[1417] Na vattabbaṁ sīlaṁ acetasikanti. Āmantā. Sīle
uppajjitvā niruddhe dussīlo hotīti. Na hevaṁ vattabbe .pe.
Tena hi sīlaṁ acetasikanti.
Sīlaṁ acetasikantikathā.
---------
Sīlaṁ nacittānuparivattītikathā

[1418] Sīlaṁ na cittānuparivattīti. Āmantā. Rūpaṁ nibbānaṁ
cakkhāyatanaṁ .pe. Phoṭṭhabbāyatananti. Na hevaṁ vattabbe .pe. Sīlaṁ
na cittānuparivattīti. Āmantā. Phasso na cittānuparivattīti.
Na hevaṁ vattabbe .pe. Sīlaṁ na cittānuparivattīti. Āmantā.
Vedanā .pe. Saññā .pe. Cetanā .pe. Saddhā viriyaṁ sati
samādhi .pe. Paññā na cittānuparivattīti. Na hevaṁ vattabbe .pe.

[1419] Phasso cittānuparivattīti. Āmantā. Sīlaṁ cittānuparivattīti
na hevaṁ vattabbe .pe. Vedanā .pe. Saññā
Cetanā saddhā viriyaṁ sati samādhi .pe. Paññā cittānuparivattīti.
Āmantā. Sīlaṁ cittānuparivattīti. Na hevaṁ vattabbe .pe.

[1420] Sammāvācā na cittānuparivattīti. Āmantā.
Sammādiṭṭhi na cittānuparivattīti. Na hevaṁ vattabbe .pe.
Sammāvācā na cittānuparivattīti. Āmantā. Sammāsaṅkappo
.pe. Sammāvāyāmo .pe. Sammāsati .pe. Sammāsamādhi na
cittānuparivattīti. Na hevaṁ vattabbe .pe. Sammākammanto
.pe. Sammāājīvo na cittānuparivattīti. Āmantā. Sammādiṭṭhi
na cittānuparivattīti. Na hevaṁ vattabbe .pe. Sammāājīvo
na cittānuparivattīti. Āmantā. Sammāsaṅkappo .pe. Sammāvāyāmo
.pe. Sammāsati .pe. Sammāsamādhi na cittānuparivattīti.
Na hevaṁ vattabbe .pe.

[1421] Sammādiṭṭhi cittānuparivattīti. Āmantā. Sammāvācā
cittānuparivattīti. Na hevaṁ vattabbe .pe. Sammādiṭṭhi cittānuparivattīti.
Āmantā. Sammākammanto .pe. Sammāājīvo
cittānuparivattīti. Na hevaṁ vattabbe .pe.

[1422] Sammāsaṅkappo .pe. Sammāvāyāmo .pe. Sammāsati
.pe. Sammāsamādhi cittānuparivattīti. Āmantā. Sammāvācā
cittānuparivattīti. Na hevaṁ vattabbe .pe. Sammāsamādhi cittānuparivattīti.
Āmantā. Sammākammanto .pe. Sammāājīvo
Cittānuparivattīti. Na hevaṁ vattabbe .pe.

[1423] Na vattabbaṁ sīlaṁ na cittānuparivattīti. Āmantā.
Sīle uppajjitvā niruddhe dussīlo hotīti. Na hevaṁ vattabbe .pe.
Tena hi sīlaṁ na cittānuparivattīti.
Sīlaṁ nacittānuparivattītikathā.
-----------
Samādānahetukakathā

[1424] Samādānahetukaṁ sīlaṁ vaḍḍhatīti. Āmantā. Samādānahetuko
phasso vaḍḍhati vedanā vaḍḍhati saññā vaḍḍhati cetanā
vaḍḍhati cittaṁ vaḍḍhati saddhā vaḍḍhati viriyaṁ vaḍḍhati sati vaḍḍhati
samādhi vaḍḍhati paññā vaḍḍhatīti. Na hevaṁ vattabbe .pe.

[1425] Samādānahetukaṁ sīlaṁ vaḍḍhatīti. Āmantā. Latā viya
vaḍḍhati māluvā viya vaḍḍhati rukkho viya vaḍḍhati tiṇaṁ viya
vaḍḍhati muñjapuñjo viya vaḍḍhatīti. Na hevaṁ vattabbe .pe.

[1426] Samādānahetukaṁ sīlaṁ vaḍḍhatīti. Āmantā. Sīlaṁ
samādiyitvā kāmavitakkaṁ vitakkentassa byāpādavitakkaṁ vitakkentassa
vihiṁsāvitakkaṁ vitakkentassa sīlaṁ vaḍḍhatīti. Āmantā. Dvinnaṁ
phassānaṁ .pe. Dvinnaṁ cittānaṁ samodhānaṁ hotīti. Na hevaṁ
vattabbe .pe. Dvinnaṁ phassānaṁ .pe. Dvinnaṁ cittānaṁ samodhānaṁ
Hotīti. Āmantā. Kusalākusalā sāvajjānavajjā hīnappaṇītā
kaṇhasukkasappaṭibhāgā dhammā sammukhībhāvaṁ āgacchantīti. Na hevaṁ
vattabbe .pe. Kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhāvaṁ āgacchantīti. Āmantā.
Nanu vuttaṁ bhagavatā cattārīmāni bhikkhave suvidūravidūrāni. Katamāni
cattāri. Nabhañca bhikkhave paṭhavī ca idaṁ paṭhamaṁ suvidūravidūraṁ .pe.
Tasmā sataṁ dhammo asabbhi ārakāti attheva suttantoti. Āmantā.
Tena hi na vattabbaṁ kusalākusalā sāvajjānavajjā hīnappaṇītā
kaṇhasukkasappaṭibhāgā dhammā sammukhībhāvaṁ āgacchantīti.