[370] Addasā kho āyasmā sārīputto āyasmantañca
revataṁ āyasmantañca ānandaṁ dūratova āgacchante disvāna
āyasmantaṁ ānandaṁ etadavoca etu kho āyasmā ānando
svāgataṁ āyasmato ānandassa bhagavato upaṭṭhākassa bhagavato
santikāvacarassa ramaṇīyaṁ āvuso ānanda gosiṅgasālavanaṁ dosinā
ratti sabbaphāliphullā sālā dibbā maññe gandhā sampavanti
kathaṁrūpena āvuso ānanda bhikkhunā gosiṅgasālavanaṁ sobheyyāti.
Idhāvuso sārīputta bhikkhu bahussuto hoti sutadharo sutasanniccayo
ye te dhammā ādikalyāṇā majjhekalyāṇā pariyosānakalyāṇā
sātthā sabyañjanā kevalaparipuṇṇaṁ parisuddhaṁ brahmacariyaṁ abhivadanti
tathārūpāssa dhammā bahussutā honti dhatā 1 vacasā paricitā manasānupekkhitā
diṭṭhiyā supaṭividdhā so catassannaṁ parisānaṁ dhammaṁ deseti
parimaṇḍalehi padabyañjanehi anuppabandhehi anusayasamugghātāya
evarūpena kho āvuso sārīputta bhikkhunā gosiṅgasālavanaṁ sobheyyāti.

[371] Evaṁ vutte āyasmā sārīputto āyasmantaṁ revataṁ
1 Ma. dhātā.
Etadavoca byākataṁ kho āvuso revata āyasmatā ānandena
yathāsakaṁ paṭibhānaṁ tatthadāni mayaṁ āyasmantaṁ revataṁ pucchāma ramaṇīyaṁ
āvuso revata gosiṅgasālavanaṁ dosinā ratti sabbaphāliphullā sālā
dibbā maññe gandhā sampavanti kathaṁrūpena āvuso revata
bhikkhunā gosiṅgasālavanaṁ sobheyyāti. Idhāvuso sārīputta bhikkhu
paṭisallānārāmo hoti paṭisallānarato ajjhattaṁ cetosamathamanuyutto
anirākatajjhāno vipassanāya samannāgato brūhetā suññāgārānaṁ
evarūpena kho āvuso sārīputta bhikkhunā gosiṅgasālavanaṁ sobheyyāti.

[372] Evaṁ vutte āyasmā sārīputto āyasmantaṁ anuruddhaṁ
etadavoca byākataṁ kho āvuso anuruddha āyasmatā revatena
yathāsakaṁ paṭibhānaṁ tatthadāni mayaṁ āyasmantaṁ anuruddhaṁ pucchāma
ramaṇīyaṁ āvuso anuruddha gosiṅgasālavanaṁ dosinā ratti sabbaphāliphullā
sālā dibbā maññe gandhā sampavanti kathaṁrūpena
āvuso anuruddha bhikkhunā gosiṅgasālavanaṁ sobheyyāti. Idhāvuso
sārīputta bhikkhu dibbena cakkhunā visuddhena atikkantamānusakena
sahassaṁ lokānaṁ voloketi seyyathāpi āvuso sārīputta cakkhumā
puriso uparipāsādavaragato sahassaṁ nemimaṇḍalānaṁ volokeyya
evameva kho āvuso sārīputta bhikkhu dibbena cakkhunā visuddhena
atikkantamānusakena sahassaṁ lokānaṁ voloketi evarūpena kho
āvuso sārīputta bhikkhunā gosiṅgasālavanaṁ sobheyyāti.

[373] Evaṁ vutte āyasmā sārīputto āyasmantaṁ mahākassapaṁ
etadavoca byākataṁ kho āvuso kassapa āyasmatā anuruddhena
yathāsakaṁ paṭibhānaṁ tatthadāni mayaṁ āyasmantaṁ mahākassapaṁ pucchāma
ramaṇīyaṁ āvuso kassapa gosiṅgasālavanaṁ dosinā ratti sabbaphāliphullā
sālā dibbā maññe gandhā sampavanti kathaṁrūpena
āvuso kassapa bhikkhunā gosiṅgasālavanaṁ sobheyyāti. Idhāvuso
sārīputta bhikkhu attanā ca āraññako 1 hoti āraññakattassa 2 ca
vaṇṇavādī attanā ca piṇḍapātiko hoti piṇḍapātikattassa ca
vaṇṇavādī attanā ca paṁsukūliko hoti paṁsukūlikattassa ca vaṇṇavādī
attanā ca tecīvariko hoti tecīvarikattassa ca vaṇṇavādī attanā
ca appiccho hoti appicchatāya ca vaṇṇavādī attanā ca santuṭṭho
hoti santuṭṭhiyā ca vaṇṇavādī attanā ca pavivitto hoti
pavivekassa ca vaṇṇavādī attanā ca asaṁsaṭṭho hoti asaṁsaggassa
ca vaṇṇavādī attanā ca āraddhaviriyo hoti viriyārambhassa ca
vaṇṇavādī attanā ca sīlasampanno hoti sīlasampadāya ca
vaṇṇavādī attanā ca samādhisampanno hoti samādhisampadāya ca
vaṇṇavādī attanā ca paññāsampanno hoti paññāsampadāya
ca vaṇṇavādī attanā ca vimuttisampanno hoti vimuttisampadāya
ca vaṇṇavādī attanā ca vimuttiñāṇadassanasampanno hoti
vimuttiñāṇadassanasampadāya ca vaṇṇavādī evarūpena kho āvuso
1 Po. Ma. āraññiko. 2 Ma. āraññikattassa.
Sārīputta bhikkhunā gosiṅgasālavanaṁ sobheyyāti.

[374] Evaṁ vutte āyasmā sārīputto āyasmantaṁ
mahāmoggallānaṁ etadavoca byākataṁ kho āvuso moggallāna
āyasmatā mahākassapena yathāsakaṁ paṭibhānaṁ tatthadāni mayaṁ āyasmantaṁ
mahāmoggallānaṁ pucchāma ramaṇīyaṁ āvuso moggallāna gosiṅgasālavanaṁ
dosinā ratti sabbaphāliphullā sālā dibbā maññe gandhā
sampavanti kathaṁrūpena āvuso moggallāna bhikkhunā gosiṅgasālavanaṁ
sobheyyāti. Idhāvuso sārīputta dve bhikkhū abhidhammakathaṁ kathenti
te aññamaññaṁ pucchanti aññamaññassa pañhaṁ puṭṭhā visajjenti
no ca saṁsādenti 1 dhammī 2 ca nesaṁ kathā pavattanī 3 hoti evarūpena
kho āvuso sārīputta bhikkhunā gosiṅgasālavanaṁ sobheyyāti.

[375] Atha kho āyasmā mahāmoggallāno āyasmantaṁ
sārīputtaṁ etadavoca byākataṁ kho āvuso sārīputta amhehi
sabbeheva yathāsakaṁ paṭibhānaṁ tatthadāni mayaṁ āyasmantaṁ sārīputtaṁ
pucchāma ramaṇīyaṁ āvuso sārīputta gosiṅgasālavanaṁ dosinā ratti
sabbaphāliphullā sālā dibbā maññe gandhā sampavanti kathaṁrūpena
āvuso sārīputta bhikkhunā gosiṅgasālavanaṁ sobheyyāti. Idhāvuso
moggallāna bhikkhu cittaṁ vasaṁ vatteti no ca bhikkhu cittassa
vasena vattati so yāya vihārasamāpattiyā ākaṅkhati pubbaṇhasamayaṁ
viharituṁ tāya vihārasamāpattiyā pubbaṇhasamayaṁ viharati yāya
1 Ma. saṁsārenti. 2 Po. pasārenti dhammiyā. 3 Ma. pavattīnī.
Vihārasamāpattiyā ākaṅkhati majjhantikasamayaṁ viharituṁ tāya vihārasamāpattiyā
majjhantikasamayaṁ viharati yāya vihārasamāpattiyā ākaṅkhati
sāyaṇhasamayaṁ viharituṁ tāya vihārasamāpattiyā sāyaṇhasamayaṁ viharati
seyyathāpi āvuso moggallāna rañño vā rājamahāmattassa vā
nānārattānaṁ dussānaṁ dussakaraṇḍako pūro assa so yaññadeva
dussayugaṁ ākaṅkheyya pubbaṇhasamayaṁ pārupituṁ taṁtadeva 1 dussayugaṁ
pubbaṇhasamayaṁpārupeyya yaññadevadussayugaṁākaṅkheyyamajjhantikasamayaṁ
pārupituṁ taṁtadeva 1 dussayugaṁ majjhantikasamayaṁ pārupeyya yaññadeva
dussayugaṁ ākaṅkheyya sāyaṇhasamayaṁ pārupituṁ taṁtadeva 1 dussayugaṁ sāyaṇhasamayaṁ
pārupeyya evameva kho āvuso moggallāna bhikkhu cittaṁ vasaṁ
vatteti no ca bhikkhu cittassa vasena vattati so yāya vihārasamāpattiyā
ākaṅkhati pubbaṇhasamayaṁ viharituṁ tāya vihārasamāpattiyā
pubbaṇhasamayaṁ viharati yāya vihārasamāpattiyā ākaṅkhati
majjhantikasamayaṁ viharituṁ tāya vihārasamāpattiyā majjhantikasamayaṁ viharati
yāya vihārasamāpattiyā ākaṅkhati sāyaṇhasamayaṁ viharituṁ tāya
vihārasamāpattiyā sāyaṇhasamayaṁ viharati evarūpena kho āvuso
moggallāna bhikkhunā gosiṅgasālavanaṁ sobheyyāti.

[376] Atha kho āyasmā sārīputto te āyasmante etadavoca
byākataṁ kho āvuso amhehi sabbeheva yathāsakaṁ paṭibhānaṁ
āyāmāvuso yena bhagavā tenupasaṅkamissāma upasaṅkamitvā etamatthaṁ
1 Po. tadeva.
Bhagavato ārocessāma yathā no bhagavā byākarissati tathā naṁ
dhāressāmāti. Evaṁ āvusoti kho te āyasmanto āyasmato
sārīputtassa paccassosuṁ. Atha kho te āyasmanto yena bhagavā
tenupasaṅkamiṁsu upasaṅkamitvā bhagavantaṁ abhivādetvā ekamantaṁ
nisīdiṁsu. Ekamantaṁ nisinno kho āyasmā sārīputto bhagavantaṁ
etadavoca idha bhante āyasmā ca revato āyasmā ca ānando
yenāhaṁ tenupasaṅkamiṁsu dhammassavanāya addasaṁ kho ahaṁ bhante
āyasmantañca revataṁ āyasmantañca ānandaṁ dūratova āgacchante
disvāna āyasmantaṁ ānandaṁ etadavocaṁ etu kho āyasmā
ānando svāgataṁ āyasmato ānandassa bhagavato upaṭṭhākassa
bhagavato santikāvacarassa ramaṇīyaṁ āvuso ānanda gosiṅgasālavanaṁ
dosinā ratti sabbaphāliphullā sālā dibbā maññe gandhā
sampavanti kathaṁrūpena āvuso ānanda bhikkhunā gosiṅgasālavanaṁ
sobheyyāti evaṁ vutte bhante āyasmā ānando maṁ etadavoca
idhāvuso sārīputta bhikkhu bahussuto hoti sutadharo .pe. Anusayasamugghātāya
evarūpena kho āvuso sārīputta bhikkhunā gosiṅgasālavanaṁ
sobheyyāti. Sādhu sādhu sārīputta yathātaṁ ānandova
sammā byākaramāno byākareyya ānando hi sārīputta bahussuto
hoti sutadharo sutasanniccayo ye te dhammā ādikalyāṇā majjhekalyāṇā
pariyosānakalyāṇā sātthā sabyañjanā kevalaparipuṇṇaṁ
Parisuddhaṁ brahmacariyaṁ abhivadanti tathārūpāssa dhammā bahussutā honti
dhatā vacasā paricitā manasānupekkhitā diṭṭhiyā supaṭividdhā so
catassannaṁ parisānaṁ dhammaṁ deseti parimaṇḍalehi padabyañjanehi
anuppabandhehi anusayasamugghātāyāti.

[377] Evaṁ vutte ahaṁ bhante āyasmantaṁ revataṁ etadavocaṁ
byākataṁ kho āvuso revata āyasmatā ānandena yathāsakaṁ paṭibhānaṁ
tatthadāni mayaṁ āyasmantaṁ revataṁ pucchāma ramaṇīyaṁ āvuso revata
gosiṅgasālavanaṁ dosinā ratti sabbaphāliphullā sālā dibbā maññe
gandhā sampavanti kathaṁrūpena āvuso revata bhikkhunā gosiṅgasālavanaṁ
sobheyyāti evaṁ vutte bhante āyasmā revato maṁ etadavoca
idhāvuso sārīputta bhikkhu paṭisallānārāmo hoti paṭisallānarato
ajjhattaṁ cetosamathamanuyutto anirākatajjhāno vipassanāya samannāgato
brūhetā suññāgārānaṁ evarūpena kho āvuso sārīputta
bhikkhunā gosiṅgasālavanaṁ sobheyyāti. Sādhu sādhu sārīputta
yathātaṁ revatova sammā byākaramāno byākareyya revato hi
sārīputta paṭisallānārāmo hoti 1 paṭisallānarato ajjhattaṁ
cetosamathamanuyutto anirākatajjhāno vipassanāya samannāgato brūhetā
suññāgārānanti.

[378] Evaṁ vutte ahaṁ bhante āyasmantaṁ anuruddhaṁ etadavocaṁ
byākataṁ kho āvuso anuruddha āyasmatā revatena .pe. Kathaṁrūpena
1 Ma. ayaṁ pāṭho sabbattha natthi.
Āvuso anuruddha bhikkhunā gosiṅgasālavanaṁ sobheyyāti evaṁ vutte
bhante āyasmā anuruddho maṁ etadavoca idhāvuso sārīputta
bhikkhu dibbena cakkhunā visuddhena atikkantamānusakena sahassaṁ lokānaṁ
voloketi seyyathāpi āvuso cakkhumā puriso uparipāsādavaragato
sahassaṁ nemimaṇḍalānaṁ volokeyya evameva kho āvuso sārīputta
bhikkhu dibbena cakkhunā visuddhena atikkantamānusakena sahassaṁ lokānaṁ
voloketi evarūpena kho āvuso sārīputta bhikkhunā gosiṅgasālavanaṁ
sobheyyāti. Sādhu sādhu sārīputta yathātaṁ anuruddhova sammā
byākaramāno byākareyya anuruddho hi sārīputta dibbena cakkhunā
visuddhena atikkantamānusakena sahassaṁ lokānaṁ voloketīti.

[379] Evaṁ vutte ahaṁ bhante āyasmantaṁ mahākassapaṁ
etadavocaṁ byākataṁ kho āvuso kassapa āyasmatā anuruddhena yathāsakaṁ
paṭibhānaṁ tatthadāni mayaṁ āyasmantaṁ mahākassapaṁ pucchāma .pe.
Kathaṁrūpena [1]- āvuso kassapa bhikkhunā gosiṅgasālavanaṁ sobheyyāti
evaṁ vutte bhante āyasmā mahākassapo maṁ etadavoca idhāvuso
sārīputta bhikkhu attanā ca āraññako hoti āraññakattassa
ca vaṇṇavādī attanā ca piṇḍapātiko hoti .pe. Paṁsukūliko
hoti ... Tecīvariko hoti ... Appiccho hoti ... Santuṭṭho hoti ...
Pavivitto hoti ... Asaṁsaṭṭho hoti ... Āraddhaviriyo hoti ...
Sīlasampanno hoti ... Samādhisampanno hoti ... Paññāsampanno hoti ...
1 Po. Ma. Yu. kho.
Vimuttisampanno hoti ... Attanā ca vimuttiñāṇadassanasampanno
hoti vimuttiñāṇadassanasampadāya ca vaṇṇavādī evarūpena kho
āvuso sārīputta bhikkhunā gosiṅgasālavanaṁ sobheyyāti. Sādhu sādhu
sārīputta yathātaṁ kassapova sammā byākaramāno byākareyya kassapo
hi sārīputta attanā ca āraññako hoti āraññakattassa ca
vaṇṇavādī attanā ca piṇḍapātiko hoti piṇḍapātikattassa ca
vaṇṇavādī attanā ca paṁsukūliko hoti paṁsukūlikattassa ca vaṇṇavādī
attanā ca tecīvariko hoti tecīvarikattassa ca vaṇṇavādī attanā ca
appiccho hoti appicchatāya ca vaṇṇavādī attanā ca santuṭṭho
hoti santuṭṭhiyā ca vaṇṇavādī attanā ca pavivitto hoti
pavivekassa ca vaṇṇavādī attanā ca asaṁsaṭṭho hoti asaṁsaggassa
ca vaṇṇavādī attanā ca āraddhaviriyo hoti viriyārambhassa ca
vaṇṇavādī attanā ca sīlasampanno hoti sīlasampadāya ca vaṇṇavādī
attanā ca samādhisampanno hoti samādhisampadāya ca vaṇṇavādī
attanā ca paññāsampanno hoti paññāsampadāya ca vaṇṇavādī
attanā ca vimuttisampanno hoti vimuttisampadāya ca vaṇṇavādī
attanā ca vimuttiñāṇadassanasampanno hoti vimuttiñāṇadassanasampadāya
ca vaṇṇavādīti.