[390] Tena kho pana samayena sambahulā itthiyo aññataraṁ
bhikkhuṁ sampīḷetvā bāhāparamparāya nesuṁ. Tassa kukkuccaṁ ahosi
.pe. Sādiyasi tvaṁ bhikkhūti. Nāhaṁ bhagavā sādiyāmīti.
Anāpatti bhikkhu asādiyantassāti.

[391] Tena kho pana samayena aññataro bhikkhu itthiyā
abhiruḷhaṁ saṅkamaṁ sāratto sañcālesi. Tassa kukkuccaṁ ahosi
.pe. Anāpatti bhikkhu saṅghādisesassa āpatti dukkaṭassāti.

[392] Tena kho pana samayena aññataro bhikkhu itthiṁ paṭipathe
Passitvā sāratto aṁsakūṭena pahāraṁ adāsi. Tassa kukkuccaṁ
ahosi .pe. Āpattiṁ tvaṁ bhikkhu āpanno saṅghādisesanti.

[393] Tena kho pana samayena aññataro bhikkhu itthiyā
abhiruḷhaṁ rukkhaṁ sāratto sañcālesi. Tassa kukkuccaṁ ahosi
.pe. Anāpatti bhikkhu saṅghādisesassa āpatti dukkaṭassāti.

[394] Tena kho pana samayena aññataro bhikkhu itthiyā
abhiruḷhaṁ nāvaṁ sāratto sañcālesi. Tassa kukkuccaṁ ahosi
.pe. Anāpatti bhikkhu saṅghādisesassa āpatti dukkaṭassāti.

[395] Tena kho pana samayena aññataro bhikkhu itthiyā gahitaṁ
rajjuṁ sāratto āviñji. Tassa kukkuccaṁ ahosi .pe. Anāpatti
bhikkhu saṅghādisesassa āpatti thullaccayassāti. Tena kho pana
samayena aññataro bhikkhu itthiyā gahitaṁ daṇḍaṁ sāratto āviñji.
Tassa kukkuccaṁ ahosi .pe. Anāpatti bhikkhu saṅghādisesassa
āpatti thullaccayassāti.

[396] Tena kho pana samayena aññataro bhikkhu sāratto
itthiṁ pattena paṇāmesi. Tassa kukkuccaṁ ahosi .pe.
Anāpatti bhikkhu saṅghādisesassa āpatti thullaccayassāti. Tena
kho pana samayena aññataro bhikkhu itthiyā vandantiyā sāratto
pādaṁ uccāresi. Tassa kukkuccaṁ ahosi .pe. Āpattiṁ tvaṁ
bhikkhu āpanno saṅghādisesanti. Tena kho pana samayena aññataro
Bhikkhu itthiṁ gahessāmīti vāyamitvā na chupi. Tassa kukkuccaṁ
ahosi kacci nu kho ahaṁ saṅghādisesaṁ āpattiṁ āpannoti.
Bhagavato etamatthaṁ ārocesi. Anāpatti bhikkhu saṅghādisesassa
āpatti dukkaṭassāti.
Dutiyasaṅghādisesaṁ niṭṭhitaṁ.
---------
Tatiyasaṅghādisesaṁ

[397] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
udāyi araññe viharati 1 . Tena kho pana samayena sambahulā
itthiyo ārāmaṁ agamaṁsu vihārapekkhikāyo. Athakho tā itthiyo
yenāyasmā udāyi tenupasaṅkamiṁsu upasaṅkamitvā āyasmantaṁ udāyiṁ
etadavocuṁ icchāma mayaṁ bhante ayyassa vihāraṁ pekkhitunti.
Athakho āyasmā udāyi tā itthiyo vihāraṁ pekkhāpetvā tāsaṁ
itthīnaṁ vaccamaggaṁ passāvamaggaṁ ādissa vaṇṇaṁpi bhaṇati avaṇṇaṁpi
bhaṇati yācatipi āyācatipi pucchatipi paṭipucchatipi ācikkhatipi
anusāsatipi akkosatipi. Yā tā itthiyo chinnakā dhuttikā
ahirikāyo ahesuṁ 2 tā āyasmatā udāyinā saddhiṁ ūhasantipi
ullapantipi ujjhaggantipi upphaṇḍentipi. Yā pana tā itthiyo
hirimanā tā nikkhamitvā bhikkhū ujjhāpenti idaṁ bhante na channaṁ
na paṭirūpaṁ sāmikenapi mayaṁ evaṁ vuttā na iccheyyāma kiṁ panayyena
udāyināti. Ye te bhikkhū appicchā santuṭṭhā lajjino kukkuccakā
1 ito paraṁ yuropiyapotthake tassāyasmato vihāro abhirūpo hoti
dassanīyo pāsādikoti paññāyati. 2 Yu. Ma. potthakesu ayaṁ
pāṭho na dissati.
Sikkhākāmā te ujjhāyanti khīyanti vipācenti kathaṁ hi nāma āyasmā
udāyi mātugāmaṁ duṭṭhullāhi vācāhi obhāsissatīti. Athakho te
bhikkhū bhagavato etamatthaṁ ārocesuṁ. Athakho bhagavā etasmiṁ
nidāne etasmiṁ pakaraṇe bhikkhusaṅghaṁ sannipātāpetvā āyasmantaṁ
udāyiṁ paṭipucchi saccaṁ kira tvaṁ udāyi mātugāmaṁ duṭṭhullāhi
vācāhi obhāsasīti. Saccaṁ bhagavāti. Vigarahi buddho bhagavā
ananucchavikaṁ moghapurisa ananulomikaṁ appaṭirūpaṁ assāmaṇakaṁ akappiyaṁ
akaraṇīyaṁ kathaṁ hi nāma tvaṁ moghapurisa mātugāmaṁ duṭṭhullāhi
vācāhi obhāsissasi nanu mayā moghapurisa anekapariyāyena virāgāya
dhammo desito no sarāgāya .pe. Kāmapariḷāhānaṁ vūpasamo
akkhāto netaṁ moghapurisa appasannānaṁ vā pasādāya .pe.
Evañca pana bhikkhave imaṁ sikkhāpadaṁ uddiseyyātha yo pana bhikkhu
otiṇṇo vipariṇatena cittena mātugāmaṁ duṭṭhullāhi vācāhi
obhāseyya yathātaṁ yuvā yuvatiṁ methunūpasañhitāhi saṅghādisesoti.

[398] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Otiṇṇo nāma sāratto
apekkhavā paṭibaddhacitto. Vipariṇatanti rattaṁpi cittaṁ vipariṇataṁ
duṭṭhaṁpi cittaṁ vipariṇataṁ mūḷhaṁpi cittaṁ vipariṇataṁ apica rattaṁ cittaṁ
imasmiṁ atthe adhippetaṁ vipariṇatanti. Mātugāmo nāma manussitthī na
yakkhī na petī na tiracchānagatā viññū paṭibalā subhāsitadubbhāsitaṁ
Duṭṭhullāduṭṭhullaṁ ājānituṁ. Duṭṭhullā nāma vācā
vaccamaggapassāvamaggamethunadhammapaṭisaṁyuttā vācā. Obhāseyyāti ajjhācāro
vuccati. Yathātaṁ yuvā yuvatinti daharo dahariṁ taruṇo taruṇiṁ
kāmabhogī kāmabhoginiṁ. Methunūpasañhitāhīti methunadhammapaṭisaṁyuttāhi
vācāhi. Saṅghādisesoti .pe. Tenapi vuccati saṅghādisesoti.

[399] Dve magge ādissa vaṇṇaṁpi bhaṇati avaṇṇaṁpi bhaṇati
yācatipi āyācatipi pucchatipi paṭipucchatipi ācikkhatipi anusāsatipi
akkosatipi.