[523] Tatiyampi kho gopālakā pasupālakā kassakā padhāvino
bhagavantaṁ etadavocuṁ mā samaṇa etaṁ maggaṁ paṭipajji etasmiṁ
samaṇa magge coro aṅgulimālo nāma luddo lohitapāṇī
hatapahate niviṭṭho adayāpanno pāṇabhūtesu tena gāmāpi agāmā
katā nigamāpi anigamā katā janapadāpi ajanapadā katā so
manusse vadhitvā vadhitvā aṅgulīnaṁ mālaṁ dhāreti etañhi samaṇa
maggaṁ dasapi purisā vīsampi purisā tiṁsampi purisā cattāḷīsampi purisā
1 Sī. saṁharitvā. 2 Yu. dutiyampi.
Saṅgaritvā saṅgaritvā paṭipajjanti tepi corassa aṅgulimālassa
hatthatthaṁ gacchantīti. Atha kho bhagavā tuṇhībhūto agamāsi.

[524] Addasā kho coro aṅgulimālo bhagavantaṁ dūratova
āgacchantaṁ. Disvānassa etadahosi acchariyaṁ vata bho abbhūtaṁ
vata bho imañhi maggaṁ dasapi purisā vīsampi purisā tiṁsampi
purisā cattāḷīsampi purisā [1]- saṅgaritvā 2 saṅgaritvā paṭipajjanti
tepi mama hatthatthaṁ gacchanti atha ca panāyaṁ samaṇo eko
adutiyo pasayha maññe āgacchati yannūnāhaṁ [3]- samaṇaṁ jīvitā
voropeyyanti. Atha kho coro aṅgulimālo asicammaṁ gahetvā
dhanukalāpaṁ sannayhitvā bhagavantaṁ piṭṭhito piṭṭhito anubandhi.
Atha kho bhagavā tathārūpaṁ iddhābhisaṅkhāraṁ abhisaṅkhāresi 4 yathā coro
aṅgulimālo bhagavantaṁ pakatiyā gacchantaṁ sabbathāmena 5 gacchanto
na sakkoti sampāpuṇituṁ. Atha kho corassa aṅgulimālassa
etadahosi acchariyaṁ vata bho abbhūtaṁ vata bho ahañhi pubbe
hatthiṁpi dhāvantaṁ anupatitvā gaṇhāmi assaṁpi dhāvantaṁ anupatitvā
gaṇhāmi rathaṁpi dhāvantaṁ anupatitvā gaṇhāmi migaṁpi dhāvantaṁ anupatitvā
gaṇhāmi atha ca panāhaṁ imaṁ samaṇaṁ pakatiyā gacchantaṁ
sabbathāmena gacchanto na sakkomi sampāpuṇitunti. Ṭhitova 6
bhagavantaṁ etadavoca tiṭṭha samaṇa tiṭṭha samaṇāti. Ṭhito ahaṁ
aṅgulimāla tvañca tiṭṭhāti.
1 Yu. etthantare paṇṇāsampi purisāti dissanti. 2 Yu. saṁharitvā.
3 Yu. etthantare imanti dissati. 4 Yu. abhisaṅkhāsi. 5 yu sabbatthāmena.
6 Yu. vasaddo natthi.

[525] Atha kho corassa aṅgulimālassa etadahosi ime
kho samaṇā sakyaputtiyā saccavādino saccapaṭiññā atha ca
panāyaṁ samaṇo gacchaṁyevāha ṭhito ahaṁ aṅgulimāla tvañca tiṭṭhāti
yannūnāhaṁ imaṁ samaṇaṁ puccheyyanti. Atha kho coro aṅgulimālo
bhagavantaṁ gāthāya ajjhabhāsi
gacchaṁ vadesi samaṇaṭṭhitomhi
mamañca brūsi ṭhitamaṭṭhitosi
pucchāmi taṁ samaṇa etamatthaṁ
kathaṁ ṭhito tvaṁ ahamaṭṭhitomhi.
Ṭhito ahaṁ aṅgulimāla sabbadā
sabbesu bhūtesu nidhāya daṇḍaṁ
tuvañca pāṇesu asaññatosi
tasmā ṭhitohaṁ tuvamaṭṭhitosi.
Cirassaṁ vata me mahito mahesī
mahāvanaṁ samaṇa 1 paccupādi 2
sohaṁ carissāmi pajahissa 3 pāpaṁ
sutvāna gāthaṁ tava dhammayuttaṁ
itveva coro asimāvudhañca
sobbhe papāte narake manvakāri 4
1 Sī. Yu. samaṇoyaṁ. 2 Yu. paccavādi. 3 Yu. cirassā pahāssaṁ.
4 Yu. anvakārī.
Avandi coro sugatassa pāde
tattheva naṁ pabbajjaṁ ayāci.
Buddho ca kho kāruṇiko mahesī
yo satthā lokassa sadevakassa
tamehi bhikkhūti tadā avoca
eseva tassa ahu bhikkhubhāvoti.
Atha kho bhagavā āyasmatā aṅgulimālena pacchāsamaṇena yena
sāvatthī tena cārikaṁ pakkāmi. Anupubbena cārikaṁ caramāno
yena sāvatthī tadavasari.

[526] Tatra sudaṁ bhagavā sāvatthiyaṁ viharati jetavane anāthapiṇḍikassa
ārāme. Tena kho pana samayena rañño pasenadissa
kosalassa antepuradvāre mahājanakāyo sannipatitvā uccāsaddo
mahāsaddo hoti coro te deva vijite aṅgulimālo nāma
luddo lohitapāṇī hatapahate niviṭṭho adayāpanno pāṇabhūtesu
tena gāmāpi agāmā katā nigamāpi anigamā katā janapadāpi
ajanapadā katā so manusse vadhitvā vadhitvā aṅgulīnaṁ mālaṁ
dhāreti taṁ devo paṭisedhetūti. Atha kho rājā pasenadi
kosalo pañcamattehi assasatehi sāvatthiyā nikkhamitvā 1 divādivassa
yena ārāmo tena pāvisi yāvatikā 2 yānassa bhūmi yānena
gantvā yānā paccorohitvā 3 pattikova yena bhagavā tenupasaṅkami
1 Yu. nikkhami. 2 Yu. yāvatiko. 3 Yu. paccārohitvā.
Upasaṅkamitvā bhagavantaṁ abhivādetvā ekamantaṁ nisīdi.

[527] Ekamantaṁ nisinnaṁ kho rājānaṁ pasenadikosalaṁ bhagavā
etadavoca kinnu te mahārāja rājā māgadho seniyo bimbisāro
kupito vesālikā vā licchavī aññe vā paṭirājānoti. Na
kho me bhante rājā māgadho seniyo bimbisāro kupito napi
vesālikā licchavī napi aññe paṭirājāno coro me bhante
vijite aṅgulimālo nāma luddo lohitapāṇī hatapahate niviṭṭho
adayāpanno pāṇabhūtesu tena gāmāpi agāmā katā nigamāpi
anigamā katā janapadāpi ajanapadā katā so manusse vadhitvā
vadhitvā aṅgulīnaṁ mālaṁ dhāreti tāhaṁ 1 bhante paṭisedhissāmīti. Sace
pana tvaṁ mahārāja aṅgulimālaṁ passeyyāsi kesamassuṁ ohāretvā
kāsāyāni vatthāni acchādetvā agārasmā anagāriyaṁ pabbajitaṁ
virataṁ pāṇātipātā virataṁ adinnādānā virataṁ musāvādā ekabhattikaṁ
brahmacāriṁ sīlavantaṁ kalyāṇadhammaṁ kinti taṁ kareyyāsīti.
Abhivādeyyāma vā bhante paccuṭṭheyyāma vā āsanena vā
nimanteyyāma abhinimanteyyāma vā naṁ cīvarapiṇḍapātasenāsana-
gilānapaccayabhesajjaparikkhārehi dhammikaṁ vā assa rakkhāvaraṇaguttiṁ
saṁvidaheyyāma kuto panassa bhante dussīlassa pāpadhammassa
evarūpo sīlasaṁyamo bhavissatīti.

[528] Tena kho pana samayena āyasmā aṅgulimālo bhagavato
1 Yu. nāhaṁ.
Avidūre nisinno hoti. Atha kho bhagavā dakkhiṇabāhaṁ paggahetvā
rājānaṁ pasenadikosalaṁ etadavoca eso mahārāja aṅgulimāloti.
Atha kho rañño pasenadissa kosalassa ahudeva bhayaṁ ahu chambhitattaṁ
ahu lomahaṁso. Atha kho bhagavā rājānaṁ pasenadikosalaṁ bhītaṁ
saṁviggalomahaṭṭhajātaṁ viditvā rājānaṁ pasenadikosalaṁ etadavoca mā
bhāyi mahārāja mā bhāyi mahārāja natthi te ito 1 bhayanti.
Atha kho rañño pasenadissa kosalassa yaṁ ahosi bhayaṁ vā
chambhitattaṁ vā lomahaṁso vā so paṭippassambhi. Atha kho
rājā pasenadi kosalo yenāyasmā aṅgulimālo tenupasaṅkami
upasaṅkamitvā āyasmantaṁ aṅgulimālaṁ etadavoca ayyo no
bhante aṅgulimāloti. Evaṁ mahārājāti. Kathaṁgotto [2]- ayyassa
pitā kathaṁgottā ayyassa mātāti. Gaggo kho mahārāja pitā
mantānī mātāti. Abhiramatu bhante ayyo gaggo mantānīputto
ahamayyassa gaggassa mantānīputtassa ussukkaṁ karissāmi
cīvarapiṇḍapātasenāsanagilānapaccayabhesajjaparikkhārānanti. Tena kho
pana samayena āyasmā aṅgulimālo āraññako hoti piṇḍapātiko
paṁsukūliko tecīvariko. Atha kho āyasmā aṅgulimālo rājānaṁ
pasenadikosalaṁ etadavoca alaṁ mahārāja paripuṇṇaṁ me ticīvaranti.

[529] Atha kho rājā pasenadi kosalo yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi.
1 Yu. ato. 2 Yu. etthantare bhanteti dissati.
Ekamantaṁ nisinno kho rājā pasenadi kosalo bhagavantaṁ etadavoca
acchariyaṁ bhante abbhūtaṁ bhante yāvañcidaṁ bhante bhagavā adantānaṁ
dametā asamentānaṁ 1 sametā apparinibbutānaṁ parinibbāpetā yaṁ
hi mayaṁ bhante nāsakkhimhā daṇḍenapi satthenapi dametuṁ so
bhagavatā adaṇḍena asatthena 2 danto handadāni mayaṁ bhante
gacchāma bahukiccā mayaṁ bahukaraṇīyāti. Yassadāni [3]- mahārāja
kālaṁ maññasīti. Atha kho rājā pasenadi kosalo uṭṭhāyāsanā
bhagavantaṁ abhivādetvā padakkhiṇaṁ katvā pakkāmi.

[530] Atha kho āyasmā aṅgulimālo pubbaṇhasamayaṁ nivāsetvā
pattacīvaramādāya sāvatthiṁ piṇḍāya pāvisi. Addasā kho āyasmā
aṅgulimālo sāvatthiyaṁ sapadānaṁ piṇḍāya caramāno aññataraṁ
itthiṁ mūḷhagabbhaṁ visātagabbhaṁ. Disvānassa etadahosi kilissanti
vata bho sattā kilissanti vata bho sattāti. Atha kho āyasmā
aṅgulimālo sāvatthiyaṁ piṇḍāya caritvā pacchābhattaṁ piṇḍapātapaṭikkanto
yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinno kho āyasmā
aṅgulimālo bhagavantaṁ etadavoca idhāhaṁ bhante pubbaṇhasamayaṁ
nivāsetvā pattacīvaraṁ ādāya sāvatthiṁ piṇḍāya pāvisiṁ addasaṁ
kho ahaṁ bhante sāvatthiyaṁ sapadānaṁ piṇḍāya caramāno aññataraṁ
itthiṁ mūḷhagabbhaṁ visātagabbhaṁ disvāna me etadahosi kilissanti
1 Yu. asantānaṁ. 2 Yu. asattheneva. 3 Yu. etthantare tvanti dissati.
Vata bho sattā kilissanti vata bho sattāti.

[531] Tenahi tvaṁ aṅgulimāla yena sā itthī 1 tenupasaṅkama
upasaṅkamitvā taṁ itthiṁ evaṁ vadehi yatohaṁ bhagini jāto nābhijānāmi
sañcicca pāṇaṁ jīvitā voropetā tena saccena sotthi
te hotu sotthi gabbhassāti. So hi nūna me bhante sampajānamusāvādo
bhavissati mayā hi bhante bahū sañcicca pāṇā
jīvitā voropitāti. Tenahi tvaṁ aṅgulimāla yena sā itthī 2
tenupasaṅkama upasaṅkamitvā taṁ itthiṁ evaṁ vadehi yatohaṁ bhagini
ariyāya jātiyā jāto nābhijānāmi sañcicca pāṇaṁ jīvitā
voropetā tena saccena sotthi te hotu sotthi gabbhassāti. Evaṁ
bhanteti kho āyasmā aṅgulimālo bhagavato paṭissutvā yena sā
itthī tenupasaṅkami upasaṅkamitvā taṁ itthiṁ etadavoca yatohaṁ
bhagini ariyāya jātiyā jāto nābhijānāmi sañcicca pāṇaṁ jīvitā
voropetā tena saccena sotthi te hotu sotthi gabbhassāti.
Atha kho sotthitthiyā ahosi sotthi gabbhassa.

[532] Atha kho āyasmā aṅgulimālo eko vūpakaṭṭho
appamatto ātāpī pahitatto viharanto nacirasseva yassatthāya
kulaputtā sammadeva agārasmā anagāriyaṁ pabbajanti tadanuttaraṁ
brahmacariyapariyosānaṁ diṭṭheva dhamme sayaṁ abhiññā sacchikatvā
1-2 katthaci potthake yena sāvatthīti pāṭho dissati.
Upasampajja vihāsi khīṇā jāti vusitaṁ brahmacariyaṁ kataṁ karaṇīyaṁ
nāparaṁ itthattāyāti abbhaññāsi. Aññataro kho panāyasmā
aṅgulimālo arahataṁ ahosi.