[103] Kathañca mahārāja bhikkhu sīlasampanno hoti idha mahārāja
bhikkhu pāṇātipātaṁ pahāya pāṇātipātā paṭivirato hoti nihitadaṇḍo
nihitasattho lajjī dayāpanno sabbapāṇabhūtahitānukampī viharati. Idaṁpissa
hoti sīlasmiṁ. Adinnādānaṁ pahāya adinnādānā paṭivirato hoti
dinnādāyī dinnapāṭikaṅkhī athenena sucibhūtena attanā viharati. Idaṁpissa
hoti sīlasmiṁ. Abrahmacariyaṁ pahāya brahmacārī hoti ārācārī
virato methunā gāmadhammā. Idaṁpissa hoti sīlasmiṁ. Musāvādaṁ pahāya
musāvādā paṭivirato hoti saccavādī saccasandho ṭheto 2 paccayiko
avisaṁvādako lokassa. Idaṁpissa hoti sīlasmiṁ. Pisuṇaṁ vācaṁ pahāya
pisuṇāya vācāya paṭivirato hoti ito sutvā na amutra akkhātā
1 Sī. kāyavacīkammena. 2 Sī. theto.
Imesaṁ bhedāya amutra vā sutvā na imesaṁ akkhātā amūsaṁ bhedāya
iti bhinnānaṁ vā sandhātā sahitānaṁ vā anuppadātā samaggārāmo
samaggarato samagganandī samaggakaraṇiṁ vācaṁ bhāsitā hoti. Idaṁpissa
hoti sīlasmiṁ. Pharusaṁ vācaṁ pahāya pharusāya vācāya paṭivirato
hoti yā sā vācā nelā kaṇṇasukhā pemanīyā hadayaṅgamā porī
bahujanakantā bahujanamanāpā tathārūpiṁ vācaṁ bhāsitā hoti. Idaṁpissa
hoti sīlasmiṁ. Samphappalāpaṁ pahāya samphappalāpā paṭivirato
hoti kālavādī bhūtavādī atthavādī dhammavādī vinayavādī nidhānavatiṁ
vācaṁ bhāsitā hoti kālena sāpadesaṁ pariyantavatiṁ atthasañhitaṁ.
Idaṁpissa hoti sīlasmiṁ. Bījagāmabhūtagāmasamārambhā paṭivirato hoti.
Ekabhattiko hoti rattūparato virato vikālabhojanā. Naccagītavādita-
visūkadassanā paṭivirato hoti. Mālāgandhavilepanadhāraṇamaṇḍanavibhūsanaṭṭhānā
paṭivirato hoti. Uccāsayanamahāsayanā paṭivirato
hoti. Jātarūparajaṭapaṭiggahaṇā 1 paṭivirato hoti. Āmakadhaññapaṭiggahaṇā
paṭivirato hoti. Āmakamaṁsapaṭiggahaṇā paṭivirato
hoti. Itthīkumārikapaṭiggahaṇā 2 paṭivirato hoti. Dāsīdāsapaṭiggahaṇā
paṭivirato hoti. Ajeḷakapaṭiggahaṇā paṭivirato hoti.
Kukkuṭasūkarapaṭiggahaṇā paṭivirato hoti. Hatthigavāssavaḷavāpaṭiggahaṇā
paṭivirato hoti. Khettavatthupaṭiggahaṇā paṭivirato
1 Sī. jātarūparajatapaṭiggahaṇā. 2 Sī. itthīkumārīpaṭiggahaṇā.
Hoti. Dūteyyapahiṇagamanānuyogā paṭivirato hoti. Kayavikkayā
paṭivirato hoti. Tulākūṭakaṁsakūṭamānakūṭā paṭivirato hoti.
Ukkoṭanavañcananikatisāviyogā paṭivirato hoti. Chedanavadhabandhana-
viparāmosāalopasahasākārā paṭivirato hoti. Idaṁpissa hoti sīlasmiṁ.
Cullasīlaṁ niṭṭhitaṁ 1 .

[104] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ bījagāmabhūtagāmasamārambhaṁ anuyuttā
viharanti. Seyyathīdaṁ. Mūlabījaṁ khandhabījaṁ phalabījaṁ aggabījaṁ bījabījameva
pañcamaṁ iti vā. Iti evarūpā bījagāmabhūtagāmasamārambhā paṭivirato
hoti. Idaṁpissa hoti sīlasmiṁ.

[105] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ sannidhikāraparibhogaṁ anuyuttā
viharanti. Seyyathīdaṁ. Annasannidhi 2 pānasannidhi vatthasannidhi
yānasannidhi sayanasannidhi gandhasannidhi āmisasannidhi iti vā. Iti
evarūpā sannidhikāraparibhogā paṭivirato hoti. Idaṁpissa hoti
sīlasmiṁ.

[106] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ visūkadassanaṁ anuyuttā viharanti.
1 Sī. cullasīlaṁ niṭṭhitanti idaṁ natthi. 2 annasannidhintipi annasannadhitipi
pāṭho dissati.
Seyyathīdaṁ. Naccaṁ gītaṁ vāditaṁ pekkhaṁ akkhānaṁ pāṇissaraṁ vetāḷaṁ
kumbhathūnaṁ sobhanagarakaṁ caṇḍālaṁ vaṁsaṁ dhovanaṁ hatthiyuddhaṁ assayuddhaṁ
mahisayuddhaṁ usabhayuddhaṁ ajayuddhaṁ meṇḍayuddhaṁ kukkuṭayuddhaṁ vaṭṭakayuddhaṁ
daṇḍayuddhaṁ muṭṭhiyuddhaṁ nibbuddhaṁ uyyodhikaṁ balaggaṁ senābyūhaṁ
anīkadassanaṁ iti vā. Iti evarūpā visūkadassanā paṭivirato
hoti. Idaṁpissa hoti sīlasmiṁ.

[107] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ jūtappamādaṭṭhānānuyogamanuyuttā
viharanti. Seyyathīdaṁ. Aṭṭhapadaṁ dasapadaṁ ākāsaṁ parihārapathaṁ
santikaṁ khalikaṁ ghaṭikaṁ salākahatthaṁ akkhaṁ paṅkacīraṁ vaṅkakaṁ mokkhacikaṁ
ciṅgulakaṁ pattāḷhakaṁ rathakaṁ dhanukaṁ akkharikaṁ mānesikaṁ 1 yathāvajjaṁ iti
vā. Iti evarūpā jūtappamādaṭṭhānānuyogā paṭivirato hoti.
Idaṁpissa hoti sīlasmiṁ.

[108] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ uccāsayanamahāsayanaṁ anuyuttā
viharanti. Seyyathīdaṁ. Āsandiṁ pallaṅkaṁ goṇakaṁ cittakaṁ paṭikaṁ paṭalikaṁ
tūlikaṁ vikatikaṁ uddhalomiṁ 2 ekantalomiṁ kaṭissaṁ koseyyaṁ kuttakaṁ hatthattharaṁ
assattharaṁ rathattharaṁ ajinappaveṇiṁ kādalimigapavarapaccattharaṇaṁ sauttaracchadaṁ
ubhatolohitakūpadhānaṁ iti vā. Iti evarūpā uccāsayanamahāsayanā
1 Sī. manosikaṁ. (manesikanti pāṭhena bhavitabbaṁ). 2 Sī. uddalomiṁ.
Paṭivirato hoti. Idaṁpissa hoti sīlasmiṁ.

[109] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ maṇḍanavibhūsanaṭṭhānānuyogaṁ anuyuttā
viharanti. Seyyathīdaṁ. Ucchādanaṁ parimaddanaṁ nhāpanaṁ sambāhanaṁ
ādāsaṁ añjanaṁ mālāgandhavilepanaṁ mukhacuṇṇaṁ mukhavilepanaṁ hatthabandhaṁ 1
sikhābandhaṁ daṇḍaṁ nālikaṁ asiṁ khaggaṁ chattaṁ citrupāhanaṁ uṇhīsaṁ maṇiṁ
vālavījaniṁ odātāni vatthāni dīghadasāni iti vā. Iti evarūpā
maṇḍanavibhūsanaṭṭhānānuyogā paṭivirato hoti. Idaṁpissa hoti sīlasmiṁ.

[110] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ tiracchānakathaṁ anuyuttā viharanti.
Seyyathīdaṁ. Rājakathaṁ corakathaṁ mahāmattakathaṁ senākathaṁ bhayakathaṁ yuddhakathaṁ
annakathaṁ pānakathaṁ vatthakathaṁ sayanakathaṁ mālākathaṁ gandhakathaṁ ñātikathaṁ
yānakathaṁ gāmakathaṁ nigamakathaṁ nagarakathaṁ janapadakathaṁ itthīkathaṁ purisakathaṁ 2
sūrakathaṁ visikhākathaṁ kumbhaṭṭhānakathaṁ pubbapetakathaṁ nānattakathaṁ lokakkhāyikaṁ
samuddakkhāyikaṁ iti bhavābhavakathaṁ iti vā. Iti evarūpāya tiracchānakathāya
paṭivirato hoti. Idaṁpissa hoti sīlasmiṁ.

[111] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ viggāhikakathaṁ anuyuttā viharanti.
1 Sī. mālāvilepanaṁ mukhacuṇṇakaṁ mukhālepaṁ hatthabandhanaṁ. 2 Sī.
purisakathanti pāṭho na dissati.
Seyyathīdaṁ. Tvaṁ imaṁ dhammavinayaṁ ājānāsi ahaṁ imaṁ dhammavinayaṁ
ājānāmi kiṁ tvaṁ imaṁ dhammavinayaṁ ājānissasi micchāpaṭipanno
tvamasi ahamasmi sammāpaṭipanno sahitaṁ me asahitante pure
vacanīyaṁ pacchā avaca pacchā vacanīyaṁ pure avaca adhiciṇṇante
viparāvattaṁ āropito te vādo niggahitosi caravādappamokkhāya
nibbeṭhehi vā sace pahosīti iti vā. Iti evarūpāya
viggāhikakathāya paṭivirato hoti. Idaṁpissa hoti sīlasmiṁ.

[112] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṁ dūteyyapahiṇagamanānuyogamanuyuttā
viharanti. Seyyathīdaṁ. Raññaṁ rājamahāmattānaṁ khattiyānaṁ brāhmaṇānaṁ
gahapatikānaṁ kumārānaṁ idha gaccha amutra gaccha idaṁ hara amutra
idaṁ āharāti iti vā. Iti evarūpā dūteyyapahiṇagamanānuyogā
paṭivirato hoti. Idaṁpissa hoti sīlasmiṁ.