[130] Jānaṁ ūnavīsativassaṁ puggalaṁ upasampādentassa pācittiyaṁ
kattha paññattanti. Rājagahe paññattaṁ. Kaṁ ārabbhāti.
Sambahule bhikkhū ārabbha. Kismiṁ vatthusminti. Sambahulā bhikkhū
jānaṁ ūnavīsativassaṁ puggalaṁ upasampādesuṁ tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ tīhi samuṭṭhānehi
samuṭṭhāti .pe.

[131] Jānaṁ theyyasatthena saddhiṁ saṁvidhāya ekaddhānamaggaṁ
paṭipajjantassa pācittiyaṁ kattha paññattanti. Sāvatthiyā paññattaṁ.
Kaṁ ārabbhāti. Aññataraṁ bhikkhuṁ ārabbha. Kismiṁ vatthusminti.
Aññataro bhikkhu jānaṁ theyyasatthena saddhiṁ saṁvidhāya ekaddhānamaggaṁ
paṭipajji tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
dvīhi samuṭṭhānehi samuṭṭhāti siyā kāyato ca
cittato ca samuṭṭhāti na vācato siyā kāyato ca vācato ca
cittato ca samuṭṭhāti .pe.

[132] Mātugāmena saddhiṁ saṁvidhāya ekaddhānamaggaṁ paṭipajjantassa
pācittiyaṁ kattha paññattanti. Sāvatthiyā paññattaṁ. Kaṁ ārabbhāti.
Aññataraṁ bhikkhuṁ ārabbha. Kismiṁ vatthusminti. Aññataro bhikkhu
mātugāmena saddhiṁ saṁvidhāya ekaddhānamaggaṁ paṭipajji tasmiṁ
vatthusmiṁ. Ekā paññatti. Channaṁ āpattisamuṭṭhānānaṁ catūhi
samuṭṭhānehi samuṭṭhāti .pe.

[133] Pāpikāya diṭṭhiyā yāvatatiyaṁ samanubhāsanāya nappaṭinissajjantassa
pācittiyaṁ kattha paññattanti. Sāvatthiyā paññattaṁ.
Kaṁ ārabbhāti. Ariṭṭhaṁ bhikkhuṁ gaddhabādhipubbaṁ ārabbha. Kismiṁ
vatthusminti. Ariṭṭho bhikkhu gaddhabādhipubbo pāpikaṁ diṭṭhiṁ 1 yāvatatiyaṁ
samanubhāsanāya nappaṭinissajji tasmiṁ vatthusmiṁ. Ekā paññatti.
Channaṁ āpattisamuṭṭhānānaṁ ekena samuṭṭhānena samuṭṭhāti kāyato ca
1 Ma. Yu. pāpikāya diṭṭhiyā.
Vācato ca cittato ca samuṭṭhāti .pe.

[134] Jānaṁ tathāvādinā bhikkhunā akaṭānudhammena taṁ diṭṭhiṁ
appaṭinissaṭṭhena saddhiṁ sambhuñjantassa pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Chabbaggiye
bhikkhū ārabbha. Kismiṁ vatthusminti. Chabbaggiyā bhikkhū jānaṁ
tathāvādinā ariṭṭhena bhikkhunā akaṭānudhammena taṁ diṭṭhiṁ appaṭinissaṭṭhena
saddhiṁ sambhuñjiṁsu tasmiṁ vatthusmiṁ. Ekā paññatti.
Channaṁ āpattisamuṭṭhānānaṁ tīhi samuṭṭhānehi samuṭṭhāti .pe.

[135] Jānaṁ tathānāsitaṁ samaṇuddesaṁ upalāpentassa pācittiyaṁ
kattha paññattanti. Sāvatthiyā paññattaṁ. Kaṁ ārabbhāti.
Chabbaggiye bhikkhū ārabbha. Kismiṁ vatthusminti. Chabbaggiyā
bhikkhū jānaṁ tathānāsitaṁ kaṇḍakaṁ samaṇuddesaṁ upalāpesuṁ tasmiṁ
vatthusmiṁ. Ekā paññatti. Channaṁ āpattisamuṭṭhānānaṁ tīhi
samuṭṭhānehi samuṭṭhāti .pe.
Sappāṇakavaggo sattamo.
Tassuddānaṁ

[136] Sañcicca pāṇaṁ jīvitā paribhogañca sappāṇakaṁ
yathādhammañca nīhataṁ jānaṁ duṭṭhullachādakaṁ
ūnavīsatitheyyañca mātugāmena saṁvidhā
saddhiṁ sambhuñjanā ceva nāsitaṁ upalāpananti.

[137] Bhikkhūhi sahadhammikaṁ vuccamānena na tāvāhaṁ āvuso etasmiṁ
sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paripucchāmīti bhaṇantassa pācittiyaṁ kattha paññattanti. Kosambiyā
paññattaṁ. Kaṁ ārabbhāti. Āyasmantaṁ channaṁ ārabbha. Kismiṁ
vatthusminti. Āyasmā channo bhikkhūhi sahadhammikaṁ vuccamāno
na tāvāhaṁ āvuso etasmiṁ sikkhāpade sikkhissāmi yāva naññaṁ
bhikkhuṁ byattaṁ vinayadharaṁ paripucchāmīti bhaṇi tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ tīhi samuṭṭhānehi
samuṭṭhāti .pe.

[138] Vinayaṁ vivaṇṇentassa pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Chabbaggiye bhikkhū
ārabbha. Kismiṁ vatthusminti. Chabbaggiyā bhikkhū vinayaṁ vivaṇṇesuṁ
tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
tīhi samuṭṭhānehi samuṭṭhāti .pe.

[139] Mohanake pācittiyaṁ kattha paññattanti. Sāvatthiyā
paññattaṁ. Kaṁ ārabbhāti. Chabbaggiye bhikkhū ārabbha.
Kismiṁ vatthusminti. Chabbaggiyā bhikkhū mohesuṁ tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ tīhi samuṭṭhānehi
samuṭṭhāti .pe.