[1250] Katattānaṁ vadhitvāna katīhi saṅgho bhijjati
katettha paṭhamāpattikā ñattiyā karaṇā kati.
Dve attānaṁ vadhitvāna dvīhi saṅgho bhijjati
dvettha paṭhamāpattikā ñattiyā karaṇā duve.

[1251] Pāṇātipāte kati āpattiyo vācā pārājikā kati
1 Ma. Yu. dhaññaraso. 2 Yu. saṁvāsabhūmiyo.
Obhāsanā kati vuttā sañcarittena vā kati.
Pāṇātipāte tisso āpattiyo vācā pārājikā tayo
obhāsanā tayo vuttā sañcarittena vā tayo.

[1252] Kati puggalā na upasampādetabbā katī kammāna saṅgahā
nāsitakā kati vuttā katīnaṁ ekavācikā.
Tayo puggalā na upasampādetabbā tayo kammāna saṅgahā
nāsitakā tayo vuttā tiṇṇannaṁ ekavācikā.

[1253] Adinnādāne kati āpattiyo kati methunapaccayā
chindantassa kati āpattiyo kati chaḍḍitapaccayā.
Adinnādāne tisso āpattiyo catasso methunapaccayā
chindantassa tisso āpattiyo pañca chaḍḍitapaccayā.

[1254] Bhikkhunovādakavaggasmiṁ pācittiyena dukkaṭā
katettha navakā vuttā katīnaṁ cīvarena ca.
Bhikkhunovādakavaggasmiṁ pācittiyena dukkaṭā katā
caturettha navakā vuttā dvinnaṁ cīvarena ca.

[1255] Bhikkhunīnañca akkhātā pāṭidesaniyā kati
bhuñjantāmakadhaññena pācittiyena dukkaṭā kati.
Bhikkhunīnañca akkhātā aṭṭha pāṭidesaniyā katā
bhuñjantāmakadhaññena pācittiyena dukkaṭā katā.

[1256] Gacchantassa kati āpattiyo ṭhitassa vāpi kittakā
Nisinnassa kati āpattiyo nipannassāpi kittakā 1 .
Gacchantassa catasso āpattiyo ṭhitassa vāpi tattakā 2
nisinnassa catasso āpattiyo nipannassāpi tattakā 2

[1257] Kati pācittiyāni sabbāni nānāvatthukāni
apubbaṁ acarimaṁ āpajjeyya ekato.
Pañca pācittiyāni sabbāni nānāvatthukāni
apubbaṁ acarimaṁ āpajjeyya ekato.

[1258] Kati pācittiyāni sabbāni nānāvatthukāni
apubbaṁ acarimaṁ āpajjeyya ekato.
Nava pācittiyāni sabbāni nānāvatthukāni
apubbaṁ acarimaṁ āpajjeyya ekato.

[1259] Kati pācittiyāni sabbāni nānāvatthukāni
kativācāya deseyya vuttā ādiccabandhunā.
Pañca pācittiyāni sabbāni nānāvatthukāni
ekavācāya deseyya vuttā ādiccabandhunā.