sikkhā. Ariyakena ariyakassa
santike sikkhaṁ paccakkhāti. So ce na paṭivijānāti appaccakkhātā
hoti sikkhā. Milakkhakena milakkhakassa santike sikkhaṁ paccakkhāti.
So ce na paṭivijānāti appaccakkhātā hoti sikkhā. Davāya
sikkhaṁ paccakkhāti. Appaccakkhātā hoti sikkhā. Ravāya sikkhaṁ
paccakkhāti. Appaccakkhātā hoti sikkhā. Asāvetukāmo sāveti.
Appaccakkhātā hoti sikkhā. Sāvetukāmo na sāveti. Appaccakkhātā
hoti sikkhā. Aviññussa sāveti. Appaccakkhātā
hoti sikkhā. Viññussa na sāveti. Appaccakkhātā hoti
sikkhā. Sabbaso vā pana na sāveti. Appaccakkhātā hoti
sikkhā. Evaṁ kho bhikkhave appaccakkhātā hoti sikkhā.

[33] Methunadhammo nāma yo so asaddhammo gāmadhammo vasaladhammo
duṭṭhullaṁ odakantikaṁ rahassaṁ dvayaṁ dvayasamāpatti eso
methunadhammo nāma.

[34] Paṭisevati nāma yo nimittena nimittaṁ aṅgajātena aṅgajātaṁ
antamaso tilaphalamattaṁpi paveseti eso paṭisevati nāma.
1 pāyato so cāti likhitaṁ.

[35] Antamaso tiracchānagatāyapīti tiracchānagatitthiyāpi methunaṁ
dhammaṁ paṭisevitvā assamaṇo hoti asakyaputtiyo pageva manussitthiyā
tena vuccati antamaso tiracchānagatāyapīti.

[36] Pārājiko hotīti seyyathāpi nāma puriso sīsacchinno
abhabbo tena sarīrabandhanena jīvituṁ evameva bhikkhu methunaṁ dhammaṁ
paṭisevitvā assamaṇo hoti asakyaputtiyo tena vuccati pārājiko
hotīti.

[37] Asaṁvāsoti saṁvāso nāma ekakammaṁ ekuddeso samasikkhātā
eso saṁvāso nāma so tena saddhiṁ natthi tena
vuccati asaṁvāsoti.

[38] Tisso itthiyo manussitthī amanussitthī tiracchānagatitthī.
Tayo ubhatobyañjanakā manussaubhatobyañjanako amanussaubhatobyañjanako
tiracchānagataubhatobyañjanako. Tayo paṇḍakā manussapaṇḍako
amanussapaṇḍako tiracchānagatapaṇḍako. Tayo purisā
manussapuriso amanussapuriso tiracchānagatapuriso. Manussitthiyā tayo
magge methunaṁ dhammaṁ paṭisevantassa āpatti pārājikassa vaccamagge
passāvamagge mukhe. Amanussitthiyā .pe. Tiracchānagatitthiyā
tayo magge methunaṁ dhammaṁ paṭisevantassa āpatti pārājikassa
vaccamagge passāvamagge mukhe. Manussaubhatobyañjanakassa .pe.
Amanussaubhatobyañjanakassa .pe. Tiracchānagataubhatobyañjanakassa
Tayo magge methunaṁ dhammaṁ paṭisevantassa āpatti pārājikassa
vaccamagge passāvamagge mukhe. Manussapaṇḍakassa dve magge
methunaṁ dhammaṁ paṭisevantassa āpatti pārājikassa vaccamagge mukhe.
Amanussapaṇḍakassa .pe. Tiracchānagatapaṇḍakassa .pe. Amanussapurisassa
.pe. Tiracchānagatapurisassa dve magge methunaṁ dhammaṁ
paṭisevantassa āpatti pārājikassa vaccamagge mukhe.

[39] Bhikkhussa sevanacittaṁ upaṭṭhite manussitthiyā vaccamaggaṁ
aṅgajātaṁ pavesentassa āpatti pārājikassa. Bhikkhussa sevanacittaṁ
upaṭṭhite manussitthiyā passāvamaggaṁ aṅgajātaṁ pavesentassa āpatti
pārājikassa. Bhikkhussa sevanacittaṁ upaṭṭhite manussitthiyā mukhaṁ
aṅgajātaṁ pavesentassa āpatti pārājikassa. Bhikkhussa sevanacittaṁ
upaṭṭhite amanussitthiyā .pe. Tiracchānagatitthiyā manussaubhatobyañjanakassa
amanussaubhatobyañjanakassa tiracchānagataubhatobyañjanakassa
vaccamaggaṁ passāvamaggaṁ mukhaṁ aṅgajātaṁ pavesentassa āpatti
pārājikassa. Bhikkhussa sevanacittaṁ upaṭṭhite manussapaṇḍakassa
vaccamaggaṁ .pe. Mukhaṁ aṅgajātaṁ pavesentassa āpatti pārājikassa.
Bhikkhussa sevanacittaṁ upaṭṭhite amanussapaṇḍakassa .pe. Tiracchānagatapaṇḍakassa
manussapurisassa amanussapurisassa tiracchānagatapurisassa
vaccamaggaṁ mukhaṁ aṅgajātaṁ pavesentassa āpatti pārājikassa.