[1337] Puthujjano kusalābyākate citte vattamāne sarāgoti
vattabboti. Āmantā. Atthi tassa rāgassa ārammaṇanti.
Na hevaṁ vattabbe .pe. Tena hi rāgo anārammaṇoti.
Anusayā anārammaṇātikathā.
----------
Ñāṇaṁ anārammaṇantikathā

[1338] Ñāṇaṁ anārammaṇanti. Āmantā. Rūpaṁ nibbānaṁ
cakkhāyatanaṁ .pe. Phoṭṭhabbāyatananti. Na hevaṁ vattabbe .pe.
Ñāṇaṁ anārammaṇanti. Āmantā. Paññā paññindriyaṁ paññābalaṁ
sammādiṭṭhi dhammavicayasambojjhaṅgo anārammaṇoti. Na hevaṁ
vattabbe .pe. Paññā paññindriyaṁ paññābalaṁ sammādiṭṭhi
dhammavicayasambojjhaṅgo sārammaṇoti. Āmantā. Ñāṇaṁ
sārammaṇanti. Na hevaṁ vattabbe .pe.

[1339] Ñāṇaṁ anārammaṇanti. Āmantā. Katamakkhandhapariyāpannanti.
Saṅkhārakkhandhapariyāpannanti. Saṅkhārakkhandho anārammaṇoti.
Na hevaṁ vattabbe .pe. Saṅkhārakkhandho anārammaṇoti.
Āmantā. Vedanākkhandho saññākkhandho viññāṇakkhandho anārammaṇoti.
Na hevaṁ vattabbe .pe.

[1340] Ñāṇaṁ saṅkhārakkhandhapariyāpannaṁ anārammaṇanti.
Āmantā. Paññā saṅkhārakkhandhapariyāpannā anārammaṇāti. Na
hevaṁ vattabbe .pe. Paññā saṅkhārakkhandhapariyāpannā sārammaṇāti.
Āmantā. Ñāṇaṁ saṅkhārakkhandhapariyāpannaṁ sārammaṇanti.
Na hevaṁ vattabbe .pe.

[1341] Ñāṇaṁ saṅkhārakkhandhapariyāpannaṁ anārammaṇaṁ paññā
saṅkhārakkhandhapariyāpannā sārammaṇāti. Āmantā. Saṅkhārakkhandho
akadeso sārammaṇo ekadeso anārammaṇoti. Na hevaṁ vattabbe
.pe. Saṅkhārakkhandho ekadeso sārammaṇo ekadeso anārammaṇoti.
Āmantā. Vedanākkhandho saññākkhandho viññāṇakkhandho
ekadeso sārammaṇo ekadeso anārammaṇoti. Na hevaṁ
vattabbe .pe.

[1342] Na vattabbaṁ ñāṇaṁ anārammaṇanti. Āmantā.
Arahā cakkhuviññāṇasamaṅgī ñāṇīti vattabboti. Āmantā.
Atthi tassa ñāṇassa ārammaṇanti. Na hevaṁ vattabbe .pe. Tena hi
ñāṇaṁ anārammaṇanti. Arahā cakkhuviññāṇasamaṅgī paññavāti
vattabboti. Āmantā. Atthi tāya paññāya ārammaṇanti.
Na hevaṁ vattabbe .pe. Tena hi paññā anārammaṇāti.
Ñāṇaṁ anārammaṇantikathā.
--------
Atītārammaṇakathā

[1343] Atītārammaṇaṁ cittaṁ anārammaṇanti. Āmantā.
Nanu atītārammaṇanti. Āmantā. Hañci atītārammaṇaṁ no vata
re vattabbe atītārammaṇaṁ cittaṁ anārammaṇanti atītārammaṇaṁ cittaṁ
anārammaṇanti micchā hañci vā pana anārammaṇaṁ no vata re
vattabbe atītārammaṇanti anārammaṇaṁ atītārammaṇanti micchā.

[1344] Atītārammaṇaṁ cittaṁ anārammaṇanti. Āmantā.
Nanu atītaṁ ārabbha atthi āvajjanā .pe. Paṇidhīti. Āmantā.
Hañci atītaṁ ārabbha atthi āvajjanā .pe. Paṇidhi no vata re
vattabbe atītārammaṇaṁ cittaṁ anārammaṇanti.
Atītārammaṇakathā.
----------
Anāgatārammaṇakathā

[1345] Anāgatārammaṇaṁ cittaṁ anārammaṇanti. Āmantā.
Nanu anāgatārammaṇanti. Āmantā. Hañci anāgatārammaṇaṁ
No vata re vattabbe anāgatārammaṇaṁ cittaṁ anārammaṇanti
anāgatārammaṇaṁ cittaṁ anārammaṇanti micchā hañci vā pana
anārammaṇaṁ no vata re vattabbe anāgatārammaṇanti anārammaṇaṁ
anāgatārammaṇanti micchā.

[1346] Anāgatārammaṇaṁ cittaṁ anārammaṇanti. Āmantā.
Nanu anāgataṁ ārabbha atthi āvajjanā .pe. Paṇidhīti. Āmantā.
Hañci anāgataṁ ārabbha atthi āvajjanā .pe. Paṇidhi no vata
re vattabbe anāgatārammaṇaṁ cittaṁ anārammaṇanti.