[1260] Kati pācittiyāni sabbāni nānāvatthukāni
kativācāya deseyya vuttā ādiccabandhunā.
Nava pācittiyāni sabbāni nānāvatthukāni
ekavācāya deseyya vuttā ādiccabandhunā.
1-2 Yu. kittikā tattikā.

[1261] Kati pācittiyāni sabbāni nānāvatthukāni
kiñca 1 kittetvā deseyya vuttā ādiccabandhunā.
Pañca pācittiyāni sabbāni nānāvatthukāni
vatthuṁ kittetvā deseyya vuttā ādiccabandhunā.

[1262] Kati pācittiyāni sabbāni nānāvatthukāni
kiñca kittetvā deseyya vuttā ādiccabandhunā.
Nava pācittiyāni sabbāni nānāvatthukāni
vatthuṁ kittetvā deseyya vuttā ādiccabandhunā.

[1263] Yāvatatiyake kati āpattiyo kati vohārapaccayā
khādantassa kati āpattiyo kati bhojanapaccayā.
Yāvatatiyake tisso āpattiyo cha vohārapaccayā.
Khādantassa tisso āpattiyo pañca bhojanapaccayā.

[1264] Sabbā yāvatatiyakā kati ṭhānāni gacchanti
katīnañceva āpatti katīnaṁ adhikaraṇena ca.
Sabbā yāvatatiyakā pañca ṭhānāni gacchanti
pañcannañceva āpatti pañcannaṁ adhikaraṇena ca.

[1265] Katīnaṁ vinicchayo hoti katīnaṁ vūpasamena ca
katīnañceva anāpatti katīhi ṭhānehi sobhati.
Pañcannaṁ vinicchayo hoti pañcannaṁ vūpasamena ca
pañcannañceva anāpatti tīhi ṭhānehi sobhati.
1 Yu. kiñci.

[1266] Kati kāyikā rattiṁ kati kāyikā divā
nijjhantassa 1 kati āpatti kati piṇḍapātapaccayā.
Dve kāyikā rattiṁ dve kāyikā divā
nijjhantassa 1 ekā āpatti ekā piṇḍapātapaccayā.

[1267] Katānisaṁse sampassaṁ paresaṁ saddhāya desaye 2
ukkhittakā kati vuttā kati sammāpavattanā 3
aṭṭhānisaṁse sampassaṁ paresaṁ saddhāya desaye 2
ukkhittakā tayo vuttā tecattāḷīsa sammāvattanā.

[1268] Katiṭhāne musāvādo kati paramanti vuccati
kati pāṭidesanīyā katīnaṁ desanāya ca.
Pañcaṭhāne musāvādo cuddasa paramanti vuccati
dvādasa pāṭidesanīyā catunnaṁ desanāya ca.

[1269] Kataṅgiko musāvādo kati uposathaṅgāni
kati dūteyyaṅgāni kati titthiyavattanā.
Aṭṭhaṅgiko musāvādo aṭṭha uposathaṅgāni
aṭṭha dūteyyaṅgāni aṭṭha titthiyavattanā.