[515] Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā ānando bhagavantaṁ etadavoca esā
bhante mahāpajāpatī gotamī sunehi pādehi rajokiṇṇena gattena
dukkhī dummanā assumukhī rudamānā bahidvārakoṭṭhake ṭhitā na
1 Ma. tenahi tvaṁ. 2 Yu. tvaṁsaddo natthi.
Bhagavā anujānāti mātugāmassa tathāgatappavedite dhammavinaye
agārasmā anagāriyaṁ pabbajjanti sādhu bhante labheyya mātugāmo
tathāgatappavedite dhammavinaye agārasmā anagāriyaṁ pabbajjanti.
Alaṁ ānanda mā te rucci mātugāmassa tathāgatappavedite
dhammavinaye agārasmā anagāriyaṁ pabbajjāti. Dutiyampi kho
āyasmā ānando bhagavantaṁ etadavoca sādhu bhante labheyya
mātugāmo tathāgatappavedite dhammavinaye agārasmā anagāriyaṁ
pabbajjanti. Alaṁ ānanda mā te rucci mātugāmassa
tathāgatappavedite dhammavinaye agārasmā anagāriyaṁ pabbajjāti. Tatiyampi
kho āyasmā ānando bhagavantaṁ etadavoca sādhu bhante labheyya
mātugāmo tathāgatappavedite dhammavinaye agārasmā anagāriyaṁ
pabbajjanti. Alaṁ ānanda mā te rucci mātugāmassa
tathāgatappavedite dhammavinaye agārasmā anagāriyaṁ pabbajjāti. Athakho
āyasmā ānando na bhagavā anujānāti mātugāmassa
tathāgatappavedite dhammavinaye agārasmā anagāriyaṁ pabbajjaṁ 1 yannūnāhaṁ
aññenapi pariyāyena bhagavantaṁ yāceyyaṁ mātugāmassa tathāgatappavedite
dhammavinaye agārasmā anagāriyaṁ pabbajjanti. Athakho
āyasmā ānando bhagavantaṁ etadavoca bhabbo nu kho bhante
mātugāmo tathāgatappavedite dhammavinaye agārasmā anagāriyaṁ
pabbajitvā sotāpattiphalaṁ vā sakidāgāmiphalaṁ 2 vā anāgāmiphalaṁ vā
1 Ma. pabbajjanti. 2 Ma. Yu. sabbattha vāresu sakadāgāmiphalaṁ.
Arahattaphalaṁ vā sacchikātunti. Bhabbo ānanda mātugāmo
tathāgatappavedite dhammavinaye agārasmā anagāriyaṁ pabbajitvā sotāpattiphalaṁpi
sakidāgāmiphalaṁpi anāgāmiphalaṁpi arahattaphalaṁpi sacchikātunti.
Sace bhante bhabbo mātugāmo tathāgatappavedite dhammavinaye
agārasmā anagāriyaṁ pabbajitvā sotāpattiphalaṁpi sakidāgāmiphalaṁpi
anāgāmiphalaṁpi arahattaphalaṁpi sacchikātuṁ bahūpakārā bhante mahāpajāpatī
gotamī bhagavato mātucchā āpādikā posikā khīrassa dāyikā
bhagavantaṁ janettiyā kālakatāya thaññaṁ pāyesi sādhu bhante
labheyya mātugāmo tathāgatappavedite dhammavinaye agārasmā anagāriyaṁ
pabbajjanti.

[516] Sace ānanda mahāpajāpatī gotamī aṭṭha garudhamme
paṭiggaṇhāti sā vassā hotu upasampadā vassasatupasampannāya
bhikkhuniyā tadahupasampannassa bhikkhuno abhivādanaṁ paccuṭṭhānaṁ añjalikammaṁ
sāmīcikammaṁ kātabbaṁ ayampi dhammo sakkatvā garukatvā
mānetvā pūjetvā yāvajīvaṁ anatikkamanīyo na bhikkhuniyā abhikkhuke
āvāse vassaṁ vasitabbaṁ ayampi dhammo sakkatvā garukatvā
mānetvā pūjetvā yāvajīvaṁ anatikkamanīyo anvaḍḍhamāsaṁ bhikkhuniyā
bhikkhusaṅghato dve dhammā paccāsiṁsitabbā uposathapucchakañca
ovādupasaṅkamanañca ayampi dhammo sakkatvā garukatvā mānetvā
pūjetvā yāvajīvaṁ anatikkamanīyo vassaṁ vuṭṭhāya bhikkhuniyā ubhatosaṅghe
Tīhi ṭhānehi pavāretabbaṁ diṭṭhena vā sutena vā parisaṅkāya
vā ayampi dhammo sakkatvā garukatvā mānetvā pūjetvā
yāvajīvaṁ anatikkamanīyo garudhammaṁ ajjhāpannāya bhikkhuniyā ubhatosaṅghe
pakkhamānattaṁ caritabbaṁ ayampi dhammo sakkatvā garukatvā
mānetvā pūjetvā yāvajīvaṁ anatikkamanīyo dve vassāni chasu
dhammesu sikkhitasikkhāya sikkhamānāya ubhatosaṅghe upasampadā
pariyesitabbā ayampi dhammo sakkatvā garukatvā mānetvā pūjetvā
yāvajīvaṁ anatikkamanīyo na bhikkhuniyā kenaci pariyāyena bhikkhu
akkositabbo paribhāsitabbo ayampi dhammo sakkatvā garukatvā
mānetvā pūjetvā yāvajīvaṁ anatikkamanīyo ajjatagge ovaṭo
bhikkhunīnaṁ bhikkhūsu vacanapatho anovaṭo bhikkhūnaṁ bhikkhunīsu vacanapatho
ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo sace panānanda 1 mahāpajāpatī gotamī ime aṭṭha
garudhamme paṭiggaṇhāti sā vassā hotu upasampadāti.

[517] Athakho āyasmā ānando bhagavato santike aṭṭha
garudhamme uggahetvā yena mahāpajāpatī gotamī tenupasaṅkami
upasaṅkamitvā mahāpajāpatiṁ gotamiṁ etadavoca sace kho tvaṁ
gotami aṭṭha garudhamme paṭiggaṇheyyāsi sā va te bhavissati
upasampadā vassasatupasampannāya bhikkhuniyā tadahupasampannassa
bhikkhuno abhivādanaṁ paccuṭṭhānaṁ añjalikammaṁ sāmīcikammaṁ kātabbaṁ
1 Ma. Yu. sace ānanda.
Ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo na bhikkhuniyā abhikkhuke āvāse vassaṁ vasitabbaṁ
ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo anvaḍḍhamāsaṁ bhikkhuniyā bhikkhusaṅghato dve dhammā
paccāsiṁsitabbā uposathapucchakañca ovādupasaṅkamanañca ayampi
dhammo sakkatvā garukatvā mānetvā pūjetvā yāvajīvaṁ anatikkamanīyo
vassaṁ vuṭṭhāya bhikkhuniyā ubhatosaṅghe tīhi ṭhānehi
pavāretabbaṁ diṭṭhena vā sutena vā parisaṅkāya vā ayampi
dhammo sakkatvā garukatvā mānetvā pūjetvā yāvajīvaṁ anatikkamanīyo
garudhammaṁ ajjhāpannāya bhikkhuniyā ubhatosaṅghe pakkhamānattaṁ
caritabbaṁ ayampi dhammo sakkatvā garukatvā mānetvā pūjetvā
yāvajīvaṁ anatikkamanīyo dve vassāni chasu dhammesu sikkhitasikkhāya
sikkhamānāya ubhatosaṅghe upasampadā pariyesitabbā ayampi dhammo
sakkatvā garukatvā mānetvā pūjetvā yāvajīvaṁ anatikkamanīyo
na bhikkhuniyā kenaci pariyāyena bhikkhu akkositabbo paribhāsitabbo
ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo ajjatagge ovaṭo bhikkhunīnaṁ bhikkhūsu vacanapatho
anovaṭo bhikkhūnaṁ bhikkhunīsu vacanapatho ayampi dhammo sakkatvā
garukatvā mānetvā pūjetvā yāvajīvaṁ anatikkamanīyo sace kho
tvaṁ gotami ime aṭṭha garudhamme paṭiggaṇheyyāsi sā va te
Bhavissati upasampadāti. Seyyathāpi bhante ānanda itthī vā
pariso vā daharo yuvā maṇḍanajātiko sīsaṁnahāto uppalamālaṁ
vā vassikamālaṁ vā adhimattakamālaṁ vā 1 labhitvā ubhohi hatthehi
paṭiggahetvā uttamaṅge sirasi patiṭṭhāpeyya evameva kho ahaṁ
bhante ānanda ime aṭṭha garudhamme paṭiggaṇhāmi yāvajīvaṁ
anatikkamanīyeti.

[518] Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho āyasmā ānando bhagavantaṁ etadavoca
paṭiggahitā bhante mahāpajāpatiyā gotamiyā aṭṭha garudhammā
upasampannā bhagavato mātucchāti 2 . Sace panānanda nālabhissa
mātugāmo tathāgatappavedite dhammavinaye agārasmā anagāriyaṁ
pabbajjaṁ ciraṭṭhitikaṁ ānanda brahmacariyaṁ abhavissa vassasahassaṁ
saddhammo tiṭṭheyya yato ca kho ānanda mātugāmo tathāgatappavedite
dhammavinaye agārasmā anagāriyaṁ pabbajito nadāni
ānanda brahmacariyaṁ ciraṭṭhitikaṁ bhavissati pañcevadāni ānanda
vassasatāni saddhammo ṭhassati seyyathāpi ānanda yāni kānici
1 Ma. Yu. atimuttakamālaṁ vā. 2 mātucchāyātipi pāṭho dissati.
Kulāni bahuitthikāni 1 appapurisakāni tāni suppadhaṁsiyāni honti
corehi kumbhathenakehi evameva kho ānanda yasmiṁ dhammavinaye
labhati mātugāmo agārasmā anagāriyaṁ pabbajjaṁ na taṁ brahmacariyaṁ
ciraṭṭhitikaṁ hoti seyyathāpi ānanda sampanne sālikkhette
setaṭṭhikā nāma rogajāti nipatati evaṁ taṁ sālikkhettaṁ na
ciraṭṭhitikaṁ hoti evameva kho ānanda yasmiṁ dhammavinaye labhati
mātugāmo agārasmā anagāriyaṁ pabbajjaṁ na taṁ brahmacariyaṁ
ciraṭṭhitikaṁ hoti seyyathāpi ānanda sampanne ucchukkhette
mañjeṭṭhikā 2 nāma rogajāti nipatati evaṁ taṁ ucchukkhettaṁ na
ciraṭṭhitikaṁ hoti evameva kho ānanda yasmiṁ dhammavinaye labhati
mātugāmo agārasmā anagāriyaṁ pabbajjaṁ na taṁ brahmacariyaṁ
ciraṭṭhitikaṁ hoti seyyathāpi ānanda puriso mahato taḷākassa
paṭikacceva pāḷiṁ 3 bandheyya yāvadeva udakassa anatikkamanāya 4
evameva kho ānanda mayā paṭikacceva bhikkhunīnaṁ aṭṭha garudhammā
paññattā yāvajīvaṁ anatikkamanīyāti.
Bhikkhunīnaṁ aṭṭha garudhammā niṭṭhitā 5 .

[519] Athakho mahāpajāpatī gotamī yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ
1 Ma. Yu. bahutthikāni. 2 Ma. mañjiṭhikā. 3 Ma. Yu. Rā. āḷiṁ. 4 Ma.
anatikkamāya. 5 Yu. bhikkhunīnaṁ aṭṭhagarudhammaṁ niṭṭhitaṁ.
Ṭhitā kho mahāpajāpatī gotamī bhagavantaṁ etadavoca kathāhaṁ bhante
imāsu sākiyānīsu paṭipajjāmīti. Athakho bhagavā mahāpajāpatiṁ
gotamiṁ dhammiyā kathāya sandassesi samādapesi samuttejasei sampahaṁsesi.
Athakho mahāpajāpatī gotamī bhagavatā dhammiyā kathāya
sandassitā samādapitā samuttejitā sampahaṁsitā bhagavantaṁ abhivādetvā
padakkhiṇaṁ katvā pakkāmi. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave bhikkhūhi bhikkhuniyo upasampādetunti.

[520] Athakho tā bhikkhuniyo mahāpajāpatiṁ gotamiṁ etadavocuṁ
ayyā anupasampannā mayañcamhā 1 upasampannā evaṁ hi
bhagavatā paññattaṁ bhikkhūhi bhikkhuniyo upasampādetabbāti.
Athakho mahāpajāpatī gotamī yenāyasmā ānando tenupasaṅkami
upasaṅkamitvā āyasmantaṁ ānandaṁ abhivādetvā ekamantaṁ aṭṭhāsi.
Ekamantaṁ ṭhitā kho mahāpajāpatī gotamī āyasmantaṁ ānandaṁ
etadavoca imā maṁ bhante ānanda bhikkhuniyo evamāhaṁsu ayyā
anupasampannā mayañcamhā upasampannā evaṁ hi bhagavatā
paññattaṁ bhikkhūhi bhikkhuniyo upasampādetabbāti. Athakho āyasmā
ānando yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinno kho āyasmā ānando
1 Yu. Rā. mayamhā.
Bhagavantaṁ etadavoca mahāpajāpatī bhante gotamī evamāha imā
maṁ bhante ānanda bhikkhuniyo evamāhaṁsu ayyā anupasampannā
mayañcamhā upasampannā evaṁ hi bhagavatā paññattaṁ bhikkhūhi
bhikkhuniyo upasampādetabbāti. Yadaggena ānanda mahāpajāpatiyā
gotamiyā aṭṭha garudhammā paṭiggahitā tadevassā 1 upasampannāti.

[521] Athakho mahāpajāpatī gotamī yenāyasmā ānando
tenupasaṅkami upasaṅkamitvā āyasmantaṁ ānandaṁ abhivādetvā
ekamantaṁ aṭṭhāsi. Ekamantaṁ ṭhitā kho mahāpajāpatī gotamī
āyasmantaṁ ānandaṁ etadavoca ekāhaṁ bhante ānanda bhagavantaṁ
varaṁ yācāmi sādhu bhante bhagavā anujāneyya bhikkhūnañca
bhikkhunīnañca yathāvuḍḍhaṁ abhivādanaṁ paccuṭṭhānaṁ añjalikammaṁ sāmīcikammanti.
Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā ānando bhagavantaṁ etadavoca mahāpajāpatī
bhante gotamī evamāha ekāhaṁ bhante ānanda bhagavantaṁ varaṁ
yācāmi sādhu bhante bhagavā anujāneyya bhikkhūnañca bhikkhunīnañca
yathāvuḍḍhaṁ abhivādanaṁ paccuṭṭhānaṁ añjalikammaṁ sāmīcikammanti.
Aṭṭhānametaṁ ānanda anavakāso yaṁ tathāgato anujāneyya
mātugāmassa abhivādanaṁ paccuṭṭhānaṁ añjalikammaṁ sāmīcikammaṁ ime
hi nāma ānanda aññatitthiyā durakkhātadhammā mātugāmassa
1 Ma. Yu. tadeva sā.
Abhivādanaṁ paccuṭṭhānaṁ añjalikammaṁ sāmīcikammaṁ na karissanti
kimaṅgaṁ pana tathāgato anujānissanti mātugāmassa abhivādanaṁ paccuṭṭhānaṁ
añjalikammaṁ sāmīcikammanti. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi na bhikkhave
mātugāmassa abhivādanaṁ paccuṭṭhānaṁ añjalikammaṁ sāmīcikammaṁ kātabbaṁ
yo kareyya āpatti dukkaṭassāti.

[522] Athakho mahāpajāpatī gotamī yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ
ṭhitā kho mahāpajāpatī gotamī bhagavantaṁ etadavoca yāni tāni
bhante bhikkhunīnaṁ sikkhāpadāni bhikkhūhi sādhāraṇāni kathaṁ mayaṁ
bhante tesu sikkhāpadesu paṭipajjāmāti. Yāni tāni gotami
bhikkhunīnaṁ sikkhāpadāni bhikkhūhi sādhāraṇāni yathā bhikkhū sikkhanti
tathā tesu sikkhāpadesu sikkhathāti. Yāni pana tāni bhante
bhikkhunīnaṁ sikkhāpadāni bhikkhūhi asādhāraṇāni kathaṁ mayaṁ bhante tesu
sikkhāpadesu paṭipajjāmāti. Yāni tāni gotami bhikkhunīnaṁ sikkhāpadāni
bhikkhūhi asādhāraṇāni yathāpaññattesu sikkhāpadesu sikkhathāti.

[523] Athakho mahāpajāpatī gotamī yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ aṭṭhāsi.
Ekamantaṁ ṭhitā kho mahāpajāpatī gotamī bhagavantaṁ etadavoca
sādhu bhante bhagavā saṅkhittena dhammaṁ desetu yamahaṁ bhagavato
Dhammaṁ sutvā ekā vūpakaṭṭhā appamattā ātāpinī pahitattā
vihareyyanti. Ye kho tvaṁ gotami dhamme jāneyyāsi ime
dhammā sarāgāya 1 saṁvattanti no virāgāya saññogāya saṁvattanti
no visaññogāya ācayāya saṁvattanti no apacayāya mahicchatāya
saṁvattanti no appicchatāya asantuṭṭhiyā saṁvattanti no santuṭṭhiyā
saṅgaṇikāya saṁvattanti no pavivekāya kosajjāya saṁvattanti
no viriyārambhāya dubbharatāya saṁvattanti no subharatāya ekaṁsena
gotami dhāreyyāsi neso dhammo neso vinayo netaṁ
satthusāsananti ye ca kho tvaṁ gotami dhamme jāneyyāsi
ime dhammā virāgāya saṁvattanti no sarāgāya 1 visaññogāya
saṁvattanti no saññogāya apacayāya saṁvattanti no ācayāya
appicchatāya saṁvattanti no mahicchatāya santuṭṭhiyā saṁvattanti
no asantuṭṭhiyā pavivekāya saṁvattanti no saṅgaṇikāya viriyārambhāya
saṁvattanti no kosajjāya subharatāya saṁvattanti no
dubbharatāya ekaṁsena gotami dhāreyyāsi eso dhammo eso
vinayo etaṁ satthusāsananti.

[524] Tena kho pana samayena bhikkhū bhikkhunīnaṁ pātimokkhaṁ
na uddisanti 2 .pe. Te bhikkhū bhagavato etamatthaṁ ārocesuṁ
1 Yu. sārāgāya. 2 Ma. Yu. rā tena kho pana samayena bhikkhunīnaṁ pātimokkhaṁ na
ūddisiyati.
.pe. Anujānāmi bhikkhave bhikkhunīnaṁ pātimokkhaṁ uddisitunti.
Athakho bhikkhūnaṁ etadahosi kena nu kho bhikkhunīnaṁ pātimokkhaṁ
uddisitabbanti. Te bhikkhū bhagavato etamatthaṁ ārocesuṁ .pe.
Anujānāmi bhikkhave bhikkhūhi bhikkhunīnaṁ pātimokkhaṁ uddisitunti.