[1240] Pañcasattati sekhiyā katīhi samuṭṭhānehi samuṭṭhahanti.
Pañcasattati sekhiyā tīhi samuṭṭhānehi samuṭṭhahanti siyā kāyato
ca cittato ca samuṭṭhahanti na vācato siyā vācato ca cittato
ca samuṭṭhahanti na kāyato siyā kāyato ca vācato ca cittato
ca samuṭṭhahantīti 1 .
Samuṭṭhānaṁ niṭṭhitaṁ.
Tassuddānaṁ

[1241] Acittakusalā 2 ceva samuṭṭhānañca sabbathā
yathādhammena ñāyena samuṭhānaṁ vijānathāti.
------------------
1 Ma. itisaddo natthi. 2 Yu. acittakusalo.
Dutiyagāthāsaṅgaṇikaṁ

[1242] Kati āpattiyo kāyikā kati vācasikā katā
chādentassa kati āpattiyo kati saṁsaggapaccayā.
Cha āpattiyo kāyikā cha vācasikā katā
chādentassa tisso āpattiyo pañca saṁsaggapaccayā.

[1243] Aruṇugge kati āpattiyo kati yāvatatiyakā
katettha aṭṭhavatthukā katīhi sabbasaṅgaho.
Aruṇugge tisso āpattiyo dve yāvatatiyakā
ekettha aṭṭhavatthukā ekena sabbasaṅgaho.

[1244] Vinayassa kati mūlāni yāni buddhena paññattā
vinayagarukā kati vuttā duṭṭhullachādanā kati.
Vinayassa dve mūlāni yāni buddhena paññattā
vinayagarukā dve vuttā dve duṭṭhullachādanā.

[1245] Gāmantare kati āpattiyo kati nadīpārapaccayā
katimaṁsesu thullaccayaṁ katimaṁsesu dukkaṭaṁ.
Gāmantare catasso āpattiyo catasso nadīpārapaccayā
ekamaṁse thullaccayaṁ navamaṁsesu dukkaṭaṁ.

[1246] Kati vācasikā rattiṁ kati vācasikā divā
dadamānassa kati āpattiyo paṭiggaṇhantassa kittakā.
Dve vācasikā rattiṁ dve vācasikā divā
dadamānassa tisso āpattiyo cattāro ca paṭiggahe.

[1247] Kati desanāgāminiyo kati sappaṭikammā katā
katettha appaṭikammā vuttā buddhenādiccabandhunā.
Pañca desanāgāminiyo cha sappaṭikammā katā
ekettha appaṭikammā vuttā buddhenādiccabandhunā.

[1248] Vinayagarukā kati vuttā kāyavācasikāni ca
kati vikāle dhaññarasā 1 kati ñatticatutthena sammati.
Vinayagarukā dve vuttā kāyavācasikāni ca
eko vikāle dhaññaraso ekā ñatticatutthena sammati.

[1249] Pārājikā kāyikā kati kati saṁvāsakabhūmiyo 2
katīnañca ratticchedo paññattā dvaṅgulā kati.
Pārājikā kāyikā dve dve saṁvāsakabhūmiyo 2
dvinnañca ratticchedo paññattā dvaṅgulā duve.