[680] Te ce bhikkhave bhikkhū na sakkonti taṁ adhikaraṇaṁ
Ubbāhikāya vūpasametuṁ tehi bhikkhave bhikkhūhi taṁ adhikaraṇaṁ saṅghassa
niyyādetabbaṁ na mayaṁ bhante sakkoma imaṁ adhikaraṇaṁ ubbāhikāya
vūpasametuṁ saṅgho va imaṁ adhikaraṇaṁ vūpasametūti. Anujānāmi
bhikkhave evarūpaṁ adhikaraṇaṁ yebhuyyasikāya vupasametuṁ. Pañcahaṅgehi
samannāgato bhikkhu salākagāhāpako sammannitabbo yo na
chandāgatiṁ gaccheyya na dosāgatiṁ gaccheyya na mohāgatiṁ
gaccheyya na bhayāgatiṁ gaccheyya gahitāgahitañca jāneyya .pe.
Sammato saṅghena itthannāmo bhikkhu salākagāhāpako khamati
saṅghassa tasmā tuṇhī. Evametaṁ dhārayāmīti. Tena
salākagāhāpakena bhikkhunā salākā gāhāpetabbā 1 . Yathā bahutarā
bhikkhū dhammavādino vadenti tathā taṁ adhikaraṇaṁ vūpasametabbaṁ
idaṁ vuccati bhikkhave adhikaraṇaṁ vūpasantaṁ. Kena vūpasantaṁ.
Sammukhāvinayena ca yebhuyyasikāya ca. Kiñca tattha sammukhāvinayasmiṁ.
Saṅghasammukhatā dhammasammukhatā vinayasammukhatā puggalasammukhatā.
Kā ca tattha saṅghasammukhatā. Yāvatikā bhikkhū kammappattā
te āgatā honti chandārahānaṁ chando āhaṭo hoti sammukhībhūtā
na paṭikkosanti ayaṁ tattha saṅghasammukhatā. Kā ca tattha
dhammasammukhatā vinayasammukhatā. Yena dhammena yena vinayena yena
satthusāsanena taṁ adhikaraṇaṁ vūpasammati ayaṁ tattha dhammasammukhatā
1 Ma. Yu. gāhetabbā.
Vinayasammukhatā. Kā ca tattha puggalasammukhatā. Yo ca vivadati
yena ca vivadati ubho atthapaccatthikā sammukhībhūtā honti ayaṁ
tattha puggalasammukhatā. Kā ca tattha yebhuyyasikāya. Yā
yebhuyyasikāya kammassa kiriyā karaṇaṁ upagamanaṁ ajjhupagamanaṁ adhivāsanā
appaṭikkosanā ayaṁ tattha yebhuyyasikāya. Evaṁ vūpasantaṁ ce
bhikkhave adhikaraṇaṁ kārako ukkoṭeti ukkoṭanakaṁ pācittiyaṁ.
Chandadāyako khīyati khīyanakaṁ pācittiyanti.

[681] Tena kho pana samayena sāvatthiyā evaṁjātaṁ evaṁsamuppannaṁ
adhikaraṇaṁ hoti. Athakho te bhikkhū asantuṭṭhā sāvatthiyā saṅghassa
adhikaraṇavūpasamanena assosuṁ kho amukasmiṁ kira āvāse sambahulā
therā viharanti bahussutā āgatāgamā dhammadharā vinayadharā mātikādharā
paṇḍitā viyattā medhāvino lajjino kukkuccakā sikkhākāmā
te ce therā imaṁ adhikaraṇaṁ vūpasameyyuṁ dhammena vinayena
satthusāsanena evamidaṁ adhikaraṇaṁ suvūpasantaṁ assāti. Athakho te
bhikkhū taṁ āvāsaṁ gantvā te there etadavocuṁ idaṁ bhante
adhikaraṇaṁ evaṁjātaṁ evaṁsamuppannaṁ sādhu bhante therā imaṁ
adhikaraṇaṁ vūpasamentu dhammena vinayena satthusāsanena yathāyidaṁ
adhikaraṇaṁ suvūpasantaṁ assāti. Athakho te therā yathā sāvatthiyā
saṅghena adhikaraṇaṁ vūpasamitaṁ yathāsuvūpasantaṁ 1 tathā taṁ adhikaraṇaṁ
1 Ma. Yu. tathāvūpasantanti.
Vūpasamesuṁ. Athakho te bhikkhū asantuṭṭhā sāvatthiyā saṅghassa
adhikaraṇavūpasamanena asantuṭṭhā sambahulānaṁ therānaṁ adhikaraṇavūpasamanena
assosuṁ kho amukasmiṁ kira āvāse tayo therā
viharanti .pe. Dve therā viharanti .pe. Eko thero viharati
bahussuto āgatāgamo dhammadharo vinayadharo mātikādharo paṇḍito
viyatto medhāvī lajjī kukkuccako sikkhākāmo so ce thero
imaṁ adhikaraṇaṁ vūpasameyya dhammena vinayena satthusāsanena evamidaṁ
adhikaraṇaṁ suvūpasantaṁ assāti. Athakho te bhikkhū taṁ āvāsaṁ
gantvā taṁ theraṁ etadavocuṁ idaṁ bhante adhikaraṇaṁ evaṁjātaṁ
evaṁsamuppannaṁ sādhu bhante thero imaṁ adhikaraṇaṁ vūpasametu
dhammena vinayena satthusāsanena yathāyidaṁ adhikaraṇaṁ suvūpasantaṁ
assāti. Athakho so thero yathā sāvatthiyā saṅghena adhikaraṇaṁ
vūpasamitaṁ yathā sambahulehi therehi adhikaraṇaṁ vūpasamitaṁ yathā
tīhi therehi adhikaraṇaṁ vūpasamitaṁ yathā dvīhi therehi adhikaraṇaṁ
vūpasamitaṁ yathāsuvūpasantaṁ yathā taṁ adhikaraṇaṁ vūpasamesi.
Athakho te bhikkhū asantuṭṭhā sāvatthiyā saṅghassa adhikaraṇavūpasamanena
asantuṭṭhā sambahulānaṁ therānaṁ adhikaraṇavūpasamanena asantuṭṭhā
tiṇṇaṁ therānaṁ adhikaraṇavūpasamanena asantuṭṭhā dvinnaṁ therānaṁ
adhikaraṇavūpasamanena asantuṭṭhā ekassa therassa adhikaraṇavūpasamanena
yena bhagavā tenupasaṅkamiṁsu upasaṅkamitvā bhagavato etamatthaṁ
Ārocesuṁ. Nīhatametaṁ bhikkhave adhikaraṇaṁ santaṁ vūpasantaṁ suvūpasantaṁ 1 .
Anujānāmi bhikkhave tesaṁ bhikkhūnaṁ saññattiyā tayo salākagāhe
gūḷhakaṁ sakaṇṇajappakaṁ vivaṭakaṁ. Kathañca bhikkhave gūḷhako
salākagāho hoti. Tena salākagāhāpakena bhikkhunā salākāyo
vaṇṇāvaṇṇāyo katvā ekeko 2 bhikkhu upasaṅkamitvā evamassa
vacanīyo ayaṁ evaṁvādissa salākā ayaṁ evaṁvādissa salākā
yaṁ icchasi taṁ gaṇhāhīti. Gahite vattabbo mā ca kassaci
dassehīti. Sace jānāti adhammavādī bahutarāti duggahoti
paccukkaḍḍhitabbaṁ. Sace jānāti dhammavādī bahutarāti suggahoti
sāvetabbaṁ. Evaṁ kho bhikkhave gūḷhako salākagāho hoti.
Kathañca bhikkhave sakaṇṇajappako salākagāho hoti. Tena
salākagāhāpakena bhikkhunā ekamekassa bhikkhuno upakaṇṇake
ārocetabbaṁ ayaṁ evaṁvādissa salākā ayaṁ evaṁvādissa salākā
yaṁ icchasi taṁ gaṇhāhīti. Gahite vattabbo mā ca kassaci
ārocehīti. Sace jānāti adhammavādī bahutarāti duggahoti
paccukkaḍḍhitabbaṁ. Sace jānāti dhammavādī bahutarāti suggahoti
sāvetabbaṁ. Evaṁ kho bhikkhave sakaṇṇajappako salākagāho
hoti. Kathañca bhikkhave vivaṭako salākagāho hoti. Sace
jānāti dhammavādī bahutarāti vissaṭṭheneva vivaṭena salākagāhena
1 Ma. Yu. suvūpasantanti. 2 Ma. Yu. ekameko.
Gāhetabbā 1 evaṁ kho bhikkhave vivaṭako salākagāho hoti
ime kho bhikkhave tayo salākagāhāti.

[682] Anuvādādhikaraṇaṁ katīhi samathehi sammati. Anuvādādhikaraṇaṁ
catūhi samathehi sammati sammukhāvinayena ca sativinayena ca amūḷhavinayena
ca tassapāpiyasikāya ca.

[683] Siyā anuvādādhikaraṇaṁ dve samathe anāgamma amūḷhavinayañca
tassapāpiyasikañca dvīhi samathehi sammeyya sammukhāvinayena
ca sativinayena cāti. Siyātissa vacanīyaṁ. Yathā kathaṁ viya.
Idha pana bhikkhave 2 bhikkhū bhikkhuṁ amūlikāya sīlavipattiyā anuddhaṁsenti.
Tassa kho taṁ bhikkhave bhikkhuno sativepullappattassa sativinayo
dātabbo. Evañca pana bhikkhave dātabbo. Tena bhikkhave
bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā .pe.
Evamassa vacanīyo maṁ bhante bhikkhū amūlikāya sīlavipattiyā
anuddhaṁsenti sohaṁ bhante sativepullappatto saṅghaṁ sativinayaṁ
yācāmīti. Dutiyampi yācitabbo tatiyampi yācitabbo.

[684] Byattena bhikkhunā paṭibalena saṅgho ñāpetabbo
suṇātu me bhante saṅgho bhikkhū itthannāmaṁ bhikkhuṁ amūlikāya
sīlavipattiyā anuddhaṁsenti. So sativepullappatto saṅghaṁ sativinayaṁ
yācati. Yadi saṅghassa pattakallaṁ saṅgho itthannāmassa bhikkhuno
1 Ma. Yu. visattheneva vivaṭena gāhetabbo. 2 Ma. Yu. bhikkhaveti natthi.
Sativepullappattassa sativinayaṁ dadeyya. Esā ñatti. Suṇātu
me bhante saṅgho bhikkhū itthannāmaṁ bhikkhuṁ amūlikāya sīlavipattiyā
anuddhaṁsenti. So sativepullappatto saṅghaṁ sativinayaṁ yācati.
Saṅgho itthannāmassa bhikkhuno sativepullappattassa sativinayaṁ deti.
Yassāyasmato khamati itthannāmassa bhikkhuno sativepullappattassa
sativinayassa dānaṁ so tuṇhassa yassa nakkhamati so bhāseyya.
Dutiyampi etamatthaṁ vadāmi .pe. Tatiyampi etamatthaṁ vadāmi .pe.
Dinno saṅghena itthannāmassa bhikkhuno sativepullappattassa sativinayo
khamati saṅghassa tasmā tuṇhī. Evametaṁ dhārayāmīti. Idaṁ
vuccati bhikkhave adhikaraṇaṁ vūpasantaṁ. Kena vūpasantaṁ. Sammukhāvinayena
ca sativinayena ca. Kiñca tattha sammukhāvinayasmiṁ. Saṅghasammukhatā
dhammasammukhatā vinayasammukhatā puggalasammukhatā .pe. Kā ca tattha
puggalasammukhatā. Yo ca anuvadati yañca anuvadati ubho
sammukhībhūtā honti ayaṁ tattha puggalasammukhatā. Kiñca tattha
sativinayasmiṁ. Yā sativinayassa kammassa kiriyā karaṇaṁ upagamanaṁ
ajjhupagamanaṁ adhivāsanā appaṭikkosanā idaṁ tattha sativinayasmiṁ.
Evaṁ vūpasantaṁ ce bhikkhave adhikaraṇaṁ kārako ukkoṭeti ukkoṭanakaṁ
pācittiyaṁ. Chandadāyako khīyati khīyanakaṁ pācittiyaṁ.

[685] Siyā anuvādādhikaraṇaṁ dve samathe anāgamma sativinayañca
tassapāpiyasikañca dvīhi samathehi sammeyya sammukhāvinayena ca
Amūḷhavinayena cāti. Siyātissa vacanīyaṁ. Yathā kathaṁ viya.
Idha pana bhikkhave bhikkhu ummattako hoti cittavipariyāsakato tena
ummattakena cittavipariyāsakatena bahuṁ assāmaṇakaṁ ajjhāciṇṇaṁ
hoti bhāsitaparikkantaṁ. Taṁ bhikkhū ummattakena cittavipariyāsakatena
ajjhāciṇṇena āpattiyā codenti saratāyasmā evarūpiṁ āpattiṁ
āpajjitāti. So evaṁ vadeti ahaṁ kho āvuso ummattako
ahosiṁ cittavipariyāsakato tena me ummattakena cittavipariyāsakatena
bahuṁ assāmaṇakaṁ ajjhāciṇṇaṁ bhāsitaparikkantaṁ nāhantaṁ sarāmi
mūḷhena me etaṁ katanti. Evaṁpi naṁ vuccamānā codenteva
saratāyasmā evarūpiṁ āpattiṁ āpajjitāti. Tassa kho bhikkhave
bhikkhuno amūḷhassa amūḷhavinayo dātabbo. Evañca pana
bhikkhave dātabbo. Tena bhikkhave bhikkhunā saṅghaṁ upasaṅkamitvā
ekaṁsaṁ uttarāsaṅgaṁ karitvā .pe. Evamassa vacanīyo ahaṁ
bhante ummattako ahosiṁ cittavipariyāsakato tena me ummattakena
cittavipariyāsakatena bahuṁ assāmaṇakaṁ ajjhāciṇṇaṁ bhāsitaparikkantaṁ
maṁ bhikkhū ummattakena cittavipariyāsakatena ajjhāciṇṇena āpattiyā
codenti saratāyasmā evarūpiṁ āpattiṁ āpajjitāti tyāhaṁ evaṁ
vadāmi ahaṁ kho āvuso ummattako ahosiṁ cittavipariyāsakato
tena me ummattakena cittavipariyāsakatena bahuṁ assāmaṇakaṁ
ajjhāciṇṇaṁ bhāsitaparikkantaṁ nāhantaṁ sarāmi muḷhena me etaṁ
Katanti. Evaṁpi maṁ vuccamānā codenteva saratāyasmā evarūpiṁ
āpattiṁ āpajjitāti. Sohaṁ bhante amūḷho saṅghaṁ amūḷhavinayaṁ
yācāmīti. Dutiyampi yācitabbo tatiyampi yācitabbo.

[686] Byattena bhikkhunā paṭibalena saṅgho ñāpetabbo suṇātu
me bhante saṅgho ayaṁ itthannāmo bhikkhu ummattako ahosi
cittavipariyāsakato tena ummattakena cittavipariyāsakatena bahuṁ
assāmaṇakaṁ ajjhāciṇṇaṁ bhāsitaparikkantaṁ. Taṁ bhikkhū ummattakena
cittavipariyāsakatena ajjhāciṇṇena āpattiyā codenti saratāyasmā
evarūpiṁ āpattiṁ āpajjitāti. So evaṁ vadeti ahaṁ
kho āvuso ummattako ahosiṁ cittavipariyāsakato tena me
ummattakena cittavipariyāsakatena bahuṁ assāmaṇakaṁ ajjhāciṇṇaṁ
bhāsitaparikkantaṁ nāhantaṁ sarāmi mūḷhena me etaṁ katanti.
Evaṁpi naṁ vuccamānā codenteva saratāyasmā evarūpiṁ āpattiṁ
āpajjitāti. So amūḷho saṅghaṁ amūḷhavinayaṁ yācati. Yadi
saṅghassa pattakallaṁ saṅgho itthannāmassa bhikkhuno amūḷhassa
amūḷhavinayaṁ dadeyya. Esā ñatti. Suṇātu me bhante saṅgho
ayaṁ itthannāmo bhikkhu ummattako ahosi cittavipariyāsakato
tena ummattakena cittavipariyāsakatena bahuṁ assāmaṇakaṁ ajjhāciṇṇaṁ
bhāsitaparikkantaṁ. Taṁ bhikkhū ummattakena cittavipariyāsakatena
ajjhāciṇṇena āpattiyā codenti saratāyasmā evarūpiṁ āpattiṁ
Āpajjitāti. So evaṁ vadeti ahaṁ kho āvuso ummattako
ahosiṁ cittavipariyāsakato tena me ummattakena cittavipariyāsakatena
bahuṁ assāmaṇakaṁ ajjhāciṇṇaṁ bhāsitaparikkantaṁ nāhantaṁ
sarāmi mūḷhena me etaṁ katanti. Evaṁpi naṁ vuccamānā
codenteva saratāyasmā evarūpiṁ āpattiṁ āpajjitāti. So
amūḷho saṅghaṁ amūḷhavinayaṁ yācati. Saṅgho itthannāmassa bhikkhuno
amūḷhassa amūḷhavinayaṁ deti. Yassāyasmato khamati itthannāmassa
bhikkhuno amūḷhassa amūḷhavinayassa dānaṁ so tuṇhassa yassa
nakkhamati so bhāseyya. Dutiyampi etamatthaṁ vadāmi .pe.
Tatiyampi etamatthaṁ vadāmi .pe. Dinno saṅghena itthannāmassa
bhikkhuno amūḷhassa amūḷhavinayo khamati saṅghassa tasmā
tuṇhī. Evametaṁ dhārayāmīti. Idaṁ vuccati bhikkhave adhikaraṇaṁ
vūpasantaṁ. Kena vūpasantaṁ. Sammukhāvinayena ca amūḷhavinayena
ca. Kiñca tattha sammukhāvinayasmiṁ. Saṅghasammukhatā dhammasammukhatā
vinayasammukhatā puggalasammukhatā .pe. Kiñca tattha amūḷhavinayasmiṁ.
Yā amūḷhavinayassa kammassa kiriyā karaṇaṁ upagamanaṁ ajjhupagamanaṁ
adhivāsanā appaṭikkosanā idaṁ tattha amūḷhavinayasmiṁ. Evaṁ
vūpasantaṁ ce bhikkhave adhikaraṇaṁ kārako ukkoṭeti ukkoṭanakaṁ
pācittiyaṁ. Chandadāyako khīyati khīyanakaṁ pācittiyaṁ.

[687] Siyā anuvādādhikaraṇaṁ dve samathe anāgamma sativinayañca
Amūḷhavinayañca dvīhi samathehi sammeyya sammukhāvinayena ca
tassapāpiyasikāya cāti. Siyātissa vacanīyaṁ. Yathā kathaṁ viya. Idha
pana bhikkhave bhikkhu bhikkhuṁ saṅghamajjhe garukāya āpattiyā codeti
saratāyasmā evarūpiṁ garukaṁ āpattiṁ āpajjitā pārājikaṁ vā
pārājikasāmantaṁ vāti. So evaṁ vadeti na kho ahaṁ āvuso
sarāmi evarūpiṁ garukaṁ āpattiṁ āpajjitā pārājikaṁ vā pārājikasāmantaṁ
vāti. Tamenaṁ so niveṭhentaṁ 1 ativeṭheti iṅghāyasmā
sādhukameva jānāhi yadi sarasi evarūpiṁ garukaṁ āpattiṁ āpajjitā
pārājikaṁ vā pārājikasāmantaṁ vāti. So evaṁ vadeti na kho
ahaṁ āvuso sarāmi evarūpiṁ garukaṁ āpattiṁ āpajjitā pārājikaṁ
vā pārājikasāmantaṁ vā sarāmi ca kho ahaṁ āvuso evarūpiṁ
appamattakaṁpi āpattiṁ āpajjitāti. Tamenaṁ so niveṭhentaṁ ativeṭheti
iṅghāyasmā sādhukameva jānāhi yadi sarasi evarūpiṁ garukaṁ āpattiṁ
āpajjitā pārājikaṁ vā pārājikasāmantaṁ vāti. So evaṁ
vadeti imaṁ hi nāmāhaṁ āvuso appamattakaṁpi 2 āpattiṁ āpajjitā 3
apuṭṭho paṭijānissāmi kiṁ panāhaṁ evarūpiṁ garukaṁ āpattiṁ āpajjitā
pārājikaṁ vā pārājikasāmantaṁ vā puṭṭho na paṭijānissāmīti.
So evaṁ vadeti imaṁ hi nāma tvaṁ āvuso appamattakaṁpi
āpattiṁ āpajjitā apuṭṭho na paṭijānissasi kiṁ pana tvaṁ
1 Ma. Yu. nibbeṭhentaṁ. 2 Ma. Yu. appamattakaṁ. 3 Ma. Yu. āpajjitvā.
Evarūpiṁ garukaṁ āpattiṁ āpajjitā pārājikaṁ vā pārājikasāmantaṁ
vā apuṭṭho paṭijānissasi iṅghāyasmā sādhukameva jānāhi yadi
sarasi evarūpiṁ garukaṁ āpattiṁ āpajjitā pārājikaṁ vā pārājikasāmantaṁ
vāti. So evaṁ vadeti 1 sarāmi kho ahaṁ āvuso evarūpiṁ
garukaṁ āpattiṁ āpajjitā pārājikaṁ vā pārājikasāmantaṁ vā davā
me etaṁ vuttaṁ ravā me etaṁ vuttaṁ nāhantaṁ sarāmi evarūpiṁ
garukaṁ āpattiṁ āpajjitā pārājikaṁ vā pārājikasāmantaṁ vāti.
Tassa khvetaṁ 2 bhikkhave bhikkhuno tassapāpiyasikākammaṁ kātabbaṁ.

[688] Evañca pana bhikkhave kātabbaṁ. Byattena bhikkhunā
paṭibalena saṅgho ñāpetabbo suṇātu me bhante saṅgho ayaṁ
itthannāmo bhikkhu saṅghamajjhe garukāya āpattiyā anuyuñjiyamāno
avajānitvā paṭijānāti paṭijānitvā avajānāti aññena aññaṁ
paṭicarati sampajānamusā bhāsati. Yadi saṅghassa pattakallaṁ
saṅgho itthannāmassa bhikkhuno tassapāpiyasikākammaṁ kareyya.
Esā ñatti. Suṇātu me bhante saṅgho ayaṁ itthannāmo
bhikkhu saṅghamajjhe garukāya āpattiyā anuyuñjiyamāno avajānitvā
paṭijānāti paṭijānitvā avajānāti aññena aññaṁ paṭicarati
sampajānamusā bhāsati. Saṅgho itthannāmassa bhikkhuno tassapāpiyasikākammaṁ
1 Ma. vadesi. 2 Ma. kho taṁ. Yu. kho.
Karoti. Yassāyasmato khamati itthannāmassa bhikkhuno
tassapāpiyasikākammassa karaṇaṁ so tuṇhassa yassa nakkhamati so
bhāseyya. Dutiyampi etamatthaṁ vadāmi .pe. Tatiyampi etamatthaṁ
vadāmi .pe. Kataṁ saṅghena itthannāmassa bhikkhuno tassapāpiyasikākammaṁ
khamati saṅghassa tasmā tuṇhī. Evametaṁ dhārayāmīti idaṁ
vuccati bhikkhave adhikaraṇaṁ vūpasantaṁ. Kena vūpasantaṁ. Sammukhāvinayena
ca tassapāpiyasikāya ca. Kiñca tattha sammukhāvinayasmiṁ. Saṅghasammukhatā
dhammasammukhatā vinayasammukhatā puggalasammukhatā .pe. Kā ca tattha
tassapāpiyasikāya. Yā tassapāpiyasikāya kammassa kiriyā karaṇaṁ
upagamanaṁ ajjhupagamanaṁ adhivāsanā appaṭikkosanā ayaṁ tattha tassapāpiyasikāya.
Evaṁ vūpasantaṁ ce bhikkhave adhikaraṇaṁ kārako ukkoṭeti
ukkoṭanakaṁ pācittiyaṁ. Chandadāyako khīyati khīyanakaṁ pācittiyaṁ.

[689] Āpattādhikaraṇaṁ katīhi samathehi sammati. Āpattādhikaraṇaṁ
tīhi samathehi sammati sammukhāvinayena ca paṭiññātakaraṇena ca
tiṇavatthārakena ca.