[650] Sā ce evaṁ vadeyya ayyo mayā diṭṭho nipanno
mātugāmena saddhiṁ kāyasaṁsaggaṁ samāpajjantoti so ce taṁ paṭijānāti
āpattiyā kāretabbo .pe. Saccāhaṁ nipanno no ca kho
kāyasaṁsaggaṁ samāpajjinti nipajjāya kāretabbo .pe. Nāhaṁ
nipanno apica kho nisinnoti nisajjāya kāretabbo .pe. Nāhaṁ
nisinno apica kho ṭhitoti na kāretabbo.

[651] Sā ce evaṁ vadeyya ayyassa mayā sutaṁ nisinnassa
mātugāmaṁ duṭṭhullāhi vācāhi obhāsantassāti so ce taṁ paṭijānāti
1 Yu. Ma. ca.
Āpattiyā kāretabbo. Sā ce evaṁ vadeyya ayyassa mayā
sutaṁ nisinnassa mātugāmaṁ duṭṭhullāhi vācāhi obhāsantassāti so
ce evaṁ vadeyya saccāhaṁ nisinno no ca kho mātugāmaṁ duṭṭhullāhi
vācāhi obhāsinti nisajjāya kāretabbo .pe. Nāhaṁ nisinno
apica kho nipannoti nipajjāya kāretabbo .pe. Nāhaṁ nisinno
apica kho ṭhitoti na kāretabbo.

[652] Sā ce evaṁ vadeyya ayyassa mayā sutaṁ nipannassa
mātugāmaṁ duṭṭhullāhi vācāhi obhāsantassāti so ce taṁ paṭijānāti
āpattiyā kāretabbo .pe. Saccāhaṁ nipanno no ca kho duṭṭhullāhi
vācāhi obhāsinti nipajjāya kāretabbo .pe. Nāhaṁ nipanno
apica kho nisinnoti nisajjāya kāretabbo .pe. Nāhaṁ nipanno
apica kho ṭhitoti na kāretabbo.

[653] Sā ce evaṁ vadeyya ayyo mayā diṭṭho mātugāmena
saddhiṁ eko ekāya raho nisinnoti so ce taṁ paṭijānāti
nisajjāya kāretabbo .pe. Nāhaṁ nisinno apica kho nipannoti
nipajjāya kāretabbo .pe. Nāhaṁ nisinno apica kho ṭhitoti
na kāretabbo.

[654] Sā ce evaṁ vadeyya ayyo mayā diṭṭho mātugāmena
saddhiṁ eko ekāya raho nipannoti so ce taṁ paṭijānāti
nipajjāya kāretabbo .pe. Nāhaṁ nipanno apica kho nisinnoti
Nisajjāya kāretabbo .pe. Nāhaṁ nipanno apica kho ṭhitoti na
kāretabbo.

[655] Ayampīti purimaṁ upādāya vuccati. Aniyatoti na
niyato saṅghādiseso vā pācittiyaṁ vā.

[656] Gamanaṁ paṭijānāti nisajjaṁ paṭijānāti āpattiṁ paṭijānāti
āpattiyā kāretabbo. Gamanaṁ paṭijānāti nisajjaṁ na paṭijānāti
āpattiṁ paṭijānāti āpattiyā kāretabbo. Gamanaṁ paṭijānāti
nisajjaṁ paṭijānāti āpattiṁ na paṭijānāti nisajjāya kāretabbo.
Gamanaṁ paṭijānāti nisajjaṁ na paṭijānāti āpattiṁ na paṭijānāti na
kāretabbo. Gamanaṁ na paṭijānāti nisajjaṁ paṭijānāti āpattiṁ
paṭijānāti āpattiyā kāretabbo. Gamanaṁ na paṭijānāti nisajjaṁ na
paṭijānāti āpattiṁ paṭijānāti āpattiyā kāretabbo. Gamanaṁ na
paṭijānāti nisajjaṁ paṭijānāti āpattiṁ na paṭijānāti nisajjāya
kāretabbo. Gamanaṁ na paṭijānāti nisajjaṁ na paṭijānāti āpattiṁ
na paṭijānāti na kāretabboti.
Dutiyo aniyato niṭṭhito.
--------------

[657] Uddiṭṭhā kho āyasmanto dve aniyatā dhammā.
Tatthāyasmante pucchāmi kaccittha parisuddhā dutiyampi pucchāmi
kaccittha parisuddhā tatiyampi pucchāmi kaccittha parisuddhā parisuddhetthāyasmanto
tasmā tuṇhī. Evametaṁ dhārayāmīti.
Aniyatakaṇḍaṁ niṭṭhitaṁ.
------------
Tassuddānaṁ
alaṅkammaniyañceva tatheva ca na heva kho
aniyatā supaññattā buddhaseṭṭhena tādināti.

Vinayapiṭake mahāvibhaṅgassa
dutiyo bhāgo
-------
namo tassa bhagavato arahato sammāsambuddhassa.
Nissaggiyakaṇḍaṁ
ime kho panāyasmanto tiṁsa nissaggiyā pācittiyā dhammā
uddesaṁ āgacchanti.
Cīvaravaggassa paṭhamasikkhāpadaṁ

[1] Tena samayena buddho bhagavā vesāliyaṁ viharati gotamake
cetiye. Tena kho pana samayena bhagavatā bhikkhūnaṁ ticīvaraṁ anuññātaṁ
hoti. Chabbaggiyā bhikkhū bhagavatā ticīvaraṁ anuññātanti aññeneva
ticīvarena gāmaṁ pavisanti aññeneva 1 ticīvarena ārāme acchanti
aññeneva 1 ticīvarena nahānaṁ otaranti. Ye te bhikkhū appicchā
santuṭṭhā 2 lajjino kukkuccakā sikkhākāmā 2 te ujjhāyanti khīyanti
vipācenti kathaṁ hi nāma chabbaggiyā bhikkhū atirekacīvaraṁ dhāressantīti.
Athakho te bhikkhū [3]- bhagavato etamatthaṁ ārocesuṁ. Athakho
bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā
chabbaggiye bhikkhū paṭipucchi saccaṁ kira tumhe bhikkhave atirekacīvaraṁ
1 Ma. Yu. aññena. 2-2 Ma. ime pāṭhā natthi. 3 Ma. chabbaggiye bhikkhū
anekapariyāyena vigarahitvā.
Dhārethāti. Saccaṁ bhagavāti. Vigarahi buddho bhagavā ananucchavikaṁ
moghapurisā ananulomikaṁ appaṭirūpaṁ assāmaṇakaṁ akappiyaṁ akaraṇīyaṁ
kathaṁ hi nāma tumhe moghapurisā atirekacīvaraṁ dhāressatha netaṁ
moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha yo pana
bhikkhu atirekacīvaraṁ dhāreyya nissaggiyaṁ pācittiyanti. Evañcidaṁ
bhagavatā bhikkhūnaṁ sikkhāpadaṁ paññattaṁ hoti.