[1387] Pañcaviññāṇasamaṅgissa atthi maggabhāvanāti. Āmantā.
Nanu pañcaviññāṇā uppannavatthukā uppannārammaṇāti.
Āmantā. Hañci pañcaviññāṇā uppannavatthukā uppannārammaṇā
no vata re vattabbe pañcaviññāṇasamaṅgissa atthi maggabhāvanāti.

[1388] Nanu pañcaviññāṇā purejātavatthukā purejātārammaṇā
ajjhattikavatthukā bāhirārammaṇā asmabhinnavatthukā asambhinnārammaṇā
nānāvatthukā nānārammaṇā na aññamaññassa gocaravisayaṁ
Paccanubhonti na asamannāhārā uppajjanti na amanasikārā
uppajjanti na abbokiṇṇā uppajjanti na apubbaṁ acarimaṁ
uppajjanti na aññamaññassa samanantarā uppajjanti .pe.
Nanu pañcaviññāṇā anābhogāti. Āmantā. Hañci pañcaviññāṇā
anābhogā no vata re vattabbe pañcaviññāṇasamaṅgissa
atthi maggabhāvanāti.

[1389] Cakkhuviññāṇasamaṅgissa atthi maggabhāvanāti. Āmantā.
Cakkhuviññāṇaṁ suññataṁ ārabbha uppajjatīti. Na hevaṁ vattabbe .pe.
Cakkhuviññāṇaṁ suññataṁ ārabbha uppajjatīti. Āmantā. Cakkhuñca
paṭicca suññatañca uppajjati cakkhuviññāṇanti. Na hevaṁ vattabbe
.pe. Cakkhuñca paṭicca suññatañca uppajjati cakkhuviññāṇanti.
Āmantā. Cakkhuñca paṭicca suññatañca uppajjati cakkhuviññāṇanti
attheva suttantoti. Natthi. Cakkhuñca paṭicca rūpe ca uppajjati
cakkhuviññāṇanti attheva suttantoti. Āmantā. Hañci cakkhuñca
paṭicca rūpe ca uppajjati cakkhuviññāṇanti attheva suttanto
no vata re vattabbe cakkhuñca paṭicca suññatañca uppajjati
cakkhuviññāṇanti.

[1390] Cakkhuviññāṇasamaṅgissa atthi maggabhāvanāti. Āmantā.
Cakkhuviññāṇaṁ atītānāgataṁ ārabbha uppajjatīti. Na hevaṁ vattabbe
.pe. Cakkhuviññāṇasamaṅgissa atthi maggabhāvanāti. Āmantā.
Cakkhuviññāṇaṁ phassaṁ ārabbha vedanaṁ ārabbha saññaṁ ārabbha cetanaṁ
ārabbha cittaṁ ārabbha cakkhuṁ ārabbha .pe. Kāyaṁ ārabbha saddaṁ
ārabbha .pe. Phoṭṭhabbaṁ ārabbha uppajjatīti. Na hevaṁ vattabbe
.pe. Manoviññāṇasamaṅgissa atthi maggabhāvanā manoviññāṇaṁ
suññataṁ ārabbha uppajjatīti. Āmantā. Cakkhuviññāṇasamaṅgissa
atthi maggabhāvanā cakkhuviññāṇaṁ suññataṁ ārabbha uppajjatīti.
Na hevaṁ vattabbe .pe. Manoviññāṇasamaṅgissa atthi maggabhāvanā
manoviññāṇaṁ atītānāgataṁ ārabbha uppajjatīti. Āmantā.
Cakkhuviññāṇasamaṅgissa atthi maggabhāvanā cakkhuviññāṇaṁ atītānāgataṁ
ārabbha uppajjatīti. Na hevaṁ vattabbe .pe. Manoviññāṇasamaṅgissa
atthi maggabhāvanā manoviññāṇaṁ phassaṁ ārabbha .pe.
Phoṭṭhabbaṁ ārabbha uppajjatīti. Āmantā. Cakkhuviññāṇasamaṅgissa
atthi maggabhāvanā cakkhuviññāṇaṁ phassaṁ ārabbha .pe. Phoṭṭhabbaṁ
ārabbha uppajjatīti. Na hevaṁ vattabbe .pe.

[1391] Na vattabbaṁ pañcaviññāṇasamaṅgissa atthi maggabhāvanāti.
Āmantā. Nanu vuttaṁ bhagavatā idha bhikkhave
bhikkhu cakkhunā rūpaṁ disvā na nimittaggāhī hoti nānubyañjanaggāhī
.pe. Sotena saddaṁ sutvā .pe. Ghānena gandhaṁ ghāyitvā .pe.
Jivhāya rasaṁ sāyitvā .pe. Kāyena phoṭṭhabbaṁ phusitvā na nimittaggāhī
hoti nānubyañjanaggāhīti 1 attheva suttantoti.
1 Ma. mū. 395. aṁ. catukka 51.
Āmantā. Tena hi pañcaviññāṇasamaṅgissa atthi maggabhāvanāti.
Pañcaviññāṇasamaṅgissa maggabhāvanākathā.
------------
Pañcaviññāṇā kusalāpītikathā

[1392] Pañcaviññāṇā kusalāpi akusalāpīti. Āmantā.
Nanu pañcaviññāṇā uppannavatthukā uppannārammaṇāti. Āmantā.
Hañci pañcaviññāṇā uppannavatthukā uppannārammaṇā
no vata re vattabbe pañcaviññāṇā kusalāpi akusalāpīti. Nanu
pañcaviññāṇā purejātavatthukā purejātārammaṇā ajjhattikavatthukā
bāhirārammaṇā asambhinnavatthukā asambhinnārammaṇā
nānāvatthukā nānārammaṇā na aññamaññassa gocaravisayaṁ paccanubhonti
na asamannāhārā uppajjanti na amanasikārā uppajjanti
na abbokiṇṇā uppajjanti na apubbaṁ acarimaṁ uppajjanti
na aññamaññassa samanantarā uppajjanti nanu pañcaviññāṇā
anābhogāti. Āmantā. Hañci pañcaviññāṇā anābhogā
no vata re vattabbe pañcaviññāṇā kusalāpi akusalāpīti.

[1393] Cakkhuviññāṇaṁ kusalanti. Āmantā. Cakkhuviññāṇaṁ
suññataṁ ārabbha uppajjatīti. Na hevaṁ vattabbe .pe. Cakkhuviññāṇaṁ
suññataṁ ārabbha uppajjatīti. Āmantā. Cakkhuñca
Paṭicca suññatañca uppajjati cakkhuviññāṇanti. Na hevaṁ vattabbe
.pe. Cakkhuñca paṭicca suññatañca uppajjati cakkhuviññāṇanti.
Āmantā. Cakkhuñca paṭicca suññatañca uppajjati cakkhuviññāṇanti
attheva suttantoti. Natthi. Cakkhuñca paṭicca rūpe ca
uppajjati cakkhuviññāṇanti attheva suttantoti. Āmantā.
Hañci cakkhuñca paṭicca rūpe ca uppajjati cakkhuviññāṇanti attheva
suttanto no vata re vattabbe cakkhuñca paṭicca suññatañca
uppajjati cakkhuviññāṇanti

[1394] Cakkhuviññāṇaṁ kusalampi akusalampīti. Āmantā.
Cakkhuviññāṇaṁ atītānāgataṁ ārabbha uppajjatīti. Na hevaṁ vattabbe
.pe. Cakkhuviññāṇaṁ kusalampi akusalampīti. Āmantā. Cakkhuviññāṇaṁ
phassaṁ ārabbha .pe. Cittaṁ ārabbha .pe. Cakkhuṁ
ārabbha .pe. Kāyaṁ ārabbha .pe. Saddaṁ ārabbha .pe.
Phoṭṭhabbaṁ ārabbha uppajjatīti. Na hevaṁ vattabbe .pe.
Manoviññāṇaṁ kusalampi akusalampi manoviññāṇaṁ suññataṁ ārabbha
uppajjatīti. Āmantā. Cakkhuviññāṇaṁ kusalampi akusalampi
cakkhuviññāṇaṁ suññataṁ ārabbha uppajjatīti. Na hevaṁ vattabbe
.pe. Manoviññāṇaṁ kusalampi akusalampi manoviññāṇaṁ atītānāgataṁ
ārabbha uppajjatīti. Āmantā. Cakkhuviññāṇaṁ kusalampi
akusalampi cakkhuviññāṇaṁ atītānāgataṁ ārabbha uppajjatīti.
Na hevaṁ vattabbe .pe. Manoviññāṇaṁ kusalampi akusalampi
manoviññāṇaṁ phassaṁ ārabbha .pe. Cittaṁ ārabbha cakkhuṁ ārabbha
.pe. Kāyaṁ ārabbha saddaṁ ārabbha .pe. Phoṭṭhabbaṁ ārabbha
uppajjatīti. Āmantā. Cakkhuviññāṇaṁ kusalampi akusalampi
cakkhuviññāṇaṁ phassaṁ ārabbha .pe. Phoṭṭhabbaṁ ārabbha uppajjatīti.
Na hevaṁ vattabbe .pe.

[1395] Na vattabbaṁ pañcaviññāṇā kusalāpi akusalāpīti.
Āmantā. Nanu vuttaṁ bhagavatā idha bhikkhave bhikkhu cakkhunā
rūpaṁ disvā nimittaggāhī hoti .pe. Na nimittaggāhī hoti .pe.
Sotena saddaṁ sutvā .pe. Kāyena phoṭṭhabbaṁ phusitvā nimittaggāhī
hoti .pe. Na nimittaggāhī hotīti attheva suttantoti.
Āmantā. Tena hi pañcaviññāṇā kusalāpi akusalāpīti.
Pañcaviññāṇā kusalāpītikathā.
--------------
Pañcaviññāṇā sābhogātikathā

[1396] Pañcaviññāṇā sābhogāti. Āmantā. Nanu
pañcaviññāṇā uppannavatthukā uppannārammaṇāti. Āmantā.
Hañci pañcaviññāṇā uppannavatthukā uppannārammaṇā no
vata re vattabbe pañcaviññāṇā sābhogāti .pe. Nanu pañcaviññāṇā
Purejātavatthukā purejātārammaṇā ajjhattikavatthukā
bāhirārammaṇā asambhinnavatthukā asambhinnārammaṇā nānāvatthukā
nānārammaṇā na aññamaññassa gocaravisayaṁ paccanubhonti
na asamannāhārā uppajjanti na amanasikārā uppajjanti na
abbokiṇṇā uppajjanti na apubbaṁ acarimaṁ uppajjanti nanu
pañcaviññāṇā na aññamaññassa samanantarā uppajjantīti.
Āmantā. Hañci pañcaviññāṇā na aññamaññassa samanantarā
uppajjanti no vata re vattabbe pañcaviññāṇā sābhogāti.