[500] Gihīnaṁ hi 2 bhikkhave dussaṁharāni bhogāni sambhatānipi 3
duranurakkhiyāni tattha nāma tumhe moghapurisā evaṁ dussaṁharesu bhogesu
sambhatesupi duranurakkhiyesu yācanabahulā viññattibahulā viharissatha
purisaṁ detha purisatthakaraṁ detha goṇaṁ detha sakaṭaṁ detha vāsiṁ detha
pharasuṁ detha kuṭhāriṁ detha kuddālaṁ detha nikhādanaṁ detha valliṁ detha
veḷuṁ detha muñjaṁ detha pabbajaṁ detha tiṇaṁ detha mattikaṁ dethāti
netaṁ moghapurisā appasannānaṁ vā pasādāya .pe. Evañca pana
bhikkhave imaṁ sikkhāpadaṁ uddiseyyātha saññācikāya pana bhikkhunā
kuṭiṁ kārayamānena assāmikaṁ attuddesaṁ pamāṇikā kāretabbā
tatridaṁ pamāṇaṁ dīghaso dvādasa vidatthiyo sugatavidatthiyā tiriyaṁ
sattantarā bhikkhū abhinetabbā vatthudesanāya. Tehi bhikkhūhi vatthuṁ
1 Yu. Ma. bahujjanā. 2 Yu. potthakeyaṁ pāṭho na paññāyati.
3 dussambhatānipīti vā pāṭho.
Desetabbaṁ anārambhaṁ saparikkamanaṁ sārambhe ce bhikkhu vatthusmiṁ
aparikkamane saññācikāya kuṭiṁ kāreyya bhikkhū vā anabhineyya
vatthudesanāya pamāṇaṁ vā atikkāmeyya saṅghādisesoti.

[501] Saññācikā 1 nāma sayaṁ yācitvā purisaṁpi purisatthakaraṁpi
goṇaṁpi sakaṭaṁpi vāsiṁpi pharasuṁpi kuṭhāriṁpi kuddālaṁpi nikhādanaṁpi .pe.
Tiṇaṁpi mattikaṁpi. Kuṭī 2 nāma ullittā vā hoti avalittā vā
ullittāvalittā vā. Kārayamānenāti karonto vā kārāpento
vā. Assāmikanti na añño koci sāmiko hoti itthī vā
puriso vā gahaṭṭho vā pabbajito vā. Attuddesanti attano
atthāya. Pamāṇikā kāretabbā tatridaṁ pamāṇaṁ dīghaso dvādasa
vidatthiyo sugatavidatthiyāti bāhirimena mānena. Tiriyaṁ sattantarāti
abbhantarimena mānena.

[502] Bhikkhū abhinetabbā vatthudesanāyāti tena kuṭīkārakena
bhikkhunā kuṭīvatthuṁ sodhetvā saṅghaṁ upasaṅkamitvā ekaṁsaṁ uttarāsaṅgaṁ
karitvā vuḍḍhānaṁ bhikkhūnaṁ pāde vanditvā ukkuṭikaṁ nisīditvā
añjaliṁ paggahetvā evamassa vacanīyo ahaṁ bhante saññācikāya
kuṭiṁ kattukāmo assāmikaṁ attuddesaṁ sohaṁ bhante saṅghaṁ kuṭīvatthuolokanaṁ
yācāmīti. Dutiyampi yācitabbā 3 tatiyampi yācitabbā.
1 Yu. saṁyācikāya. 2 Yu. kuṭiṁ. 3 dutiyampi yācitabbāti bhikkhū
sandhāya bahuvacanaṁ vuttanti tabbaṇṇanā.
Sace sabbo saṅgho ussahati kuṭīvatthuṁ oloketuṁ sabbena saṅghena
oloketabbaṁ. No ce sabbo saṅgho ussahati kuṭīvatthuṁ oloketuṁ
ye tattha honti bhikkhū byattā paṭibalā sārambhaṁ anārambhaṁ
saparikkamanaṁ aparikkamanaṁ jānituṁ te yācitvā sammannitabbā.
Evañca pana bhikkhave sammannitabbā byattena bhikkhunā paṭibalena
saṅgho ñāpetabbo suṇātu me bhante saṅgho ayaṁ itthannāmo
bhikkhu saññācikāya kuṭiṁ kattukāmo assāmikaṁ attuddesaṁ so saṅghaṁ
kuṭīvatthuolokanaṁ yācati. Yadi saṅghassa pattakallaṁ saṅgho itthannāmañca
itthannāmañca bhikkhū sammanneyya itthannāmassa bhikkhuno
kuṭīvatthuṁ oloketuṁ. Esā ñatti. Suṇātu me bhante saṅgho ayaṁ
itthannāmo bhikkhu saññācikāya kuṭiṁ kattukāmo assāmikaṁ attuddesaṁ
so saṅghaṁ kuṭīvatthuolokanaṁ yācati. Saṅgho itthannāmañca itthannāmañca
bhikkhū sammannati itthannāmassa bhikkhuno kuṭīvatthuṁ oloketuṁ.
Yassāyasmato khamati itthannāmassa ca itthannāmassa ca bhikkhūnaṁ
sammati itthannāmassa bhikkhuno kuṭīvatthuṁ oloketuṁ so tuṇhassa
yassa nakkhamati so bhāseyya. Sammatā saṅghena itthannāmo ca
itthannāmo ca bhikkhū itthannāmassa bhikkhuno kuṭīvatthuṁ oloketuṁ.
Khamati saṅghassa tasmā tuṇhī. Evametaṁ dhārayāmīti.

[503] Tehi sammatehi bhikkhūhi tattha gantvā kuṭīvatthuṁ oloketabbaṁ
sārambhaṁ anārambhaṁ saparikkamanaṁ aparikkamanaṁ jānitabbaṁ. Sace sārambhaṁ
Hoti aparikkamanaṁ māyidha karīti vattabbo. Sace anārambhaṁ hoti
saparikkamanaṁ saṅghassa ārocetabbaṁ anārambhaṁ saparikkamananti. Tena
kuṭīkārakena bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā
vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ
paggahetvā evamassa vacanīyo ahaṁ bhante saññācikāya kuṭiṁ
kattukāmo assāmikaṁ attuddesaṁ sohaṁ bhante saṅghaṁ kuṭīvatthudesanaṁ
yācāmīti. Dutiyampi yācitabbā tatiyampi yācitabbā. Byattena
bhikkhunā paṭibalena saṅgho ñāpetabbo suṇātu me bhante saṅgho
ayaṁ itthannāmo bhikkhu saññācikāya kuṭiṁ kattukāmo assāmikaṁ
attuddesaṁ so saṅghaṁ kuṭīvatthudesanaṁ yācati. Yadi saṅghassa pattakallaṁ
saṅgho itthannāmassa bhikkhuno kuṭīvatthuṁ deseyya. Esā ñatti.
Suṇātu me bhante saṅgho ayaṁ itthannāmo bhikkhu saññācikāya kuṭiṁ
kattukāmo assāmikaṁ attuddesaṁ so saṅghaṁ kuṭīvatthudesanaṁ yācati.
Saṅgho itthannāmassa bhikkhuno kuṭīvatthuṁ deseti. Yassāyasmato
khamati itthannāmassa bhikkhuno kuṭīvatthussa desanā so tuṇhassa
yassa nakkhamati so bhāseyya. Desitaṁ saṅghena itthannāmassa bhikkhuno
kuṭīvatthuṁ. Khamati saṅghassa tasmā tuṇhī. Evametaṁ dhārayāmīti.

[504] Sārambhaṁ nāma kipillikānaṁ vā āsayo hoti upacikānaṁ
vā āsayo hoti undurānaṁ vā āsayo hoti ahīnaṁ vā āsayo
hoti vicchikānaṁ vā āsayo hoti satapadīnaṁ vā āsayo hoti
Hatthīnaṁ vā āsayo hoti assānaṁ vā āsayo hoti sīhānaṁ
vā āsayo hoti byagghānaṁ vā āsayo hoti dīpīnaṁ vā āsayo
hoti acchānaṁ vā āsayo hoti taracchānaṁ vā āsayo hoti yesaṁ
kesañci tiracchānagatānaṁ vā pāṇānaṁ āsayo hoti pubbaṇṇanissitaṁ
vā hoti aparaṇṇanissitaṁ vā hoti abbhāghātanissitaṁ vā hoti
āghātananissitaṁ vā hoti susānanissitaṁ vā hoti uyyānanissitaṁ vā hoti
rājavatthunissitaṁ vā hoti hatthisālānissitaṁ vā hoti assasālānissitaṁ
vā hoti bandhanāgāranissitaṁ vā hoti pānāgāranissitaṁ vā hoti
sūnanissitaṁ vā hoti racchānissitaṁ vā hoti caccaranissitaṁ vā hoti
sabhānissitaṁ vā hoti saṁsaraṇanissitaṁ vā hoti etaṁ sārambhaṁ nāma.

[505] Aparikkamanaṁ nāma na sakkā hoti yathāyuttena sakaṭena
anuparigantuṁ samantā nisseṇiyā anuparigantuṁ etaṁ aparikkamanaṁ nāma.

[506] Anārambhaṁ nāma na kipillikānaṁ vā āsayo hoti na
upacikānaṁ vā āsayo hoti na undurānaṁ vā āsayo hoti na
ahīnaṁ vā āsayo hoti na vicchikānaṁ vā āsayo hoti na
satapadīnaṁ vā āsayo hoti .pe. Na saṁsaraṇanissitaṁ vā hoti
etaṁ anārambhaṁ nāma.

[507] Saparikkamanaṁ nāma sakkā hoti yathāyuttena sakaṭena
anuparigantuṁ samantā nisseṇiyā anuparigantuṁ etaṁ saparikkamanaṁ nāma.

[508] Saññācikā nāma sayaṁ yācitvā purisaṁpi purisatthakaraṁpi
.pe. Nikhādanaṁpi. Kuṭī nāma ullittā vā hoti avalittā vā
ullittāvalittā vā. Kāreyyāti karoti vā kārāpeti vā.
Bhikkhū vā anabhineyya vatthudesanāya pamāṇaṁ vā atikkāmeyyāti
ñattidutiyena kammena kuṭīvatthuṁ na desāpetvā āyāmato vā
vitthārato vā antamaso kesaggamattampi atikkāmetvā karoti vā
kārāpeti vā payoge 1 dukkaṭaṁ. Ekapiṇḍaṁ anāgate āpatti
thullaccayassa. Tasmiṁ piṇḍe āgate āpatti saṅghādisesassa.
Saṅghādisesoti .pe. Tenapi vuccati saṅghādisesoti.

[509] Bhikkhu kuṭiṁ karoti adesitavatthukaṁ sārambhaṁ aparikkamanaṁ
āpatti saṅghādisesena dvinnaṁ dukkaṭānaṁ. Bhikkhu kuṭiṁ karoti adesitavatthukaṁ
sārambhaṁ saparikkamanaṁ āpatti saṅghādisesena dukkaṭassa.
Bhikkhu kuṭiṁ karoti adesitavatthukaṁ anārambhaṁ aparikkamanaṁ āpatti
saṅghādisesena dukkaṭassa. Bhikkhu kuṭiṁ karoti adesitavatthukaṁ anārambhaṁ
saparikkamanaṁ āpatti saṅghādisesassa. Bhikkhu kuṭiṁ karoti desitavatthukaṁ
sārambhaṁ aparikkamanaṁ āpatti dvinnaṁ dukkaṭānaṁ. Bhikkhu
kuṭiṁ karoti desitavatthukaṁ sārambhaṁ saparikkamanaṁ āpatti dukkaṭassa.
Bhikkhu kuṭiṁ karoti desitavatthukaṁ anārambhaṁ aparikkamanaṁ āpatti
dukkaṭassa. Bhikkhu kuṭiṁ karoti desitavatthukaṁ anārambhaṁ saparikkamanaṁ
anāpatti.
1 Yu. Ma. potthakesu idha. āmeṇḍitaṁ kataṁ.