[545] Tena kho pana samayena bhikkhū ovādaṁ na gaṇhanti .pe.
Bhagavato etamatthaṁ ārocesuṁ .pe. Na bhikkhave ovādo na
gahetabbo yo na gaṇheyya āpatti dukkaṭassāti.

[546] Tena kho pana samayena aññataro bhikkhu bālo
hoti. Taṁ bhikkhuniyo upasaṅkamitvā etadavocuṁ ovādaṁ ayya
gaṇhāhīti. Ahamhi bhaginī bālo kathāhaṁ ovādaṁ gaṇhāmīti.
Gaṇhāhayya ovādaṁ evaṁ hi bhagavatā paññattaṁ bhikkhūhi
bhikkhunīnaṁ ovādo gahetabboti. Bhagavato etamatthaṁ ārocesuṁ.
Anujānāmi bhikkhave ṭhapetvā bālaṁ avasesehi ovādaṁ gahetunti.

[547] Tena kho pana samayena aññataro bhikkhu gilāno
hoti. Taṁ bhikkhuniyo upasaṅkamitvā etadavocuṁ ovādaṁ ayya
gaṇhāhīti. Ahamhi bhaginī gilāno kathāhaṁ ovādaṁ gaṇhāmīti.
Gaṇhāhayya ovādaṁ evaṁ hi bhagavatā paññattaṁ ṭhapetvā
bālaṁ avasesehi ovādo gahetabboti. Bhagavato etamatthaṁ
ārocesuṁ. Anujānāmi bhikkhave ṭhapetvā bālaṁ ṭhapetvā gilānaṁ
avasesehi ovādaṁ gahetunti.

[548] Tena kho pana samayena aññataro bhikkhu gamiko
hoti. Taṁ bhikkhuniyo upasaṅkamitvā etadavocuṁ ovādaṁ ayya
gaṇhāhīti. Ahamhi bhaginī gamiko kathāhaṁ ovādaṁ gaṇhāmīti.
Gaṇhāhayya ovādaṁ evaṁ hi bhagavatā paññattaṁ ṭhapetvā
bālaṁ ṭhapetvā gilānaṁ avasesehi ovādo gahetabboti. Bhagavato
etamatthaṁ ārocesuṁ .pe. Anujānāmi bhikkhave ṭhapetvā bālaṁ
ṭhapetvā gilānaṁ ṭhapetvā gamikaṁ avasesehi ovādaṁ gahetunti.

[549] Tena kho pana samayena aññataro bhikkhu araññe
viharati. Taṁ bhikkhuniyo upasaṅkamitvā etadavocuṁ ovādaṁ
ayya gaṇhāhīti. Ahaṁ hi bhaginī araññe viharāmi kathāhaṁ
Ovādaṁ gaṇhāmīti. Gaṇhāhayya ovādaṁ evaṁ hi bhagavatā
paññattaṁ ṭhapetvā bālaṁ ṭhapetvā gilānaṁ ṭhapetvā gamikaṁ
avasesehi ovādo gahetabboti. Bhagavato etamatthaṁ ārocesuṁ.
Anujānāmi bhikkhave āraññakena bhikkhunā ovādaṁ gahetuṁ saṅketañca
kātuṁ atra paṭiharissāmīti.

[550] Tena kho pana samayena bhikkhū ovādaṁ gahetvā na
ārocenti. Bhagavato etamatthaṁ ārocesuṁ .pe. Na bhikkhave
ovādo na ārocetabbo yo na āroceyya āpatti
dukkaṭassāti.

[551] Tena kho pana samayena bhikkhū ovādaṁ gahetvā na
paccāharanti .pe. Bhagavato etamatthaṁ ārocesuṁ. Na bhikkhave
ovādo na paccāharitabbo yo na paccāhareyya āpatti
dukkaṭassāti.

[552] Tena kho pana samayena bhikkhuniyo saṅketaṁ na gacchanti.
Bhagavato etamatthaṁ ārocesuṁ. Na bhikkhave bhikkhuniyā saṅketaṁ na
gantabbaṁ yā na gaccheyya āpatti dukkaṭassāti.

[553] Tena kho pana samayena bhikkhuniyo dīghāni kāyabandhanāni
dhārenti teheva phāsuke 1 namenti 2 . Manussā ujjhāyanti
khīyanti vipācenti .pe. Seyyathāpi gihikāmabhoginiyoti 3 . Bhagavato
1 Yu. pāske. 2 Ma. phāsukā nāmenti. 3 Ma. gihinī kāmabhoginiyoti.
Etamatthaṁ ārocesuṁ. Na bhikkhave bhikkhuniyā dīghaṁ kāyabandhanaṁ
dhāretabbaṁ yā dhāreyya āpatti dukkaṭassa anujānāmi
bhikkhave bhikkhuniyā ekapariyāyakataṁ 1 kāyabandhanaṁ na ca tena phāsukā
nametabbā 2 yā nameyya āpatti dukkaṭassāti.

[554] Tena kho pana samayena bhikkhuniyo vilivena paṭṭena
phāsuke 3 namenti 4 cammapaṭṭena phāsuke namenti dussapaṭṭena phāsuke
namenti dussaveṇiyā phāsuke namenti dussavaṭṭiyā phāsuke namenti
coḷapaṭṭena phāsuke namenti coḷaveṇiyā phāsuke namenti
coḷavaṭṭiyā phāsuke namenti suttaveṇiyā phāsuke namenti suttavaṭṭiyā
phāsuke namenti. Manussā ujjhāyanti khīyanti vipācenti .pe.
Seyyathāpi gihikāmabhoginiyoti. Bhagavato etamatthaṁ ārocesuṁ.
Na bhikkhave bhikkhuniyā vilivena paṭṭena phāsukā nametabbā na
cammapaṭṭena phāsukā nametabbā na dussapaṭṭena phāsukā nametabbā
na dussaveṇiyā phāsukā nametabbā na dussavaṭṭiyā phāsukā
nametabbā na coḷapaṭṭena phāsukā nametabbā na coḷaveṇiyā
phāsukā nametabbā na coḷavaṭṭiyā phāsukā nametabbā na
suttaveṇiyā phāsukā nametabbā na suttavaṭṭiyā phāsukā nametabbā
yā nameyya āpatti dukkaṭassāti.