[410] Tena kho pana samayena aññatarā itthī khettaṁ
vapāpetvā āgacchati. Aññataro bhikkhu sāratto taṁ itthiṁ
etadavoca vāpitaṁ kho te bhaginīti. Sā na paṭivijānāti āma
ayya no ca kho paṭivuttanti. Tassa kukkuccaṁ ahosi .pe.
Anāpatti bhikkhu saṅghādisesassa āpatti dukkaṭassāti.

[411] Tena kho pana samayena aññataro bhikkhu paribbājikaṁ
paṭipathe passitvā sāratto taṁ paribbājikaṁ etadavoca kacci
bhagini te maggo saṁsaratīti 1 . Sā na paṭivijānāti āma bhikkhu
1 Yu. Ma. saṁsīdatīti.
Paṭipajjissasīti. Tassa kukkuccaṁ ahosi .pe. Anāpatti bhikkhu
saṅghādisesassa āpatti thullaccayassāti.

[412] Tena kho pana samayena aññataro bhikkhu sāratto
aññataraṁ itthiṁ etadavoca saddhāsi tvaṁ bhagini apica yaṁ sāmikassa
desi taṁ namhākaṁ desīti. Kiṁ bhanteti. Methunadhammanti.
Tassa kukkuccaṁ ahosi .pe. Āpattiṁ tvaṁ bhikkhu āpanno
saṅghādisesanti. Tena kho pana samayena aññataro bhikkhu sāratto
aññataraṁ itthiṁ etadavoca saddhāsi tvaṁ bhagini apica yaṁ aggadānaṁ
taṁ namhākaṁ desīti. Kiṁ bhante aggadānanti. Methunadhammanti.
Tassa kukkuccaṁ ahosi .pe. Āpattiṁ tvaṁ bhikkhu āpanno
saṅghādisesanti.

[413] Tena kho pana samayena aññatarā itthī kammaṁ karoti.
Aññataro bhikkhu sāratto taṁ itthiṁ etadavoca tiṭṭha bhagini ahaṁ
karissāmīti. Sā na paṭivijānāti. Tassa kukkuccaṁ ahosi .pe.
Anāpatti bhikkhu saṅghādisesassa āpatti dukkaṭassāti. Tena
kho pana samayena aññatarā itthī kammaṁ karoti. Aññataro bhikkhu
sāratto taṁ itthiṁ etadavoca nisīda bhagini ahaṁ karissāmīti.
Sā na paṭivijānāti. Tassa kukkuccaṁ ahosi .pe. Anāpatti
bhikkhu saṅghādisesassa āpatti dukkaṭassāti. Tena kho pana
samayena aññatarā itthī kammaṁ karoti. Aññataro bhikkhu
Sāratto taṁ itthiṁ etadavoca nipajja bhagini ahaṁ karissāmīti.
Sā na paṭivijānāti. Tassa kukkuccaṁ ahosi .pe. Anāpatti
bhikkhu saṅghādisesassa āpatti dukkaṭassāti.
Tatiyasaṅghādisesaṁ niṭṭhitaṁ.
Catutthasaṅghādisesaṁ

[414] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā udāyi
sāvatthiyaṁ kulūpako hoti bahukāni kulāni upasaṅkamati. Tena kho
pana samayena aññatarā itthī matapatikā abhirūpā hoti dassanīyā
pāsādikā. Athakho āyasmā udāyi pubbaṇhasamayaṁ nivāsetvā
pattacīvaramādāya yena tassā itthiyā nivesanaṁ tenupasaṅkami
upasaṅkamitvā paññatte āsane nisīdi. Athakho sā itthī
yenāyasmā udāyi tenupasaṅkami upasaṅkamitvā āyasmantaṁ udāyiṁ
abhivādetvā ekamantaṁ nisīdi. Ekamantaṁ nisinnaṁ kho taṁ itthiṁ
āyasmā udāyi dhammiyā kathāya sandassesi samādapesi samuttejesi
sampahaṁsesi. Athakho sā itthī āyasmatā udāyinā dhammiyā
kathāya sandassitā samādapitā samuttejitā sampahaṁsitā āyasmantaṁ
udāyiṁ etadavoca vadeyyātha bhante yena attho paṭibalā mayaṁ
ayyassa dātuṁ yadidaṁ cīvarapiṇḍapātasenāsanagilānapaccayabhesajjaparikkhāranti 1 .
Na kho te bhagini amhākaṁ dullabhā yadidaṁ cīvarapiṇḍapātasenāsana-
gilānapaccayabhesajjaparikkhārā apica kho 2 yo amhākaṁ
dullabho taṁ amhākaṁ dehīti. Kiṁ bhanteti. Methunadhammanti.
1 Yu. parikkhārānanti. 2 Yu. Ma. potthakesu ayaṁ pāṭho natthi.
Attho bhanteti. Attho bhaginīti. Ehi bhanteti ovarakaṁ
pavisitvā sāṭakaṁ nikkhipitvā mañcake uttānā nipajji. Athakho
āyasmā udāyi yena sā itthī tenupasaṅkami upasaṅkamitvā
ko imaṁ vasalaṁ duggandhaṁ āmasissatīti nuṭṭhuhitvā pakkāmi. Athakho
sā itthī ujjhāyati khīyati vipāceti alajjino ime samaṇā
sakyaputtiyā dussīlā musāvādino ime hi nāma samacārino
dhammacārino brahmacārino saccavādino sīlavanto kalyāṇadhammā
paṭijānissanti natthi imesaṁ sāmaññaṁ natthi imesaṁ brahmaññaṁ
naṭṭhaṁ imesaṁ sāmaññaṁ naṭṭhaṁ imesaṁ brahmaññaṁ kuto imesaṁ
sāmaññaṁ kuto imesaṁ brahmaññaṁ apagatā ime sāmaññā
apagatā ime brahmaññā kathaṁ hi nāma samaṇo udāyi maṁ
sāmaṁ methunadhammaṁ yācitvā ko imaṁ vasalaṁ duggandhaṁ āmasissatīti
nuṭṭhuhitvā pakkamissati kiṁ me pāpakaṁ kiṁ me duggandhaṁ kissāhaṁ
kena hāyāmīti. Aññāpi itthiyo ujjhāyanti khīyanti vipācenti
alajjino ime samaṇā sakyaputtiyā dussīlā musāvādino ime hi
nāma samacārino brahmacārino saccavādino sīlavanto kalyāṇadhammā
paṭijānissanti natthi imesaṁ sāmaññaṁ natthi imesaṁ brahmaññaṁ
naṭṭhaṁ imesaṁ sāmaññaṁ naṭṭhaṁ imesaṁ brahmaññaṁ kuto imesaṁ
sāmaññaṁ kuto imesaṁ brahmaññaṁ apagatā ime sāmaññā
apagatā ime brahmaññā kathaṁ hi nāma samaṇo udāyi imissā sāmaṁ
Methunadhammaṁ yācitvā ko imaṁ vasalaṁ duggandhaṁ āmasissatīti nuṭṭhuhitvā
pakkamissati kiṁ imissā pāpakaṁ kiṁ imissā duggandhaṁ kissāyaṁ
kena hāyatīti. Assosuṁ kho bhikkhū tāsaṁ itthīnaṁ ujjhāyantīnaṁ
khīyantīnaṁ vipācentīnaṁ. Ye te bhikkhū appicchā santuṭṭhā lajjino
kukkuccakā sikkhākāmā te ujjhāyanti khīyanti vipācenti kathaṁ
hi nāma āyasmā udāyi mātugāmassa santike attakāmapāricariyāya
vaṇṇaṁ bhāsissatīti. Athakho te bhikkhū bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā
āyasmantaṁ udāyiṁ paṭipucchi saccaṁ kira tvaṁ udāyi
mātugāmassa santike attakāmapāricariyāya vaṇṇaṁ bhāsasīti.
Saccaṁ bhagavāti. Vigarahi buddho bhagavā ananucchavikaṁ moghapurisa
ananulomikaṁ appaṭirūpaṁ assāmaṇakaṁ akappiyaṁ akaraṇīyaṁ kathaṁ hi nāma
tvaṁ moghapurisa mātugāmassa santike attakāmapāricariyāya vaṇṇaṁ
bhāsissasi nanu mayā moghapurisa anekapariyāyena virāgāya dhammo
desito no sarāgāya .pe. Kāmapariḷāhānaṁ vūpasamo akkhāto netaṁ
moghapurisa appasannānaṁ vā pasādāya .pe. Evañca pana bhikkhave imaṁ
sikkhāpadaṁ uddiseyyātha yo pana bhikkhu otiṇṇo vipariṇatena cittena
mātugāmassa santike attakāmapāricariyāya vaṇṇaṁ bhāseyya etadaggaṁ
bhagini pāricariyānaṁ yā mādisaṁ sīlavantaṁ kalyāṇadhammaṁ brahmacāriṁ
etena dhammena paricareyyāti methunūpasañhitena saṅghādisesoti.

[415] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Otiṇṇo nāma sāratto
apekkhavā paṭibaddhacitto. Vipariṇatanti rattaṁpi cittaṁ vipariṇataṁ
duṭṭhaṁpi cittaṁ vipariṇataṁ mūḷhaṁpi cittaṁ vipariṇataṁ apica rattaṁ cittaṁ
imasmiṁ atthe adhippetaṁ vipariṇatanti. Mātugāmo nāma manussitthī
na yakkhī na petī na tiracchānagatā viññū paṭibalā subhāsitadubbhāsitaṁ
duṭṭhullāduṭṭhullaṁ ājānituṁ. Mātugāmassa santiketi mātugāmassa
sāmantā mātugāmassa avidūre. Attakāmanti attano kāmaṁ attano
hetuṁ attano adhippāyaṁ attano pāricariyaṁ. Etadagganti etaṁ aggaṁ
etaṁ seṭṭhaṁ etaṁ mokkhaṁ etaṁ uttamaṁ etaṁ pavaraṁ. Yāti khattiyā 1
vā brāhmaṇī vā vesī vā suddī vā. Mādisanti khattiyaṁ vā
brāhmaṇaṁ vā vesaṁ vā suddaṁ vā. Sīlavantanti pāṇātipātā
paṭivirataṁ adinnādānā paṭivirataṁ musāvādā paṭivirataṁ. Brahmacārinti
methunadhammā paṭivirataṁ. Kalyāṇadhammo nāma tena ca sīlena tena
ca brahmacariyena kalyāṇadhammo hoti. Etena dhammenāti methunadhammena.
Paricareyyāti abhirameyya. Methunūpasañhitenāti methunadhammapaṭisaṁyuttena.
Saṅghādisesoti .pe. Tenapi vuccati saṅghādisesoti.

[416] Itthī ca hoti itthīsaññī sāratto ca bhikkhu ca naṁ
itthiyā santike attakāmapāricariyāya vaṇṇaṁ bhāsati āpatti
1 Yu. Ma. khattiyī.
Saṅghādisesassa. Itthī ca hoti vematiko paṇḍakasaññī purisasaññī
tiracchānagatasaññī sāratto ca bhikkhu ca naṁ itthiyā santike attakāmapāricariyāya
vaṇṇaṁ bhāsati āpatti thullaccayassa. Paṇḍako
ca hoti paṇḍakasaññī sāratto ca bhikkhu ca naṁ paṇḍakassa
santike attakāmapāricariyāya vaṇṇaṁ bhāsati āpatti thullaccayassa.
Paṇḍako ca hoti vematiko purisasaññī tiracchānagatasaññī itthīsaññī
sāratto ca bhikkhu ca naṁ paṇḍakassa santike attakāmapāricariyāya
vaṇṇaṁ bhāsati āpatti dukkaṭassa. Puriso ca hoti
purisasaññī vematiko tiracchānagatasaññī itthīsaññī paṇḍakasaññī
sāratto ca bhikkhu ca naṁ purisassa santike attakāmapāricariyāya
vaṇṇaṁ bhāsati āpatti dukkaṭassa. Tiracchānagato ca hoti
tiracchānagatasaññī vematiko itthīsaññī paṇḍakasaññī purisasaññī
sāratto ca bhikkhu ca naṁ tiracchānagatassa santike attakāmapāricariyāya
vaṇṇaṁ bhāsati āpatti dukkaṭassa.

[417] Dve itthiyo dvinnaṁ itthīnaṁ itthīsaññī sāratto ca
bhikkhu ca naṁ dvinnaṁ itthīnaṁ santike attakāmapāricariyāya vaṇṇaṁ
bhāsati āpatti dvinnaṁ saṅghādisesānaṁ. Dve itthiyo dvinnaṁ
itthīnaṁ vematiko paṇḍakasaññī purisasaññī tiracchānagatasaññī
sāratto ca bhikkhu ca naṁ dvinnaṁ itthīnaṁ santike attakāmapāricariyāya
vaṇṇaṁ bhāsati āpatti dvinnaṁ thullaccayānaṁ. Dve paṇḍakā
Dvinnaṁ paṇḍakānaṁ paṇḍakasaññī sāratto ca bhikkhu ca naṁ dvinnaṁ
paṇḍakānaṁ santike attakāmapāricariyāya vaṇṇaṁ bhāsati āpatti
dvinnaṁ thullaccayānaṁ. Dve paṇḍakā dvinnaṁ paṇḍakānaṁ vematiko
purisasaññī tiracchānagatasaññī itthīsaññī sāratto ca bhikkhu ca
naṁ dvinnaṁ paṇḍakānaṁ santike attakāmapāricariyāya vaṇṇaṁ bhāsati
āpatti dvinnaṁ dukkaṭānaṁ. Dve purisā dvinnaṁ purisānaṁ .pe.
Dve tiracchānagatā dvinnaṁ tiracchānagatānaṁ tiracchānagatasaññī vematiko
itthīsaññī paṇḍakasaññī purisasaññī sāratto ca bhikkhu ca naṁ
dvinnaṁ tiracchānagatānaṁ santike attakāmapāricariyāya vaṇṇaṁ bhāsati
āpatti dvinnaṁ dukkaṭānaṁ. Itthī ca paṇḍako ca ubhinnaṁ
itthīsaññī sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti saṅghādisesena dukkaṭassa.
Itthī ca paṇḍako ca ubhinnaṁ vematiko .pe. Āpatti thullaccayena
dukkaṭassa .pe. Paṇḍakasaññī .pe. Āpatti dvinnaṁ thullaccayānaṁ
.pe. Purisasaññī .pe. Tiracchānagatasaññī sāratto ca bhikkhu
ca naṁ ubhinnaṁ santike attakāmapāricariyāya vaṇṇaṁ bhāsati āpatti
thullaccayena dukkaṭassa. Itthī ca puriso ca ubhinnaṁ itthīsaññī
sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti saṅghādisesena dukkaṭassa. Itthī ca
puriso ca ubhinnaṁ vematiko paṇḍakasaññī purisasaññī tiracchānagatasaññī
Sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti thullaccayena dukkaṭassa. Itthī ca
tiracchānagato ca ubhinnaṁ itthīsaññī sāratto ca bhikkhu ca naṁ ubhinnaṁ
santike attakāmapāricariyāya vaṇṇaṁ bhāsati āpatti saṅghādisesena
dukkaṭassa. Itthī ca tiracchānagato ca ubhinnaṁ vematiko paṇḍakasaññī
purisasaññī tiracchānagatasaññī sāratto ca bhikkhu ca naṁ
ubhinnaṁ santike attakāmapāricariyāya vaṇṇaṁ bhāsati āpatti
thullaccayena dukkaṭassa. Paṇḍako ca puriso ca ubhinnaṁ paṇḍakasaññī
sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti thullaccayena dukkaṭassa. Paṇḍako ca
puriso ca ubhinnaṁ vematiko purisasaññī tiracchānagatasaññī sāratto
ca bhikkhu ca naṁ ubhinnaṁ santike attakāmapāricariyāya vaṇṇaṁ bhāsati
āpatti dvinnaṁ dukkaṭānaṁ. Paṇḍako ca tiracchānagato ca ubhinnaṁ
paṇḍakasaññī sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti thullaccayena dukkaṭassa. Paṇḍako
ca tiracchānagato ca ubhinnaṁ vematiko purisasaññī tiracchānagatasaññī
itthīsaññī sāratto ca bhikkhu ca naṁ ubhinnaṁ santike attakāmapāricariyāya
vaṇṇaṁ bhāsati āpatti dvinnaṁ dukkaṭānaṁ. Puriso
ca tiracchānagato ca ubhinnaṁ purisasaññī vematiko tiracchānagatasaññī
itthīsaññī paṇḍakasaññī sāratto ca bhikkhu ca naṁ ubhinnaṁ santike
Attakāmapāricariyāya vaṇṇaṁ bhāsati āpatti dvinnaṁ dukkaṭānaṁ.

[418] Anāpatti cīvarapiṇḍapātasenāsanagilānapaccayabhesajjaparikkhārena
upaṭṭhahāti bhaṇati ummattakassa ādikammikassāti.

[419] Kathaṁ vañjhā labhe puttaṁ piyā ca subhagā siyaṁ
kiṁ dajjaṁ kenupaṭṭheyyaṁ kathaṁ gaccheyya suggatinti.