[1427] Na vattabbaṁ samādānahetukaṁ sīlaṁ vaḍḍhatīti. Āmantā.
Nanu vuttaṁ bhagavatā ārāmaropā vanaropā .pe. Dhammaṭṭhā
sīlasampannā te janā saggagāminoti attheva suttantoti.
Āmantā. Tena hi samādānahetukaṁ sīlaṁ vaḍḍhatīti.
Samādānahetukakathā.
----------
Viññatti sīlantikathā

[1428] Viññatti sīlanti. Āmantā. Pāṇātipātā
veramaṇīti. Na hevaṁ vattabbe .pe. Adinnādānā veramaṇīti.
Na hevaṁ vattabbe .pe. Kāmesumicchācārā veramaṇīti. Na hevaṁ
Vattabbe .pe. Musāvādā veramaṇīti. Na hevaṁ vattabbe .pe.
Surāmerayamajjapamādaṭṭhānā veramaṇīti. Na hevaṁ vattabbe .pe.
Abhivādanaṁ sīlaṁ paccuṭṭhānaṁ sīlaṁ añjalīkammaṁ sīlaṁ sāmīcikammaṁ
sīlaṁ āsanābhihāro sīlaṁ seyyābhihāro sīlaṁ pādodakābhihāro
sīlaṁ pādakathalikābhihāro sīlaṁ nhāne piṭṭhiparikammaṁ sīlanti.
Āmantā. Pāṇātipātā veramaṇīti. Na hevaṁ vattabbe .pe.
Surāmerayamajjapamādaṭṭhānā veramaṇīti. Na hevaṁ vattabbe .pe.

[1429] Na vattabbaṁ viññatti sīlanti. Āmantā. Dussīlyanti.
Na hevaṁ vattabbe .pe. Tena hi viññatti sīlanti.
Viññatti sīlantikathā.
----------
Aviññatti dussīlyantikathā

[1430] Aviññatti dussīlyanti. Āmantā. Pāṇātipātoti.
Na hevaṁ vattabbe .pe. Adinnādānanti. Na hevaṁ
vattabbe .pe. Kāmesumicchācāroti. Na hevaṁ vattabbe .pe.
Musāvādoti. Na hevaṁ vattabbe .pe. Surāmerayamajjapamādaṭṭhānanti.
Na hevaṁ vattabbe .pe. Pāpakammaṁ samādiyitvā dānaṁ
dadantassa puññañca apuññañca ubho vaḍḍhantīti. Na hevaṁ
vattabbe .pe. Puññañca apuññañca ubho vaḍḍhantīti.
Āmantā. Dvinnaṁ phassānaṁ .pe. Dvinnaṁ cittānaṁ samodhānaṁ
hotīti. Na hevaṁ vattabbe .pe. Dvinnaṁ phassānaṁ .pe. Dvinnaṁ
cittānaṁ samodhānaṁ hotīti. Āmantā. Kusalākusalā sāvajjānavajjā
hīnappaṇītā kaṇhasukkasappaṭibhāgā dhammā sammukhībhāvaṁ
āgacchantīti. Na hevaṁ vattabbe .pe. Kusalākusalā sāvajjānavajjā
hīnappaṇītā kaṇhasukkasappaṭibhāgā dhammā sammukhībhāvaṁ
āgacchantīti. Āmantā. Nanu vuttaṁ bhagavatā cattārīmāni
bhikkhave suvidūravidūrāni. Katamāni cattāri. Nabhañca bhikkhave paṭhavī
ca idaṁ paṭhamaṁ suvidūravidūraṁ .pe. Tasmā sataṁ dhammo asabbhi
ārakāti attheva suttantoti. Āmantā. Tena hi na vattabbaṁ
kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhāvaṁ āgacchantīti. Pāpakammaṁ samādiyitvā cīvaraṁ
dadantassa piṇḍapātaṁ dadantassa senāsanaṁ dadantassa gilānapaccayabhesajjaparikkhāraṁ
dadantassa abhivādanārahassa abhivādentassa paccuṭṭhānārahassa
paccuṭṭhentassa añjalīkammārahassa añjalīkammaṁ karontassa
sāmīcikammārahassa sāmīcikammaṁ karontassa āsanārahassa āsanaṁ
dadantassa maggārahassa maggaṁ dadantassa puññañca apuññañca
ubho vaḍḍhantīti. Na hevaṁ vattabbe .pe. Puññañca apuññañca
ubho vaḍḍhantīti. Āmantā. Dvinnaṁ phassānaṁ .pe. Dvinnaṁ
cittānaṁ samodhānaṁ hotīti. Na hevaṁ vattabbe .pe. Dvinnaṁ
Phassānaṁ .pe. Dvinnaṁ cittānaṁ samodhānaṁ hotīti. Āmantā.
Kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhāvaṁ āgacchantīti. Na hevaṁ vattabbe .pe.
Kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhāvaṁ āgacchantīti. Āmantā. Nanu vuttaṁ bhagavatā
cattārīmāni bhikkhave suvidūravidūrāni. Katamāni cattāri. Nabhañca
bhikkhave paṭhavī ca idaṁ paṭhamaṁ suvidūravidūraṁ .pe. Tasmā sataṁ dhammo
asabbhi ārakāti attheva suttantoti. Āmantā. Tena hi
na vattabbaṁ kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhāvaṁ āgacchantīti.

[1431] Na vattabbaṁ aviññatti dussīlyanti. Āmantā.
Nanu pāpakammaṁ samādinno āsīti. Āmantā. Hañci pāpakammaṁ
samādinno āsi tena vata re vattabbe aviññatti dussīlyanti.
Aviññatti dussīlyantikathā.
Dasamo vaggo.
Tassa uddānaṁ
maggasamaṅgissa rūpaṁ maggo pañcaviññāṇasamaṅgissa atthi
maggabhāvanā pañcaviññāṇā kusalāpi akusalāpi pañcaviññāṇā
sābhogā maggasamaṅgī dvīhi sīlehi samannāgato
sīlaṁ acetasikaṁ sīlaṁ na cittānuparivatti samādānahetukaṁ
Sīlaṁ vaḍḍhati viññatti sīlaṁ aviññatti dussīlyanti.
Dutiyapaṇṇāsako.
Niyāmasaṅgahagatānisaṁsatā atthi pañcavokārabhavo
nirodho maggasamaṅgissa pañcavokārabhavoti.
------------
Tissopi anusayakathā

[1432] Anusayā abyākatāti. Āmantā. Vipākābyākatā
kiriyābyākatā rūpaṁ nibbānaṁ cakkhāyatanaṁ .pe. Phoṭṭhabbāyatananti.
Na hevaṁ vattabbe .pe.

[1433] Kāmarāgānusayo abyākatoti. Āmantā. Kāmarāgo
kāmarāgapariyuṭṭhānaṁ kāmarāgasaññojanaṁ kāmogho kāmayogo kāmacchandanīvaraṇaṁ
abyākatanti. Na hevaṁ vattabbe .pe. Kāmarāgo
kāmarāgapariyuṭṭhānaṁ .pe. Kāmacchandanīvaraṇaṁ akusalanti. Āmantā.
Kāmarāgānusayo akusaloti. Na hevaṁ vattabbe .pe.

[1434] Paṭighānusayo abyākatoti. Āmantā. Paṭighaṁ paṭighapariyuṭṭhānaṁ
paṭighasaññojanaṁ abyākatanti. Na hevaṁ vattabbe .pe.
Paṭighaṁ paṭighapariyuṭṭhānaṁ paṭighasaññojanaṁ akusalanti. Āmantā.
Paṭighānusayo akusaloti. Na hevaṁ vattabbe .pe.

[1435] Mānānusayo abyākatoti. Āmantā. Māno
Mānapariyuṭṭhānaṁ mānasaññojanaṁ abyākatanti. Na hevaṁ vattabbe .pe.
Māno mānapariyuṭṭhānaṁ mānasaññojanaṁ akusalanti. Āmantā.
Mānānusayo akusaloti. Na hevaṁ vattabbe .pe.

[1436] Diṭṭhānusayo abyākatoti. Āmantā. Diṭṭhi diṭṭhogho
diṭṭhiyogo diṭṭhipariyuṭṭhānaṁ diṭṭhisaññojanaṁ abyākatanti. Na hevaṁ
vattabbe .pe. Diṭṭhi diṭṭhogho diṭṭhiyogo diṭṭhipariyuṭṭhānaṁ diṭṭhisaññojanaṁ.
Akusalanti. Āmantā. Diṭṭhānusayo akusaloti.
Na hevaṁ vattabbe .pe.