[690] Siyā āpattādhikaraṇaṁ ekaṁ samathaṁ anāgamma tiṇavatthārakaṁ
dvīhi samathehi sammeyya sammukhāvinayena ca paṭiññātakaraṇena cāti.
Siyātissa vacanīyaṁ. Yathā kathaṁ viya. Idha pana bhikkhave bhikkhu
lahukaṁ āpattiṁ āpanno hoti. Tena bhikkhave bhikkhunā ekaṁ
bhikkhuṁ upasaṅkamitvā ekaṁ uttarāsaṅgaṁ karitvā ukkuṭikaṁ 1 nisīditvā
1 Ma. karitvā vuḍḍhānaṁ bhikkhūnaṁ pāde vanditvā ukkuṭikaṁ.
Añjaliṁ paggahetvā evamassa vacanīyo ahaṁ āvuso itthannāmaṁ
āpattiṁ āpanno taṁ paṭidesemīti. Tena vattabbo passasīti.
Āma passāmīti. Āyatiṁ saṁvareyyāsīti. Idaṁ vuccati bhikkhave
adhikaraṇaṁ vūpasantaṁ. Kena vūpasantaṁ. Sammukhāvinayena ca
paṭiññātakaraṇena ca. Kiñca tattha sammukhāvinayasmiṁ. Dhammasammukhatā
vinayasammukhatā puggalasammukhatā .pe. Kā ca tattha puggalasammukhatā.
Yo ca deseti yassa ca deseti ubho sammukhībhūtā honti
ayaṁ tattha puggalasammukhatā. Kiñca tattha paṭiññātakaraṇasmiṁ.
Yā paṭiññātakaraṇassa kammassa kiriyā karaṇaṁ upagamanaṁ ajjhupagamanaṁ
adhivāsanā appaṭikkosanā idaṁ tattha paṭiññātakaraṇasmiṁ. Evaṁ
vūpasantaṁ ce bhikkhave adhikaraṇaṁ paṭiggāhako ukkoṭeti ukkoṭanakaṁ
pācittiyaṁ. Evañce taṁ labhetha iccetaṁ kusalaṁ no ce labhetha
tena bhikkhave bhikkhunā sambahule bhikkhū upasaṅkamitvā ekaṁsaṁ
uttarāsaṅgaṁ karitvā vuḍḍhānaṁ bhikkhūnaṁ pāde vanditvā ukkuṭikaṁ
nisīditvā añjaliṁ paggahetvā evamassu vacanīyā ahaṁ bhante
itthannāmaṁ āpattiṁ āpanno taṁ paṭidesemīti. Byattena
bhikkhunā paṭibalena te bhikkhū ñāpetabbā suṇantu me āyasmantā
ayaṁ itthannāmo bhikkhu āpattiṁ sarati vivarati uttānīkaroti
deseti. Yadāyasmantānaṁ pattakallaṁ ahaṁ itthannāmassa bhikkhuno
āpattiṁ paṭiggaṇheyyanti. Tena vattabbo passasīti.
Āma passāmīti. Āyatiṁ saṁvareyyāsīti. Idaṁ vuccati bhikkhave
adhikaraṇaṁ vūpasantaṁ. Kena vūpasantaṁ. Sammukhāvinayena ca
paṭiññātakaraṇena ca. Kiñca tattha sammukhāvinayasmiṁ. Dhammasammukhatā
vinayasammukhatā puggalasammukhatā .pe. Kā ca tattha puggalasammukhatā.
Yo ca deseti yassa ca deseti ubho sammukhībhūtā honti
ayaṁ tattha puggalasammukhatā. Kiñca tattha paṭiññātakaraṇasmiṁ.
Yā paṭiññātakaraṇassa kammassa kiriyā karaṇaṁ upagamanaṁ ajjhupagamanaṁ
adhivāsanā appaṭikkosanā idaṁ tattha paṭiññātakaraṇasmiṁ.
Evaṁ vūpasantaṁ ce bhikkhave adhikaraṇaṁ paṭiggāhako ukkoṭeti
ukkoṭanakaṁ pācittiyaṁ. Evañce taṁ labhetha iccetaṁ kusalaṁ
no ce labhetha tena bhikkhave bhikkhunā saṅghaṁ upasaṅkamitvā
ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde vanditvā
ukkuṭikaṁ nisīditvā añjaliṁ paggahetvā evamassa vacanīyo ahaṁ
bhante itthannāmaṁ āpattiṁ āpanno taṁ paṭidesemīti. Byattena
bhikkhunā paṭibalena saṅgho ñāpetabbo suṇātu me bhante
saṅgho ayaṁ itthannāmo bhikkhu āpattiṁ sarati vivarati uttānīkaroti
deseti. Yadi saṅghassa pattakallaṁ ahaṁ itthannāmassa bhikkhuno
āpattiṁ paṭiggaṇheyyanti. Tena vattabbo passasīti. Āma
passāmīti. Āyatiṁ saṁvareyyāsīti. Idaṁ vuccati bhikkhave adhikaraṇaṁ
vūpasantaṁ. Kena vūpasantaṁ. Sammukhāvinayena ca paṭiññātakaraṇena
Ca. Kiñca tattha sammukhāvinayasmiṁ. Saṅghasammukhatā dhammasammukhatā
vinayasammukhatā puggalasammukhatā .pe. Evaṁ vūpasantaṁ ce bhikkhave
adhikaraṇaṁ paṭiggāhako ukkoṭeti ukkoṭanakaṁ pācittiyaṁ.
Chandadāyako khīyati khīyanakaṁ pācittiyaṁ.

[691] Siyā āpattādhikaraṇaṁ ekaṁ samathaṁ anāgamma
paṭiññātakaraṇaṁ dvīhi samathehi sammeyya sammukhāvinayena ca tiṇavatthārakena
cāti. Siyātissa vacanīyaṁ. Yathā kathaṁ viya. Idha pana bhikkhave
bhikkhūnaṁ bhaṇḍanajātānaṁ kalahajātānaṁ vivādāpannānaṁ viharataṁ bahuṁ
assāmaṇakaṁ ajjhāciṇṇaṁ hoti bhāsitaparikkantaṁ. Tatra ce
bhikkhave 1 bhikkhūnaṁ evaṁ hoti amhākaṁ kho bhaṇḍanajātānaṁ kalahajātānaṁ
vivādāpannānaṁ viharataṁ bahuṁ assāmaṇakaṁ ajjhāciṇṇaṁ bhāsitaparikkantaṁ
sace mayaṁ imāhi āpattīhi aññamaññaṁ kāressāma
siyāpi taṁ adhikaraṇaṁ kakkhaḷatāya vāḷatāya bhedāya saṁvatteyyāti.
Anujānāmi bhikkhave evarūpaṁ adhikaraṇaṁ tiṇavatthārakena vūpasametuṁ.
Evañca pana bhikkhave vūpasametabbaṁ. Sabbeheva ekajjhaṁ
sannipatitabbaṁ sannipatitvā byattena bhikkhunā paṭibalena saṅgho
ñāpetabbo suṇātu me bhante saṅgho amhākaṁ bhaṇḍanajātānaṁ
kalahajātānaṁ vivādāpannānaṁ viharataṁ bahuṁ assāmaṇakaṁ ajjhāciṇṇaṁ
bhāsitaparikkantaṁ. Sace mayaṁ imāhi āpattīhi aññamaññaṁ
kāressāma siyāpi taṁ adhikaraṇaṁ kakkhaḷatāya vāḷatāya bhedāya
1 Ma. bhikkhaveti natthi.
Saṁvatteyya. Yadi saṅghassa pattakallaṁ saṅgho imaṁ adhikaraṇaṁ
tiṇavatthārakena vūpasameyya ṭhapetvā thullavajjaṁ ṭhapetvā gihipaṭisaṁyuttanti.
Ekatopakkhikānaṁ bhikkhūnaṁ byattena bhikkhunā paṭibalena
sako pakkho ñāpetabbo suṇantu me āyasmantā amhākaṁ
bhaṇḍanajātānaṁ kalahajātānaṁ vivādāpannānaṁ viharataṁ bahuṁ assāmaṇakaṁ
ajjhāciṇṇaṁ bhāsitaparikkantaṁ. Sace mayaṁ imāhi āpattīhi
aññamaññaṁ kāressāma siyāpi taṁ adhikaraṇaṁ kakkhaḷatāya vāḷatāya
bhedāya saṁvatteyya. Yadāyasmantānaṁ pattakallaṁ ahaṁ yā ceva
āyasmantānaṁ āpatti yā ca attano āpatti āyasmantānañceva
atthāya attano ca atthāya saṅghamajjhe tiṇavatthārakena
deseyyaṁ ṭhapetvā thullavajjaṁ ṭhapetvā gihipaṭisaṁyuttanti.

[692] Athāparesaṁ ekatopakkhikānaṁ bhikkhūnaṁ byattena bhikkhunā
paṭibalena sako pakkho ñāpetabbo suṇantu me āyasmantā
amhākaṁ bhaṇḍanajātānaṁ kalahajātānaṁ vivādāpannānaṁ viharataṁ bahuṁ
assāmaṇakaṁ ajjhāciṇṇaṁ bhāsitaparikkantaṁ. Sace mayaṁ imāhi
āpattīhi aññamaññaṁ kāressāma siyāpi taṁ adhikaraṇaṁ kakkhaḷatāya
vāḷatāya bhedāya saṁvatteyya. Yadāyasmantānaṁ pattakallaṁ ahaṁ
yā ceva āyasmantānaṁ āpatti yā ca attano āpatti
āyasmantānañceva atthāya attano ca atthāya saṅghamajjhe
tiṇavatthārakena deseyyaṁ ṭhapetvā thullavajjaṁ ṭhapetvā gihipaṭisaṁyuttanti.

[693] [1]- Ekatopakkhikānaṁ bhikkhūnaṁ byattena bhikkhunā paṭibalena
saṅgho ñāpetabbo suṇātu me bhante saṅgho amhākaṁ
bhaṇḍanajātānaṁ kalahajātānaṁ vivādāpannānaṁ viharataṁ bahuṁ assāmaṇakaṁ
ajjhāciṇṇaṁ bhāsitaparikkantaṁ. Sace mayaṁ imāhi āpattīhi
aññamaññaṁ kāressāma siyāpi taṁ adhikaraṇaṁ kakkhaḷatāya vāḷatāya
bhedāya saṁvatteyya. Yadi saṅghassa pattakallaṁ ahaṁ yā ceva
imesaṁ āyasmantānaṁ āpatti yā ca attano āpatti imesañceva
āyasmantānaṁ atthāya attano ca atthāya saṅghamajjhe tiṇavatthārakena
deseyyaṁ ṭhapetvā thullavajjaṁ ṭhapetvā gihipaṭisaṁyuttaṁ. Esā
ñatti. Suṇātu me bhante saṅgho amhākaṁ bhaṇḍanajātānaṁ
kalahajātānaṁ vivādāpannānaṁ viharataṁ bahuṁ assāmaṇakaṁ ajjhāciṇṇaṁ
bhāsitaparikkantaṁ. Sace mayaṁ imāhi āpattīhi aññamaññaṁ
kāressāma siyāpi taṁ adhikaraṇaṁ kakkhaḷatāya vāḷatāya bhedāya
saṁvatteyya. Ahaṁ yā ceva imesaṁ āyasmantānaṁ āpatti yā
ca attano āpatti imesañceva āyasmantānaṁ atthāya attano
ca atthāya saṅghamajjhe tiṇavatthārakena desemi ṭhapetvā thullavajjaṁ
ṭhapetvā gihipaṭisaṁyuttaṁ. Yassāyasmato khamati amhākaṁ imāsaṁ
āpattīnaṁ saṅghamajjhe tiṇavatthārakena desanā ṭhapetvā thullavajjaṁ
ṭhapetvā gihipaṭisaṁyuttaṁ so tuṇhassa yassa nakkhamati so
bhāseyya. Desitā amhākaṁ imā āpattiyo saṅghamajjhe
1 Ma. athāparesaṁ.
Tiṇavatthārakena ṭhapetvā thullavajjaṁ ṭhapetvā gihipaṭisaṁyuttaṁ khamati
saṅghassa tasmā tuṇhī. Evametaṁ dhārayāmīti. Athāparesaṁ .pe.
Evametaṁ dhārayāmīti. Idaṁ vuccati bhikkhave adhikaraṇaṁ vūpasantaṁ.
Kena vūpasantaṁ. Sammukhāvinayena ca tiṇavatthārakena ca. Kiñca
tattha sammukhāvinayasmiṁ. Saṅghasammukhatā dhammasammukhatā vinayasammukhatā
puggalasammukhatā. Kā ca tattha saṅghasammukhatā. Yāvatikā bhikkhū
kammappattā te āgatā honti chandārahānaṁ chando āhaṭo
hoti sammukhībhūtā na paṭikkosanti ayaṁ tattha saṅghasammukhatā.
Kā ca tattha dhammasammukhatā vinayasammukhatā. Yena dhammena yena
vinayena yena satthusāsanena taṁ adhikaraṇaṁ vūpasammati ayaṁ tattha
dhammasammukhatā vinayasammukhatā. Kā ca tattha puggalasammukhatā.
Yo ca deseti yassa ca deseti ubho sammukhībhūtā honti
ayaṁ tattha puggalasammukhatā. Kiñca tattha tiṇavatthārakasmiṁ.
Yā tiṇavatthārakassa kammassa kiriyā karaṇaṁ upagamanaṁ ajjhupagamanaṁ
adhivāsanā appaṭikkosanā idaṁ tattha tiṇavatthārakasmiṁ. Evaṁ
vūpasantaṁ ce bhikkhave adhikaraṇaṁ paṭiggāhako ukkoṭeti
ukkoṭanakaṁ pācittiyaṁ. Chandadāyako khīyati khīyanakaṁ pācittiyaṁ.

[694] Kiccādhikaraṇaṁ katīhi samathehi sammati. Kiccādhikaraṇaṁ
ekena samathena sammati sammukhāvinayenāti.
Samathakkhandhakaṁ niṭṭhitaṁ catutthaṁ 1 .
------------
1 Ma. samathakkhandhako niṭṭhito catuttho.

Vinayapiṭake cullavaggassa
dutiyo bhāgo
------
khuddakavatthukkhandhakaṁ

[1] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena chabbaggiyā bhikkhū nahāyamānā
rukkhe kāyaṁ ugghaṁsenti ūrumpi bāhumpi 1 urampi piṭṭhimpi.
Manussā passitvā 2 ujjhāyanti khīyanti vipācenti kathaṁ hi nāma
samaṇā sakyaputtiyā nahāyamānā rukkhe kāyaṁ ugghaṁsessanti ūrumpi
bāhumpi urampi piṭṭhimpi seyyathāpi mallamuṭṭhikā gāmapūṭavāti 3 .
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ .pe. Athakho te bhikkhū bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe bhikkhusaṅghaṁ
sannipātāpetvā bhikkhū paṭipucchi saccaṁ kira bhikkhave chabbaggiyā
bhikkhū nahāyamānā rukkhe kāyaṁ ugghaṁsenti ūrumpi bāhumpi urampi
piṭṭhimpīti. Saccaṁ bhagavāti 4 . Vigarahi buddho bhagavā ananucchavikaṁ 5
1 Yu. bāhampi. 2 Ma. Yu. Rā. ayaṁ pāṭho natthi. 3 Ma. gāmamoddavāti.
Yu. gāmapoddavāti. 4 Yu. iti na dissati. 5 Yu. ananucchaviyaṁ.
Bhikkhave tesaṁ moghapurisānaṁ ananulomikaṁ appaṭirūpaṁ assāmaṇakaṁ
akappiyaṁ akaraṇīyaṁ kathaṁ hi nāma te bhikkhave moghapurisā nahāyamānā
rukkhe kāyaṁ ugghaṁsessanti ūrumpi bāhumpi urampi piṭṭhimpi netaṁ
bhikkhave appasannānaṁ vā pasādāya .pe. Vigarahitvā dhammiṁ kathaṁ
katvā bhikkhū āmantesi na bhikkhave nahāyamānena [1]- rukkhe kāyo
ugghaṁsetabbo yo ugghaṁseyya āpatti dukkaṭassāti.

[2] Tena kho pana samayena chabbaggiyā bhikkhū nahāyamānā
thambhe kāyaṁ ugghaṁsenti ūrumpi bāhumpi urampi piṭṭhimpi.
Manussā ujjhāyanti khīyanti vipācenti kathaṁ hi nāma samaṇā
sakyaputtiyā nahāyamānā thambhe kāyaṁ ugghaṁsessanti ūrumpi bāhumpi
urampi piṭṭhimpi seyyathāpi mallamuṭṭhikā gāmapūṭavāti. Assosuṁ
kho bhikkhū tesaṁ manussānaṁ ujjhāyantānaṁ khīyantānaṁ vipācentānaṁ
.pe. Athakho te bhikkhū bhagavato etamatthaṁ ārocesuṁ .pe.
Saccaṁ kira bhikkhave .pe. Saccaṁ bhagavāti. Vigarahitvā dhammiṁ
kathaṁ katvā bhikkhū āmantesi na bhikkhave nahāyamānena [1]- thambhe
kāyo ugghaṁsetabbo yo ugghaṁseyya āpatti dukkaṭassāti.

[3] Tena kho pana samayena chabbaggiyā bhikkhū nahāyamānā
kuḍḍe kāyaṁ ugghaṁsenti ūrumpi bāhumpi urampi piṭṭhimpi.
Manussā ujjhāyanti khīyanti vipācenti kathaṁ hi nāma samaṇā
1 Ma. Yu. bhikkhunā.
Sakyaputtiyā nahāyamānā kuḍḍe kāyaṁ ugghaṁsessanti ūrumpi bāhumpi
urampi piṭṭhimpi seyyathāpi mallamuṭṭhikā gāmapūṭavāti .pe. Na
bhikkhave nahāyamānena kuḍḍe kāyo ugghaṁsetabbo yo ugghaṁseyya
āpatti dukkaṭassāti.

[4] Tena kho pana samayena chabbaggiyā bhikkhū nahāyamānā 1
aṭṭhāne nahāyanti. Manussā ujjhāyanti khīyanti vipācenti
.pe. Seyyathāpi gihī kāmabhoginoti. Assosuṁ kho bhikkhū tesaṁ
manussānaṁ ujjhāyantānaṁ khīyantānaṁ vipācentānaṁ .pe. Athakho
te bhikkhū bhagavato etamatthaṁ ārocesuṁ .pe. Saccaṁ kira bhikkhave
.pe. Saccaṁ bhagavāti .pe. Vigarahitvā dhammiṁ kathaṁ katvā bhikkhū
āmantesi na bhikkhave nahāyamānena 1 aṭṭhāne nahāyitabbaṁ yo
nahāyeyya āpatti dukkaṭassāti.