[1397] Cakkhuviññāṇaṁ sābhoganti. Āmantā. Cakkhuviññāṇaṁ
suññataṁ ārabbha uppajjatīti. Na hevaṁ vattabbe
.pe. Cakkhuviññāṇaṁ suññataṁ ārabbha uppajjatīti. Āmantā.
Cakkhuñca paṭicca suññatañca uppajjati cakkhuviññāṇanti. Na
hevaṁ vattabbe .pe. Cakkhuñca paṭicca suññatañca uppajjati
cakkhuviññāṇanti. Āmantā. Cakkhuñca paṭicca suññatañca
uppajjati cakkhuviññāṇanti attheva suttantoti. Natthi.
Cakkhuñca paṭicca rūpe ca uppajjati cakkhuviññāṇanti attheva
suttantoti. Āmantā. Hañci cakkhuñca paṭicca rūpe ca
uppajjati cakkhuviññāṇanti attheva suttanto no vata re
vattabbe cakkhuñca paṭicca suññatañca uppajjati cakkhuviññāṇanti.

[1398] Cakkhuviññāṇaṁ sābhoganti. Āmantā. Cakkhuviññāṇaṁ
Atītānāgataṁ ārabbha uppajjatīti. Na hevaṁ vattabbe
.pe. Cakkhuviññāṇaṁ sābhoganti. Āmantā. Cakkhuviññāṇaṁ
phassaṁ ārabbha .pe. Phoṭṭhabbaṁ ārabbha uppajjatīti. Na hevaṁ
vattabbe .pe. Manoviññāṇaṁ sābhogaṁ manoviññāṇaṁ suññataṁ
ārabbha uppajjatīti. Āmantā. Cakkhuviññāṇaṁ sābhogaṁ
cakkhuviññāṇaṁ suññataṁ ārabbha uppajjatīti. Na hevaṁ vattabbe
.pe. Manoviññāṇaṁ sābhogaṁ manoviññāṇaṁ atītānāgataṁ ārabbha
uppajjatīti. Āmantā. Cakkhuviññāṇaṁ sābhogaṁ cakkhuviññāṇaṁ
atītānāgataṁ ārabbha uppajjatīti. Na hevaṁ vattabbe .pe.
Manoviññāṇaṁ sābhogaṁ manoviññāṇaṁ phassaṁ ārabbha .pe.
Phoṭṭhabbaṁ ārabbha uppajjatīti. Āmantā. Cakkhuviññāṇaṁ
sābhogaṁ cakkhuviññāṇaṁ phassaṁ ārabbha .pe. Phoṭṭhabbaṁ ārabbha
uppajjatīti. Na hevaṁ vattabbe .pe.

[1399] Na vattabbaṁ pañcaviññāṇā sābhogāti. Āmantā. Nanu
vuttaṁ bhagavatā idha bhikkhave bhikkhu cakkhunā rūpaṁ disvā nimittaggāhī
hoti .pe. Na nimittaggāhī hoti .pe. Kāyena phoṭṭhabbaṁ
phusitvā nimittaggāhī hoti .pe. Na nimittaggāhī hotīti attheva
suttantoti. Āmantā. Tena hi pañcaviññāṇā sābhogāti .pe.
Pañcaviññāṇā sābhogātikathā.
--------------
Dvīhi sīlehi samannāgatotikathā

[1400] Maggasamaṅgī dvīhi sīlehi samannāgatoti. Āmantā.
Maggasamaṅgī dvīhi phassehi dvīhi vedanāhi dvīhi saññāhi dvīhi
cetanāhi dvīhi cittehi dvīhi saddhāhi dvīhi viriyehi dvīhi satīhi dvīhi
samādhīhi dvīhi paññāhi samannāgatoti. Na hevaṁ vattabbe .pe.

[1401] Maggasamaṅgī lokiyena sīlena samannāgatoti. Āmantā.
Maggasamaṅgī lokiyena phassena lokiyāya vedanāya lokiyāya saññāya
lokiyāya cetanāya lokiyena cittena lokiyāya saddhāya lokiyena
viriyena lokiyāya satiyā lokiyena samādhinā lokiyāya paññāya
samannāgatoti. Na hevaṁ vattabbe .pe.

[1402] Maggasamaṅgī lokiyena ca lokuttarena ca sīlena
samannāgatoti. Āmantā. Maggasamaṅgī lokiyena ca lokuttarena
ca phassena samannāgato .pe. Lokiyāya ca lokuttarāya ca
paññāya samannāgatoti. Na hevaṁ vattabbe .pe. Maggasamaṅgī
lokiyena sīlena samannāgatoti. Āmantā. Maggasamaṅgī puthujjanoti.
Na hevaṁ vattabbe .pe.

[1403] Maggasamaṅgī lokiyāya sammāvācāya samannāgatoti.
Āmantā. Maggasamaṅgī lokiyāya sammādiṭṭhiyā samannāgatoti.
Na hevaṁ vattabbe .pe. Maggasamaṅgī lokiyāya sammāvācāya
Samannāgatoti. Āmantā. Maggasamaṅgī lokiyena sammāsaṅkappena
.pe. Lokiyena sammāvāyāmena .pe. Lokiyāya sammāsatiyā
.pe. Lokiyena sammāsamādhinā samannāgatoti. Na hevaṁ vattabbe
.pe. Maggasamaṅgī lokiyena sammākammantena .pe. Lokiyena
sammāājīvena samannāgatoti. Āmantā. Maggasamaṅgī lokiyāya
sammādiṭṭhiyā .pe. Lokiyena sammāsamādhinā samannāgatoti.
Na hevaṁ vattabbe .pe.

[1404] Maggasamaṅgī lokiyāya ca lokuttarāya ca sammāvācāya
samannāgatoti. Āmantā. Maggasamaṅgī lokiyāya ca lokuttarāya
ca sammādiṭṭhiyā samannāgatoti. Na hevaṁ vattabbe .pe.
Maggasamaṅgī lokiyāya ca lokuttarāya ca sammāvācāya samannāgatoti.
Āmantā. Maggasamaṅgī lokiyena ca lokuttarena ca sammāsaṅkappena
.pe. Lokiyena ca lokuttarena ca sammāvāyāmena .pe. Lokiyāya
ca lokuttarāya ca sammāsatiyā .pe. Lokiyena ca lokuttarena ca
sammāsamādhinā samannāgatoti. Na hevaṁ vattabbe .pe. Maggasamaṅgī
lokiyena ca lokuttarena ca sammākammantena .pe.

[1405] Maggasamaṅgī lokiyena ca lokuttarena ca sammāājīvena
samannāgatoti. Āmantā. Maggasamaṅgī lokiyāya ca lokuttarāya
ca sammādiṭṭhiyā samannāgatoti. Na hevaṁ vattabbe .pe.
Maggasamaṅgī lokiyena ca lokuttarena ca sammāājīvena samannāgatoti.
Āmantā. Maggasamaṅgī lokiyena ca lokuttarena ca sammāsaṅkappena
.pe. Lokiyena ca lokuttarena ca sammāsamādhinā samannāgatoti.
Na hevaṁ vattabbe .pe.

[1406] Na vattabbaṁ maggasamaṅgī dvīhi sīlehi samannāgatoti.
Āmantā. Lokiye sīle niruddhe maggo uppajjatīti. Āmantā.
Dussīlo khaṇḍasīlo chiddasīlo 1 maggaṁ bhāvetīti. Na hevaṁ vattabbe
.pe. Tena hi maggasamaṅgī dvīhi sīlehi samannāgatoti.
Dvīhi sīlehi samannāgatotikathā.
------------
Sīlaṁ acetasikantikathā