[420] Tena kho pana samayena aññatarā vañjhā itthī kulūpakaṁ
bhikkhuṁ etadavoca kathāhaṁ bhante vijāyeyyanti. Tenahi bhagini aggadānaṁ
dehīti. Kiṁ bhante aggadānanti. Methunadhammanti. Tassa kukkuccaṁ
ahosi .pe. Bhagavato etamatthaṁ ārocesi. Āpattiṁ tvaṁ
bhikkhu āpanno saṅghādisesanti. Tena kho pana samayena aññatarā
vijāyinī itthī kulūpakaṁ bhikkhuṁ etadavoca kathāhaṁ bhante puttaṁ na 1
labheyyanti. Tenahi bhagini aggadānaṁ dehīti. Kiṁ bhante
aggadānanti. Methunadhammanti. Tassa kukkuccaṁ ahosi .pe.
Āpattiṁ tvaṁ bhikkhu āpanno saṅghādisesanti. Tena kho pana samayena
aññatarā itthī kulūpakaṁ bhikkhuṁ etadavoca kathāhaṁ bhante sāmikassa piyā
assanti. Tenahi bhagini aggadānaṁ dehīti. Kiṁ bhante aggadānanti.
Methunadhammanti. Tassa kukkuccaṁ ahosi .pe. Āpattiṁ tvaṁ
bhikkhu āpanno saṅghādisesanti. Tena kho pana samayena aññatarā
itthī kulūpakaṁ bhikkhuṁ etadavoca kathāhaṁ bhante subhagā assanti.
1 Yu. Ma. potthakesu ayaṁ pāṭho na hoti.
Tenahi bhagini aggadānaṁ dehīti. Kiṁ bhante aggadānanti.
Methunadhammanti. Tassa kukkuccaṁ ahosi .pe. Āpattiṁ tvaṁ
bhikkhu āpanno saṅghādisesanti. Tena kho pana samayena aññatarā
itthī kulūpakaṁ bhikkhuṁ etadavoca kyāhaṁ bhante ayyassa dajjāmīti.
Aggadānaṁ bhaginīti. Kiṁ bhante aggadānanti. Methunadhammanti. Tassa
kukkuccaṁ ahosi .pe. Āpattiṁ tvaṁ bhikkhu āpanno saṅghādisesanti.
Tena kho pana samayena aññatarā itthī kulūpakaṁ bhikkhuṁ etadavoca
kenāhaṁ bhante ayyaṁ upaṭṭhāmīti 1 . Aggadānena bhaginīti. Kiṁ
bhante aggadānanti. Methunadhammanti. Tassa kukkuccaṁ ahosi
.pe. Āpattiṁ tvaṁ bhikkhu āpanno saṅghādisesanti. Tena kho
pana samayena aññatarā itthī kulūpakaṁ bhikkhuṁ etadavoca kathāhaṁ
bhante sugatiṁ gaccheyyanti. Tenahi bhagini aggadānaṁ dehīti. Kiṁ
bhante aggadānanti. Methunadhammanti. Tassa kukkuccaṁ ahosi kacci
nu kho ahaṁ saṅghādisesaṁ āpattiṁ āpannoti. Bhagavato etamatthaṁ
ārocesi. Āpattiṁ tvaṁ bhikkhu āpanno saṅghādisesanti.
Catutthasaṅghādisesaṁ niṭṭhitaṁ.
-----------
1 Yu. Ma. upaṭṭhemīti.
Pañcamasaṅghādisesaṁ

[421] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
udāyi sāvatthiyaṁ kulūpako hoti bahukāni kulāni upasaṅkamati yattha
passati kumārakaṁ vā apajāpatikaṁ kumārikaṁ vā apatikaṁ kumārakassa
mātāpitūnaṁ santike kumārikāya vaṇṇaṁ bhaṇati amukassa kulassa
kumārikā abhirūpā dassanīyā pāsādikā paṇḍitā byattā medhāvinī
dakkhā analasā channā sā kumārikā imassa kumārakassāti.
Te evaṁ vadenti 1 ete kho bhante amhe na jānanti ke vā
ime kassa vāti sace bhante ayyo dāpeyya āneyyāma 2 mayaṁ
taṁ kumārikaṁ imassa kumārakassāti. Kumārikāya mātāpitūnaṁ santike
kumārakassa vaṇṇaṁ bhaṇati amukassa kulassa kumārako abhirūpo
dassanīyo pāsādiko paṇḍito byatto medhāvī dakkho analaso
channo so kumārako imissā kumārikāyāti 3 . Te evaṁ vadenti
ete kho bhante amhe na jānanti ke vā ime kassa vāti kasmiṁ
viya kumārikāya vatthuṁ sace bhante ayyo yācāpeyya dajjeyyāma mayaṁ
imaṁ kumārikaṁ tassa kumārakassāti. Eteneva upāyena āvāhānipi
1 Yu. Ma. vadanti. 2 Yu. Ma. ānema. 3 Yu. Ma. channāyaṁ
kumārikā tassa kumārakassāti.
Kārāpeti vivāhānipi kārāpeti vāreyyānipi vattāpeti.

[422] Tena kho pana samayena aññatarissā purāṇagaṇakiyā
dhītā abhirūpā hoti dassanīyā pāsādikā. Tīrogāmakā ca
ājīvakasāvakā āgantvā taṁ gaṇakiṁ etadavocuṁ dehayye imaṁ
kumārikaṁ amhākaṁ kumārakassāti. Sā evamāha ahaṁ khvayyā
tumhe na jānāmi ke vā ime kassa vāti ayañca me ekadhītikā
tīrogāmo ca gantabbo nāhaṁ dassāmīti. Manussā te ājīvakasāvake
etadavocuṁ kissa tumhe ayyā āgatatthāti. Idha mayaṁ ayyā
amukaṁ nāma gaṇakiṁ dhītaraṁ yācimhā amhākaṁ kumārakassa sā evamāha
ahaṁ khvayyā tumhe na jānāmi ke vā ime kassa vāti ayañca
me ekadhītikā tīrogāmo ca gantabbo nāhaṁ dassāmīti. Kissa
tumhe ayyā taṁ gaṇakiṁ dhītaraṁ yācittha nanu ayyo udāyi
vattabbo ayyo udāyi dāpessatīti. Athakho te ājīvakasāvakā
yenāyasmā udāyi tenupasaṅkamiṁsu upasaṅkamitvā āyasmantaṁ udāyiṁ
etadavocuṁ idha mayaṁ bhante amukaṁ nāma gaṇakiṁ dhītaraṁ yācimhā amhākaṁ
kumārakassa sā evamāha ahaṁ khvayyā tumhe na jānāmi ke vā
ime kassa vāti ayañca me ekadhītikā tīrogāmo ca gantabbo
nāhaṁ dassāmīti sādhu bhante ayyo taṁ gaṇakiṁ dhītaraṁ dāpetu
amhākaṁ kumārakassāti. Athakho āyasmā udāyi yena sā gaṇakī
tenupasaṅkami upasaṅkamitvā taṁ gaṇakiṁ etadavoca kissa imesaṁ dhītaraṁ
Na desīti. Ahaṁ khvayya ime na jānāmi ke vā ime kassa vāti
ayañca me ekadhītikā tīrogāmo ca gantabbo nāhaṁ dassāmīti.
Dehi imesaṁ ahaṁ ime jānāmīti. Sace bhante ayyo jānāti
dassāmīti. Athakho sā gaṇakiṁ tesaṁ ājīvakasāvakānaṁ dhītaraṁ adāsi.
Athakho te ājīvakasāvakā taṁ kumārikaṁ netvā māsaṁyeva suṇisābhogena
bhuñjiṁsu tato aparena dāsībhogena bhuñjanti.

[423] Athakho sā kumārikā mātuyā santike dūtaṁ pāhesi
ahaṁ hi duggatā dukkhitā na sukhaṁ labhāmi māsaṁyeva maṁ suṇisābhogena
bhuñjiṁsu tato aparena dāsībhogena bhuñjanti āgacchatu me mātā
maṁ 1 nessatūti. Athakho sā gaṇakī yena te ājīvakasāvakā tenupasaṅkami
upasaṅkamitvā te ājīvakasāvake etadavoca mā ayyā
imaṁ kumārikaṁ dāsībhogena bhuñjittha suṇisābhogena imaṁ kumārikaṁ
bhuñjathāti. Te evamāhaṁsu natthamhākaṁ tayā saddhiṁ āhārūpahāro
samaṇena saddhiṁ amhākaṁ āhārūpahāro gaccha tvaṁ na mayantaṁ
jānāmāti. Athakho sā gaṇakī tehi ājīvakasāvakehi apasāditā
punadeva sāvatthiṁ paccāgañchi. Dutiyampi kho sā kumārikā mātuyā
santike dūtaṁ pāhesi ahaṁ hi duggatā dukkhitā na sukhaṁ labhāmi
māsaṁyeva maṁ suṇisābhogena bhuñjiṁsu tato aparena dāsībhogena
bhuñjanti āgacchatu me mātā maṁ nessatūti. Athakho sā gaṇakī
1 Yu. Ma. potthakesu ayaṁ pāṭho na hoti.
Yenāyasmā udāyi tenupasaṅkami upasaṅkamitvā āyasmantaṁ udāyiṁ
etadavoca sā kira bhante kumārikā duggatā dukkhitā na sukhaṁ
labhati māsaṁyeva naṁ suṇisābhogena bhuñjiṁsu tato aparena dāsībhogena
bhuñjanti vadeyyātha bhante mā ayyā imaṁ kumārikaṁ dāsībhogena
bhuñjittha suṇisābhogena imaṁ kumārikaṁ bhuñjathāti. Athakho āyasmā
udāyi yena te ājīvakasāvakā tenupasaṅkami upasaṅkamitvā te
ājīvakasāvake etadavoca mā ayyā imaṁ kumārikaṁ dāsībhogena
bhuñjittha suṇisābhogena imaṁ kumārikaṁ bhuñjathāti. Te evamāhaṁsu
natthamhākaṁ tayā saddhiṁ āhārūpahāro gaṇakiyā saddhiṁ amhākaṁ
āhārūpahāro samaṇena bhavitabbaṁ abyāvaṭena samaṇo assa
sussamaṇo gaccha tvaṁ na mayantaṁ jānāmāti. Athakho āyasmā
udāyi tehi ājīvakasāvakehi apasādito punadeva sāvatthiṁ paccāgañchi.
Tatiyampi kho sā kumārikā mātuyā santike dūtaṁ pāhesi ahaṁ hi
duggatā dukkhitā na sukhaṁ labhāmi māsaṁyeva maṁ suṇisābhogena
bhuñjiṁsu tato aparena dāsībhogena bhuñjanti āgacchatu me mātā
maṁ nessatūti. Dutiyampi kho sā gaṇakī yenāyasmā udāyi tenupasaṅkami
upasaṅkamitvā āyasmantaṁ udāyiṁ etadavoca sā kira
bhante kumārikā duggatā dukkhitā na sukhaṁ labhati māsaṁyeva naṁ suṇisābhogena
bhuñjiṁsu tato aparena dāsībhogena bhuñjanti vadeyyātha
bhante mā ayyā imaṁ kumārikaṁ dāsībhogena bhuñjittha suṇisābhogena
Imaṁ kumārikaṁ bhuñjathāti. Paṭhamaṁ cāhaṁ tehi ājīvakasāvakehi
apasādito gaccha tvaṁ nāhaṁ gamissāmīti.

[424] Athakho sā gaṇakī ujjhāyati khīyati vipāceti evaṁ
duggato hotu ayyo udāyi evaṁ dukkhito hotu ayyo udāyi
evaṁ mā sukhaṁ labhatu ayyo udāyi yathā me kumārikā duggatā
dukkhitā na sukhaṁ labhati pāpikāya sassuyā pāpakena sassurena
pāpakena sāmikenāti. Sāpi kho kumārikā ujjhāyati khīyati
vipāceti evaṁ duggato hotu ayyo udāyi evaṁ dukkhito hotu
ayyo udāyi evaṁ mā sukhaṁ labhatu ayyo udāyi yathāhaṁ duggatā
dukkhitā na sukhaṁ labhāmi pāpikāya sassuyā pāpakena sassurena
pāpakena sāmikenāti. Aññāpi itthiyo asantuṭṭhā sassūhi vā
sassurehi vā sāmikehi vā tā evaṁ oyācanti evaṁ duggato
hotu ayyo udāyi evaṁ dukkhito hotu ayyo udāyi evaṁ mā
sukhaṁ labhatu ayyo udāyi yathā mayaṁ duggatā dukkhitā na sukhaṁ
labhāma pāpikāhi sassūhi pāpakehi sassurehi pāpakehi sāmikehīti.
Yā pana tā itthiyo santuṭṭhā sassūhi vā sassurehi vā sāmikehi
vā tā evaṁ āyācanti evaṁ sukhito hotu ayyo udāyi evaṁ
sajjito hotu ayyo udāyi evaṁ sukhamedhatu ayyo udāyi yathā
mayaṁ sukhitā sajjitā sukhamedhāma bhaddakāhi sassūhi bhaddakehi sassurehi
bhaddakehi sāmikehīti.

[425] Assosuṁ kho bhikkhū ekaccānaṁ itthīnaṁ oyācantīnaṁ
ekaccānaṁ itthīnaṁ āyācantīnaṁ. Ye te bhikkhū appicchā santuṭṭhā
.pe. Te ujjhāyanti khīyanti vipācenti kathaṁ hi nāma āyasmā
udāyi sañcarittaṁ samāpajjissatīti. Athakho te bhikkhū bhagavato
etamatthaṁ ārocesuṁ. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā āyasmantaṁ udāyiṁ paṭipucchi
saccaṁ kira tvaṁ udāyi sañcarittaṁ samāpajjasīti. Saccaṁ bhagavāti.
Vigarahi buddho bhagavā ananucchavikaṁ moghapurisa ananulomikaṁ appaṭirūpaṁ
assāmaṇakaṁ akappiyaṁ akaraṇīyaṁ kathaṁ hi nāma tvaṁ moghapurisa
sañcarittaṁ samāpajjissasi netaṁ moghapurisa appasannānaṁ vā pasādāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu sañcarittaṁ samāpajjeyya itthiyā vā purisamatiṁ purisassa vā
itthīmatiṁ jāyattane vā jārattane vā saṅghādisesoti. Evañcidaṁ
bhagavatā bhikkhūnaṁ sikkhāpadaṁ paññattaṁ hoti.

[426] Tena kho pana samayena sambahulā dhuttā uyyāne
paricārentā aññatarissā vesiyā santike dūtaṁ pāhesuṁ āgacchatu
uyyāne paricāressāmāti. Sā evamāha ahaṁ khvayyā tumhe
na jānāmi ke vā ime kassa vāti ahañcamhi bahubhaṇḍā bahuparikkhārā
bahinagarañca gantabbaṁ nāhaṁ gamissāmīti. Athakho so
dūto tesaṁ dhuttānaṁ etamatthaṁ ārocesi. Evaṁ vutte aññataro
Puriso te dhutte etadavoca kissa tumhe ayyā taṁ vesiṁ yācittha
nanu ayyo udāyi vattabbo ayyo udāyi uyyojessatīti. Evaṁ
vutte aññataro upāsako taṁ purisaṁ etadavoca mā ayyo evaṁ
avaca na kappati samaṇānaṁ sakyaputtiyānaṁ evarūpaṁ kātuṁ nāyyo
udāyi evarūpaṁ karissatīti. Evaṁ vutte karissati na karissatīti
abbhutaṁ akaṁsu. Athakho te dhuttā yenāyasmā udāyi tenupasaṅkamiṁsu
upasaṅkamitvā āyasmantaṁ udāyiṁ etadavocuṁ idha mayaṁ bhante
uyyāne paricārentā amukāya nāma vesiyā santike dūtaṁ pahiṇimhā
āgacchatu uyyāne paricāressāmāti sā evamāha ahaṁ khvayyā
tumhe na jānāmi ke vā ime kassa vāti ahañcamhi bahubhaṇḍā
bahuparikkhārā bahinagarañca gantabbaṁ nāhaṁ gamissāmīti sādhu
bhante ayyo taṁ vesiṁ uyyojetūti. Athakho āyasmā udāyi yena
sā vesī tenupasaṅkami upasaṅkamitvā taṁ vesiṁ etadavoca kissa
imesaṁ na gacchasīti. Ahaṁ khvayya ime na jānāmi ke vā ime kassa
vāti ahañcamhi bahubhaṇḍā bahuparikkhārā bahinagarañca gantabbaṁ
nāhaṁ gamissāmīti. Gaccha imesaṁ ahaṁ ime jānāmīti. Sace
bhante ayyo jānāti gamissāmīti. Athakho te dhuttā taṁ
vesiṁ ādāya uyyānaṁ agamaṁsu. Athakho so upāsako ujjhāyati
khīyati vipāceti kathaṁ hi nāma ayyo udāyi taṁkhaṇikaṁ sañcarittaṁ
samāpajjissatīti. Assosuṁ kho bhikkhū tassa upāsakassa ujjhāyantassa
Khīyantassa vipācentassa. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma āyasmā udāyi
taṁkhaṇikaṁ sañcarittaṁ samāpajjissatīti. Athakho te bhikkhū bhagavato
etamatthaṁ ārocesuṁ. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā āyasmantaṁ udāyiṁ paṭipucchi
saccaṁ kira tvaṁ udāyi taṁkhaṇikaṁ sañcarittaṁ samāpajjasīti 1 . Saccaṁ
bhagavāti. Vigarahi buddho bhagavā ananucchavikaṁ moghapurisa ananulomikaṁ
.pe. Kathaṁ hi nāma tvaṁ moghapurisa taṁkhaṇikaṁ sañcarittaṁ
samāpajjissasi netaṁ moghapurisa appasannānaṁ vā pasādāya .pe.
Evañca pana bhikkhave imaṁ sikkhāpadaṁ uddiseyyātha yo pana bhikkhu
sañcarittaṁ samāpajjeyya itthiyā vā purisamatiṁ purisassa vā itthīmatiṁ
jāyattane vā jārattane vā antamaso taṁkhaṇikāyapi saṅghādisesoti.

[427] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Sañcarittaṁ samāpajjeyyāti
itthiyā vā pahito purisassa santike gacchati purisena vā pahito
itthiyā santike gacchati. Itthiyā vā purisamatinti purisassa
matiṁ itthiyā vā āroceti. Purisassa vā itthīmatinti itthiyā
matiṁ purisassa vā āroceti. Jāyattane vāti jāyā bhavissasi.
Jārattane vāti jārī bhavissasi. Antamaso taṁkhaṇikāyapīti muhuttikā
1 Yu. Ma. samāpajjīti.
Bhavissasi. Saṅghādisesoti .pe. Tenapi vuccati saṅghādisesoti.

[428] Dasa itthiyo māturakkhitā piturakkhitā mātāpiturakkhitā
bhāturakkhitā bhaginīrakkhitā ñātirakkhitā gottarakkhitā dhammarakkhitā
sārakkhā saparidaṇḍā.

[429] Dasa bhariyāyo dhanakkītā chandavāsinī bhogavāsinī paṭavāsinī
odapattakinī obhatacumbaṭā dāsī ca bhariyā ca kammakārī ca bhariyā
ca dhajāhaṭā muhuttikā.