[435] Tena kho pana samayena bhikkhū vaccakuṭiyā yathāvuḍḍhaṁ
vaccaṁ karonti. Navakā bhikkhū paṭhamataraṁ āgantvā vaccitā
āgamenti. Te vaccaṁ sandhārentā mucchitā papatanti. Bhagavato
etamatthaṁ ārocesuṁ .pe. Saccaṁ kira bhikkhave bhikkhū vaccakuṭiyā
yathāvuḍḍhaṁ vaccaṁ karonti navakā bhikkhū paṭhamataraṁ āgantvā
vaccitā āgamenti te vaccaṁ sandhārentā mucchitā papatantīti.
Saccaṁ bhagavāti .pe. Na bhikkhave vaccakuṭiyā yathāvuḍḍhaṁ vacco
kātabbo yo kareyya āpatti dukkaṭassa anujānāmi bhikkhave
āgatapaṭipāṭiyā vaccaṁ kātunti.

[436] Tena kho pana samayena chabbaggiyā bhikkhū atisahasāpi
vaccakuṭiṁ pavisanti ubbhujitvāpi 1 pavisanti nitthunantāpi vaccaṁ
1 Ma. ubbhajitvā.
Karonti dantakaṭṭhaṁ khādantāpi vaccaṁ karonti bahiddhāpi
vaccadoṇikāya vaccaṁ karonti bahiddhāpi passāvadoṇikāya passāvaṁ
karonti passāvadoṇikāyapi kheḷaṁ karonti pharusenapi kaṭṭhena
avalekhanti avalekhanakaṭṭhampi vaccakūpamhi pātenti atisahasāpi
nikkhamanti ubbhujitvāpi nikkhamanti capucapukārakāpi 1 ācamenti
ācamanasarāvakepi udakaṁ sesenti. Ye te bhikkhū appicchā .pe.
Te ujjhāyanti khīyanti vipācenti kathaṁ hi nāma chabbaggiyā
bhikkhū atisahasāpi vaccakuṭiṁ pavisissanti ubbhujitvāpi
pavisissanti nitthunantāpi vaccaṁ karissanti dantakaṭṭhaṁ khādantāpi
vaccaṁ karissanti bahiddhāpi vaccadoṇikāya vaccaṁ karissanti
bahiddhāpi passāvadoṇikāya passāvaṁ karissanti passāvadoṇikāyapi
kheḷaṁ karissanti pharusenapi kaṭṭhena avalekhissanti avalekhanakaṭṭhaṁpi
vaccakūpamhi pātessanti atisahasāpi nikkhamissanti ubbhujitvāpi
nikkhamissanti capucapukārakāpi 1 ācamessanti ācamanasarāvakepi
udakaṁ sesessantīti. Athakho te bhikkhū bhagavato etamatthaṁ
ārocesuṁ .pe. Saccaṁ kira bhikkhave .pe. Saccaṁ bhagavāti .pe.
Vigarahitvā dhammiṁ kathaṁ katvā bhikkhū āmantesi tenahi bhikkhave
bhikkhūnaṁ vaccakuṭīvattaṁ paññāpessāmi yathā bhikkhūhi vaccakuṭiyā
sammā vattitabbaṁ.
1 Ma. capucapukārakaṁpi. Yu. capucapukārakampi.

[437] Yo vaccakuṭiṁ gacchati tena 1 bahiṭṭhitena ukkāsitabbaṁ
anto nisinnenapi ukkāsitabbaṁ cīvaravaṁse vā cīvararajjuyā vā
cīvaraṁ nikkhipitvā sādhukaṁ ataramānena vaccakuṭī pavisitabbā
nātisahasā pavisitabbā na ubbhujitvā pavisitabbā vaccapādukāya
ṭhitena ubbhujitabbaṁ na nitthunantena vacco kātabbo na
dantakaṭṭhaṁ khādantena vacco kātabbo na bahiddhā vaccadoṇikāya
vacco kātabbo na bahiddhā passāvadoṇikāya passāvo kātabbo
na passāvadoṇikāya kheḷo kātabbo na pharusena kaṭṭhena
avalekhitabbaṁ na avalekhanakaṭṭhaṁ vaccakūpamhi pātetabbaṁ
vaccapādukāya ṭhitena paṭicchādetabbaṁ nātisahasā nikkhamitabbaṁ na
ubbhujitvā nikkhamitabbaṁ ācamanapādukāya ṭhitena ubbhujitabbaṁ na
capucapukārakena 2 ācametabbaṁ na ācamanasarāvake udakaṁ sesetabbaṁ
ācamanapādukāya ṭhitena paṭicchādetabbaṁ sace vaccakuṭī ūhatā
hoti dhovitabbā sace avalekhanapiṭharo pūro hoti avalekhanakaṭṭhaṁ
chaḍḍetabbaṁ sace vaccakuṭī uklāpā hoti vaccakuṭī
sammajjitabbā sace paribhaṇḍaṁ uklāpaṁ hoti paribhaṇḍaṁ
sammajjitabbaṁ sace pariveṇaṁ uklāpaṁ hoti pariveṇaṁ sammajjitabbaṁ
sace koṭṭhako uklāpo hoti koṭṭhako sammajjitabbo
sace ācamanakumbhiyā udakaṁ na hoti ācamanakumbhiyā udakaṁ
1 Yu. tenātisaddo natthi. 2 Ma. Yu. capucapukārakaṁ.
Āsiñcitabbaṁ idaṁ kho bhikkhave bhikkhūnaṁ vaccakuṭīvattaṁ yathā
bhikkhūhi vaccakuṭiyā sammā vattitabbanti.

[438] Tena kho pana samayena saddhivihārikā upajjhāyesu na
sammā vattanti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma saddhivihārikā upajjhāyesu
na sammā vattissantīti. Athakho te bhikkhū bhagavato etamatthaṁ
ārocesuṁ .pe. Saccaṁ kira bhikkhave saddhivihārikā upajjhāyesu
na sammā vattantīti. Saccaṁ bhagavāti. Vigarahi buddho bhagavā
kathaṁ hi nāma bhikkhave saddhivihārikā upajjhāyesu na sammā
vattissanti netaṁ bhikkhave appasannānaṁ vā pasādāya .pe.
Vigarahitvā dhammiṁ kathaṁ katvā bhikkhū āmantesi tenahi bhikkhave
saddhivihārikānaṁ upajjhāyesu vattaṁ paññāpessāmi yathā
saddhivihārikehi upajjhāyesu sammā vattitabbaṁ.

[439] Saddhivihārikena bhikkhave upajjhāyamhi sammā vattitabbaṁ.
Tatrāyaṁ sammāvattanā kālasseva uṭṭhāya upāhanā omuñcitvā
ekaṁsaṁ uttarāsaṅgaṁ karitvā dantakaṭṭhaṁ dātabbaṁ mukhodakaṁ dātabbaṁ
āsanaṁ paññāpetabbaṁ sace yāgu hoti bhājanaṁ dhovitvā yāgu
upanāmetabbā yāguṁ pītassa udakaṁ datvā bhājanaṁ paṭiggahetvā
nīcaṁ katvā sādhukaṁ aparighaṁsantena dhovitvā paṭisāmetabbaṁ
upajjhāyamhi vuṭṭhite āsanaṁ uddharitabbaṁ sace so deso uklāpo
Hoti so deso sammajjitabbo sace upajjhāyo gāmaṁ
pavisitukāmo hoti nivāsanaṁ dātabbaṁ paṭinivāsanaṁ paṭiggahetabbaṁ
kāyabandhanaṁ dātabbaṁ saguṇaṁ katvā saṅghāṭiyo dātabbā dhovitvā
patto saudako dātabbo sace upajjhāyo pacchāsamaṇaṁ ākaṅkhati
timaṇḍalaṁ paṭicchādentena parimaṇḍalaṁ nivāsetvā kāyabandhanaṁ
bandhitvā saguṇaṁ katvā saṅghāṭiyo pārupitvā gaṇṭhikaṁ paṭimuñcitvā
dhovitvā pattaṁ gahetvā upajjhāyassa pacchāsamaṇena hotabbaṁ
nātidūre gantabbaṁ nāccāsanne gantabbaṁ pattapariyāpannaṁ
paṭiggahetabbaṁ na upajjhāyassa bhaṇamānassa antarantarā kathā
opātetabbā upajjhāyo āpattisāmantā bhaṇamāno
nivāretabbo nivattantena paṭhamataraṁ āgantvā āsanaṁ paññāpetabbaṁ
pādodakaṁ pādapīṭhaṁ pādakathalikaṁ upanikkhipitabbaṁ paccuggantvā
pattacīvaraṁ paṭiggahetabbaṁ paṭinivāsanaṁ dātabbaṁ nivāsanaṁ
paṭiggahetabbaṁ sace cīvaraṁ sinnaṁ hoti muhuttaṁ uṇhe otāpetabbaṁ
na ca uṇhe cīvaraṁ nidahitabbaṁ cīvaraṁ saṁharitabbaṁ 1 cīvaraṁ saṁharantena 2
caturaṅgulaṁ kaṇṇaṁ ussādetvā 3 cīvaraṁ saṁharitabbaṁ mā majjhe
bhaṅgo ahosīti obhoge kāyabandhanaṁ kātabbaṁ sace piṇḍapāto
hoti upajjhāyo ca bhuñjitukāmo hoti udakaṁ datvā
1 Ma. Rā. saṅgharitabbaṁ. 2 Ma. Rā. saṅgharantena. 3 Ma. Yu. ussāretvā.
Piṇḍapāto upanāmetabbo upajjhāyo pānīyena pucchitabbo
bhuttāvissa udakaṁ datvā pattaṁ paṭiggahetvā nīcaṁ katvā sādhukaṁ
aparighaṁsantena dhovitvā vodakaṁ katvā muhuttaṁ uṇhe otāpetabbo
na ca uṇhe patto nidahitabbo pattacīvaraṁ nikkhipitabbaṁ pattaṁ
nikkhipantena ekena hatthena pattaṁ gahetvā ekena hatthena
heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo
na ca anantarahitāya bhūmiyā patto nikkhipitabbo cīvaraṁ nikkhipantena
ekena hatthena cīvaraṁ gahetvā ekena hatthena cīvaravaṁsaṁ vā
cīvararajjuṁ vā pamajjitvā pārato antaṁ orato bhogaṁ katvā
cīvaraṁ nikkhipitabbaṁ upajjhāyamhi vuṭṭhite āsanaṁ uddharitabbaṁ
pādodakaṁ pādapīṭhaṁ pādakathalikaṁ paṭisāmetabbaṁ sace so deso
uklāpo hoti so deso sammajjitabbo sace upajjhāyo
nahāyitukāmo hoti nahānaṁ paṭiyādetabbaṁ sace sītena attho
hoti sītaṁ paṭiyādetabbaṁ sace uṇhena attho hoti uṇhaṁ
paṭiyādetabbaṁ sace upajjhāyo jantāgharaṁ pavisitukāmo hoti
cuṇṇaṁ sannetabbaṁ mattikā temetabbā jantāgharapīṭhaṁ ādāya
upajjhāyassa piṭṭhito piṭṭhito gantvā jantāgharapīṭhaṁ datvā cīvaraṁ
paṭiggahetvā ekamantaṁ nikkhipitabbaṁ cuṇṇaṁ dātabbaṁ mattikā
dātabbā sace ussahati jantāgharaṁ pavisitabbaṁ jantāgharaṁ
pavisantena mattikāya mukhaṁ makkhetvā purato ca pacchato ca
Paṭicchādetvā jantāgharaṁ pavisitabbaṁ na there bhikkhū anūpakhajja
nisīditabbaṁ na navā bhikkhū āsanena paṭibāhitabbā jantāghare
upajjhāyassa parikammaṁ kātabbaṁ jantāgharā nikkhamantena
jantāgharapīṭhaṁ ādāya purato ca pacchato ca paṭicchādetvā jantāgharā
nikkhamitabbaṁ udakepi upajjhāyassa parikammaṁ kātabbaṁ nahātena
paṭhamataraṁ uttaritvā attano gattaṁ vodakaṁ katvā nivāsetvā
upajjhāyassa gattato udakaṁ pamajjitabbaṁ nivāsanaṁ dātabbaṁ
saṅghāṭi dātabbā jantāgharapīṭhaṁ ādāya paṭhamataraṁ āgantvā
āsanaṁ paññāpetabbaṁ pādodakaṁ pādapīṭhaṁ pādakathalikaṁ upanikkhipitabbaṁ
upajjhāyo pānīyena pucchitabbo sace uddisāpetukāmo hoti
uddisāpetabbo sace paripucchitukāmo hoti paripucchitabbo
yasmiṁ vihāre upajjhāyo viharati sace so vihāro uklāpo
hoti sace ussahati sodhetabbo vihāraṁ sodhentena paṭhamaṁ
pattacīvaraṁ nīharitvā ekamantaṁ nikkhipitabbaṁ nisīdanapaccattharaṇaṁ
nīharitvā ekamantaṁ nikkhipitabbaṁ bhisibimbohanaṁ nīharitvā ekamantaṁ
nikkhipitabbaṁ mañco nīcaṁ katvā sādhukaṁ aparighaṁsantena asaṅghaṭṭantena
kavāṭapiṭṭhaṁ nīharitvā ekamantaṁ nikkhipitabbo pīṭhaṁ nīcaṁ
katvā sādhukaṁ aparighaṁsantena asaṅghaṭṭantena kavāṭapiṭṭhaṁ nīharitvā
ekamantaṁ nikkhipitabbaṁ mañcapaṭipādakā nīharitvā ekamantaṁ
nikkhipitabbā kheḷamallako nīharitvā ekamantaṁ nikkhipitabbo
Apassenaphalakaṁ nīharitvā ekamantaṁ nikkhipitabbaṁ bhummattharaṇaṁ
yathāpaññattaṁ sallakkhetvā nīharitvā ekamantaṁ nikkhipitabbaṁ sace
vihāre santānakaṁ hoti ullokā paṭhamaṁ ohāretabbaṁ ālokasandhikaṇṇabhāgā
pamajjitabbā sace gerukaparikammakatā bhitti
kaṇṇakitā hoti coḷakaṁ temetvā pīḷetvā pamajjitabbā
sace kāḷavaṇṇakatā bhūmi kaṇṇakitā hoti coḷakaṁ temetvā
pīḷetvā pamajjitabbā sace akatā hoti bhūmi udakena
paripphositvā sammajjitabbā mā vihāro rajena ūhaññīti
saṅkāraṁ vicinitvā ekamantaṁ chaḍḍetabbaṁ bhummattharaṇaṁ otāpetvā
sodhetvā pappoṭetvā atiharitvā yathāpaññattaṁ paññāpetabbaṁ
mañcapaṭipādakā otāpetvā pamajjitvā atiharitvā yathāṭhāne
ṭhapetabbā mañco otāpetvā sodhetvā pappoṭetvā nīcaṁ
katvā sādhukaṁ aparighaṁsantena asaṅghaṭṭantena kavāṭapiṭṭhaṁ atiharitvā
yathāpaññattaṁ paññāpetabbo piṭhaṁ otāpetvā sodhetvā
pappoṭetvā nīcaṁ katvā sādhukaṁ aparighaṁsantena asaṅghaṭṭantena
kavāṭapiṭṭhaṁ atiharitvā yathāpaññattaṁ paññāpetabbaṁ bhisibimbohanaṁ
otāpetvā sodhetvā pappoṭetvā atiharitvā yathāpaññattaṁ
paññāpetabbaṁ nisīdanapaccattharaṇaṁ otāpetvā sodhetvā
pappoṭetvā atiharitvā yathāpaññattaṁ paññāpetabbaṁ kheḷamallako
Otāpetvā pamajjitvā atiharitvā yathāṭhāne ṭhapetabbo apassenaphalakaṁ
otāpetvā pamajjitvā atiharitvā yathāṭhāne ṭhapetabbaṁ
pattacīvaraṁ nikkhipitabbaṁ pattaṁ nikkhipantena ekena hatthena pattaṁ
gahetvā ekena hatthena heṭṭhāmañcaṁ vā heṭṭhāpīṭhaṁ vā parāmasitvā
patto nikkhipitabbo na ca anantarahitāya bhūmiyā patto
nikkhipitabbo cīvaraṁ nikkhipantena ekena hatthena cīvaraṁ gahetvā
ekena hatthena cīvaravaṁsaṁ vā cīvararajjuṁ vā pamajjitvā pārato
antaṁ orato bhogaṁ katvā cīvaraṁ nikkhipitabbaṁ sace puratthimā
sarajā vātā vāyanti puratthimā vātapānā thaketabbā sace
pacchimā sarajā vātā vāyanti pacchimā vātapānā thaketabbā
sace uttarā sarajā vātā vāyanti uttarā vātapānā thaketabbā
sace dakkhiṇā sarajā vātā vāyanti dakkhiṇā vātapānā thaketabbā
sace sītakālo hoti divā vātapānā vivaritabbā rattiṁ thaketabbā
sace uṇhakālo hoti divā vātapānā thaketabbā rattiṁ
vivaritabbā sace pariveṇaṁ uklāpaṁ hoti pariveṇaṁ sammajjitabbaṁ
sace koṭṭhako uklāpo hoti koṭṭhako sammajjitabbo sace
upaṭṭhānasālā uklāpā hoti upaṭṭhānasālā sammajjitabbā
sace aggisālā uklāpā hoti aggisālā sammajjitabbā sace
vaccakuṭī uklāpā hoti vaccakuṭī sammajjitabbā sace pānīyaṁ
na hoti pānīyaṁ upaṭṭhāpetabbaṁ sace paribhojanīyaṁ na hoti
Paribhojanīyaṁ upaṭṭhāpetabbaṁ sace ācamanakumbhiyā udakaṁ na hoti
ācamanakumbhiyaṁ udakaṁ āsiñcitabbaṁ sace upajjhāyassa anabhirati
uppannā hoti saddhivihārikena vūpakāsetabbo vūpakāsāpetabbo 1
dhammakathā vāssa kātabbā sace upajjhāyassa kukkuccaṁ uppannaṁ
hoti saddhivihārikena vinodetabbaṁ vinodāpetabbaṁ dhammakathā
vāssa kātabbā sace upajjhāyassa diṭṭhigataṁ uppannaṁ hoti
saddhivihārikena vivecetabbaṁ vivecāpetabbaṁ dhammakathā vāssa
kātabbā sace upajjhāyo garudhammaṁ ajjhāpanno hoti
parivāsāraho saddhivihārikena ussukkaṁ kātabbaṁ kinti nu kho saṅgho
upajjhāyassa parivāsaṁ dadeyyāti sace upajjhāyo mūlāya
paṭikassanāraho hoti saddhivihārikena ussukkaṁ kātabbaṁ kinti nu kho
saṅgho upajjhāyaṁ mūlāya paṭikasseyyāti sace upajjhāyo
mānattāraho hoti saddhivihārikena ussukkaṁ kātabbaṁ kinti nu kho saṅgho
upajjhāyassa mānattaṁ dadeyyāti sace upajjhāyo abbhānāraho
hoti saddhivihārikena ussukkaṁ kātabbaṁ kinti nu kho saṅgho
upajjhāyaṁ abbheyyāti sace saṅgho upajjhāyassa kammaṁ kattukāmo hoti
tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ
vā saddhivihārikena ussukkaṁ kātabbaṁ kinti nu kho saṅgho
upajjhāyassa kammaṁ na kareyya lahukāya vā pariṇāmeyyāti
1 Yu. Rā. vūpakāsetabbā vūpakāsāpetabbā.
Kataṁ vā panassa hoti saṅghena kammaṁ tajjanīyaṁ vā niyassaṁ vā
pabbājanīyaṁ vā paṭisāraṇīyaṁ vā ukkhepanīyaṁ vā saddhivihārikena
ussukkaṁ kātabbaṁ kinti nu kho upajjhāyo sammā vatteyya
lomaṁ pāteyya netthāraṁ vatteyya saṅgho taṁ kammaṁ paṭippassambheyyāti
sace upajjhāyassa cīvaraṁ dhovitabbaṁ hoti
saddhivihārikena dhovitabbaṁ ussukkaṁ vā kātabbaṁ kinti nu kho
upajjhāyassa cīvaraṁ dhoviyethāti sace upajjhāyassa cīvaraṁ kātabbaṁ
hoti saddhivihārikena kātabbaṁ ussukkaṁ vā kātabbaṁ kinti nu
kho upajjhāyassa cīvaraṁ kariyethāti sace upajjhāyassa rajanaṁ
pacitabbaṁ 1 hoti saddhivihārikena pacitabbaṁ 1 ussukkaṁ vā kātabbaṁ
kinti nu kho upajjhāyassa rajanaṁ paciyethāti sace upajjhāyassa
cīvaraṁ rajetabbaṁ 2 hoti saddhivihārikena rajetabbaṁ 2 ussukkaṁ vā
kātabbaṁ kinti nu kho upajjhāyassa cīvaraṁ rajiyethāti cīvaraṁ
rajentena 3 sādhukaṁ samparivattakaṁ samparivattakaṁ rajetabbaṁ 2 na ca
acchinne theve pakkamitabbaṁ na upajjhāyaṁ anāpucchā ekaccassa
patto dātabbo na ekaccassa patto paṭiggahetabbo na
ekaccassa cīvaraṁ dātabbaṁ na ekaccassa cīvaraṁ paṭiggahetabbaṁ
na ekaccassa parikkhāro dātabbo na ekaccassa parikkhāro
paṭiggahetabbo na ekaccassa kesā chedetabbā 4 na ekaccena
1 Ma. rajanā pacitabbā. 2 Ma. rajitabbaṁ. 3 Ma. rajantena. 4 Yu. chedātabbā.
Kesā chedāpetabbā na ekaccassa parikammaṁ kātabbaṁ na
ekaccena parikammaṁ kārāpetabbaṁ na ekaccassa veyyāvacco
kātabbo na ekaccena veyyāvacco kārāpetabbo na ekaccassa
pacchāsamaṇena hotabbaṁ na ekacco pacchāsamaṇo ādātabbo
na ekaccassa piṇḍapāto nīharitabbo na ekaccena piṇḍapāto
nīharāpetabbo na upajjhāyaṁ anāpucchā gāmo pavisitabbo
na susānaṁ gantabbaṁ na disā pakkamitabbā sace upajjhāyo
gilāno hoti yāvajīvaṁ upaṭṭhātabbo vuṭṭhānassa āgametabbaṁ
idaṁ kho bhikkhave saddhivihārikānaṁ upajjhāyesu vattaṁ yathā
saddhivihārikehi upajjhāyesu sammā vattitabbanti.

[440] Tena kho pana samayena upajjhāyā saddhivihārikesu na
sammā vattanti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma upajjhāyā saddhivihārikesu na
sammā vattissantīti. Athakho te bhikkhū bhagavato etamatthaṁ
ārocesuṁ .pe. Saccaṁ kira bhikkhave upajjhāyā saddhivihārikesu
na sammā vattantīti. Saccaṁ bhagavāti .pe. Vigarahitvā dhammiṁ
kathaṁ katvā bhikkhū āmantesi tenahi bhikkhave upajjhāyānaṁ
saddhivihārikesu vattaṁ paññāpessāmi yathā upajjhāyehi
saddhivihārikesu sammā vattitabbaṁ.

[441] Upajjhāyena bhikkhave saddhivihārikamhi sammā vattitabbaṁ.
Tatrāyaṁ sammāvattanā upajjhāyena bhikkhave saddhivihāriko
saṅgahetabbo anuggahetabbo uddesena paripucchāya ovādena
anusāsaniyā sace upajjhāyassa patto hoti saddhivihārikassa
patto na hoti upajjhāyena saddhivihārikassa patto dātabbo
ussukkaṁ vā kātabbaṁ kinti nu kho saddhivihārikassa patto
uppajjiyethāti sace upajjhāyassa cīvaraṁ hoti saddhivihārikassa
cīvaraṁ na hoti upajjhāyena saddhivihārikassa cīvaraṁ dātabbaṁ
ussukkaṁ vā kātabbaṁ kinti nu kho saddhivihārikassa cīvaraṁ
uppajjiyethāti sace upajjhāyassa parikkhāro hoti
saddhivihārikassa parikkhāro na hoti upajjhāyena saddhivihārikassa
parikkhāro dātabbo ussukkaṁ vā kātabbaṁ kinti nu kho
saddhivihārikassa parikkhāro uppajjiyethāti sace saddhivihāriko
gilāno hoti kālasseva uṭṭhāya dantakaṭṭhaṁ dātabbaṁ mukhodakaṁ
dātabbaṁ āsanaṁ paññāpetabbaṁ sace yāgu hoti bhājanaṁ
dhovitvā yāgu upanāmetabbā yāguṁ pītassa udakaṁ datvā bhājanaṁ
paṭiggahetvā nīcaṁ katvā sādhukaṁ aparighaṁsantena dhovitvā
paṭisāmetabbaṁ saddhivihārikamhi vuṭṭhite āsanaṁ uddharitabbaṁ sace so
deso uklāpo hoti so deso sammajjitabbo sace
saddhivihāriko gāmaṁ pavisitukāmo hoti nivāsanaṁ dātabbaṁ paṭinivāsanaṁ
paṭiggahetabbaṁ kāyabandhanaṁ dātabbaṁ saguṇaṁ katvā saṅghāṭiyo
Dātabbā dhovitvā patto saudako dātabbo ettāvatā
nivattissatīti āsanaṁ paññāpetabbaṁ pādodakaṁ pādapīṭhaṁ pādakathalikaṁ
upanikkhipitabbaṁ paccuggantvā pattacīvaraṁ paṭiggahetabbaṁ paṭinivāsanaṁ
dātabbaṁ nivāsanaṁ paṭiggahetabbaṁ sace cīvaraṁ sinnaṁ hoti muhuttaṁ
uṇhe otāpetabbaṁ na ca uṇhe cīvaraṁ nidahitabbaṁ cīvaraṁ saṁharitabbaṁ
cīvaraṁ saṁharantena caturaṅgulaṁ kaṇṇaṁ ussādetvā cīvaraṁ saṁharitabbaṁ
mā majjhe bhaṅgo ahosīti obhoge kāyabandhanaṁ kātabbaṁ
sace piṇḍapāto hoti saddhivihāriko ca bhuñjitukāmo hoti
udakaṁ datvā piṇḍapāto upanāmetabbo saddhivihāriko pānīyena
pucchitabbo bhuttāvissa udakaṁ datvā pattaṁ paṭiggahetvā nīcaṁ
katvā sādhukaṁ aparighaṁsantena dhovitvā vodakaṁ katvā muhuttaṁ uṇhe
otāpetabbo na ca uṇhe patto nidahitabbo pattacīvaraṁ
nikkhipitabbaṁ pattaṁ nikkhipantena ekena hatthena pattaṁ gahetvā
ekena hatthena heṭṭhāmañcaṁ vā heṭṭhāpīṭhaṁ vā parāmasitvā
patto nikkhipitabbo na ca anantarahitāya bhūmiyā patto
nikkhipitabbo cīvaraṁ nikkhipantena ekena hatthena cīvaraṁ gahetvā
ekena hatthena cīvaravaṁsaṁ vā cīvararajjuṁ vā pamajjitvā pārato
antaṁ orato bhogaṁ katvā cīvaraṁ nikkhipitabbaṁ saddhivihārikamhi
vuṭṭhite āsanaṁ uddharitabbaṁ pādodakaṁ pādapīṭhaṁ pādakathalikaṁ
paṭisāmetabbaṁ sace so deso uklāpo hoti so deso
Sammajjitabbo sace saddhivihāriko nahāyitukāmo hoti nahānaṁ
paṭiyādetabbaṁ sace sītena attho hoti sītaṁ paṭiyādetabbaṁ
sace uṇhena attho hoti uṇhaṁ paṭiyādetabbaṁ sace
saddhivihāriko jantāgharaṁ pavisitukāmo hoti cuṇṇaṁ sannetabbaṁ
mattikā temetabbā jantāgharapīṭhaṁ ādāya gantvā jantāgharapiṭhaṁ
datvā cīvaraṁ paṭiggahetvā ekamantaṁ nikkhipitabbaṁ cuṇṇaṁ dātabbaṁ
mattikā dātabbā sace ussahati jantāgharaṁ 1 pavisitabbaṁ jantāgharaṁ
pavisantena mattikāya mukhaṁ makkhetvā purato ca pacchato ca
paṭicchādetvā jantāgharaṁ pavisitabbaṁ na there bhikkhū anūpakhajja
nisīditabbaṁ na navā bhikkhū āsanena paṭibāhitabbā jantāghare
saddhivihārikassa parikammaṁ dātabbaṁ jantāgharaṁ nikkhamantena
jantāgharapīṭhaṁ ādāya purato ca pacchato ca paṭicchādetvā jantāgharā
nikkhamitabbaṁ udakepi saddhivihārikassa parikammaṁ kātabbaṁ nahātena
paṭhamataraṁ uttaritvā attano gattaṁ vodakaṁ katvā nivāsetvā
saddhivihārikassa gattato udakaṁ pamajjitabbaṁ nivāsanaṁ dātabbaṁ
saṅghāṭi dātabbā jantāgharapīṭhaṁ ādāya paṭhamataraṁ āgantvā
āsanaṁ paññāpetabbaṁ pādodakaṁ pādapīṭhaṁ pādakathalikaṁ upanikkhipitabbaṁ
saddhivihāriko pānīyena pucchitabbo yasmiṁ vihāre saddhivihāriko
viharati sace so vihāro uklāpo hoti sace
ussahati sodhetabbo vihāraṁ sodhentena paṭhamaṁ pattacīvaraṁ
1 Ma. Yu. jantāgharā.
Nīharitvā ekamantaṁ nikkhipitabbaṁ .pe. Sace ācamanakumbhiyā
udakaṁ na hoti ācamanakumbhiyā udakaṁ āsiñcitabbaṁ sace
saddhivihārikassa anabhirati uppannā hoti upajjhāyena vūpakāsetabbo
vūpakāsāpetabbo dhammakathā vāssa kātabbā sace saddhivihārikassa
kukkuccaṁ uppannaṁ hoti upajjhāyena vinodetabbaṁ vinodāpetabbaṁ
dhammakathā vāssa kātabbā sace saddhivihārikassa diṭṭhigataṁ
uppannaṁ hoti upajjhāyena vivecetabbaṁ vivecāpetabbaṁ dhammakathā
vāssa kātabbā sace saddhivihāriko garudhammaṁ ajjhāpanno
hoti parivāsāraho upajjhāyena ussukkaṁ kātabbaṁ kinti
nu kho saṅgho saddhivihārikassa parivāsaṁ dadeyyāti sace saddhivihāriko
mūlāya paṭikassanāraho hoti upajjhāyena ussukkaṁ kātabbaṁ
kinti nu kho saṅgho saddhivihārikaṁ mūlāya paṭikasseyyāti sace
saddhivihāriko mānattāraho hoti upajjhāyena ussukkaṁ
kātabbaṁ kinti nu kho saṅgho saddhivihārikassa mānattaṁ dadeyyāti
sace saddhivihāriko abbhānāraho hoti upajjhāyena ussukkaṁ
kātabbaṁ kinti nu kho saṅgho saddhivihārikaṁ abbheyyāti sace
saṅgho saddhivihārikassa kammaṁ kattukāmo hoti tajjanīyaṁ vā
niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā
upajjhāyena ussukkaṁ kātabbaṁ kinti nu kho saṅgho saddhivihārikassa
kammaṁ na kareyya lahukāya vā pariṇāmeyyāti kataṁ vā
Panassa hoti saṅghena kammaṁ tajjanīyaṁ vā niyassaṁ vā pabbājanīyaṁ
vā paṭisāraṇīyaṁ vā ukkhepanīyaṁ vā upajjhāyena ussukkaṁ kātabbaṁ
kinti nu kho saddhivihāriko sammā vatteyya lomaṁ pāteyya
netthāraṁ vatteyya saṅgho taṁ kammaṁ paṭippassambheyyāti sace
saddhivihārikassa cīvaraṁ dhovitabbaṁ hoti upajjhāyena ācikkhitabbaṁ
evaṁ dhoveyyāsīti ussukkaṁ vā kātabbaṁ kinti nu kho
saddhivihārikassa cīvaraṁ dhoviyethāti sace saddhivihārikassa cīvaraṁ
kātabbaṁ hoti upajjhāyena ācikkhitabbaṁ evaṁ kareyyāsīti
ussukkaṁ vā kātabbaṁ kinti nu kho saddhivihārikassa cīvaraṁ
kariyethāti sace saddhivihārikassa rajanaṁ pacitabbaṁ hoti upajjhāyena
ācikkhitabbaṁ evaṁ paceyyāsīti ussukkaṁ vā kātabbaṁ kinti
nu kho saddhivihārikassa rajanaṁ paciyethāti sace saddhivihārikassa
cīvaraṁ rajetabbaṁ hoti upajjhāyena ācikkhitabbaṁ evaṁ rajeyyāsīti
ussukkaṁ vā kātabbaṁ kinti nu kho saddhivihārikassa cīvaraṁ
rajiyethāti cīvaraṁ rajentena sādhukaṁ samparivattakaṁ samparivattakaṁ
rajetabbaṁ na ca acchinne theve pakkamitabbaṁ sace saddhivihāriko
gilāno hoti yāvajīvaṁ upaṭṭhātabbo vuṭṭhānassa āgametabbaṁ
idaṁ kho bhikkhave upajjhāyānaṁ saddhivihārikesu vattaṁ yathā
upajjhāyehi saddhivihārikesu sammā vattitabbanti.
Dutiyabhāṇavāraṁ niṭṭhitaṁ.

[442] Tena kho pana samayena antevāsikā ācariyesu
na sammā vattanti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma antevāsikā
ācariyesu na sammā vattissantīti. Athakho te bhikkhū bhagavato
etamatthaṁ ārocesuṁ .pe. Saccaṁ kira bhikkhave antevāsikā
ācariyesu na sammā vattantīti. Saccaṁ bhagavāti .pe. Vigarahitvā
dhammiṁ kathaṁ katvā bhikkhū āmantesi tenahi bhikkhave antevāsikānaṁ
bhikkhūnaṁ ācariyesu vattaṁ paññāpessāmi yathā antevāsikehi
bhikkhūhi ācariyesu sammā vattitabbaṁ.

[443] Antevāsikena bhikkhave ācariyamhi sammā vattitabbaṁ.
Tatrāyaṁ sammāvattanā kālasseva uṭṭhāya upāhanā omuñcitvā
ekaṁsaṁ uttarāsaṅgaṁ karitvā dantakaṭṭhaṁ dātabbaṁ mukhodakaṁ dātabbaṁ
āsanaṁ paññāpetabbaṁ sace yāgu hoti bhājanaṁ dhovitvā yāgu
upanāmetabbā yāguṁ pītassa udakaṁ datvā bhājanaṁ paṭiggahetvā
nīcaṁ katvā sādhukaṁ aparighaṁsantena dhovitvā paṭisāmetabbaṁ ācariyamhi
vuṭṭhite āsanaṁ uddharitabbaṁ sace so deso uklāpo hoti
so deso sammajjitabbo sace ācariyo gāmaṁ pavisitukāmo
hoti nivāsanaṁ dātabbaṁ paṭinivāsanaṁ paṭiggahetabbaṁ kāyabandhanaṁ
dātabbaṁ saguṇaṁ katvā saṅghāṭiyo dātabbā dhovitvā
Patto saudako 1 dātabbo sace ācariyo pacchāsamaṇaṁ ākaṅkhati
timaṇḍalaṁ paṭicchādentena parimaṇḍalaṁ nivāsetvā kāyabandhanaṁ
bandhitvā saguṇaṁ katvā saṅghāṭiyo pārupitvā gaṇṭhikaṁ paṭimuñcitvā
dhovitvā pattaṁ gahetvā ācariyassa pacchāsamaṇena hotabbaṁ
nātidūre gantabbaṁ nāccāsanne gantabbaṁ pattapariyāpannaṁ
paṭiggahetabbaṁ na ācariyassa bhaṇamānassa antarantarā kathā
opātetabbā ācariyo āpattisāmantā bhaṇamāno nivāretabbo
nivattantena paṭhamataraṁ āgantvā āsanaṁ paññāpetabbaṁ pādodakaṁ
pādapīṭhaṁ pādakathalikaṁ upanikkhipitabbaṁ paccuggantvā pattacīvaraṁ
paṭiggahetabbaṁ paṭinivāsanaṁ dātabbaṁ nivāsanaṁ paṭiggahetabbaṁ
sace cīvaraṁ sinnaṁ hoti muhuttaṁ uṇhe otāpetabbaṁ na ca
uṇhe cīvaraṁ nidahitabbaṁ cīvaraṁ saṁharitabbaṁ cīvaraṁ saṁharantena
caturaṅgulaṁ kaṇṇaṁ ussādetvā cīvaraṁ saṁharitabbaṁ mā majjhe
bhaṅgo ahosīti obhoge kāyabandhanaṁ kātabbaṁ sace piṇḍapāto
hoti ācariyo ca bhuñjitukāmo hoti udakaṁ datvā piṇḍapāto
upanāmetabbo ācariyo pānīyena pucchitabbo bhuttāvissa
udakaṁ datvā pattaṁ paṭiggahetvā nīcaṁ katvā sādhukaṁ aparighaṁsantena
dhovitvā vodakaṁ katvā muhuttaṁ uṇhe otāpetabbo na
ca uṇhe patto nidahitabbo pattacīvaraṁ nikkhipitabbaṁ pattaṁ
nikkhipantena ekena hatthena pattaṁ gahetvā ekena hatthena
1 Ma. sodako.
Heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo
na ca anantarahitāya bhūmiyā patto nikkhipitabbo cīvaraṁ nikkhipantena
ekena hatthena cīvaraṁ gahetvā ekena hatthena cīvaravaṁsaṁ vā
cīvararajjuṁ vā pamajjitvā pārato antaṁ orato bhogaṁ katvā
cīvaraṁ nikkhipitabbaṁ ācariyamhi vuṭṭhite āsanaṁ uddharitabbaṁ
pādodakaṁ pādapīṭhaṁ pādakathalikaṁ paṭisāmetabbaṁ sace so deso
uklāpo hoti so deso sammajjitabbo sace ācariyo
nahāyitukāmo hoti nahānaṁ paṭiyādetabbaṁ sace sītena attho
hoti sītaṁ paṭiyādetabbaṁ sace uṇhena attho hoti uṇhaṁ
paṭiyādetabbaṁ sace ācariyo jantāgharaṁ pavisitukāmo hoti
cuṇṇaṁ sannetabbaṁ mattikā temetabbā jantāgharapīṭhaṁ ādāya
ācariyassa piṭṭhito piṭṭhito gantvā jantāgharapīṭhaṁ datvā cīvaraṁ
paṭiggahetvā ekamantaṁ nikkhipitabbaṁ cuṇṇaṁ dātabbaṁ mattikā
dātabbā sace ussahati jantāgharaṁ pavisitabbaṁ jantāgharaṁ
pavisantena mattikāya mukhaṁ makkhetvā purato ca pacchato ca
paṭicchādetvā jantāgharaṁ pavisitabbaṁ na there bhikkhū anupakhajja
nisīditabbaṁ na navā bhikkhū āsanena paṭibāhitabbā jantāghare
ācariyassa parikammaṁ kātabbaṁ jantāgharā nikkhamantena jantāgharapīṭhaṁ
ādāya purato ca pacchato ca paṭicchādetvā jantāgharā nikkhamitabbaṁ
udakepi ācariyassa parikammaṁ kātabbaṁ nahātena paṭhamataraṁ uttaritvā
Attano gattaṁ vodakaṁ katvā nivāsetvā ācariyassa gattato
udakaṁ pamajjitabbaṁ nivāsanaṁ dātabbaṁ saṅghāṭi dātabbā
jantāgharapīṭhaṁ ādāya paṭhamataraṁ āgantvā āsanaṁ paññāpetabbaṁ
pādodakaṁ pādapīṭhaṁ pādakathalikaṁ upanikkhipitabbaṁ ācariyo pānīyena
pucchitabbo sace uddisāpetukāmo hoti uddisāpetabbo
sace paripucchitukāmo hoti paripucchitabbo yasmiṁ vihāre ācariyo
viharati sace so vihāro uklāpo hoti sace ussahati
sodhetabbo vihāraṁ sodhentena paṭhamaṁ pattacīvaraṁ nīharitvā
ekamantaṁ nikkhipitabbaṁ nisīdanapaccattharaṇaṁ nīharitvā ekamantaṁ
nikkhipitabbaṁ bhisibimbohanaṁ nīharitvā ekamantaṁ nikkhipitabbaṁ mañco
nīcaṁ katvā sādhukaṁ aparighaṁsantena asaṅghaṭṭantena kavāṭapiṭṭhaṁ
nīharitvā ekamantaṁ nikkhipitabbo pīṭhaṁ nīcaṁ katvā sādhukaṁ
aparighaṁsantena asaṅghaṭṭantena kavāṭapiṭṭhaṁ nīharitvā ekamantaṁ
nikkhipitabbaṁ mañcapaṭipādakā nīharitvā ekamantaṁ nikkhipitabbā
kheḷamallako nīharitvā ekamantaṁ nikkhipitabbo apassenaphalakaṁ
nīharitvā ekamantaṁ nikkhipitabbaṁ bhummattharaṇaṁ yathāpaññattaṁ
sallakkhetvā nīharitvā ekamantaṁ nikkhipitabbaṁ sace vihāre
santānakaṁ hoti ullokā paṭhamaṁ ohāretabbaṁ ālokasandhikaṇṇabhāgā
pamajjitabbā sace gerukaparikammakatā bhitti kaṇṇakitā
hoti coḷakaṁ temetvā pīḷetvā pamajjitabbā sace
Kāḷavaṇṇakatā bhūmi kaṇṇakitā hoti coḷakaṁ temetvā pīḷetvā
pamajjitabbā sace akatā hoti bhūmi udakena paripphosetvā
sammajjitabbā mā vihāro rajena ūhaññīti saṅkāraṁ vicinitvā
ekamantaṁ chaḍḍetabbaṁ bhummattharaṇaṁ otāpetvā sodhetvā
pappoṭetvā atiharitvā yathāpaññattaṁ paññāpetabbaṁ mañcapaṭipādakā
otāpetvā pamajjitvā atiharitvā yathāṭhāne ṭhapetabbā
mañco otāpetvā sodhetvā pappoṭetvā nīcaṁ katvā sādhukaṁ
aparighaṁsantena asaṅghaṭṭantena kavāṭapiṭṭhaṁ atiharitvā yathāpaññattaṁ
paññāpetabbo pīṭhaṁ otāpetvā sodhetvā pappoṭetvā nīcaṁ
katvā sādhukaṁ aparighaṁsantena asaṅghaṭṭantena kavāṭapiṭṭhaṁ atiharitvā
yathāpaññattaṁ paññāpetabbaṁ bhisibimbohanaṁ otāpetvā sodhetvā
pappoṭetvā atiharitvā yathāpaññattaṁ paññāpetabbaṁ nisīdanapaccattharaṇaṁ
otāpetvā sodhetvā pappoṭetvā atiharitvā
yathāpaññattaṁ paññāpetabbaṁ kheḷamallako otāpetvā pamajjitvā
atiharitvā yathāṭhāne ṭhapetabbo apassenaphalakaṁ otāpetvā
pamajjitvā atiharitvā yathāṭhāne ṭhapetabbaṁ pattacīvaraṁ nikkhipitabbaṁ
pattaṁ nikkhipantena ekena hatthena pattaṁ gahetvā ekena hatthena
heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo
na ca anantarahitāya bhūmiyā patto nikkhipitabbo cīvaraṁ nikkhipantena
ekena hatthena cīvaraṁ gahetvā ekena hatthena cīvaravaṁsaṁ vā
Cīvararajjuṁ vā pamajjitvā pārato antaṁ orato bhogaṁ katvā
cīvaraṁ nikkhipitabbaṁ sace puratthimā sarajā vātā vāyanti puratthimā
vātapānā thaketabbā sace pacchimā sarajā vātā vāyanti
pacchimā vātapānā thaketabbā sace uttarā sarajā vātā
vāyanti uttarā vātapānā thaketabbā sace dakkhiṇā sarajā
vātā vāyanti dakkhiṇā vātapānā thaketabbā sace sītakālo
hoti divā vātapānā vivaritabbā rattiṁ thaketabbā sace
uṇhakālo hoti divā vātapānā thaketabbā rattiṁ vivaritabbā
sace pariveṇaṁ uklāpaṁ hoti pariveṇaṁ sammajjitabbaṁ sace
koṭṭhako uklāpo hoti koṭṭhako sammajjitabbo sace
upaṭṭhānasālā uklāpā hoti upaṭṭhānasālā sammajjitabbā
sace aggisālā uklāpā hoti aggisālā sammajjitabbā
sace vaccakuṭī uklāpā hoti vaccakuṭī sammajjitabbā sace
pānīyaṁ na hoti pānīyaṁ upaṭṭhāpetabbaṁ sace paribhojanīyaṁ na
hoti paribhojanīyaṁ upaṭṭhāpetabbaṁ sace ācamanakumbhiyā udakaṁ
na hoti ācamanakumbhiyā udakaṁ āsiñcitabbaṁ sace ācariyassa
anabhirati uppannā hoti antevāsikena vūpakāsetabbo vūpakāsāpetabbo
dhammakathā vāssa kātabbā sace ācariyassa kukkuccaṁ
uppannaṁ hoti antevāsikena vinodetabbaṁ vinodāpetabbaṁ
dhammakathā vāssa kātabbaṁ sace ācariyassa diṭṭhigataṁ uppannaṁ
Hoti antevāsikena vivecetabbaṁ vivecāpetabbaṁ dhammakathā vāssa
kātabbā sace ācariyo garudhammaṁ ajjhāpanno hoti parivāsāraho
antevāsikena ussukkaṁ kātabbaṁ kinti nu kho saṅgho ācariyassa
parivāsaṁ dadeyyāti sace ācariyo mūlāya paṭikassanāraho hoti
antevāsikena ussukkaṁ kātabbaṁ kinti nu kho saṅgho ācariyaṁ
mūlāya paṭikasseyyāti sace ācariyo mānattāraho hoti
antevāsikena ussukkaṁ kātabbaṁ kinti nu kho saṅgho ācariyassa
mānattaṁ dadeyyāti sace ācariyo abbhānāraho hoti antevāsikena
ussukkaṁ kātabbaṁ kinti nu kho saṅgho ācariyaṁ abbheyyāti
sace saṅgho ācariyassa kammaṁ kattukāmo hoti tajjanīyaṁ vā
niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā
antevāsikena ussukkaṁ kātabbaṁ kinti nu kho saṅgho ācariyassa
kammaṁ na kareyya lahukāya vā pariṇāmeyyāti kataṁ vā
panassa hoti saṅghena kammaṁ tajjanīyaṁ vā niyassaṁ vā pabbājanīyaṁ
vā paṭisāraṇīyaṁ vā ukkhepanīyaṁ vā antevāsikena ussukkaṁ
kātabbaṁ kinti nu kho ācariyo sammā vatteyya lomaṁ pāteyya
netthāraṁ vatteyya saṅgho taṁ kammaṁ paṭippassambheyyāti sace
ācariyassa cīvaraṁ dhovitabbaṁ hoti antevāsikena dhovitabbaṁ
ussukkaṁ vā kātabbaṁ kinti nu kho ācariyassa cīvaraṁ dhoviyethāti
sace ācariyassa cīvaraṁ kātabbaṁ hoti antevāsikena kātabbaṁ
Ussukkaṁ vā kātabbaṁ kinti nu kho ācariyassa cīvaraṁ kariyethāti
sace ācariyassa rajanaṁ pacitabbaṁ hoti antevāsikena pacitabbaṁ
ussukkaṁ vā kātabbaṁ kinti nu kho ācariyassa rajanaṁ paciyethāti
sace ācariyassa cīvaraṁ rajetabbaṁ hoti antevāsikena rajetabbaṁ
ussukkaṁ vā kātabbaṁ kinti nu kho ācariyassa cīvaraṁ rajiyethāti
cīvaraṁ rajentena sādhukaṁ samparivattakaṁ samparivattakaṁ rajetabbaṁ na
ca acchinne theve pakkamitabbaṁ na ācariyaṁ anāpucchā ekaccassa
patto dātabbo na ekaccassa patto paṭiggahetabbo na
ekaccassa cīvaraṁ dātabbaṁ na ekaccassa cīvaraṁ paṭiggahetabbaṁ
na ekaccassa parikkhāro dātabbo na ekaccassa parikkhāro
paṭiggahetabbo na ekaccassa kesā chedetabbā na ekaccena
kesā chedāpetabbā na ekaccassa parikammaṁ kātabbaṁ na
ekaccena parikammaṁ kārāpetabbaṁ na ekaccassa veyyāvacco
kātabbo na ekaccena veyyāvacco kārāpetabbo na
ekaccassa pacchāsamaṇena hotabbaṁ na ekacco pacchāsamaṇo
ādātabbo na ekaccassa piṇḍapāto nīharitabbo na ekaccena
piṇḍapāto nīharāpetabbo na ācariyaṁ anāpucchā gāmo
pavisitabbo na susānaṁ gantabbaṁ na disā pakkamitabbā sace
ācariyo gilāno hoti yāvajīvaṁ upaṭṭhātabbo vuṭṭhānassa
āgametabbaṁ idaṁ kho bhikkhave antevāsikānaṁ ācariyesu vattaṁ
Yathā antevāsikehi ācariyesu sammā vattitabbanti.

[444] Tena kho pana samayena ācariyā antevāsikesu na
sammā vattanti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma ācariyā antevāsikesu
na sammā vattissantīti. Athakho te bhikkhū bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe
bhikkhusaṅghaṁ sannipātāpetvā bhikkhū paṭipucchi saccaṁ kira bhikkhave
ācariyā antevāsikesu na sammā vattantīti. Saccaṁ bhagavāti
.pe. Vigarahitvā dhammiṁ kathaṁ katvā bhikkhū āmantesi tenahi
bhikkhave ācariyānaṁ antevāsikesu vattaṁ paññāpessāmi yathā
ācariyehi antevāsikesu sammā vattitabbaṁ.